Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Ngbaõbambu Sinziri (Gu du Tipa Dungurati)  |  Zerekpe 2016

Ya Mo Mo Namangasunge na Berãro Wenengai?

Ya Mo Mo Namangasunge na Berãro Wenengai?

HE Gudu ho barõaha ambeda kuti kiro sa na beberehe (1.4 kg), aboro nafura tipaha nga “si nga gu kpakarakpakara he aboro ata inongo pai tipaha ya rogo gi gaani zegino re.” Gu he re nga berã boro. Si nga riko iiriwo he nirengo. Ka ani wirikipai tipaha ni bakerehe, kinawo gaani tambuahe tipa ga Yekova “iiriwo” asunge nika du. (Tam. 139:14) Ani wisigingo pai awere tipa pai gupai berãrani amangaha nga ka berãpai.

Ginihe nga ka berãpai? Buku sa nasaka rogo afugoyo naya tipaha wẽ, si nga “gu tandu du mo na ni tipa ka kusa kpiaapai riro yo watadu agu abipai du berãro yo tipa vovo apai na agu apai naye na ngbarago, watadu agu apai mo agbianga tiro na ni mbata ya.” Nibi gu sakarogopai yo re, ya mo mo arengbanga ka ya mo namangasunge amanga na berãro dedede te? Ni kpiapai, ya mo mo agedinga pai watadu ka giapai tipa gu rago mo adanga rogoho mbata ya? Ya mo pa zanga da mo yo rengbe ka ká na mo ti bi kpiaha riro yo? Nirengo, gu regbo ani aberãpa agu ahe ka ani abingo ho, giaha, asadaha, zadaha, watadu ka giafuõho ya, berãrani du namangasunge.

Ziazia Kekeapai naundo rani tipa ani rugutirani nga i ambakadi boro rogo kpiapai Mbori yo. (Bam. P. 1:26, 27) Ya mo gipai re ayugongo gupai furani nga Yekova nitiko naberãpai aberã te? Wa duhe nga ko asia ka kusa rani na gi tandu re berani, ko namaabangiriko nga ani mangisunge na ni tipa ka giarogo gupai yo ko akpinyemuhe. (Batu. 3:11) Wai du rengbe ani ka mangasunge na berãrani wenengai tipa ka manga gipai re, na gini gbegberẽ mangasunge na berãrani si aida ani nehe?

GBEGBERẼ MANGASUNGE NA BERÃ

(1) Wakana pai ti gu regbo adanga ya, watadu ka berã tipa gbegberẽ apai.

Gbegberẽpai ngaha nga boro wakana pai te. Nirengo, goapai kinaho nayugo na ni nga wakana pai ima rengba ka undo. Ono tie, Batungusipai 3:1 naundo rani ani bihe nga ‘rago tipa apai ni basasa dunduko,’ boro ima rengba ka rimiso tini ku rogo kura apai yo ti gbegberẽ regbo. Ni kpiapai, ani ima rengba kaa baka bangirani ti regbo dunguratise watadu ti regbo gaani wisigo ziazia kekeapai, ya mo berãrani naundo rani tigu regbo re watadu si ni mbiakota furani? Yesu afu nyanyakipa zahe tipa gu kerepai duti mbu berãrani si ni wakana gbegberẽ apai wa wasiwasi aberãpai. (Mt. 5:28) Gu kura apai kinaho rengbe ani ka berãpa ha nga gu rengbe ka fu gberãrago fu Yekova. Berã wasiwasi apai ima rengba kadu furani nga gene koyo du gbegberẽ mangapai ni. Oni dinga berã adia ka zanga mbu gaoni berãpai si gbe roni kusayo ti Yekova!

(2) Berã gupai nga aũzegino ima rengba ka mbakada ba roni nyeanye kindi.

