Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Gini Apai Rengbe Baibiri ka Yugoho Furani?

 KAPITA SA

Da Nga Mbori?

Da Nga Mbori?

1, 2. Gini asanahe aboro naasanaha dedede?

AGUDE nga agu aboro ninaasanahe ni bakerehe. Mo rengbe ka sakarogopai yo fuyo, ono i kini sanaro kindi nga, ‘Tipagine?’ Na ka mo vura asada ka fu wene akaragapai fu yo, i rengbe ka sana ro kindi nga, ‘Ono tipagine?’

2 Singia agude nga ani watadu sosono aboro, ani dunduko du na asanahe ngbarani. Ani ima rengba ka sanahe tipa guhe ani ka rihe, ka voho, watadu ka ngbehe. Watadu ani rengbe kadu na nyanyakipa asanahe ngbarani nabipa gaani raka awere na kumbatayo. Ono ka ani agbianga wene akaragapai kuti agu asanahe re ya, ani ima rengba ka mbu gbata akaragapai sa ni.

3. Tipagine dungu aboro aberãha ti ni nga i arengbanga ka gbia akaragapai kuti gayo nyanyakipa asanahe te?

3 Ya mo Baibiri na akaragapai rogoho kuti gu nyanyakipa asanahe ani asanaha? Kura aboro rengbe arengba ka bihe wo, ono i nabihe nga Baibiri ima kpakara tipa boro rugutini na ni. I rengbe ka berãha nga kina abayugupai watadu apasita du na akaragapai beyo sa. Na si ni pazee fu aguyo ka idaha nga i ainongo gaha akaragapai te. Mo nabihe wai tigamo?

4, 5. Gini nyanyakipa sanahe du ngbaro? Tipagine si aida mo nigbata akaragapai agbata ti ni kindi kuti ni?

4 Si nawira wa mo naaida akaragapai aida kuti agu asanahe du wa: Tipagine mi araka ti ni? Ginipai nika manga re ho mi nika kpi ni? Asino Mbori nga gine? Yesu nangia Bakere bayugupai aya: “Oni sana he tipa he, i ki fu he fu roni; oni gbata ha, oni ki bi he abi; oni ngoka ngbadimo,  i ki uru he fu roni.” (Matayo 7:7) Ka mo mbunga ya, mo mangi ome daho mo nika gbia akaragapai ni kutini.

5 Nirengo, ka mo kpatagara kuti “gbata ha,” mo nika gbia akaragapai agbia rogo Baibiri yo. (Asanza 2:1-5) Agi akaragapai re akpakaranga tipa ka giarogoyo te. Agu apai mo nika wirikaha nika fu ngbarago foro rogo raka yo tona awere gbiati wene maabangirise kumbatayo. Ani furanga tipa sanahe sa dungu aboro ainongo karagapai kuti ni ya.

YA MO MBORI NABERÃ PARANI?

6. Tipagine kura aboro aberãha ti ni nga Mbori aberãnga pa gayo arungo te?

6 Dungu aboro naberãha nga Mbori aberãnga parani te. I nabihe nga ka Mbori naaberãpa rani aberã, ka apai du ni wenehe rogo zegino. Ani nabi avura, sogote, gbiati gbegberẽ apai rogo arago dũ. Aboro nawoka, narungo, na kini kpiki. Aguyo nabakabangiriyo nga, ‘Kangia Mbori naberãpa rani aberã, tipagine ko anyasanga riipa agi apai re ti ni ya?’

7. (a) Wai du agbia-pambori asa aboro i nibi Mbori ni gbegberẽ boro? (b) Tipagine idi ani ti ni kuti gupai nga si aidanga ani bira Mbori tipa agu apai namanga te?

7 Abarumbatayo rogo apambori naasa aboro ti gu kura aregbo i nibi Mbori ni gbegberẽ boro. Ho kere gbegberẽpai amanga ni, i naya ga Mbori pai du. I naya ko du idi si mangi. Ho i apepai ni wa gere, gure nzunzu nga i nabira Mbori. Ono Baibiri nayugo gupai furani nga Mbori nga mburu gu gbegberẽ apai namanga te. Yakoba 1:13 nape gupai furani nga Mbori aˈasadanga boro na gbegberẽpai te. Si naya: “Ka boro du ni asadiasadi ni, ka ni yá nga, ‘Mbori naasada re,’ ya; bambiko ka i asadi nga Mbori na gbegberẽpai te, ko aasada nga boro tigako wa sa te.” Gipai  re nayugo gupai nga wa vura duhe nga Mbori akanga na gbegberẽ apai ti manga te, anga ko nasaha si nimangi te. (Mo gedi Eyobo 34:10-12.) Ani bingo kpiapai.

