Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Ngbaõbambu Sinziri (Gu du Tipa Dungurati)  |  Zerekpe 2016

 Agu Apangbanga Du Tipa Ga Boro Raka

Anarani Asatiyo ni Ndikidi Awirina Nga ga Toro Yo

Anarani Asatiyo ni Ndikidi Awirina Nga ga Toro Yo

FELISA aya tooni tameri nga Araceli atangbari kuriri ki ya: “Ka mo furanga na mi ya. Mi aidanga ka gia wiripai ane tipa gamo pambori te. Mi nawoka awoka be gigihe. Mi ima soga ro!” Wa vura da mi na garã nga 91, mi natingida wai atingida agu afugo re aigirã. Ono a wa Batungusipai 7:8 apehe, “digidapai ngba ti tonatona ha,” na gipai re nga rengo tipa rani.

Felisa: Mi aye rogo gu ngbadimokporo naima ida na pambori. Nirengo, aboro 13 dagba agumerani yo nangia abarani Katoriko yo. Papa Paul gu Ueko aima fu maku kurii tame nina nangia gu narani naayugopai rogo gu sukuru nga ga aKatoriko nga ri aima da ni santo. Gaani aborokporo angia airarungo. Buba angia pangu, na nina kini mangisunge ati yo. Mi nangia unvuru fu agu agude muambe i avunguyo.

Ho garãre adu ni nga 12, vura atona ka manga Spain yo. Fuo vura nyasi, i azi buba ku bambukiso yo. Gako bipai nga ga aboro du na ranirii aangbanga ti abazogo te. Nina anaasota asota tipa ka riga aborokporo, nakureari afu berãpai furi nga ri kedi atamere biata nga Araceli, Lauri, na Ramoni i ndu ku rogo gu ga anarani ba du Spain yo rogo gu gbata nga Bilbao. Si adu nga i aranga na gomoro yo te.

Araceli: Agarã rani adu ti gu regbo re nga 14, 12, na 10, na si aima kpakara furani tipa ani kpara tirani ti gaani aborokporo. Ani anaamangasunge giriso rago Bilbao yo. Agarã ue kusa, agu anarani naadu yo akedi rani ku rogo gu kura ba nga Zaragoza nga gu naangerafuo sosono aboro. Gaani sunge angia ka giriso madaba, nga gu sunge naima nyaka fu rukutu paranga adegude wa ani were.

Felisa: Ho awirinami andu ni ku Zaragoza yo, nina gbiati ando nangia gu barani naadu rogo gaani dagbarago adiberã nga si naida mi ndu ka mangasunge rogo gu ba re a. I aaberãha nga pa keda re koyo nika sa gupai nga gu paranga naida ka diare ka ko bingo re dedede ya. Wa duhe nga mi angia gu degude naima du na nyemu pambori, rago aima ngba tire na gu berãpai nga mi sungu rogo gu kporo nga  ga anarani tipa bete regbo. Mi anaandu tipa irisombori na aˈuru dunduko, mi aida kada ni mokedi wakina gu gumere naamangasunge Afirika yo.

Garebee yo: Gu ba anarani du Zaragoza yo Spain yo; kumbabee yo: Gu sasa fugo Ziazia Kekeapai nangia ga Nácar-Colunga

Agu anarani re angarasanga re na gu nyemupai mi adu na ni tipa ka mangasunge fu Mbori rogo kura ringara te, na mi anaabi tire wakina zizi boro be gu raka naadu yo. Sidu, fuo garã sa kusa, mi adiberã tipa ka karaga tire ku kporo yo tipa ka ngerafuo gu ando nangia barani re. Kupati mangasunge kporo, mi anaageda Arozaria na anyemu dunduko. Mi anaakpinyemu maa ambumbudo kenisa yo, na ka giriso gu kpiahe nga ga Maria gbiati ga “asanto.”

Araceli: Ti kina gu bangisa regbo re, gaani raka rogo gu kporo nga ga anarani aˈariatihe. Fuo mi mangi bambata zunguhe, anarani bawe adiberã tipa ka kparaka rani nga adegude. Romoni aga ku Zaragoza, Lauri ki ga ku Valencia yo, na i ki kedi re ku Madrid yo, yo du mi amangi ue zungahe ni. Gu ba anarani naadu Madrid yo anaafu barame afu fu agude, sosono aboro, gbiati kura agino, sidu bakere sunge aima du yo tipa ka mangaha. Mi anaamangasunge rogo gu ba naangerafuo aborokaza.

Ka pe kina rengo, mi amaabangire nga gu raka nga ga anarani nika du ni wenehe kisusi gure. Mi anaamaa bangire tipa ka geda Ziazia Kekeapai na ka rugatire na ni. Boro ho naafura tipa Mbori watadu Yesu te, na ani aamanganga sunge na Ziazia Kekeapai a te. Mi awiriki kina pa-Tiriani, na ki wirikipai tipa gu raka nga ga “asanto” na kini irisi Maria. Gu kurapai paha anyaki yo angia kina nyanyaki sunge.

