Si gu ku mbatayo

Mo gu kuti tangaratangara ariihe

ADezire Yekova

Mo sia fugo Zande

Yangara Fugo

Yangara Fugo

“Oni du ni awiriki agu yo du ni adikumbo akidohe mbiko idapase na hipai.”​—AEBERE 6:12.

1, 2. Tipagine duhe ti ni ni nyanyakipa pai ani sonosi idapase awere? Oni funga kpiapai tipa gipai re.

IDAPASE. Si nga gu bawene fugo narukuba bawene sino. Ono tie, ho ani abi gu fugo ni re, si naida ani berẽpa kura fugo nga: “Ni ipo!” Ka ani adunga na idapase ya, si naida ani asadi ka gbiaha ni ipo. Na ka ani ima du na idapase, si naida ani bandaha ni ipo na kini rigihe. Tipagine?

2 Mo berẽnga gupai nga mo nandu rogo bakere ngatarĩrago. Mo na bakere zingo ime. Ho ka mo gbia bete ime ni, mo bandaha abanda gbe be uru. Na mo ki hiisi gamo ũime tipa si undoro daho mo nika da ni rogo gu ba mo andu ku rogoho. Areme, ani dunduko naraka rogo gu ngatarĩrago nga ga toro, nga gu zegino du ndikidi idapase rogoho ni kina betehe gbua na si nagundo agundo kusayo kinagu ka boro bandaha na kini hiisihe. A wa ani arengbanga ka raka zanga ime ya, ani arengbanga kadu ni ungarani rogo toro yo zanga idapase te.​—Rom. 1:17.

3. Gine Yekova nafuhe si undo rani ani sonosi idapase, na gini apai ue si aida ani tingidihe?

3 Yekova ima ino gupai nga si naida aida ani du na idapase awere ni ipo, na ko ima ino wai kpakaraha fu boro ní sonosi idapase areme na kini bandaha. Si du ko nafu akpiapai ti ni furani ani pekefuoho. Yekova asa gu mokedi nangia Pauro ko kepai ki ya: “Oni du ni awiriki agu yo du ni adikumbo akidohe mbiko idapase na hipai.” (Eb. 6:12) Si du ga Yekova riigbu azungodi rani ti ni ani asadi nyanyaki ka wirika gu kpiapai nga ga gu ruru akumba na adee du payo rogo Ziazia Kekeapai nga aguyo ani nawirikipai tipa beteyo rogo gi buku re. Ginipai tie si aida ani mangihe awere? Apai ue si aida ani tingidihe nga: (1) Si naida ani naanyakasa gaani idapase anyakasa kindi; (2) si naida ani sungu na pa gaani maabangirise kina berãrani yo ti aregbo dũ.

4. Wai Satana nayugu tiko ni vura idapase, ono tipagine si aidanga ani gunde ti ni ya?

4 Mo ninyakasi gamo idapase kindi. Bakere vura idapase kinaho, nga Satana. Bazogo gi zegino re ima sa zegino si du ni gu ngatarĩrago angbanga ba idapase rogoho ya. Ko ima du na ome ki susi rani gbe. Ya mo si naida ani gunde nga ani arengbanga ka sonosa idapase na kini nyakasihe te? Wagusa te! Yekova nga bakere Bakurea agu aboro dunduko nagbata ndikidi idapase. Ko nakido rani ki ya wẽ mbiko Gako undo, ani rengbe arengba ka ká fu Bakitingbanga ko ki oro berani! (Yak. 4:7) Ani naka fu Bakitingbanga ni dia ani regbo na aʹuru dũ ka nyakasa gaani idapase. Wai rengbe ani ka manga gupai re?

5. Wai gu ruru akumba na adee du payo rogo Ziazia Kekeapai agbia idapase? Oni sakingo rogoyo.

 5 A wa bi ani he, agu akumba na adee naadu na idapase Ziazia Kekeapai ape payo, i aavunganga yó na idapase te. Gere nayugo gupai nga idapase nga zuzu ga Yekova ziazia toro. (Gara. 5:22, 23, Vovo Ndika Atambuahe, 1952) I akpari fu Yekova tipa undo, na Yekova anaanyakasa gayo idapase kindi. Ani mangingo pai wakina gu i amangihe, ka bangirani agonga ti gupai nga Yekova nafu gako toro afu kpaima fu aguyo nasanahe tipaha na kini gbata gene ka gbiaha ya. (Rk. 11:13) Ya mo kurapai ho berewe ka ani mangihe?

6. Wai rengbe ani ka gbia undo wenengai ti wisigo agu apangbanga du rogo Ziazia Kekeapai?

6 Rogo gi buku re, ani wirikipai tipa kina bete aboro gbua nga aguyo naadu na bakere idapase. Badungu aguyo kinaho ani awirikanga pai tipa yó ya! (Oni gedi AEbere 11:32.) Si ngba angba ani gedi agu apangbanga du tipa yó na kini berẽkuriihe gbe. Ka ani aora aora gbua rii agu apangbanga du rogo Ziazia Kekeapai tipa aboro idapase, ani nyakasingo gaani idapase te. Gupai rengbe ka undo rani nga ho ani agedapai ni, ani di regbo ka berãkuriihe gbe na kurii agu apai naadu ti gu regbo re. Ka ani atingida gupai ti aregbo dũ nga i ‘angia aboro wakina rani,’ gayo akpiapai undo rani aundo gbe. (Yak. 5:17) Ani rengbe arengba ka rugatirani na gu rungo i adu rogoho rogo agu akpakarapai dunduko i agbiatiyo na ni nga gu du wakina gaani areme.

