Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Gini Apai Nzunzu Ziazia Kekeapai Ayugoho?

 KAPITA RIBUA

Ya Mo Ani Naraka Rogo Yangara Arame?

Ya Mo Ani Naraka Rogo Yangara Arame?
  • Gini apai namanga ti gi gaani regbo re i aima gumbapaha rogo Ziazia Kekeapai mbata kusayo?

  • Sangba Mbori naya aboro nika du wai rogo yangara arame?

  • Gini weneapai Ziazia Kekeapai nafura tipaha ki ya si nikaa manga rogo yangara arame?

1. Wari rengbe ani ka ino agu apai ni du ku mbatayo?

MO ADENGENGA turo kuti agu apangbanga i agumbaha rogo radio watadu terevizioni mo ki kpari ki ya, ‘Gi zegino re adu wai ku mbatayo?’ Dungu gbegberẽ apai natunguo aboro atunguo, sidu, boro ho rengbe ka ino gupai nika manga gba te. (Yakoba 4:14) Ono tipa Yekova tigako, ko nabi apai abi ku mbatayo. (Yesaya 46:10) Bakuru kusayo, Sangbako nga Ziazia Kekeapai aima gumbapa gu gbegberẽ apai nikaa manga ti gi gaani regbo re gbiati gu weneapai a nika manga ku mbatayo barambeda.

2, 3. Gini sanahe ga Yesu abawiriki asanako na ni, na gako karagapai angia gine?

2 Yesu Kristo afura tipa ga Mbori Kindo, nga gu Kindo nika dia gbegberẽ apai dunduko kusayo na ki sa kpotosende ni paradizo. (Ruka 4:43) Ti rago Yesu, aboro aidi ka ino gu regbo ga Mbori Kindo nika ye ti ni. Zavura gako abawiriki, i asanako ki ya: “Gine  i ka ina pa ga ye ti ni, na pa digida rago?” (Matayo 24:3) Yesu akaragapai fuyo ki ya wẽ kina Yekova sa ini gu regbo nzunzu digida gi zegino re nika ye ti ni. (Matayo 24:36) Ono Yesu aima gumba agu apai nikaa manga auru kpotosende ho ga Mbori Kindo nika mbeda ni ka ye na ndikidi zereda gbiati ngbabase. Agu apai ko agumbapaha re, si namanga amanga awere wa du rago re!

3 Mbata fu ani wisigi agu apai nayugo gupai nga ani naraka ti “digida rago,” ani wisigingo pai tooni tipa gu vura boro aarengbanga ka bihe ya. Gu vura re amangi ngbangbaturũ yo, na sangbanaha ima du kurirani.

GU VURA NAMANGI NGBANGBATURŨ YO

4, 5. (a) Ginipai namangi ngbangbaturũ yo nibasa fuo da Yesu ni Bakindo? (b) Ringbisihe kuti Yugoti 12:12, ginipai si adu nga si nika ngia sangbana gu vura namangi ngbangbaturũ yo?

4 Gu kapita du mbata fu gere nayugo gupai furani nga, Yesu Kristo ada ni Bakindo ngbangbaturũ yo rogo 1914. (Mo gedi Daniere 7:13, 14.) Nibasa fuo da ko ni Bakindo, ko atona vura. Ziazia Kekeapai naya: “Vura ki du ngbangbaturũ yo, Mikaere [nga Yesu] na gako amaraika ki so vura na daragona [nga Satana Bakitingbanga]; daragona ki niso vura na gako amaraika a.” * Yesu adibe Satana na gako gbegberẽ amaraika nga adaimona, ki diyo ki bayo ku sende no. Gu ga Mbori ruru amaraika du ngbangbaturũ yo adu na bakere ngbarago mbiko gupai nga i ado Satana kusayo ngbangbaturũ yo. Ono tipa rani nga agu aboro nga ga kpotosende yó, rago angbanga ­tirani te.  Gupai i apehe tipa rani fuo bayo Satana kono nga: “Rungo du fu kpotosende na baime, bambiko bakitingbanga azorõ koyo du oni ni na bakere zinga, bambiko ko ini he ya kina bete rago nye fu ko.”Yugoti 12:7, 9, 12.

