ROGO gu Ziazia Kekeapai nga ga pa-Zande, ani nabi agu afugo yo nga “Baatoro kpikpi aboro” na “Adisi.” Gu fugo Ebere i asaha nga “Baatoro kpikpi aboro,” si nga “sheʼohlˈ.” Na gu fugo Giriki i asaha nga Adisi, si nga “haiˈdes.” Ka i gbia agi afugo du ue re, bangehe du rogo Ziazia Kekeapai susi 70. Si ue dunduko na rogoyo sa. Si dunduko ue nabi kina pa kpio. Kura abasafugo Ziazia Kekeapai asaha nga “murã,” watadu “due.” Ono tie, si ni kpakarakpakaraha ka sa agu afugo re ku rogo dungu afugo nga ga aboro. Rogoyo nga gine nzunzu? Ani bingo wai furayo tipaha rogo bete apapara Ziazia Kekeapai.

Batungusipai 9:10 naya: “Sunge rogo Baatoro kpikpi aboro yo [sheʼohlˈ] yo mo andú ku ho ni te, berãpai na inahe na tatamana a te.” Ya mo si nayugo gupai nga gu ba ya yo tipaha si nga Baatoro kpikpi aboro, watadu Adisi, si nga gu ba aboro atakpi atoroyo kini ga ku rogoho? Oó. Ba ho atoro aboro araka rogoho te, na anga toro nga he du rogo boro yo naraka ku mbatayo kindi fuo kpi ní te. Ya mo Baatoro kpikpi aboro nga bakpisida aboro, watadu gu ba i nakpisidi bangisa boro rogoho? Oó. Ho Ziazia Kekeapai afura ni rogo kura aba tipa bakpisida aboro watadu murã, si gumbaha agumba ziazia nga “bakpisida aboro” na ‘murã,’ angianga “Baatoro kpikpi aboro,” watadu “Adisi” ya. (Bambata Pai 23:7-9; Matayo 28:1) Na berewe a, Ziazia Kekeapai ayanga wẽ sheʼohlˈ, watadu Adisi nga gu bangisa murã i nakpisidi dungu aboro rogoho te.Bambata Pai 49:30, 31.

Wa duhe tie were, gini ngbatunga ba du nzunzu ya yo ti ni “Baatoro kpikpi aboro,” watadu “Adisi”? Ziazia Kekeapai nayugo gupai nga, gu ba re nga bakere ba ki susi gu ba i akpisido badungu aboro rogoho. Ni kpiapai, Yesaya 5:14 naya wẽ Baatoro kpikpi aboro ‘nakiisa tihe kini zara ngbaha zanga ringbisaha.’ Wa vura duhe nga badungu aboro ga ku  rogo gi ba re ka i agedanga yo ya, si nazara ngbaha kindi tipa kina kura aboro. Gomoro namangaha kindi. (Asanza 30:15, 16) Kungbo bakpisida aboro naahi ahi be kangba aboro, ono ‘Baatoro kpikpi aboro ambinga te.’ (Asanza 27:20) Gure nga, ka gu ba re hingo te. Digidoho ti ni te. Gere nayugo gupai nga, ndikidi rago ngaha te. Ono si nga gu ba nga ga kpikpi aboro angianga ndikidi he ya. Agu aboro kpiki, si wa ka i ya i rogo bangisa ba, watadu murã, ono anga ndikidi murã du ngaha duadu ho ti ni te.

Gu yugopai nga ga Ziazia Kekeapai du tipa zingabekpio naundo rani aundo berewe ani ini guhe nga “Baatoro kpikpi aboro” na “Adisi.” Ziazia Kekeapai naringbisapa agi aba re ni agu aba rengbe aboro arengba ka kura rogoho. * (Eyobo 14:13; Amokedi 2:31; Yugoti 20:13) Anga kina agu aboro sa nairisi Yekova du Baatoro kpikpi aboro yo watadu Adisi yo te, ono badungu kura aboro a. (Bambata Pai 37:35; Atambuahe 55:15) Sidu tie, Ziazia Kekeapai naya wẽ “ruru aboro azinga be kpio na iraira yo a.”Amokedi 24:15.

^ genewaraga 1 Gu kpikpi aboro Mbori nikaa zingisanga yo be kpio ya, Ziazia Kekeapai naya wẽ i tigayo “Geyena yo.” (Matayo 5:30; 10:28; 23:33) A wa adunga Baatoro kpikpi aboro na Adisi ni ndikidi ba ya, Geyena nga ndikidi ba a te.