Mi atona kadu na bakabangirise, na mi ki fura fu gu narani naangerakurii apai. Mi aya furi wẽ rago angbanga tire tipa ka manga nyanyaki sunge tipa kura aboro nigbia undo ti ni te baraho gimi aboro aida mi undo yo aundo ni. Ri akisi re ku dimo yo, na gu maabangirise tiri nga pa manga re wo nika aria gimi berã ti mbu sunge.

Agu anarani re asasana re bara biata tipa ka bihe singia mi kindi na nyemu ka guari. Mbiko gimi diaberã, i aya fere mi kehe rogo waraga nga, “Mi nambu sunge tipa ka mangasunge na Satana kuba Mbori.” Gupai re aima iiriwo tire, na wa si avura du nga mi aima du na bakere nyemu ka mbu sunge, mi arengbanga ka ke agu afugo re te. Niyangaraha, mi asanahe tipa gu barani i naakusa ingapai fuko, na mi ki pe gupai namangi re fuko. Ko afura na aboro kenisa i karaga re ku rogo gu ba anarani naadu Zaragoza yo. Fuo bete adiwi kusa, i aidihe fere tipa mi guari. Fuoho aturõngo te Lauri na Ramoni ki guari a.

GU BUKU “I AZAHE TIPAHA” AKPARAKA RANI

Felisa

Felisa: Fuo bete regbo kusa, mi adi kumba ki ga ku Kantabria yo. Mi anaandu andu tipa irisombori dedede, Rago Poso sa, mi agi nyanyakipa tingidapai  rii tambara yo. Barani sa afura na zinga kini ta ngbako nga, “Oni bi gi buku re!” Ko ki tai beko kuti gu buku nga The Truth That Leads to Eternal Life. Ko aya berewe wẽ, “Ka boro fuhe foro, mo ye na ni fere watadu mo baha kusayo!”

Si aadunga bere te, ono mi adu na nyemu ka gbiaha. A wa si amangi, fuo arame ue kusa, aDezire Yekova angoka gimi ngbadimo na ki fu gu buku fere “i azahe tipaha” re. Mi agedihe naabaha rogo gu yuru re, na ho agu adee re akaragatiyo ni, mi ki idi ka wirika Ziazia Kekeapai nayo.

Gu buku “i azahe tipaha”

Si aturõngo te rengo ki zi ngbadure yo. Gu bakere nyemu pambori naadu tire asatihe ku rogo bakere nyemuse fu Yekova na bakere nyemu ka manga gako sunge. Mi azi bapatiza rogo gu garã nangia 1973. Wa si avura du nga mi adu na bete amomu tipa tungusa rengo fu gimi aborokporo, mi amangi kina gupai narẽ na ome re. A wa mi nigumbaha ti tonatonaha, i aima soga re, gbe wirinami nga Araceli.

Araceli: Agu apai namangi re rogo gu kporo nangia ga anarani aima sa re ni zingizingi boro. Ono tie, mi anaandu andu tipa irisombori Rago aPoso, na kini gedi Arozaria na aˈuru dunduko. Mi adu kindi na bakere nyemu ka ino Ziazia Kekeapai, na mi ki sana mbori tipa ko undo re. Ono ho wirinami nga Felisa afura ni nami tipa gari vovo ida, ri afura tipaha na ngbarago dunduko si kidu wa ri nga gu boro narimiso tiní ku rogo pai nyanyaki zanga ni rugatini na ni. Mi aima ka gu gari pai re.

Araceli

Fuo bete agarã, mi akaraga tire ku Madrid yo tipa sunge na ki di kumba yo. Fuo bete regbo kusa, mi adu na bakere tiko. Mi atona ka bi gupai nga agu aboro naaye tipa irisombori anaamanganga gupai i ayugoho rogo Akitabu Wene Pangbanga te. Mi ambu nduge ku kanisa yo. Mi aidanga berewe kuti “asanto,” kusa ingapai, watadu we-iferno te. Mi adiberã ka gbarasa gimi akpiahe dunduko. Mi ainongo singia mi namanga rurupai te. Mi adu na bakere gberãrago, ono kini kpari kindi fu Mbori nga, “Mi naida ka ino ro. Mo undo re!” Mi atingidi gupai nga aDezire Yekova angoka gimi ngbadimo bara dunguhe, ono ka mi azakanga ngbadimo fuyo ya. Mi aadunga na kido kuti pambori berewe te.

 Bara ti tonatona gu garã nangia 1980, awirinami nga Lauri na Ramoni naaraka France yo na Spain yo, i atona ka wirika Ziazia Kekeapai na aDezire Yekova. Mi aabihe nga i ima nanga yo, kina wai i anangi Felisa. Kusa, gimi murakporo nangia Angelines, adani wene nakureami. Ri aima da ni Dezire Yekova a. Dedede, Angelines na kumbari asana re tipa mi wiriki Ziazia Kekeapai. I abi gupai nga wa vura du mi na tiko, mi na bakere nyemu gu inohe nga ga Ziazia Kekeapai. Niyangaraha, mi aya fuyo, “Si agberãnga te. Ono mi rengbe ka ida ka wirika Ziazia Kekeapai na oni kina gu ka mi amangasunge na gimi Ziazia Kekeapai,” mi aafura tipa gu sasa fugo Ziazia Kekeapai nangia ga Nácar-Colunga.