5 Mo bi gupai i agumbaha nga si nika manga fuo manga vura ngbangbaturũ yo. Si adu nga Satana nika ye na rungo kurii agu aboro naraka auru kpotosende. A wa mo nika bihe ku mbatayo, ani naraka awere ti regbo gu rungo re. Ono gu rungo re nika du gbua tipa “bete” regbo. Satana ima inoho wo a. Ziazia Kekeapai nayamba gi regbo re nga “kusa rago,” watadu yangara arame. (2 Timoteo 3:1) Si naida ani du na bakere ngbarago mbiko gupai nga, Mbori ima mbeda ka dia ga Bakitingbanga gbegberẽ apai kusayo auru kpotosende. Ani bingo bete agu apai namanga awere nga gu i aima gumbapaha rogo Ziazia Kekeapai. Agi apai re nayugo gupai nga ani naraka rogo yangara arame na ga Mbori Kindo ima mbeda ka ye na nyenye amaku fu agu aboro nakpinyemu Yekova. Ni bambataha,  ani bingo apai biama Yesu aya si ani ka inopa yangara arame ti ni.

GU BAKEREAPAI NAMANGA ROGO YANGARA ARAME

6, 7. Wai gupai Yesu agumbaha tipa avura na angbongi adigo areme?

6 “Rika aboro azínga kuti gu rika aboro, ngbi ki zingi kuti gu ngbi.” (Matayo 24:7) Vuru agu agarã kama susi kusayo, badungu amirioni aboro kpiki be vura. Bakeke kuru apangbanga sa nga Ngirisi akepai ki ya: “Ue-bawe kama agarã nga gu regbo i aimi aboro kisusi tona wa rago aenge. . . . Si angia gu regbo vura aatidanga rogoho ya, bambiko aregbo dunduko abasovura anidu ho tingba vura rogo gu papara zegino. Kina wiri bete guruguru aregbo gbua gu vura nga ga abanzengere anaadunga ya.” Kura riigbu sa du Amerika yo ape gupai nga: “Agu aboro nakpiki be vura rogo [20 kama agarã], bangeyo ima susa ga aguyo nakpiki be agu avura dunduko natona rogo bambata sa kama agarã Fuo Batikayo Kristo kada ku rogo gu garã nga 1899.” (Worldwatch Institute) Aboro susi amirioni 100 kpiki be vura tona rogo gu garã nangia 1914 kada ku awere.  Ho bangisa gaani boro akpi ni be vura, si nafu bakere rungo furani, ono mo berẽnga pa gu rungo du badungu amirioni aboro na ni nga aguyo gayo aboro nakpiki be vura.

7 “Angbongi nikadu.” (Matayo 24:7) Abawetekeapai nape gupai nga, i ima kusa riahe rogo zegino ni bakerehe gbe rogo agu agarã 30 susi kusayo. Ono wa vura duhe wo, zingo riahe namanga aboro kindi bambiko badungu aboro na marã beyo ka ngbe riahe te, watadu sende ka sopa bino rogoho te. Rogo agu aringara du ni rungorungoho, aboro susi birioni nambu be gomoro, nga boro sa nari he ngba dorari sa watadu kusende ti ni rogo uru sa. Badungu agi aboro re nakoba akoba be gomoro. Gu riigbu nabipa ngerafuo kpotose rogo zegino dunduko naya wẽ, zanga ririahe wenengai naimo agude susi amirioni bisue na agarã dũ.World Health Organization.

8, 9. Ginipai nayugoho nga agu apai Yesu agumbaha tipa abazigizo na riri akaza, si ima da ti rengo?

8 “Kpotosende adú ni zigizozigizo  ho bakere.” (Ruka 21:11) Gu riigbu nga ga Amerika nawisigopai tipa sende bi gupai nga, agarã dunduko kikindigi abazigizo nikaa manga wa bara 19 nga gu nikaa kuadi abambu na kini sapu sende. Na agarã dũ bazigizo amanga nga gu nakuadi abambu akuadi kusande. Agu apangbanga duho ni kekehe nayugo gupai nga, tona rogo gu garã nangia 1900 kada ku awere, abazigizo imi aboro bangeyo naima susa amirioni ue. Gu kura riigbu naya: “Wa sonakumbatayo rogo birĩ-ino-mangaahe navura du, si zogosi bange agu aboro nakpi be abazigizo gbua tooni.”

9 ‘Gberãngbi nikadu.’ (Ruka 21:11) Gu gberãngbi Yesu ape paha re, si nga gu gberãngbi nga ga riri akaza. Wa vura duhe nga sonakumbatayo ima du awere tipa inopa akaza na husa akaza, kuru akaza na gu vovoho nakura naimo aboro kindi ni bakerehe gbe. Riigbu sa naya wẽ akaza ho 20 aboro naima inoho wenengai moipai rogo gi bete agarã susi kusayo re, kodihe na dingo, mararia, na korera (cholera). Na kura ngbatunga akaza kinaho du  ni kpakarakpakaraha ka husaha na ziga. Vovo akaza ho kuru naima da ti 30 nga gu nanaadunga mbata ya. Agu akuraha kinaho i abingo ziga tipaha ya, na si naimo aboro aimo.

