Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Gini Apai Rengbe Baibiri ka Yugoho Furani?

 KAPITA 18

Ya Mo Si Naida Mi Kpara Gimi Raka fu Mbori na ki Zi Bapatiza?

Ya Mo Si Naida Mi Kpara Gimi Raka fu Mbori na ki Zi Bapatiza?

1. Ginipai rengbe mo ka berãha tifuo wirika mo gi buku re sirisiri?

MO Aima wirika dungu agu arengo nga ga Baibiri ti gu regbo mo aawirika gi buku re, gu du wa ga Mbori kidohe tipa nyenye unga, gupai du tipa kpikpi aboro, na gu maabangirise nga ga zingabekpio. (Batungusipai 9:5; Ruka 23:43; Yoane 5:28, 29; Yugoti 21:3, 4) Si nawira wa mo ima tona nduge kupati agu adunguratise nga ga aDezire Yekova na mo ki ima ida kuti gupai nga i namanga ndikidi irisombori. (Yoane 13:35) Si rengbe kadu a nga mo ima tona kaa sonosa mbembedi pagume na Yekova, na mo ki dakuti  gupai nga mo naida ka iriso ko. Sidu tie, mo ima rengbe ka berã nga ‘Ginipai rengbe mi ka mangaha awere tipa ka iriso Mbori?’

2. Tipagine boro Etiopia aida ka zio bapatiza ti ni?

2 Gere nga gupai gu boro Etiopia naaraki ti regbo Yesu aberẽhe. Bete aregbo kusa fuo zinga Yesu be kpio, gu ga Yesu bawiriki nangia Firipo atungusipai fu gi kumba re. Firipo ayugu gu goapai fuko naayugo na ni nga Yesu nga Masiya. Gupai gu boro Etiopia re awirikihe aima zio ngbaduko yo ko ki ya: “Mo bí, ime du re! Gine naza re ti bapatiza?”—Amokedi 8:26-36.

3. (a) Gini zinahe Yesu afuhe fu apefuoko? (b) Wai du si aida boro zi bapatiza?

3 Baibiri nayugo gupai furani ziazia nga, ka ani aaida ka iriso Yekova ani du wa ka ani zi bapatiza. Yesu aya fu apefuoko wẽ: Oni ‘sa arikaaboro dunduko ni abawiriki, ki ni bapatizi yo.’ (Matayo 28:19) Yesu aima maa kpiapai ni zio ko bapatiza. I aima rindosi ko ku ime yo naabako dunduko angianga ka uka kina wiri ime gbua ku riko yo ya. (Matayo 3:16) Areme a, ho Kristano azio bapatiza ni, i du wa ka i rindosi ni ku ime yo naabani dunduko.

4. Ginipai pa zio mo bapatiza ayugoho fu gu kura aboro?

4 Ho mo azio bapatiza ni, si nayugo gupai fu gu kura aboro nga mo ima kpinyemu kadu ni bakurea Mbori na mo ima ida ka mangasunge fuko. (Atambuahe 40:7, 8) Mo ima rengba kaa bakabangiro nga, ‘Ginipai si aida mi mangihe tipa ka zio bapatiza?’

INOHE GBIATI IDAPASE

5. (a) Ginipai si aida mo mangihe mbata fu mo zi bapatiza? (b) Tipagine du agu adunguratise ti ni nga ga aKristano na nyanyakipaha?

5 Mbata fu mo zi bapatiza, mo du wa ka mo ini Yekova gbiati Yesu. Mo aima tona manga gipai re ho mo atona wirika Baibiri ni. (Mo gedi Yoane 17:3.) Ono anga gure nga  gu yangada pai si aidaha te. Baibiri naya mo du wa ka mo ‘híki be ina pa sangba’ gupai Yekova akpinyemuhe. (AKorosaio 1:9) Agu adunguratise nga ga aDezire Yekova nika undoro tipa mo du na mbembedi pagume na Yekova. Gere nga gu nyanyaki ndupai sa si aida mo nindu ti ni kupati agu adunguratise re dedede.—AEbere 10:24, 25.

Mbata fu mo zi bapatiza, mo du wa ka mo wiriki Baibiri

6. Ya mo si naida mo ini apai aino dunduko tipa Baibiri mbata fu mo zi bapatiza?

6 Rengo ngaha nga, Yekova aidanga ani ini agu apai dunduko du rogo Baibiri mbata fu ani zi bapatiza te. Ko aaidanga boro Etiopia ini apai aino dunduko mbata fu ko zi bapatiza te. (Amokedi 8:30, 31) Ani nikaa wirikapai tipa Mbori nyeanye kindi. (Batungusipai 3:11) Ono tipa ka zio bapatiza, si naida mo ini kandara agu abangua yugopai nga ga Baibiri.—AEbere 5:12.

