Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Gini Apai Rengbe Baibiri ka Yugoho Furani?

 KAPITA BAWE-NA-BISUE

Gu Ruru Irisombori Ngba Ti Mbori

Gu Ruru Irisombori Ngba Ti Mbori

1. Da rengbe ka yugo gu ruru gene furani si aida ani irisi Mbori ngbaha?

DUNGU apambori nata ngbaduyo nga i nayugo rengo tipa Mbori. Ono rengo ngaha te, bambiko apambori nayugo apai ni bakiakia tipa da nga Mbori na gu gene rengbe ani ka irisoko ngbaha. Wai du rengbe ani ka ino gu ruru gene rengbe ani ngbaha ka iriso Mbori? Kina Yekova sa nga gu boro rengbe ka yugo wai furani si aida ani irisiko.

2. Wai du rengbe mo ka ino gu ruru gene rengbe mo ka iriso Mbori ngbaha?

2 Yekova ima fu Baibiri furani tipa ani wiriki gu ruru gene rengbe ani ka irisoko ngbaha. Sidu, mo wisigi Baibiri, na Yekova nika undoro mo gbia undo be gako yugopai bambiko ko naberãpa ro aberã nyanyaki.—Yesaya 48:17.

3. Ginipai Mbori aida ani mangihe?

3 Gu kura aboro naya Mbori naida na apambori dunduko, ono Yesu aayugongo pai wa gure te. Ko aya: “Agu yo naya ti re, ‘Gbia, Gbia,’ i aríma nga ku rogo gu ngbi nga ga ngbangbaturũ dunduko te; kina gu ni namanga wa Buba akpi nyemu he.” Sidu, si ni nyanyakipa pai furani tipa ani ini gupai Mbori akpinyemuhe na kini mangihe. Gere nga nyanyakipa pai mbiko Yesu aringbisi agu aboro agianga sangba Mbori ya kuti akuondiko, nga “amangi irairapai.”—Matayo 7:21-23.

4. Ginipai Yesu agumbaha tipa manga gupai Mbori akpinyemuhe?

4 Yesu aima pe gupai nga ka ani aida ka manga gupai Mbori akpinyemuhe, ani agbiatirani agbia na akpakarapai.  Ko aya: “Oni rími rogo pangipangi ngbadimo; bambiko gu ngbadimo na gu gene nangbe koyo du kpio ni, si du ni kikii he, ni basisi he, dungu aboro narima koyo. Bambiko gu ngbadimo na gu gene nangbe koyo du unga ni, si du ni pangipangi he, ni fitikiri he, aboro nabi he ni kina umba yo.” (Matayo 7:13, 14) Gu pangipangi gene re, watadu gu ruru gene du tipa ka iriso Mbori re, si nandu na boro sa nyenye unga. Gu gene du ni kikiihe, watadu gu iraira gene iriso Mbori, si nandu na boro sa kpio. Ono Yekova aidanga boro kpi wagu sa te. Ko nafu momu fu aboro dunduko tipa i wirikipai tipa ko.—2 Petero 3:9.

GU RURU GENE DU TIPA IRISO MBORI

5. Wai du rengbe mo ka ino agu aboro nairiso Mbori ngba ruru gene?

5 Yesu aya ani rengbe arengba ka ino agu aboro nairiso Mbori ngba ruru gene. Ani naino yo ti agu apai i naidi kutini na agu apai i amangaha. Ko aya: “Oni aína yo ti zuzuyo.” Ko agbia kurapai kutini nga: “Wene ngua nazu wene rinde.” (Matayo 7:16, 17) Gipai re ayugongo gupai nga agu aboro tigayo nairisombori, ingapai tiyo te te. Ono ga Mbori amoyambu namanga ome dedede tipa ka manga gupai du ni ruruhe. Ani nika wisigopai awere tipa agu apai rengbe ka undo rani ani ini agu aboro nairiso Mbori ngba ruru gene.

