‘Oni sonosi tironi rogo gaoni ziazia idapase . . . Oni bánda tironi rogo ga Mbori nyemuse yo.’YUDA 20, 21.

1, 2. Gini nyanyakipa asadatise ani amangaha tipa kpotorani du wenengai, na tipagine du gu sunge re ti ni na nyanyakipaha?

ANI dunduko naida kpotorani du na ome ti ni na kidu ni wenehe. Ono tipa kpotorani du na ome ti ni na ki du wenengai, si naida ani ri wene riahe, ki ningi agu ambaro naakpurasi kpoto boro, na kini banda kpotorani ti aregbo dunduko. Gipai re naida na nyanyaki asadatise, ono wa duhe nga si nabipa gaani raka, ani ambunga mangaha te. Gu kura sona kinaho si aida ani gbe berãrani kutini. Gini sona du nga ni?

2 Gu bawiriki nangia Yuda afura tipa ngbatunga gu sona re ho ko aya ni we: “Oni bánda tironi rogo ga Mbori nyemuse yo,” kina ti gu bangisa regbo re, ko agumba gupai berewe nga: Ni “sonosa tironi rogo gaoni ziazia idapase.” (Yuda 20, 21) Ginipai rengbe mo ka mangaha tipa ka sonosa gamo idapase tipa ka nye rogo ga Mbori nyemuse yo? Ani makianga apai biata si aida ani gbe berãrani kutini.

ONI NINYAKASI GAONI IDAPASE KINDI KUTI GA YEKOVA RURU ARUGUTE

3-5. (a) Gini iraira bipai Satana aida ka nanga rani ani du na ni tipa ga Yekova arugute? (b) Gini bipai si aida ani du na ni tipa ga Mbori arugute, na gini maapai si aida si du na ni kuriipa wai du ani? Mo funga kpiapai tipa gipai re.

3 Ni bambatapai, si naida ani nyakasi gaani idapase kuti ga Mbori arugute. Wa mo atona wirika gi buku re, mo ima wirika dungu ga Yekova arugute nibipa ruru mangaapai. Gini bipai du mo na ni tipa ga Yekova ruru arugute? Satana naida ka  nanga ro mo bi ga Yekova andiko gbiati agu arugute ko nasigiraha tipa mangaapai ni agu arugute naká aká na ani ti wene apai na ni agu arugute narungosi rani arungosi. Ko aima digo nimangisunge na gi birĩ re natona kina ti gu regbo ko amangisunge na ni kidu na diabese ati Edene yo. (Bambata Pai 3:1-6) Ya mo mo ambuko ko nangi ro na gu gako birĩ re? Si naru kina kurii gamo bipai.

4 Ka yugoho na kpiapai: Mo makianga gupai nga mo nandu rogo gu ati nga ga ambumbudo nga gu aboro ninaasungo rogoho kaa ongoda. Fuo ndu mo tooni, mo ki bi he wa ndugu ni gbangaha kuari nga gu nakiso gene bero ti kura papara gu ati ambumbudo re. Ono gu ba du gii gu ndugu re ngba ni kerehe. Ti tonatonaha, mo rengbe ka bi gu ndugu re wa guhe nakiso gene akiso bero. Ono fuo ngera mo ku rogo gu ndugu re, mo ki bi kere bahu koyo u ningere tipa nya ka zio ru! Fuo bi mo gu bahu re, mo ki rugu tiro tie nzunzu na sunge gu ndugu re, mo ki inihe nga gu ndugu re tipa ka gu bahu re kurunga fuoro ya. Ya mo boro ho wa gu bahu re nangera tipa ka zio ro? Fugo Mbori nazahe kini ya: “Oni dú na rugatise ki ningere; bambiko wa bahu nata ki nipoi, nigbata boro ka rita ni, kina wo vuraroni nga bakitingbanga nata.”1 Petero 5:8.

5 Satana nga kere bahu. Wa Yekova aidanga gupai nga Satana zi rani ya, Ko ima maa andiko tipa ka banda rani be gu gbegberẽ ‘abirĩ’ nga ga Satana. (AEfeso 6:11) Sidu, agu aregbo dunduko ani aberãkurii ga Mbori andiko, si naida ani bi ga Yekova nyemuse tipa rani abi rogoho yo. Ka ani abi agu andiko re wo, si nika du furani ni bandahe na ni pa ngbarago. Gu bawiriki nangia Yakoba akepai ki ya: “Gu ni nangana gu ziazia rugute nga ga raniri, ki nye rogo ho . . . i afu maku afu fu ni rogo gani manga sunge.”Yakoba 1:25.