7. Wai du gamo wirika Baibiri naundo ro?

7 Baibiri naya: “Zanga idapase ga boro pai arengba nga na ngba bangiri Mbori te.” (AEbere 11:6) Sidu tie, si naida mo duadu na idapase mbata fu mo zi bapatiza. Baibiri nagumba gupai furani nga gu kura aboro kinaho naadu rogo gu gbata nga Korinda agi gupai apefuo Yesu aayugoho, ni sangbana gipai re i “ki idi pa ha ni dungu yo, i ki bapatizi yo.” (Amokedi 18:8) Teketeke a, gamo wirika Baibiri ima undo ro tipa mo du na idapase kuti ga Mbori akidohe na kuti gu ome du ga Yesu motumo na ni, nga gu rengbe ka batasa rani be ingapai na kpio.—Yosua 23:14; Amokedi 4:12; 2 Timoteo 3:16, 17.

MO GUMBA GU RENGO NGA GA BAIBIRI FU KURA ABORO

8. Ginipai rengbe ka fõngbaduroyo mo gumba agu apai fu kura aboro mo awirikaha?

8 A wa mo nikaa wirika dungu apai tipa Baibiri na kini bi wai rengbehe ka undo ro rogo gamo raka yo, gamo  idapase nika da ni ba nyanyakihe. Mo nika du na nyemu kaa gumba agu apai fu kura aboro mo awirikaha. (Yeremaya 20:9; 2 AKorindo 4:13) Ono ada du si aida mo gumbaha fuyo?

Idapase du si aida si fõngbaduroyo mo gumba gupai fu akuaro mo naidi kutini

9, 10. (a) Gini ngbatunga aboro rengbe mo ka tona fugo na yo riipa agu apai mo awirikaha? (b) Ginipai si aida mo mangihe ka mo aaida ka tona tungusapai na dungurati?

9 Mo ima rengba ka fura fu gamo aborokporo, gamo amurakporo, watadu gamo abadiasunge tipa agu apai mo awirikaha. Wenepai du ngaha, ono mo nimangihe ti aregbo dũ rogo wene gene yo na rogo nyemuse yo. Ni yangaraha, mo nika tona kaa tungusapai na gamo dungurati. Ho mo nika bi ti ro ni nga mo ima rẽ, si naida mo fura na gu Dezire Yekova nawirika Baibiri na mo nga mo naida ka mangasunge tungusapai na gamo dungurati. Ka si du nga gu boro re bihe nga mo ima rẽ na ka mo araka ringbisihe kuti agu arugute nga ga Baibiri, abaakumba ue nga ga dungurati yo nika sungo na mo.

10 Ginipai nika manga pati gu dunguratise re? Abaakumba nika fura na mo ka inoho singia mo rugutiro wenengai na ki idi kuti agu abangua yugopai nga ga Baibiri, singia mo nairiso agu apai Baibiri agumbaha rogo gamo raka yo na aˈuru dunduko, na singia mo naida aida nzunzu ka da ni Dezire Yekova. Mo tingidi gupai nga, abaakumba du nangerafuo agu aboro dunduko du kutii beyo rogo dungurati kodihe na mo a, sidu, ka mo gunde ti fura na yo ya. (Amokedi 20:28; 1 Petero 5:2, 3) Tingbafuo gi dunguratise re, abaakumba nika pehe ape foro singia mo ima rengba ka tona tungusapai na dungurati.

11. Tipagine du duhe ti ni ni nyanyakipa pai tipa mo mangi aˈariapai mbata fu mo tona tungusapai na dungurati?

11 Abaakumba ima rengba ka gumba gupai foro nga si naida mo mangi gu kura bete aˈariapai amanga mbata fu  mo tona tungusapai na dungurati. Tipagine du duhe ti ni ni nyanyakipa pai mo mangi agu aˈariapai re? Bambiko ho ani afura ni fu kura aboro tipa Mbori, ani narukuba Yekova na si naida ani raki ngba gu gene nafu irisa fuko.—1 AKorindo 6:9, 10; AGaratio 5:19-21.

SABERÃ NA SATISE

12. Tipagine du si aida aboro dunduko sa gayo berã ti ni?

12 Gu kurapai kinaho berewe si aida mo mangihe mbata fu mo zi bapatiza. Gu mokedi nangia Petero aya: ‘Oni zúngadi tironi bambiko gere ki sa tironi berewe, i gbandaka gaoni ingaapai.’ (Amokedi 3:19) Rogo gupai nga ka saberã nga gine? Ti nayugo gupai nga ka du na gberãrago tipa gu gbegberẽpai ani namangihe. Ni kpiapai, ka si du nga mo aaraka gu raka nga ga wasiwasi mangapai, si naida mo sa gamo berã asa. Ka si vura du vurũ nga mo naamanga kina gupai du ni ruruhe rogo gamo raka yo naabaha, si naida mo nisa gamo berã asa kindi, bambiko ani dunduko nga aboro ingapai si aida ani sana Mbori tipa ko mbupai furani ti gaani aingapai.—ARomo 3:23; 5:12.