6, 7. Tipagine du mburu ndikidi irisombori ti ni rii Baibiri? Ginipai ga Yesu kpiapai ayugoho furani?

6 Si naida mburu gaani irisombori du rii Baibiri. Baibiri naya: “Ziazia Kekeapai dunduko si aye be ga Mbori Toro si ki rengbe tipa yugopai, tipa zapai, tipa ruga aboro, na tipa raba aboro rogo rurupai; ya ga Mbori boro du ziazia, aũ manga wene apai dunduko ki du be ni.” (2 Timoteo 3:16, 17) Gu mokedi nangia Pauro akepai fu aKristano nga: “Oni adi gu pai oni agi ku gume be rani nga kina ga  Mbori pai, oni adia nga [ha] wa ka si angia ga aboro pai te, ono ni ga Mbori pai, a wo du he ni rengo.” (1 ATesaroniko 2:13) Mburu ndikidi irisombori kina rii Fugo Mbori sa nga Baibiri. Anga mburuhe rii ga aboro aberãpai, asinoyo, watadu gu kura apai kia te.

7 Agu apai dunduko Yesu ayuguhe mburuhe adu rii Fugo Mbori. (Mo gedi Yoane 17:17.) Ko anaadia apai dedede kina rogo Ziazia Kekeapai yo. (Matayo 4:4, 7, 10) Ga Mbori ndikidi amoyambu napekafuo ga Yesu kpiapai na kini moi mburu agu apai dunduko i ayugoho rii Baibiri.

8. Ginipai Yesu ayuguhe furani tipa iriso Yekova?

8 Si naida ani irisi kina Yekova sa. Atambuahe 83:18 naya: “Kina ro sa, du rimoro nga Yekova, nga gu Ko nga Bahe ki susi auru kpotosende dunduko.” Yesu aaida aboro ini da nzunzu nga ndikidi Mbori, na ko aima yugo rimo Mbori fu aboro. (Mo gedi Yoane 17:6.) Yesu aya: “Mo irisi Gbia nga gamo Mbori mo rá fu kina ko.” (Matayo 4:10) Sidu, wangia ani ga Mbori amoyambu, ani napekafuo ga Yesu kpiapai. Ani nairiso kina Yekova sa, ani namangasunge na rimoko, na ani kini yugupai fu kura aboro tipa rimo Mbori gbiati gupai ko nika mangaha furani.

9, 10. Wai du ani ayugo nyemuse fu akuarani?

9 Si naida ani du na ndikidi nyemuse tipa aboro. Yesu ayugupai fu gako abawiriki nga i kpinyemu akurayo. (Mo gedi Yoane 13:35.) Gipai re abingo pa gu ba ye ani rogoho, asino rani, singia ani nga airakumuko watadu airarungo te. Si naida gu nyemuse du ani na ni tipa akuarani kodi rani ani du wa awiri-vuse sa. (AKorosaio 3:14) Sidu, ani andunga sa vura tipa ka imo aboro te. Baibiri naya: “Si nayugo awiri Mbori, na awiri bakitingbanga. Gu ni ka amanga nga rurupai ya ga Mbori ni nga ni te, na gu ni adu nga nyemu wirinani ti ni ya. Bambiko gi nga gu  pangbanga oni agi ho pai aenge ni re, ya nyemu akuarani du ti rani.” Ko ape kurapai nga: “Gi rugute re di ani he yo du ko ni, nga gu ni du nyemu Mbori ti ni, nyemu wirinani du ti ni a.”—1 Yoane 3:10-12; 4:20, 21.

10 Ani namangasunge na gaani regbo, ome, na agu ahe du berani tipa ka undo kura aboro na kini ngarasi yo. (AEbere 10:24, 25) ‘Ani namanga gupai ngba angba fu aboro dunduko.’—AGaratio 6:10.