Aũzegino na nyanyakipaha na si naundo rani aundo. Ono tie, rago ima rengbe ka gberã tirani ka si du nga ani naberãha nga ndikidi ngbabase gbiati ngbarago naye behe. Gu iratatamana nangia Soromo aya: “Ga irakumuko kumuko nga gani nyanyaki bakporo, wa bagbanga  ngapa bakporo nabanda gani berã.” (Snz. 18:11) Ani bingo gi kpiapai namangi rogo gu bagbata nga Manila, du Philippines yo, nga 80 rii kama nga ga gu gbata re agberẽ be gu ime mai naana rogo Mbirinvuo 2009. Ya mo kina airarungo pa gayo ahe agbere? Irakumuko sa pa gako ahe agbere aya: “Gu mai naana re asa gupai nga aboro dunduko du kina kubani sa, na si aye na kpakarapai gbiati rungo fu kumukokumuko aboro na rungorungo yo a.” Si ima rengba kadu taata boro berẽhe nga aũkumuko rengbe ka ye na ndikidi bandahe gbiati ngbabase. Gu rengo duho nga, si ayengo na wiripai kandara tooni te.

(3) Bakabangirise tipa agu apai mo arengbanga ka mangaha ya.

Yesu arugu rani nga ka ani “wisigi nga pai” tipa ungarani ni bakehe ya. (Mt. 6:34) Bakabangirise ti aregbo dunduko naida berã boro nimangisunge amanga kindi. Ani ima rengba ka gbarasa bakere regbo tipa kaa bakabangirani tipa agu pai du berãrani yo nga gu ata manganga ya watadu nikaa manganga a ya. Ziazia Kekeapai nayugo gupai nga ngbatunga gu bakabangirise re ima rengba ka ye na zerakpotoseyo yo watadu bakere gberãrago. (Snz. 12:25) Nairiwo wai ngbaha nga ani mangipai kuti ga Yesu rugute ki zanga bakabangirani ni bakerehe gbe na kini mangipai kuti akpakarapai kina wai si nikaa kura rogo aˈuru ni basasa.

WENE MANGASUNGE NA BERÃ

(1) Bi kerepai kumbatayo na ki nehe.

Ziazia Kekeapai nangarasa rani ani du na tatamana na kini berẽ tipa agu apai du kumbatayo. (Snz. 22:3) Ka ani mangisunge na berãrani, ani ima rengba ka ino surungba gaani diaberã mbata fu ani mangihe. Ni kpiapai, kangia i yambu ro sa pumbo, wai du rengbe berãro ka undo ro mo mangi wene diaberã singia ka ndu tipaha watadu ka zanga ndu tipaha? Fuo wisigo mo pai tipa ka ino ada i nayambu yo, bakio gu pumbo re, na wari si nika du ni, na gu regbo si ka manga ti ni, mo rengbe ka berã nga: Ginipai rengbe arengba ka manga yo? Ya mo mo rengbe ka berãpa gu wene pumbo rengbe ka manga ringbisihe kuti gu bangua arengo nga ga Ziazia Kekeapai? Gi berãpai re rengbe ka undoro mo bi gi pumbo re berãro yo mbata fu si mangi. Mangasunge na berãro wenengai rengbe ka undoro mo ne gu kerepai rengbe ka gbia ro rogo toro yo.

(2) Ka manga kpia wai rengbe mo ka nyasariipa kpakarapai berãro yo.

Mangasunge na berãse nakoda gu “tandu du mo na ni tipa ka gbia tiro na kpakarapai na ki nyasiriipa ha.” Ani yanga mo na zanga giatise dagba tiro na wirinamo rogo dungurati. Wai du mo nika ndu fuo ni tipa ka ye na zereda dagbaroni? Dungu apai duho si aida mo inihe. Wai du ni naafura na aboro? Gini regbo du ngba gbe tipa ka fura riipa gupai re? Gini afugo na worofugo ka ngba gbe tipa ka  mangasunge na ni? Ka mo mangisunge na berãro wenengai, mo rengbe ka maa kpia wai rengbe mo ka nyasariipa gupai re ngba dungu agene na ki sia gu gene mo nabihe nga si du ni wenehe tipa ka mangasunge na ni. (Snz. 15:28) Ngbatunga gu berãpai du tipa ka nyasariipa akpakarapai ngba gi gene re rengbe ka ye na zereda ku rogo dungurati. Nirengo, gere nga wene mangasunge na berã.