8, 9. Tipagine arẽnga ha ti ni furani ani bira Mbori tipa gaani akpakarapai ya? Mo funga kpiapai.

8 Ani yanga paranga naraka na avunguko kporo. Bako ima kpinyemuko ni bakerehe na ko ki yugu wai rengbe ko ka manga wene adiaberã. Fuani, gi paranga re ki samungu kuti bako na ki guari kporo. Ko tona ka manga gbegberẽ apai na ki ti ku rogo kpakarapai. Ya mo mo rengbe ka bira bako tipa gupai gbia wiriko mbiko wa ko akanga na ko ti guari kporo ho ya? Wagusa te! (Ruka 15:11-13) Mbori wakina gu baagude re, ko aakanga na aboro ho i asia ka samungu ni kutiko na ka manga gbegberẽ apai te. Sidu, ho gbegberẽpai amanga ni, si naida ani ini gupai nga Mbori saha si mangi te. Rẽnga ha furani ani bira Mbori te.

9 Wene ndupai kinaho Mbori arugusanga agu apai ti ni namanga ya. Rogo Kapita 11, mo nika wirika gupai Baibiri apehe tipa gipai re. Ono si naida mo ini gupai nga, Mbori nakpinyemurani akpi na si aidanga ani bira ko tipa gaani akpakarapai te. Nirengo, kina ko Sa nga gu boro rengbe ka nyasariipa ha.—Yesaya 33:2.

10. Tipagine rengbe ani ti ni kadu na kido nga Mbori nika nyasariipa agu apai dũ gbegberẽ aboro amangaha?

10 Mbori ni ziazia ko. (Yesaya 6:3) Agu apai dunduko ko amangaha si ni ziaziaha, ni gigirihe, na ni wenehe. Sidu, ani rengbe arengba ka kido kuti ko. Aboro wa gure te. I namanga gbegberẽ apai amanga ti kura aregbo. Zavura kina gu wene bazogo nape rengo, ni arengbanga ka nyasariipa agu apai dunduko gbegberẽ aboro amangaha te. Boro ho du na bakere ome tini wa Mbori te. Ko na kina  ome beko ka nyasariipa agu apai gbegberẽ aboro amangaha. Ko nika dia gbegberẽ apai dunduko kusayo.—Mo gedi Atambuahe 37:9-11.

YA MO MBORI NAIDA ANI RUNGO?

11. Wai du Mbori abi agu arungo namanga ro?

11 Wai du Mbori abi gu gbegberẽ apai namanga rogo zegino gbiati agu apai namanga ro? Baibiri nayugo gupai nga Mbori “nakpi nyemu ruru sarangbanga.” (Atambuahe 37:28) Sidu, Mbori naida na rurupai angianga irairapai ya. Rago angbanga tiko ka bi aboro i nirungo te. Baibiri naya ‘ngbaduko aimi aima’ ho ko abi kpotosende ni si nahi be gbegberẽ apai bakuru kusayo. (Bambata Pai 6:5, 6) Mbori ata sanga sinoko te. (Maraki 3:6) Baibiri naya Mbori naberãpa ro aberã.—Mo gedi 1 Petero 5:7.

Baibiri nape gupai nga Yekova nga Bakusi zegino

12, 13. (a) Tipagine ani akpinyemu kura aboro ti ni na kini berẽpa yo, na wai du ani abi gu rungo du rogo zegino? (b) Tipagine du du ani ti ni na kido nga Mbori nika dia arungo na iraira mangaapai kusayo?

12 Baibiri nape gupai furani a nga Mbori akusi rani rogo kpiako yo. (Bambata Pai 1:26) Gipai re nayugo ho nga Mbori akusi rani na kina gu bangisa wene asino du tiko. Kangia rago naagberã tiro ka bi aboro i nirungo, gure tie nga rago nagberã ti Mbori kisusi ro! Wai du ini ani gipai re?