11. Tipagine idi ani ti ni kuti Yesu nga ko nga gene koyo du Mbori ni?

11 Si naida ani gisangba Yesu mbiko ko nga gene koyo du Mbori ni. Baibiri naya: “I abata nga mbiko kura boro te; bambiko kura rimo zegino fu yo ku dagba aboro ani abata mbiko ho te.” (Amokedi 4:12) Rogo Kapita 5 nga ga gi buku re, ani awirikipai yo nga Yekova akedi Yesu ko ye ka fu ungako ni motumo tipa aboro giasangba. (Matayo 20:28) Yekova ima sia Yesu ko zogorago ni Bakindo ku auru kpotosende. Si nga ndu gupai Baibiri ape gupai ti ni nga ani du wa ka ani gisangba Yesu ka ani aida ka raka nyeanye kindi.—Mo gedi Yoane 3:36.

12. Tipagine ani arimisongo tirani ti ni ku rogo poritiki ya?

12 Si aidanga ani rimisi tirani ku rogo poritiki te. Yesu aarimisongo tiko ku rogo poritiki te. Ho ko adu ni ngbanga yo, ko aya gu ga aRomo bazogo nangia Pirato wẽ: “Gi ngbi aenga nga rogo gi zegino te re.” (Mo gedi Yoane 18:36.) A wa si adu tipa Yesu, ani niruru rani fu ga Mbori Kindo du ngbangbaturũ yo, na mbiko gipai re, ka ani vura kaa raka kina wari vurũ, ani arimisongo tirani ku rogo poritiki te. Ono tie, Baibiri nazinahe furani nga ani gisangba “abaira tandu,” nga abazogo. (ARomo 13:1) Ani nairisa agu andiko airisa nga ga gu ringara ani araka rogoho. Kina rengo ngaha nga, ho agu andiko nga ga aboro atagbagatihe ni na ga Mbori andiko, ani nawirika ga  amokedi kpiapai, nga aguyo naya: “Ani gi nga sangba Mbori agia susi ga aboro.”—Amokedi 5:29; Marako 12:17.

13. Ginipai ani atungusaha tipa ga Mbori Kindo?

13 Ani idi kuti gupai nga kina ga Mbori Kindo sa nga ziga kuti gu fudifudiapai namanga rogo zegino. Yesu aya gu “wene pangbanga nga ga ngbi re” i atungusaha rogo zegino dunduko. (Mo gedi Matayo 24:14.) Zogarago ho nga ga aboro rengbe ka manga gupai ga Mbori Kindo nika mangaha furani te. (Atambuahe 146:3) Yesu ayugupai furani tipa ani kpari tipa ga Mbori Kindo ho ko ayani wẽ: “Ga ngbi yé, Ani mángi rogo kpotosende wa mo akpi nyemu he, wa du he ngbangbaturũ yo.” (Matayo 6:10) Baibiri nape gupai nga ga Mbori Kindo nika gbarasa agu azogarago nga ga aboro dunduko na kinaha sa nika “nye anye kindi.”—Daniere 2:44.

14. Ada mo nabihe nga i nairisombori ngba ruru gene?

14 Tingbafuo wisigo agi apai re, mo sananga tiro nga: ‘Ada du du mburu gayo yugopai rii Baibiri? Ada nayugo rimo Mbori fu kura aboro? Ada nayugo ndikidi nyemuse fu akurayo na idi kuti gupai nga Mbori akedi Yesu ko ye ka batasa rani? Ada arimisongo tiyo ku rogo poritiki ya? Ada natungusa gupai nga kina ga Mbori Kindo sa nika nyasariipa gaani akpakarapai?’ Kina aDezire Yekova sa namangaha.—Yesaya 43:10-12.

GINIPAI MO NIKA MANGAHA?

15. Ginipai si aida ani mangihe ka ani aida Mbori idi na gaani irisombori?

15 Anga gupai si aida mo mangihe gbua nga ka ida kuti gupai nga Mbori kina ti ni te. Zavura adaimona i ima inoho nga Mbori kina ti ni, ono i agianga sangbako te. (Yakoba 2:19) Ka ani aida Mbori idi na gaani irisombori, si aidanga ani idi kuti gupai gbua nga ko kina ti ni te, ono ka manga gupai ko agumbaha.

