Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Gini Apai Nzunzu Ziazia Kekeapai Ayugoho?

 KURA APAI

Rimo Mbori—Rogoyo Nga Gine na Wai Nyakipaha?

Rimo Mbori—Rogoyo Nga Gine na Wai Nyakipaha?

ROGO gu Ziazia Kekeapai du bero, gu veresi nga Atambuahe 83:18 naya wai? Gu Ziazia Kekeapai nga ga pa-Zande rogodi ani averesi rogoho ku rogo gi buku re, si naya: “I ki ini he ya kina ro sa, du rimoro nga Yekova, nga gu Ko nga Bahe ki susi auru kpotosende dunduko.” Kura asasa fugo Ziazia Kekeapai nagumbapai wakina gure a. Ono tie, dungu asasa fugo Ziazia Kekeapai i aima dia gu rimo nga Yekova re kusayo rogoho, ki moi kina agu afugo kubaha nga “Gbia” watadu “Baira.” Ono gu veresi du kuari re nafura tipa ginihe? Rimo nga ga sunge watadu ndikidi rimo?

Rimo Mbori rogo pa-Ebere

Gu veresi re nafura tipa ndikidi rimo, nga Yekova. Rogo pa-Ebere, nga gu fugo i ake bakere papara Ziazia Kekeapai rogoho, i ake gu rimo re na bangiri kekeapai biama, nga יהוה (YHWH). I nake gu rimo re rogo pa-Zande nga “Yekova.” Ya mo gu rimo re rogo bangisa veresi gbua? Oó. Ho i ake Ziazia Kekeapai ni ni bambataha rogo pa-Ebere, gu rimo nga Yekova re adu yo wa bara 7,000!

Ya mo nyakipa rimo Mbori anyaka? Mo bingo gu kpia kparakpee Yesu Kristo ayuguhe fu gako abawiriki. Si natona niya: “Barani du ngbangbaturũ yo, Ani írisi rimoro airisa.” (Matayo 6:9) Kusa fuo gure, Yesu akpari fu Mbori ki ya: “Buba, mo táasi rimoro.” Mbori akaragapai fuko ngbangbaturũ yo ki ya: “Mi taasi he, mi atáasa ha ataasa berewe a.” (Yoane 12:28) Agi apai re nayugo gupai nga pa rimo Mbori nga Yekova ima nyaka gbe. Ono tipagine abasafugo Ziazia Kekeapai adia gu rimo re ti ni kusayo rogo agu aZiazia Kekeapai i asaha kini moi kina agu apai kubaha duwa “Gbia” watadu “Baira”?

Abangua nduapai ho ue i afuhe. Bambataha nga, i naya wẽ si aidanga aboro mangisunge na gu rimo nga Yekova te bambiko boro ho ini wai nzunzu i anaayambaha mbata te. I anaake pa-Ebere mbata zanga gu kekeapai duwa a, e, i, o, u, nga gu naundo boro ní ini yamba fugo wenengai. Sidu tie, boro ho areme  rengbe ka ino wai nzunzu i anaayamba gu rimo re na gu kekeapai nga YHWH te. Ono ya mo si naida ani mbu mangasunge na rimo Mbori mbiko gipai re? Ti agu aregbo i aake Ziazia Kekeapai, si nawira gupai nga i anaayamba rimo Yesu wa ka i ayamba gu rimo nga Yeshua watadu Yehoshua. Ono wa vura duhe wo, aboro rogo zegino dũ areme nayamba gu rimo nga Yesu ngba dungu agene ringbisihe kuti fugoyo. I ambunga yamba gu rimo re mbiko gupai gbua nga i ainongo wai agu aboro naadu rogo bambata sa kama agarã anaayambaha te te. Wakina gure a, ka mo ndu ku rogo kura ringara, mo rengbe ka bi gupai nga aboro nayamba rimoro kia ti gu mo naayambaha. Sidu tie, si aidanga ani mbu yamba rimo Mbori mbiko gupai gbua nga ani ainongo wai i anaayambaha mbata te te.

Gu ue ndupai aboro naafuhe tipa dia yo rimo Mbori kusayo rogo Ziazia Kekeapai, si nabipa gu sino naenge ti aYudo. Dunguyo abihe ya si aidanga i naayamba rimo Mbori te. Si nawira gupai nga, gupai du rogo Gate 20:7, si du nasayo i dakuti gupai re. Gu veresi re naya: “Ka mo yambu nga rimo Yekova nga gamo Mbori gbua ya; bambiko Yekova ambu nga ha fu guni niyambu rimoko gbua te.”