13 Baibiri naya, “Mbori nga nyemuse.” (1 Yoane 4:8) Agu apai dunduko Mbori amangaha mburuhe rii nyemuse. Ani nakpinyemu Mbori mbiko ko nakpinyemu rani. Mo berẽnga kurii gipai re: Ka ome nidu tiro, ya mo ka mo nyasiriipa agu arungo na iraira mangapai du rogo zegino? Mo ima rengba ka mangaha, mbiko mo nakpinyemu aboro. Ya mo Mbori rengbe ka mangaha? Ii, ko na ome tiko, na wa duhe nga ko nakpinyemu rani, ko nika dia arungo na iraira mangaapai kusayo. Si naida mo du  na gu kido nga gu ga Mbori akidohe dunduko i nafura tipaha rogo tonatona gi buku re nika manga amanga! Ono tipa mo kido kuti agi akidohe re, si naida mo ini dungu apai tipa Mbori.

MBORI NAIDA MO INIKO

Ka mo aida kadu ni bakurea boro, mo nayugo rimoro funi. Mbori nayugo rimoko furani rogo Baibiri yo

14. Rimo Mbori nga da, na wai du ini anihe nga si naida ani mangisunge amanga na ni?

14 Kangia mo naida ka zio bakure na boro, gu bambatapai rengbe mo ka pehe funi nga gine? Mo natonaha na rimoro. Ya mo rimo Mbori ti ni? Dungu apambori naya rimoko nga Mbori watadu Gbia, ono ndikidi arimo nga gere te. Gure wakina agu arimo sunge nga “munganga” watadu “bayugupai.” Mbori ima pe gupai furani nga rimoko nga Yekova. Atambuahe 83:18 naya: “I ki ini he ya kina ro sa, du rimoro nga Yekova, nga gu Ko nga Bahe ki susi auru kpotosende dunduko.” Abake Baibiri aima mangasunge na rimo Mbori wa bara akutu. Yekova naida mo ini rimoko na kini mangisunge na ni. Ko nayugo rimoko foro tipa mo da ni bakureako.

15. Gu rimo nga Yekova rogoyo nga gine?

15 Gu rimo Mbori nga Yekova na bakere rogoyo ti ni. Si nayugo gupai nga Mbori rengbe  ka manga agu apai dunduko ko nakidohe tipaha na ki digisi gako ringbisapai. Pai ho rengbe ka ká na ko ti mangaha te. Kina Yekova sa rengbe kadu na gi rimo re. *

16, 17. Ginipai ini ani he ti agu afugo nga (a) “Mbori du na tandu apai dũ”? (b) “Nyenye Bakindo”? (d) “Bakusiahe”?

16 A wa ani ni gedihe mbata, Atambuahe 83:18 naya tipa Yekova wẽ: ‘Kina ro sa nga Bahe Kisusi.’ Berewe a, 1 Timoteo 1:17 naya: “Awere irisa dú fu nyenye Bakindo,  na taarimo, nga gu ko ka azirã nga ya, ka i abi nga ko a ya, nga bangisa Mbori du na tatamana nye anye kindi. Amina.” Gu fugo nga “Mbori du na tandu apai dũ” rogoyo nga gine? Si nayugo gupai nga Yekova na bakere ome tiko kisusi aboro dũ rogo zegino. Na gu fugo nga “Nyenye Bakindo,” si nayugo gupai nga kinako sa adu nga tonatona ko ti ni na digido ko ya. Atambuahe 90:2 nape gupai nga Mbori aima duho mbata rago nika enga. Nairiwo gupai re!

17 Kina Yekova sa nga Bakusiahe. Yugoti 4:11 naya: “Mo gaani Gbia nga gaani Mbori, re mo are na dia taarimo na irisa na tandu, bambiko mo nafu ahe dunduko, si adu ho mbiko sangbaro, ki du ni mangimangi he.” Nirengo, tona ti agu amaraika du ngbangbaturũ yo ki da ti akerekuru ariyo na gu zukuzuku ahe du ngua yo gbiati atĩo baime yo, agu ahe re dunduko Yekova du na ambakadihe!

 MO RENGBE KADU NI BAKUREA YEKOVA?