6. Gine nga wene gene tipa ka sonosa idapase kuti ga Mbori ruru andiko gbiati arugute? Mo funga kpiapai.

6 Raka ringbisihe kuti ga Mbori arugute nga wene gene tipa ka sonosa idapase kuti gaani Bafu andiko gbiati gu tatamana du rogo gako andiko. Ni kpiapai, “ga Kristo rugute” nakoda  gu ndiko nga ani yugupai fu aboro tipa “agu apai dunduko” ko aruguhe. (AGaratio 6:2; Matayo 28:19, 20) AKristano namangapai a na ngbaduyo yo dunduko kuti gu rugute naya i naakoda tiyo na awirinayo wa sa tipa kaa irisombori na kini koditiyo wa sa. (AEbere 10:24, 25) Ga Mbori arugute nakoda gupai a nga kaa manga kparakpee fu Yekova dedede kina boro ngbadurani yo. (Matayo 6:5-8; 1 ATesaroniko 5:17) Wa ani araka ringbisihe kuti agu andiko re, ani nabi wai abi si ayugo ga Mbori nyemuse. Ho ani amangapai ni kuti agu andiko re, si naye na ngbarago furani nga gu ani arengbanga ka gbiaha be gu kurahe rogo gi zegino re ya. Ho mo aberã ni kuriipa wai mo nagbia undo nitiro mbiko raka ringbisihe kuti ga Mbori andiko, ya mo si anyakasanga gamo idapase te?

7, 8. Wai Fugo Mbori akido agu aboro nabaka bangiriyo nga fuo agarã, gene adunga beyo wa ka i kakuti ruru mangapai te?

7 Gu kura aboro nabaka bangiriyo nga tifuo bete agarã, si nika duadu fuyo ni kpakara kpakaraha tipa i nimangi gupai Yekova akpinyemuhe. I nagunde nga si nika dia adia beyo. Ka si du nga wo mo aberãha, mo banda agu afugo ku beraro yo nga: “Mi nga Yekova ga Mbori, nayugo pai foro sa u, nga gu ko nangbe ku mbata yo foro ngba gu gene mo ka ndu ngba ha. Akõ! ka mo adege turo sa gimi arugute! Si du ka ga zereda adu  ti ni wa di, na ga rurupai wa ngiri baime.” (Yesaya 48:17, 18) Ya mo mo aberẽnga kuriipa gu kidohe du rogo agu afugo re?

8 Yekova natingida rani rogo agu afugo re na gupai nga ani nagbia maku agbia ho ani agiasangbako ni. Ko nakido rani nga ani nika gbia amaku ue ka ani gisangbako. Ni bambataha, gaani zereda nika du wakina di, zezeredi, kpaima, na kini fu afu kindi. Ni uehe, gaani rurupai nika du wakina ngiri baime. Ho mo aru ni pangba di kaa bi ngiri baime si nisakitihe, mo nabihe abi nzunzu ni guhe nika nyeanye kindi. Mo nabihe abi nga gu ngiri baime re nika saka tihe wa gure tipa gbanga regbo. Yekova nagumba gupai nga gaani rurupai ima rengba ka nye wakina gu ngiri baime re ka ani degeturani fuko. Ka ani amanga nyanyaki asadatise ka nye ni ruru rani fuko, ko mbunga rani ani ti wa gu sa te! (Mo gedi Atambuahe 55:22.) Ya mo gu wene kidohe re anyakasanga gamo idapase kuti Yekova gbiati gako ruru arugute te?

“ANI SÚSI KU MBATA YO DATI DU ANI ZIAZIA”

9, 10. (a) Tipagine du pa manga ome ti ni ka nyaka rogo toro yo nga wene sásá fu aKristano? (b) Wai padu boro na gu bipai nga ga toro asa ni ni du na ngbarago?

9 Ni uepai, si naida ani sonosi gaani idapase kuti agu afugo nga: “Ani súsi ku mbata yo dati du ani ziazia.” (AEbere 6:1) Pa nyaka boro rogo toro yo nga gu wene sásá rengbe Kristano ka maaha. Aboro arengbanga ka da ni rengberengbe yo awere ti gi regbo re te, ono i ima rengba ka nyaka rogo toro yo. Na berewe a, aKristano nagbia bakere ngbarago ti iriso Yekova ho i asona ni rogo toro yo. Tipagine duhe ti ni wo?