SINO ABORO ROGO YANGARA ARAME

10. Gini asino gumbayo paha rogo 2 Timoteo 3:1-5 mo abihe areme ti aboro?

10 Kurii agu apai namanga rogo zegino re, Ziazia Kekeapai aima pe gupai a nga agu aboro nikaa raka rogo yangara arame, gayo mangaapai nika du kia. Gu mokedi nangia Pauro aringbisipa wai badungu aboro nika du. Ko aya: “Rogo kusa rago gbegberẽ rago aye.” (Mo gedi 2 Timoteo 3:1-5.) Bete agu apai Pauro agumbaha nga, aboro nika ngia

  • airakpinyemutise

  • airakpinyemumarã

  • abasasangba avunguyo

  • airazanga ziaziapai

  • airasakparakpa

  • airazanga rugatise

  • airaerã

  • akpinyemu sangba borose susi nyemu Mbori

  • akakuti kpia sinombori ono kini ti kango tanduhe

11. Wai Atambuahe 92:7 asakapa gupai nika manga gbegberẽ aboro?

11 Ya mo aboro da wa gure rogo gu rago mo araka rogoho? Si nawira wa i ima da wo. Aboro rogo arago  dunduko du na gbegberẽ asino tiyo. Gere nayugo gupai nga Mbori ima mbeda ka mangapai, a wa Ziazia Kekeapai agumbaha niya: “Ka gbegberẽ aboro vura kura wa tomo nvuo vurũ, amangi irairapai dunduko ki nizuga, i ringbisi yo tipa gbarasa yo nye anye kindi.”Atambuahe 92:7.

GU WENEAPAI NAMANGA ROGO YANGARA ARAME!

12, 13. Wai “[ndikidi] inahe” namoipai ti gi ‘digida rago’ re?

12 Yangara arame ima hi be arungo nirengo, a wa Ziazia Kekeapai agumbaha. Ono wa zegino navura hi be fudifudiapai, weneapai kinaho namanga fu agu aboro nakpinyemu ka iriso Yekova nga gu i aima gumbapaha ku mbatayo.

13 “[Ndikidi] inahe amáa pai,” gure nga gupai gu kitabu nga Daniere agumbaha. Gini regbo si adu nga gupai re nika manga? Si adu nga si nika manga ti ‘digida rago.’ (Daniere 12:4) Gbe, tona rogo gu garã nangia 1914 kada ku awere, Yekova ima undo agu aboro du na nyemu ka irisoko i sono rogo gayo giarogo Ziazia Kekeapai yo. I na tambuahe mbiko gu rengo i nainihe tipa rimo Mbori na tipa gako ringbisapai, tipa gu motumo tumorii nga ga Yesu Kristo, tipa gupai du tipa kpikpi aboro, na tipa zingabekpio. Kurigure, airisi Yekova ima wirika wai ka raka ngba gu gene naundoyo aundo na si kini fu taarimo fu Mbori. I ima ino gu rengo a du tipa ga Mbori Kindo na wai gu Kindo re nika mbakada apai auru kpotosende ane. Ginipai i amangaha na gi inahe i agbiaha re? Gu sanahe re nasa rani ani bi gu kura sangbanebi i agumbaha tipa yangara arame.

“Gi wene pangbanga nga ga ngbi re i atungusa ha rogo zegino dunduko.”Matayo 24:14

14. Wai sunge tungusa gu wene pangbanga nga ga Kindo namoipai areme, na ada natungusaha?

 14 “Gi wene pangbanga nga ga ngbi re i atungusa ha rogo zegino dunduko,” gure nga gupai Yesu agumbaha ho ko aafura ni tipa “digida rago.” (Mo gedi Matayo 24:3, 14.) Rogo zegino dunduko, i natungusa gu wene pangbanga nga ga ngbii, watadu Kindo, rogo aringara susi 230 na rogo badungu akama afugo. Gu wene pangbanga re nafura tipa guhe nga ga Mbori Kindo, gupai si nika mangaha, na wai rengbe ani ka gbia agu amaku si nika ye na ni. Dungu amirioni aboro nga aDezire Yekova natungusa gi wene pangbanga nga ga Kindo re kakaka. I “dagba rika aboro dunduko, na angbatunga yo, na aboro, na angbatunga afugo dunduko.” (Yugoti 7:9) ADezire Yekova nandu kaa yugo Ziazia Kekeapai fu dungu amirioni aboro rogo akpuyo, nga agu aboro nakpinyemu ka ino agu apai nzunzu Ziazia Kekeapai ayugoho. Gure nga gu bakere sangba Yesu nadigo areme, si ki vura du vurũ nga aboro nasoga aDezire Yekova asoga a wa Yesu agumbaha nga aboro dunduko nika soga ndikidi aKristano asoga tipa rimoko!Ruka 21:17.