16. Tipagine si aida ani sogo ziree pambori ti ni?

 16 Tipa Mbori idi na gaani irisombori, ani du wa ka ani mbu ziree pambori. Gu nebi nangia Yesaya aya: “Oni kúru yo, oni gírisi tironi.” (Yesaya 52:11; 2 AKorindo 6:17) Gere nga ndu gupai si aida ani sogo agu ahe ti ni dunduko du na ngbanya dagbaha na ziree pambori.

17, 18. Ginihe nga “Babera du ni bakere he,” na tipagine si aida mo kuru rogoho ti ni kusayo ni ipo?

17 Ginihe nga ziree pambori? Si nga agu apambori dunduko nayugo gupai furani nga ani irisimbori ngba gu gene du kia ti gupai Fugoko apehe. Baibiri nayamba ziree apambori dunduko nga “Babera du ni bakere he.” (Yugoti 17:5) Tipagine? Tingbafuo gu Ime Akangbii nangia ga Noa, dungu ziree ayugopai nga ga pambori atona rogo gu bakere gbata nangia Babera re. Agu ayugopai re agbataka ku auru kpotosende dunduko. Ni kpiapai, agu aboro naaraka Babera yo airiso badona nga ga ambori biata. Areme a, dungu apambori nayugo gupai nga Mbori nga Tirinita, ono Baibiri nayugo gupai ziazia nga ndikidi Mbori ho gbua kina sa nga Yekova, na Yesu nga Wiriko. (Yoane 17:3) Agu aboro naadu Babera yo aidi kuti gupai a nga ho boro akpi ni, kura papara ni kinaho naraka araka fuo kpio, na i ima rengba ka rungosi gu papara ni re rogo we yo. Rengo nga gupai re te.—Mo bi gu 14, 17, na 18 rukutu kekeapai du ti digido gi buku re.

Ka mo airiso Yekova wa sa na gako aboro, mo nika da ni papara agu aborokporo du rogo zegino dunduko

18 Mbori aima fura tipa pai kumbatayo nga i nika gbarasa ziree apambori dunduko kusayo. (Yugoti 18:8) Mo rugutiro na ndu gupai si aida mo kuru ti ni ni ipo rogo ziree pambori kusayo? Yekova Mbori naida mo mangi gipai re mbata fu regbo susi.—Yugoti 18:4.

19. Ka mo diberã ka mangasunge fu Yekova, wai du ko nika ngerafuo ro?

19 Ka mo diberã tipa ka mbu ziree pambori tipa ka  mangasunge fu Yekova, kura abakureamo na agumero arengbanga ka rugatiyo na pa gamo diaberã te na i ima rengba ka soga ro tipaha. Ono Yekova ambunga ro te. Mo nika da ni papara agu amirioni aborokporo du rogo zegino dunduko nga aguyo nakpinyemu tiyo nzunzu, na mo nika du na maabangirise tipa ka raka nyeanye kindi rogo ga Mbori vovo zegino. (Marako 10:28-30) Si rengbe kadu nga agu abakureamo na agumero nasoga gamo diaberã tipa ka mangasunge fu Yekova re, i ima rengba ka wirika Baibiri kusa.

20. Tipagine duhe ti ni ni nyanyakipa pai tipa ka iriso Mbori ngba ruru gene?

20 Barambeda, Mbori nika nyasariipa gbegberẽ apai dunduko kusayo na gako Kindo ki zogarago ku auru kpotosende. (2 Petero 3:9, 13) Gu regbo re nika ngia wene regbo gbe nzunzu! Aboro dunduko nika iriso Yekova kina wai ko aida ani mangihe. Sidu, gere nga regbo foro tipa mo mangipai awere tipa ka iriso Mbori ngba ruru gene.