7-9. (a) Wai ka bete agu akumba na adee naadu na idapase du payo rogo Ziazia Kekeapai abipa iriso Yekova wa gu ani amangaha areme? (b) Tipagine si aida ani nyakasi gaani idapase ti ni rogo mangaapai yo?

7 Ani nanyakasa gaani idapase a rogo mangaapai yo. Ani ima ino wenengai nga “ka idapase zanga mangaapai si ki du ni kpikpi he.” (Yak. 2:26) Ani berẽnga pa gu ngbarago ka agu akumba na adee adu na ni ani nawirikipai tipa yó wa ka si adu nga i du Yekova nafu gu sunge fuyo ko nafuhe furani areme!

8 Ni kpiapai, na wa ka si adu nga Yekova aya fu Abarayama ko niirisiko angianga pati gu bamotumo ko aduaha na ambia ngbakungba yo ya, ono dagba gako aboro rogo bawene aBambu Kindo na pati kikindigi adunguratise, yo i asakapai ni wenengai tipa agu akidohe ko abihe “tuturũ” gbua? (Oni gedi AEbere 11:13.) Na wa ka i aya fu Eriya wẽ gako sunge nga ka imo agu anebi nga ga Bara yó ti gu kere regbo gbegberẽ bakindo aazogarago te, ono si nga kaa ndu rogo pazereda na gu pangbanga nafu wasa na maabangirise fu aboro? Ka gumba rengo nzunzu, ya mo ka agu akumba na adee Ziazia Kekeapai nafura tipa yó re agunga na ngbarago ka iriso Yekova wa gu ani airisoko areme te?

9 Sidu tie, ani naanyakasa gaani idapase anyakasa kindi rogo mangaapai yo. Ka ani amangaha wo, gure nga ani nawirika agu akpiapai nga ga agu akumba na adee nga ga idapase yó du payo rogo Sangba Mbori yo.  A wa i agumbaha rogo Tonatona Fugo nga ga gi buku re, ani nika ye ka ino agu aboro re gbe kini biyo wa bawene abakurearani. Ono i nika da ni ndikidi abakurearani ani kini raki na yó sa rogo vovo zegino.

10. Ginipai nika ngia pangbarago rogo Paradizo?

10 Mo sungu na pa gamo maabangirise berãro yo ti aregbo dũ. Ruru akumba na adee aima digo nigbia ome be gu maabangirise Mbori afuhe. Ya mo mo wo? Ni kpiapai, mo berẽnga pa gbia ga Yekova amoyambu i nazingi be kpio ho ‘ruru aboro nika zinga be kpio’ ni. (Oni gedi Amokedi 24:15.) Gini bete asanahe duho mo akpinyemu ka sanayo na ni?

11, 12. Rogo vovo zegino, gini asanahe rengbe mo ka sana agi aboro re na ni: (a) Ebere? (b) Noa? (d) Abarayama? (e) Ruta? (f) Abigaira? (g) Esetere?

11 Ho mo nika bi Ebere ni, ya mo mo adu na nyemu ka sasanako tipa wai avunguko adu? Watadu mo rengbe ka sanako ki ya: “Ya mo mo afuranga fu agu akeruba naadu ati Edene yo? Ya mo i akaragapai?” Na Noa tigako? Mo rengbe ka sanako ki ya: “Ya mo mo agundenga be gu diangbadiangba aboro nangia awiri agu amaraika nasamungu? Mo aru wai ka ngerafuo agu anya naadu na mo kurungba yo?” Ka mo bi Abarayama, mo rengbe ka sanako ki ya: “Ya mo mo arakingo na Seme sa? Da nayugupai foro tipa Yekova? Ya mo si adu ni kpakarapai foro mo guari Ura yo?”

12 Wakina gure, mo berẽnga pa agu asanahe rengbe mo ka sana gu ruru adee na ni nika zinga be kpio. “Ruta, gine nafõ ngbaduroyo mo da ni irisi Yekova?” “Abigaira, ya mo mo adu na gunde ka pe gupai fu Nabara nga mo aundo Davide?” “Esetere, ginipai namangi tipa roni na Morudekai fuo nyasa gu pangbanga du rogo Ziazia Kekeapai tipa ro?”

13. (a) Gini ngbatunga asanahe rengbe agu aboro nika zinga be kpio ka sasana ro na ni? (b) Mo nabipa gbia gu ruru akumba na adee naraki bakuruyo wai?

13 Gu ruru akumba na adee nika zinga be kpio re nika du adu na dungu asanahe a ka sanaro na ni. Si nika du ni bakere pa ngbarago ka pe pa agu apai fuyo namangi rogo yangara arame na wai Yekova afu maku fu gako aboro ti kere aregbo! Si adu fuyo ni bawenepai ka inopa wai Yekova adigisi gako akidohe. Rogo vovo zegino, ani amakianga pa gu ga Mbori ruru amoyambu du payo rogo Ziazia Kekeapai kina berãrani yo te. I adu na kina rani Paradizo yo! Wadu rago re tie, mo asadi na omero dũ ka ino agu aboro re wenengai. Mo niwiriki gayo idapase kindi. Mo irisingo Yekova airiso na yó sa ni bawene abakureamo nyeanye kindi!