1, 2. (a) Ginihe nasa gamahe si du na nyanyakipaha bangiro? (b) Tipagine du du ga Yesu motumo ti ni ni ga Mbori bakere gamahe?

GINI wene gamahe boro afunga ha foro? Si aidanga gamahe du mbata na kikii genoho tipa mo bihe na nyanyakipaha te. Ho gamahe afu ngbarago ni foro watadu ho duhe ni ni guhe du mo na zingoho, mo nadu na bakere tambuahe tipaha.

2 Dagba agu agamahe dunduko Mbori nafuhe furani, gamahe ho sa du na nyanyakipaha. Si nga ga Mbori bakere gamahe fu aboro. Rogo gi kapita re, ani nika wirika gupai nga Yekova akedi Wiriko nga Yesu Kristo tipa ani raki nyeanye kindi. (Mo gedi Matayo 20:28.) Pa keda Yekova Yesu ku auru kpotosende ane ni motumo, nayugoho nzunzu nga ko nakpinyemu rani akpi.

GINIHE NGA MOTUMO?

3. Tipagine aboro akpi ti ni?

3 Motumo nga gu gene Yekova azaka aboro ngbaha be ingapai na kpio. (AEfeso 1:7) Tipa ka rugatirani na ndu gupai si aaida motumo ti ni, si naida ani ini gupai namangi akutu agarã kusayo ati Edene yo. Gu bambata atitarani nga aAdamu na Eva aingipai. I akpiki mbiko i aingipai. Ani a nakpi mbiko ani adi ingapai ti Adamu na Eva.—Mo bi gu 9 rukutu kekeapai du ti digido gi buku re.

4. Da nangia Adamu, na gini wene apai nadu tipa ko?

 4 Ho Yekova akusi gu bambata kumba ni nangia Adamu, ko afu nyanyakipa gamahe fuko. Yekova afu rengberengbe raka fuko. Adamu adu na rengberengbe berã na wene kpotoko. Si adu nga ko awokanga te, ko agbinzanga te, na ko akpingo a te. Bambiko Yekova nakusi Adamu, Ko adu wa ba fuko. (Ruka 3:38) Yekova anaafura na ko dedede. Yekova aima pe gupai fu Adamu ko aaidaha beko na ko ki fu bawene sunge fuko ko nimangihe.—Bambata Pai 1:28-30; 2:16, 17.

5. Ho Baibiri aya ni wẽ Mbori akusi Adamu “ni kpiako” ginipai si ayugoho?

5 Mbori akusi Adamu “ni kpiako.” (Bambata Pai 1:27) Yekova afu asinoko fu Adamu, wa gu nga nyemuse, tatamana, ruru sarangbanga, gbiati ome. Ko afu ranirii fu Adamu a. Adamu aadunga wa gu masini namanga kina gupai i ambakadihe si naamangaha te. Mbori akusi ko na ranirii tipa ka sia manga wenepai watadu gbegberẽpai. Ka Adamu asia ka giasangba Mbori, ka ko araki nyeanye kindi rogo Paradizo.

6. Ho Adamu abasasangba Mbori ni, ginihe ko azangaha? Wai du duhe na maapai kurirani?

6 Ho Adamu abasasangba Mbori ni, i asaringbanga ko sa kpio, na ko atumo ni bakerehe tipa gako ingapai. Ko azanga bawene pagume na Yekova, gako wene raka, na gu kpuko nangia Paradizo re. (Bambata Pai 3:17-19) Adamu na Eva asia ka basasangba Mbori, sidu, i aadunga na maabangirise berewe te. Mbiko gupai Adamu amangihe re, “gbegberẽpai akuru ku zegino mbiko boro sa, kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.” (ARomo 5:12) Ho Adamu aingipai ni, ko ada “ni zizi boro” fu ingapai na kpio kodihe na ani a. (ARomo 7:14) Ya mo maabangirise ho tipa rani? Ii, si kinaho.

7, 8. Ginihe nga motumo?

 7 Ginihe nga motumo? Motumo na arogoyo ue. Ni bambataha, si nga gu marã boro atumoho tipa i kusi gu boro i nazi ni watadu guhe i nazihe. Ni uehe, si nga gu marã watadu gu he i atumoho tipa guhe paha nagberẽ re.

8 Boro ho naarengbe ka tumo kuba gu he Adamu agberesipaha ho ko aingipai ni na ki ye na kpio kurirani te. Ono Yekova amangipai tipa ka kusa rani tiibe ingapai na kpio. Ani wisigingo pai tipa wai motumo amangasunge gbiati gu undo rengbe ani ka gbiaha ti ni.