GINIPAI MO NIKA MANGAHA?

15. (a) Ya mo mo idi kuti gupai nga ani naraka rogo yangara arame, na tipagine? (b) Digida rago nika du wai fu agu aboro nasoga Yekova na fu aguyo idi na gako Kindo?

15 Wa duhe nga badungu asangbaanebi nga ga Ziazia Kekeapai nadigo areme, ya mo mo aidanga kuti gupai nga ani naraka rogo yangara arame te? Fuo tungusayo wene pangbanga si ki da wa Yekova aidaha, digida rago nika da. (Matayo 24:14) Digida rago nga gu regbo Mbori nika nyasariipa gbegberẽ apai kusayo  dunduko auru kpotosende. Yekova nika mangasunge na Yesu gbiati amaraika i imi agu aboro kusayo nataino aino kini sogo Yekova. (2 ATesaroniko 1:6-9) Fuo manga gupai re, Satana na gako adaimona aingisanga aboro berewe te. Fuo gure, ga Mbori Kindo nika ye na badungu amaku fu agu aboro dunduko idi na gu zogarago re.Yugoti 20:1-3; 21:3-5.

16. Gini apai duhe foro ni patatamana mo mangihe?

16 Wa duhe nga digida gi zegino re ima mbeda, si naida boro sana tiní na gu sanahe nga, ‘Ginipai si aida mi nimangihe?’ Si ni patatamana boro niwirikipai kindi tipa Yekova na tipa agu apai ko akpinyemuhe berani. (Yoane 17:3) Mo du ni wene bawiriki Ziazia Kekeapai. Mo saha ni sinoro kaa koda tiro dedede na agu aboro naˈasadatiyo ka manga gupai Yekova akpinyemuhe. (Mo gedi AEbere 10:24, 25.) Mo nigbia gu inahe Yekova Mbori afuhe kpaima fu aboro rogo zegino dũ, na mo ki mangi ariapai rogo gamo raka tipa ka ngba bangiriko.Yakoba 4:8.

17. Tipagine rago gbarasa gbegberẽ aboro nika tunguo dungu aboro atunguo ti ni?

17 Yesu aya wẽ badungu aboro nika basa agu apai abasa nayugo gupai nga ani naraka rogo yangara arame. Rago gbarasa gbegberẽ aboro nika da wa ikpirogumba na ni tunguotunguoho. Si nika ye wakina gu iradĩ naye yuru; si atunguo badungu aboro atunguo. (Mo gedi 1 ATesaroniko 5:2.) Yesu aya: “Wa si adu rago Noa, wo pa ye Wiri boro nika du. Bambiko, wa si adu ni gu rago naadu mbata fu ngirimo akangbi re, i aniri he nimbiri he, nirogo ade nifuku ade sa roga yo, ki da ti gu uru Noa arimi . . . ku kurungba  yo, ka i aina nga ha ya daho ngirimo akangbi aye ni ki nirogo yo dunduko ku sa yo; wo ye Wiri boro nikadu.”Matayo 24:37-39.

18. Gini rugute Yesu afuhe si aida ani mangipai kuti ni?

18 Sidu tie, Yesu afu rugute fu aboro ki ya: “Oni bánda tironi, oni ka hisa kpotoroni yo na bakere riahe, na kpibuda, na berã pa gi unga re, gu rago ki da re ni ba sa wa kina gbina naza; bambiko wo si ka da fu agu aboro dunduko naraka auru kpotosende dunduko. Oni ngére dedede, ki nikpari, ya oni di be pai ka bata be agi apai nikamanga dunduko re, ki ru barangba Wiri boro [ko ki idi na oni.]” (Ruka 21:34-36) Si ni patatamana boro berẽ wenengai kurii gu fugo Yesu re na ki mangipai kutini. Tipagine? Bambiko agu aboro Yekova Mbori na “Wiri boro” nga Yesu Kristo nika ida na yo, i nika bata ho Mbori nika gbarasa gi ga Satana gbegberẽ zegino re ni, na i kidu na maabangirise ka raka nyeanye kindi rogo gu vovo zegino naima mbeda kada!Yoane 3:16; 2 Petero 3:13.

^ genewaraga 4 Tipa ka ino gupai nga Mikaere nga kura rimo Yesu Kristo, mo bi Kura Apai ti kpewaraga 250-251.