18. Tipagine rengbe kura aboro ti ni ka ya i arengbanga kada ni abakurea Mbori te? Ginipai Baibiri apehe tipa gupai re?

18 Ho gu kura aboro agedapai ni tipa asino Yekova, kina gunde nazio yo na i ki tona ka berãha nga, ‘Mbori na bakere ome tiko, na nyanyakipa ko, na ni tuturũ ko, ginihe rengbe ka sako ko berẽpa re?’ Ya mo gu bipai re du Mbori aida ani du na ni? Wagusa te. Yekova naida kadu mbembedi na ani. Baibiri naya Mbori “aturã nga na ani wa sa te.” (Amokedi 17:27) Mbori naida mo mbedi na ko, na ko nakidohe nga ‘ko nika mbeda na mo’ a.—Yakoba 4:8.

19. (a) Wai du rengbe mo kada ni bakurea Mbori? (b) Gini asino Yekova ngba tiro gbe?

19 Wai du rengbe mo kada ni bakurea Mbori? Yesu aya: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.” (Yoane 17:3) Mo nindu kumbatayo kindi na wirikapai, mo nika ino Yekova aino na Yesu. Na fuo gure, mo nika gbia nyenye unga. Ni kpiapai, ani ima wirika gupai nga “Mbori nga nyemuse.” (1 Yoane 4:16) Ono gu kura wene asino kina tiko a. Baibiri naya furani wẽ Yekova na “nunga aboro na undahe ti ko, du ni bayee ko tipa zinga, ki du na inapai kpaima na rengo.” (Gate 34:6) Yekova “ni wene [ko], ki du zaza tipa vu aboro.” (Atambuahe 86:5) Mbori na gbanga hipai na kidu ni ruruko. (2 Petero 3:9; Yugoti 15:4) Mo nika inopai ni bakerehe tipa asinoko wa mo nikaa gedapai tipa ko rogo Baibiri yo.

20-22. (a) Wai du rengbe ani ka mbeda na Mbori wa ani abingo ko ya? (b) Ginipai rengbe mo ka mangaha ka si du nga kura aboro aidanga mo wiriki Baibiri te?

20 Wai du rengbe mo ka mbeda na Mbori wa mo  abingo ko ya? (Yoane 1:18; 4:24; 1 Timoteo 1:17) Ho mo agedapai ni tipa Yekova rogo Baibiri yo, ko nada bangiro ni ndikidi Boro. (Atambuahe 27:4; ARomo 1:20) Ka mo wirikapai ni bakerehe tipa Yekova, mo nika kpinyemuko ni bakerehe na ki mbedi na ko gbe.

Baagude nidu na nyemu awirini, ono gu Barani du ngbangbaturũ yo nakpinyemu rani susi gure

21 Mo nika rugatiro aruga na gupai nga Yekova nga Barani. (Matayo 6:9) Ko afu unga furani, na ko naida ani raki wene raka. Gere nga gupai gu baagude du na nyemuse aidaha tipa awirini. (Atambuahe 36:9) Nirengo, Baibiri nayugo gupai nga mo rengbe arengba kada ni bakurea Mbori. (Yakoba 2:23) Nangba gupai re. Yekova nga Bakusi zegino naida mo du ni bakureako!

22 Kura aboro rengbe ka ida mo mbu wirika Baibiri. I rengbe kaa gunde nga mo nika mbu gamo pambori. Ono ka mo mbunga boro ni ka na mo ti da ni bakurea Mbori ya. Ko nga gu boro rengbe mo ka zio wene bakure na ni.

23, 24. (a) Tipagine si aida mo naasanahe asana ti ni kindi? (b) Ginipai ani ka wisigopai tipaha rogo gu kapita ngbefuo gere?

23 Wa mo nikaa wirika Baibiri, kura apai kinaho mo nikaa ruganga tiro na ni ya. Ka zee mangingo ro ti sanahe watadu tipa gbata undo ya. Yesu aya si naida ani du na umbasitise wakina rukutu agude. (Matayo 18:2-4) Na agude nidu na dungu asanahe ngbayo. Mbori naida mo gbia akaragapai kuti gamo asanahe. Mo wiriki Baibiri sirisiri na kini bihe singia agu apai mo awirikaha nga rengo nzunzu.—Mo gedi Amokedi 17:11.

24 Gu wene gene rengbe mo ka inopai tipa Yekova ngbaha nga ka wirika Baibiri. Rogo gu kapita ngbefuo gere, ani nika wisigopai tipa ndu gupai du Baibiri ti ni kia ti gu kura abuku.

^ genewaraga 15 Ka si du nga mo naida ka ino dungu apai tipa gupai rimo Mbori ayugoho gbiati wai i ayambaha, mo bi gu 1 rukutu kekeapai du ti digido gi buku re.