GU GENE YEKOVA AFU MOTUMO NGBAHA

9. Gini motumo si aaida i fuhe?

9 Boro ho dagbarani naarengbe ka fu motumo tipa gu rengberengbe raka Adamu agbarasipaha te. Tipagine? Bambiko ani dunduko nga aboro ingapai. (Atambuahe 49:7, 8) Gu motumo si aaida i tumoho angia unga gu boro adunga ingapai tini ya. Baibiri nagumba gupai nga Yesu afu “tiko ni motumo tipa aboro dũ.” (1 Timoteo 2:6) Si adu nga si naida gu motumo re du na nyanyakipaha wakina gu unga Adamu agbarasipaha.

10. Wai du Yekova afu motumo?

10 Wai du Yekova afu motumo? Yekova akedi bangisa wiriko ku auru kpotosende no. Gi wiriko nga Yesu re angia gako bambata kusikusihe. (1 Yoane 4:9, 10) Yesu aima ida ka mbu Bako na gu wene kpuko du ngbangbaturũ yo. (AFiripoio 2:7) Yekova aˈaria ga Yesu raka ku auru kpotosende ane tipa i vungu ko ni boro zanga ingapai tiko.—Ruka 1:35.

Yekova afu bangisa Wiriko ni motumo tipa rani

11. Wai du bangisa boro arengbe ka fu motumo tipa aboro dũ?

 11 Gu bambata kumba nangia Adamu agbarasipa raka fu aboro dunduko ho ko abasasangba Yekova ni. Ya mo kura boro adu ho naarengbe ka dia kpio kusayo ti awiri Adamu? Ii ni adu kinaho. (Mo gedi ARomo 5:19.) Yesu nga gu boro ingapai aadunga tiko ya afu unga ko ni motumo. (1 AKorindo 15:45) Gu gako raka naadunga na ingapai ti ni re ya arengbe ka dia kpio kusayo ti awiri Adamu.—1 AKorindo 15:21, 22.

12. Tipagine Yesu arungo ti ni ni bakerehe?

12 Baibiri nasakapai tipa wai Yesu arungo mbata fu ko kpi. I ata ko gbegberẽ, ki asi ko ti ngua rungosi, na ki sako ko kpi kere iˈigirã kpio. (Yoane 19:1, 16-18, 30) Tipagine du Yesu arungo ni bakerehe ti ni were? Bambiko Satana akusi kango nga boro ho ka nye niruru ni fu Mbori ho du ni ni rogo kere asada te. Yesu ayuguhe nga rengberengbe boro ima rengba ka nye niruru ni fu Mbori ka ni vura gbia tini agbia na kere arungosi vurũ. Mo berẽnga kina pa gu ngbarago Yekova agbiaha be Yesu!—Asanza 27:11; mo bi gu 15 rukutu kekeapai du ti digido gi buku re.

13. Wai du i afu motumo?

13 Wai du i afu motumo? Yesu ayugupa nyakapa ungako fu Bako. Rogo gu ga aYudo diwi nga Nisana rogo gu garã nangia 33, ti ramediwi 14, Yekova ambugene fu avura Yesu tipa i imi ko. (AEbere 10:10) Tingbafuo arame biata, Yekova azingisi Yesu ko raki berewe, ni gu boro nga toro. Kusa, ho Yesu aga ni fuo Bako ku ngbangbaturũ yo, ko ayugupa nyaka gu ungako ko afuhe ni Motumo fu Yekova naadunga na ingapai ti ni re ya. (AEbere 9:24) Wa duhe nga i aima fu motumo, ani awere tie na gu momu berani nga ka kura tiibe ingapai na kpio.—Mo gedi ARomo 3:23, 24.

 GU GENE RENGBE ANI KA GBIA UNDO NGBAHA TI GA YESU MOTUMO

14, 15. Ginipai du wa ka ani mangihe tipa i mbupai furani ti gaani aingapai?

14 Ani ima gbia undo ti ga Yekova bakerepa gamahe. Ani bingo wai ani agbia undo awere na wai ani nika gbia undo kumbatayo.

15 Mbupai ti gaani ingapai. Si ima kpakara kaa manga kina rurupai ti aregbo dũ. Ani namanga aingahe, na ti kura aregbo ani nagumba agu apai watadu ani namanga agu apai arunga ya. (AKorosaio 1:13, 14) Wai tie du rengbe ani ka gbia mbupai? Si naida ani du na ndikidi saberã ti gupai mangi ani he ni gbegberẽhe na ki sana Yekova ni umbasitise tipa ko mbupai furani. Ani rengbe kadu na gu kido nga i nika mbupai ambu furani ti gaani aingapai.—1 Yoane 1:8, 9.

16. Ginipai si aida ani mangihe tipa kadu na wene sangbakpotoseyo?

16 Ani na wene sangbakpotoseyo. Ka sangbakpotoraniyo pepai furani nga ani mangi gupai arunga ya, rago nagberã tirani, ani kidu zanga maabangirise watadu ka bi tirani nga sunge tirani te. Ono si aidanga ani mbu tirani fuhe te. Ka ani ho mbupai be Yekova, ani rengbe kadu na gu kido nga ko nika degatuko adega furani na ki mbupai furani. (AEbere 9:13, 14) Yekova naida ani gumbapa gaani akpakarapai na gaani arungbura dunduko fuko. (AEbere 4:14-16) Ni sangbana gipai re, ani nadu na zereda dagbarani na Mbori.