13. Rogo gupai yo nga ‘sa tironi’ nga gine?

13 Ya mo gu yangara pai gbua si aidaha nga kadu na gberãrago tipa gupai mo namangihe? Oó. Petero aya si naida ani ‘sa tirani.’ Gere nayugo gupai nga si naida mo ne gu sino raka mo aarakaha mbata na ki tona ka manga gupai du ni ruruhe. Ni kpiapai, mo makianga gupai nga mo nandu ku rogo gu ba mo aandunga mbata ku rogoho ya. Tifuo bete regbo, mo ki ini gupai nga mo ima inga. Ginipai ka mo mangihe? Kango ti ni te nga mo ima rengba ka zogosa bete nduge, ka ru, ka sa tiro, na ki ndu ngba ruru gene. Wakina gure a, a wa mo nikaa wirika Baibiri, mo nika ino gupai nga gu kura asino watadu gu kura apai kinaho rogo gamo raka yo si aaida mo mangi ariapai  rogoho. Mo du na nyemu ka ‘sa tiro’ du rogoyo nga, ka manga agu aˈariapai si aida mo mangihe na ki tona kaa manga gupai du ni ruruhe.

MO MANGI GAMO KPARATISE

Ya mo mo kidohe fu Yekova nga mo nika iriso ko?

14. Wai du mo akpara gamo raka fu Mbori?

14 Gu kura nyanyakipa diandue si aida mo dihe mbata fu mo zi bapatiza nga ka kpara gamo raka fu Yekova. Ho mo akpara gamo raka ni fu Yekova, mo namanga gu kparakpee mo akidohe rogoho Yekova ka iriso kina ko sa na ka sa gupai ko akpinyemuhe ni bambatapai rogo gamo raka yo.—Pa Fu Rugute ni Ue he 6:15.

15, 16. Ginihe nafõngbadu boro yo tipa nikpara gani raka fu Mbori?

15 Kidohe tipa ka iriso Yekova wa ka mo mangi zungahe tipa ka raka na gu boro mo akpinyemu ni nyeanye kindi. Mo berẽnga gupai ku berãro yo nga kumba na dee nambakada pa rogatise. Fuo ino gu kumba re gu dee re wenengai, ko kpinyemu ri na kidu na nyemu ka dia ri. Wa vura du vurũ nga nyanyaki diaberã du, gu kumba re na nyemu ka dia gu tindiro re bambiko ko ima kpinyemu ri.

16 A wa mo nikaa wirikapai tipa Yekova, mo nika ye ka kpinyemu ko na ki mangi asadatise tipa ka iriso ko. Gere du nika fõngbaduroyo mo mangi gu kparakpee mo nika kidohe rogoho tipa ka iriso ko. Baibiri naya gu boro naida ka pekafuo Yesu ni du wa ka “ni mbu gani apai.” (Marako 8:34) Ginipai gupai re ayugoho? Si nayugo gupai nga ka maapa giasangba Yekova ni bambatapai rogo gamo raka yo. Gupai Yekova akpinyemuhe nyakipaha kisusi gu gamo apai mo akpinyemuhe na gamo asásá a.—Mo gedi 1 Petero 4:2.

KA MO GUNDENGA BE TIGO YA

17. Tipagine kura aboro akparanga gayo raka ti ni fu Yekova ya?

17 Gu kura aboro kinaho aidanga ka kpara gayo raka fu Yekova ya, bambiko i nagunde nga i arengbanga ka kakuti  gu gayo kidohe nga ka iriso Yekova te. I aidanga ka ba gberãrago ti Yekova te, watadu i rengbe kaa berã gupai nga ka si du nga i akparanga gayo raka fu Yekova te, ko asapanga ngbanga yo tipa agu apai i amangaha te.

18. Ginipai rengbe ka undo ro tipa mo dibe gu gunde nga ga ba gberãrago ti Yekova?

18 Gu nyemuse du mo na ni koyo du Yekova ni nika undoro tipa mo dibe gu gunde nga ga ba gberãrago ti ko. Bambiko gupai nga mo ima kpinyemuko, mo nika manga asadatise amanga tipa ka kakuti gamo kidohe fuko. (Batungusipai 5:4; AKorosaio 1:10) Mo aberãnga gupai nga si ni ba mbumbupai tipa boro mangi gupai Yekova akpinyemuhe te. Gu mokedi nangia Yoane aya: “Bambiko gi nga du na nyemu Mbori re, nga ka ani kuti gako rugute. Gako rugute asusa nga omerani te.”—1 Yoane 5:3.