Gu ndiko re azahe ti yamba rimo Mbori ngba gbegberẽ gene. Ono ya mo si azahe ti yamba rimo Mbori rogo iriiri gene? Wagusa te. Agu akumba nake Kuru Ndika, i angia kina ruru akumba dunduko nga aguyo naaraka ringbisihe kuti agu andiko Mbori afuhe fu aYisaraere. Ono i anaayamba rimo Mbori ayamba dedede. Ni kpiapai, i akehe rogo agu abia yo nga ga tambuahe nga gu rimbasa aboro anaabihe na fugoyo kuari rogo irisombori. Na kina boro Yekova nitiko aima ruga aboro i naayamba rimoko, na ruru aboro aamanga gupai re amanga. (Yoere 2:32; Amokedi 2:21) Sidu, gu ndikidi aKristano du areme amanganga ndundu ti yamba rimo Mbori rogo iriiri gene te, a wa rugu ani tirani na ni nga Yesu anaayambaha ayamba.Yoane 17:26.

Agu abasafugo Ziazia Kekeapai nadia rimo Mbori kusayo rogoho kini moi kina kura apai kubaha, i namanga kere ingahe. I nasa aboro i naabi Mbori ni kere boro ka boro ambedanga na ní ya, baraho Ziazia Kekeapai azungadi rani ni ki ya ani du rogo ‘gu rondo nga ga Yekova.’ (Atambuahe 25:14) Mo berẽnga pa gu bakureamo ngba oni na ní gbe. Ka si nidu nga mo ainongo rimo gu  bakureamo re te, ka oni ngba na ní wa gure ní kini gumba gani rondo foro? Oó. Teketeke a, ka aboro ainongo rimo Mbori nga Yekova ya, wai ka i rengbe ka zio dawedawe bakure na ko? Kurigure, ho aboro amanganga sunge ni na rimo Mbori ya, i ainongo rogoyo a te. Rogo rimo Mbori yo nga gine?

Kina boro Mbori nitiko nagumba rogo rimoko yo fu gu gako moyambu nangia Moize. Ho Moize asana Mbori ni tipa rimoko, Mbori aya fuko: “Mi Nga gu Nga Mi.” (Gate 3:14) Gu sasa fugo Ziazia Kekeapai nga New World Translation nape gu veresi re were: “Mi Nika Du ni gu Boro Mi Nika Ida Kadu Nga Ní.” Sidu, Yekova rengbe arengba ka sa tiko ni gu ngbatunga boro ko aida kadu nga ní tipa ka manga agu apai ko akpinyemuhe, na ko nasa gu boro asa ko akusi ní, watadu guhe ko akusihe, ni gu ngbatunga boro ko aida ní du nga ní watadu gu ngbatunga he ko aida si du nga ha tipa ka digiso gako kidohe. Gure nga rogo gu rimo yo nga Yekova.

Wa ka si nidu nga mo rengbe arengba ka sa tiro ni gu ngbatunga boro mo aida kadu nga ní, ginipai ka mo nimangihe tipa abakureamo? Ka guni awoka ni kerehe, mo naima sa tiro ni wene munganga tipa ka husa ní. Ka guni arungo be zingo marã, mo naima sa tiro ni irakumuko tipa ka undo ní. Ono gupai nga rengo nga, dungu apai ani arengbanga ka mangaha ya nga aboro. Anga wo duhe tipa Mbori te. Wa mo nikaa wisigo Ziazia Kekeapai, mo nika bi wai abi Yekova asatiko ni gu ngbatunga boro ko aida kadu nga ní tipa ka manga agu apai ko akidopaha. Kina iriwo gupai re nika ti tiro. Rago nangba angba ti Yekova ka mangasunge na gako ome tipa ka undo agu aboro nakpinyemuko. (2 Pekapai 16:9) Agu aboro ainongo rimo Yekova ya, i ainongo pa gu bawene asino du tiko te.

Si tie ziazia nga, gu rimo nga Yekova, si kina rogo Ziazia Kekeapai yo. Pa ino ani gu rimo re na kini mangisunge na ni rogo gaani irisombori yo nga gupai naundo rani ani mbedi na ko gbe, nga Barani. *

^ genewaraga 3 Tipa ka ino kura apai tipa rimo Mbori na gupai si aida ani naamangasunge ti ni na ni rogo gaani irisombori, mo bi gu buku nga Mounda Tipa Wisigo Fugo Mbori, kpewaraga 1-13. Si nga gu buku aDezire Yekova akusihe.