(3) Mbakada gaani geda Ziazia Kekeapai na wisigopai nisase.

Si ni nyanyakipa pai ani gedi Ziazia Kekeapai na aˈuru dunduko. Ono tie, dungu apai kinaho si aidaha kuba geda kina dungu akpewaraga na aˈuru dunduko. Si naida ani rugutirani na gu mangimangiapai ani awirikaha rogo Ziazia Kekeapai na kini mangihe rogo gaani raka yo na aˈuru dũ. Si naida ani nyakasi gu tambuahe du ani na ni tipa ga Yekova agene vurube geda ani Ziazia Kekeapai. Mangasunge na berãrani rengbe arengba ka undo rani ani mangi gipai re. Wai? Ani bingo gupai du tipa gu waraga nga Oni Wiriki Gayo Idapase. Geda agu apangbanga du rogo gi buku re rengbe ka fõ gaani berãpai si undo rani ani bi agu apai na agu aba agu aboro du payo rogo Ziazia Kekeapai re adu rogoho. Si naundo rani ani bi agu aba re, ani gii apai, ani gi fuõ ahe, na ani rugutirani na pa gayo abipai. Gipai re rengbe ka sa gupai nga ani ini gu wenepai rengbe ani ka wirikaha na agu aberãpai rengbe ka ngarasa rani rogo agu apangbanga nga ga Ziazia Kekeapai re, nga gu ani anaabihe mbata wa ani ima inoho wenengai. Mangasunge na berãrani ngba gi gene re nika mbakada wai ani ageda Ziazia Kekeapai na kini mangi wisigipai nisase.

(4) Sonosa nunga na kini yuguhe.

Nunga nga gu sino du ni bawenehe i nasakipai tipaha nga ka maa gu igirã nga ga kura boro ku kpotoraniyo. Wa duhe nga Yekova na Yesu na nunga tiyo, si naida ani wiriki yo. (Gate 3:7; Tam. 72:13) Wai du rengbe ani ka sonosa gi sino re? Gene sa rengbe ani ka sonosa gi sino re ngbaha nga ka mangasunge na berãrani. Si rengbe kadu nga gupai wirinarani Kristano asusa rogoho, si aamanganga rani mbata te. Ono wa vura duhe wo, mo rengbe ka sana tiro nga: ‘Ka mi nidu rogo gu bangiriba re, wai du ka mi ni du? Ginihe ka mi naaidaha?’ Mangasunge na berãrani ka karagapai kuti agi asanahe re nika undo rani ani du na bakere nunga. Nirengo, ka ani ayugo nunga fu aboro wangia ani aKristano, si undo yo aundo, kodihe na gene tungusapai yo gbiati gaani mangapai na akuarani aKristano.

(5) Mo makiapa wai raka nika du rogo vovo zegino.

Ziazia Kekeapai ima hi be wenewene asakapai nga gu nafura tipa gu vovo zegino Mbori nakido paha. (Yes. 35:5-7; 65:21-25; Yugo. 21:3, 4) Gaani awaraga ima hi be gu wenewene asura nayugo pa gipai re. Tipagine? Agu asura i akekaha re nanyakasa gaani berãpai na kini undo rani ani bi tirani wa ani nagbia ngbarago be agu amaku i nakido paha. Yekova nga gu boro naakusi berã boro, ko ima ino gu ome du berã boro na ni kisusi rani. Mangasunge na ni ka berãkurii gako akidohe rengbe ka sarani ani du na kido nga agi apai re adigisotihe adigiso na si rengbe ka undo rani ani nye niruru rani, akpakarapai ki vura du rogo raka awere vurũ.

Yekova ima fu iiriwo he furani nga berãrani. Si rengbe ka undo rani tipa ani mangisunge fuko na aˈuru dunduko rogo gaani raka yo. Ani tambuanga gu boro atambua nga Bafu gi iiriwo gamahe re furani ni manga ani sunge na ni wenengai na aˈuru dunduko.