19. Tipagine du si aidanga mo nigunde ti kpara gamo raka ti ni fu Yekova ya?

19 Si aidanga mo du mbata zanga ingapai mo kini ru ka kpara gamo raka fu Yekova te. Ko akpingo nyemu ani mangi gupai fu rii omerani te. (Atambuahe 103:14) Ko nika undo ro aundo tipa mo mangi gupai du ni ruruhe. (Yesaya 41:10) Mo kido kuti Yekova na kpotoroyo dunduko “ko arúga gamo apai foro nzunzu.”—Asanza 3:5, 6.

KUSA PASE NI NGBA SA BATA

20. Tingbafuo kpara mo gamo raka fu Mbori, gini kura diandue si aida mo mangihe?

20 Ya mo mo naberãha nga mo ima mbakadatiro tipa ka kpara gamo raka fu Yekova? Tingbafuo manga mo gamo kparatise fu Yekova, gure nga mo ima mbakadatiro tipa gu kura diandue. Si naida mo zi bapatiza.

21, 22. Wai du rengbe mo ka manga gu ‘kusa pase ni ngba’ nga ga gamo idapase?

21 Si naida barii gu gbuu nga ga abaakumba rogo gamo  dungurati ini gupai nga mo ima kpara gamo raka fu Yekova na mo naida ka zio bapatiza. Ko ni ka manga mbakadapai na gu kura bete abaakumba i fugu bete agu abangua yugopai nga ga Baibiri na mo. Ka i bihe nga mo ima rẽ, i nika gumba gupai foro nga mo nika zio bapatiza ti regbo gu bakere dunguratise naye re watadu ti regbo gu bakere dunguratise nga ga aDezire Yekova du tipa arame biata. Ti regbo  gu bakere dunguratise re, gumbapai nika du kinaho nga gu nikaa sakapai tipa ginihe nga bapatiza. Gu bagumbapai nikaa manga gu gumbapai re nika sana agu aboro mbakaditiyo tipa ka zio bapatiza na wiri taata asanahe ue. Ho mo nikaa karagapai ni kuti agu asanahe re, mo nika manga gu ‘kusa pase ni ngba’ nga ga gamo idapase.—ARomo 10:10.

 22 Tingbafuo ho, mo ki zi bapatiza. I nika rindosi ro arindosi dunduko ku ime yo. Gamo bapatiza nika yugoho fu aboro dunduko nga mo ima kpara gamo raka fu Yekova na mo nga Dezire Yekova.

GUPAI GAMO BAPATIZA ARU KUBAHA

23. Rogo gupai yo nga i bapatiza boro “rogo rimo Mbori nga Ba na Wiri na Ziazia Toro” nga gine?

23 Yesu aya i nika bapatiza gako abawiriki “rogo rimo Mbori nga Ba na Wiri na Ziazia Toro.” (Mo gedi Matayo 28:19.) Gupai re nayugo gine? Si nayugo gupai nga mo ima ida kuti ga Yekova pagbia na ga Yesu bangiriba rogo ga Mbori ringbisapai yo kodihe na wai Mbori amangasunge na gako ziazia toro.—Atambuahe 83:18; Matayo 28:18; AGaratio 5:22, 23; 2 Petero 1:21.

Ho mo azio bapatiza ni, mo nayugo gupai nga mo ima kpinyemu ka manga gupai Mbori akpinyemuhe

24, 25. (a) Bapatiza narukuba gine? (b) Ginipai ani nika sakapai tipaha rogo gu yangara kapita nga ga gi buku re?

24 Bapatiza narukuba nyanyakipa pai. Ho mo arindo ni ku ime yo, gure nayugo gupai nga mo ima imo gamo kuru gene raka watadu mo ima gindigo ho. Ho mo akura ni ime yo, mo nika tona gu vovo raka nga kaa manga gupai Mbori akpinyemuhe. Si nayugo gupai nga mo nikaa iriso Yekova tona awere kaa ndu kumbatayo kindi. Si naida mo nitingidi gupai nga mo akparanga gamo raka fu aboro, riigbu, watadu sunge te. Yekova du mo nakpara gamo raka fuko.

25 Gamo kparatise nika undoro tipa mo sonosi mbembedi pagume na Mbori. (Atambuahe 25:14) Gere ayugongo gupai nga mo nika gbia bata mbiko gupai nga mo zi bapatiza te. Gu mokedi nangia Pauro akepai ki ya: “Oni mangi pa gaoni bata tigaoni ni gunde na kio.” (AFiripoio 2:12) Bapatiza gbua nga tonatonapai. Ono wai du rengbe mo ka nye mbembedi na Yekova? Gu yangara kapita nga ga gi buku re nika karagapai sa gu sanahe re.