17. Gini amaku rengbe ani ka gbiaha mbiko wa Yesu akpi tipa rani?

17 Ani na gu maabangirise nga ga raka nyeanye kindi. “Mosoro ingapai nga kpio; ono ga Mbori gamunihe gbua nga nyenye unga rogo Kristo Yesu yo gaani Gbia.” (ARomo 6:23) Bambiko wa Yesu akpi tipa rani, ani rengbe arengba ka raka nyeanye kindi na wene kpotorani.  (Yugoti 21:3, 4) Ono ginihe rengbe ani ka mangaha tipa ka gbia agu amaku re?

YA MO MO AIDA NA GA YESU MOTUMO?

18. Wai du ini ani he nga Yekova nakpinyemu rani akpi?

18 Mo berẽnga kina pa wai rengbe mo ka du na ngbarago ho boro afu wene gamahe ni foro. Ga Yesu motumo ima ngba kisusi agamahe dũ, na si naida ani tambua Yekova atambua tipaha. Yoane 3:16 nape gupai nga “Mbori akpi nyemu aboro akpi zegino dũ, wa ko afu bangisa Wiriko.” Nirengo, Yekova ima kpinyemu rani ni bakerehe si du ko akedi bangisa wiriko nga Yesu ti ni. Ani ima inoho nga Yesu ima kpinyemu rani a, mbiko ko aima ida ka kpi tipa rani. (Yoane 15:13) Si naida gu gamahe nga ga motumo sa ro mo idi kuti gupai nga Yekova na Yesu ima kpinyemuro.—AGaratio 2:20.

Wa ani kaa wirikapai tipa Yekova, ani nika da ada ni abakureako na gaani nyemuse tipa ko nikaa kio kina kumbatayo

19, 20. (a) Wai du rengbe mo ka da ni bakurea Yekova? (b) Wai du rengbe mo ka yugoho nga mo ima ida kuti ga Yesu motumo?

19 Wa mo naima wirikapai awere tipa ga Yekova bakere nyemuse, wai du rengbe mo kadu ni bakureako? Si ima mbu tipa boro kpinyemu gu boro ni ainongo ni ya. Yoane 17:3 nape gupai nga ani rengbe arengba ka ino Yekova. Ni manga mo gipai re, gamo nyemuse tipa ko nika sona, mo ni ka kpinyemu ka sa ngbarago tiko, na mo nika da ni bakureako. Mo nindu kindi kumbatayo kaa wirikapai tipa Yekova ni wisigo mo Baibiri.—1 Yoane 5:3.

20 Mo idi kuti ga Yesu motumo. Baibiri nape gupai nga “gu ni ka idi pa Wiri nyenye unga du adu be ni.” (Yoane 3:36) Rogo gupai yo nga kadu na idapase nga gine? Si nga manga agu apai Yesu aya furani ani nimangihe. (Yoane 13:15) Ani arengbanga kaa gumba kina gupai gbua nga ani ima ida kuti Yesu te. Tipa ka ida na ga Yesu motumo, si naida ani mangipai tipa gaani idapase. Rogo  Yakoba 2:26, ani nageda gupai yo nga: ‘Idapase zanga mangaapai ni kpikpi he.’

21, 22. (a) Tipagine si aida ani du ti ni pati Tingida Pakpio Yesu na agarã dũ? (b) Ginipai ani ka sakapai tipaha rogo Kapita 6 na 7?

21 Mo du pati Tingida Pakpio Yesu. Rogo gu nyemu nadu mbata fu Yesu kpi, ko ayugu gupai furani nga ani nitingidi pakpio ko. Ani naamanga gipai re na agarã dũ, na i nayambaha nga Tingida Pakpio Yesu watadu “ga Gbia riahe.” (1 AKorindo 11:20; Matayo 26:26-28) Yesu aaida ani tingidi gupai nga ko afu gako raka naadunga na ingapai ti ni ya ni motumo tipa rani. Ko aya: “Oni mangi gere nitingidi pa re.” (Mo gedi Ruka 22:19.) Ho du mo ni pati Tingida Pakpio Yesu, mo nayugo na ni nga mo natingida pa ga Yesu motumo na pa gu bakere nyemuse du aYekova na Yesu na ni tipa rani.—Mo bi gu 16 rukutu kekeapai du ti digido gi buku re.

22 Ga Yesu motumo nga gu nyanyakipa he Mbori nafuhe furani. (2 AKorindo 9:14, 15) Zavura agu mirioni aboro naima kpiko i nika gbia undo agbia ti gu nyanyakipa gamahe re. Kapita 6 na 7 nika sakapai tipa wai rengbe gipai re ka manga.