ZIAZIA KEKEAPAI AKODI RANI NIYANGARAHA

Felisa: Ho mi azi bapatiza ni rogo gu agarã nangia 1973, aDezire Yekova adu gbua nga 70 rogo gu bagbata nga Santander du rogo gu rago nga Cantabria Spain yo. Gaani dagbarago tungusapai aima kio, ani anaandu na tarambiri tipa ka tungusapai rogo gu rago re. Ani anaata rogo agbaria na gbaria daho ani andu ni ku rogo agbaria naima susa akama rogo gu dagbarago re.

Tipa dungu agarã, mi aima du na momu bere ka yugo Ziazia Kekeapai fu dungu aboro, na 11 dagbayo yo aima zio bapatiza. Badunguyo angia aKatoriko. Mbiko wa mi aima du ni idipase mbata, mi aima inoho nga si naida mi du na zerangbaduse gbiati rugatinapai. Mi aima bihe nga si nika dia regbo adia tipa i mbu gayo aida wa ka Ziazia Kekeapai gbiati ga Yekova ziazia toro undo yo tipa i ini rengo. (Eb. 4:12) Kumbami nga Bienvenido, nangia sekere azi bapatiza rogo gu garã nangia 1979, na nina ki tona wirika Ziazia Kekeapai mbata fu ri kpi.

Araceli: Mi adu na bakere tiko ti gu regbo mi atona ka wirika Ziazia Kekeapai na aDezire Yekova. Ono wa aposo atona kaa susa, mi abi gupai nga gu imisiri ngbaduse mi adu na ni nago. Gupai rago angba tire na ni gbe na aDezire Yekova nga i namanga gupai i atungusaha. Idapase adiba gu tiko naadu tire kusayo, na mi kidu na ngbarago gbe. Zavura kura gimi amurakporo anaaya fere wẽ, “Araceli, ka mo mbunga gu gene mo nasiaha re ya!”

Mi natingida gupai nga mi akpari ki ya, “Tambuahe foro Yekova, tipa ka zanga mbu re na tipa ka fu dungu amomu fere mi gbia gupai mi aagbataha nga gu inohe nga ga Ziazia Kekeapai.” Mi asana wirinami nga Felisa ri mbupai fere tipa gu gbegberẽ afugo mi apehe furi. Gu kango naadu dagbarani asatihe ku rogo gu sakapai nga ga Ziazia Kekeapai. Mi azi bapatiza rogo gu garã nangia 1989 ho garã re adu ni nga 61.

Felisa: Awere wa du garãre nga 91, mi nga dekurugbo na ome tire wa gu naadu mbata te. Ono mi nageda Ziazia Kekeapai na aˈuru dunduko, kini ndu tipa adunguratise ho kaza adianga ni bere ya, na mi nagbia ngbarago agbia ti tungusapai kina wai rengbe omere na ni.

Araceli: Mbiko wa mi angia narani, mi nidu na ngbarago tipa ka tungusapai fu agu abarani na anarani mi agbiayo gene tungusapai yo. Mi ima fu dungu awaraga fuyo na ki sakipai na dunguyo. Mi natingidapa barani sa mi andu fuoko bara dunguhe ko ki ya fere, “Araceli, mi ima ida kuti gupai mo apehe, ono wari du rengbe mi ka ndu kuhoni na gi garã du mi na ni re? Ginipai gimi aboro kanisa na gimi aborokporo ka pehe?” Mi karagapai fuko nga: “Na ginipai Mbori nika pehe tigako?” Ko awoti riko na gberãrago, ono ka ko adunga na wingbaduse tipa ka gbata rengo berewe ya.

Mi natingida gu regbo wenepai amangi fere rogo gimi raka yo, si angia gu regbo kumbami aya fere ni bambataha ko naida ani ndu na ko ku ba dunguratise yo. Wa garãko avura du nga 80 ti gu regbo re, ko akpanga ti adunguratise fuo gure berewe te. Ko awiriki Ziazia Kekeapai na ki da ni gu batungusipai ata ataziongo bapatiza ya. Mi natingidapa gu wene aregbo atingida ani anaadiaha na ko ku gene tungusapai yo. Ko akpi mbu diwi ue mbata fu gu uru si adu nga ko zi bapatiza.

Felisa: Gupai naangba tire gbe rogo gimi raka yo nga ka bi atamere biata nga aguyo naasogo gimi pambori mbata i nida ni awirinami rogo toro yo. Nairiwo gu ngbarago ani adu na ni kaa sungo sa, kaa fura tipa gaani Mbori nga Yekova, gbiati Fugoko! Niyangaraha, mi ima koda tire na awirinami rogo toro yo. *

^ genewaraga 29 Garã Araceli, Flisa, na Ramoni awere nga 87, 91, na 83, i namangasunge fu Yekova kindi zaaza da ku awere. Lauri aima kpi rogo gu garã nangia 1990 niruru ri fu Yekova.