10 Gu boro naima nyaka rogo toro yo nga gu boro nabi apai kina ngba gu gene Yekova abihe ngbaha. (Yoane 4:23) Pauro akepai ki ya: “Agu yo du sangba borose yo i naberã agu apai nga ga borose, ono agu yo du sangba Toro yo i naberã agu apai nga ga Ziazia Toro.” (ARomo 8:5) Gu boro naberã kina pa agu apai nga ga borose, ni agbianga ndikidi ngbarago te, bambiko ni naberã kina pa tini, ni naberã ni guruhe, na ni naberã kina  pa aũzegino. Ono gu boro naberã pa agu apai nga ga toro, ni nagbia bakere ngbarago, bambiko ni nagbe berani kuti Yekova, nga “betedi Mbori.” (1 Timoteo 1:11) Gu boro naima nyaka rogo toro yo na ngbarago ka manga gupai nafu ngbarago fu Yekova, na ni nadu a na ngbarago zavura ti regbo asada. Tipagine? Bambiko asada nafu mamu funi ni yugu Satana ni irazire na ki kakuti gani ruru mangaapai, kini ye na ngbarago fu gu Bani du ngbangbaturũ yo ni sangbanaha.Asanza 27:11; mo gedi Yakoba 1:2, 3.

11, 12. (a) Ginipai Pauro agumbaha tipa ga Kristano “berã na wisiga pa wenepai na gbegberẽpai,” na rogo gu fugo yo nga ‘manga ani pai’ na gaani berã na wisiga pa wenepai na gbegberẽpai nga gine? (b) Ginipai si aida boro mangihe tipa kpotoni nyaki wenengai ki inidi tihe na mangaapai?

11 Kina gu boro sa namanga ome, ni nanyaka rogo toro yo. Mo berẽnga kurii gi veresi re: “Nyanyaki riahe du tipa sosono aboro, nga agu yo rengbe gayo berã na wisiga pa wenepai na gbegberẽpai, mbiko manga yo pai na ni.” (AEbere 5:14) Ho Pauro aafura ni tipa ‘manga ani pai’ na gaani berã na wisiga pa wenepai na gbegberẽpai, ko amangisunge na gu fugo pa-Giriki dungu aboro anaamangasunge na ni ho i aniidi ni ka fura tipa agu aboro nambakada tiyo tipa mbaro abaangirã. Gu mbakadatise re nakoda dungu apai.

Gu boro nangi ambaro, ni naraba kpotoni araba

12 Ho i avungurani ni, kpotorani ainidonga tihe na dungu apai te. Ni kpiapai, tooni gude ainongo wai ka yaka aberu gbiati gu kura abarapa ru te. Si du duhe ti ni ti kura aregbo nga gude nayaka beru ayaka tua, ki ninari kpakpuru yo na kini votoko tiru zanga inoho. Ono tie, tooni tooni, u natona kaa ino wai ka wo ti aberu zanga nara tiru na kini wo ti angbazunga ru wenengai. Gude natona kaa araga, ki tona nduge, na fuo gure u ki tona oto. * Ginipai tigaha du tipa agu aboro nangi ambaro? Ni kpiapai, ho mo abi boro ni ni ningi kandi wenengai, mo naino gupai aino nga ni ima dia regbo ka wirika ngi  ru wenengai. I avunganga ni na kina gu ino ngi kandi re te, ono ni adi bakere regbo adia tipa ka wirika ngiru wo. Gu ngbatunga nyakasa borose re, Ziazia Kekeapai nagumba gupai nga si ni “umba ha” watadu na umba paha. Ono gupai nyaki paha gbe nga nyakasa pa gaani berã na wisiga pa wenepai na gbegberẽpai!1 Timoteo 4:8.

13. Wai rengbe ani ka sonosa gaani berã na wisiga pa wenepai na gbegberẽpai?

13 Rogo gi buku re, ani ima wisigo dungu apai nga gu rengbe ka undo ro mo nyakasi gamo berã na wisiga pa wenepai na gbegberẽpai na ki nye nyanyaki rogo toro yo. Wa mo nikaa manga adiaberã na uru dunduko, mo berẽ dudunguro tipa ga Mbori arugute gbiati andiko na kini mangi kparakpee tipaha. Rogo apai yo dunduko, mo sana tiro nga: ‘Gini andiko watadu arugute nga ga Ziazia Kekeapai nafura tipa gipai re? Wai rengbe mi ka mangapai kuti agu arugute gbiati andiko re? Ginipai ka mi mangihe si ki fu ngbarago fu gu Barani du ngbangbaturũ yo?’ (Mo gedi Asanza 3:5, 6; Yakoba 1:5.) Ka mo amanga adiaberã wa gure ti aregbo dunduko, si nika undo ro tipa mo ini gu kparakparapai du dagba wenepai na gbegberẽpai. Manga gipai re wo nika undo ro mo nye nyanyaki rogo toro yo.

14. Gini ngbatunga gomoro si aida ani du na ni tipa gu riahe nga ga toro, ono tie gini zahe si aida ani bandaha berãrani yo?

14 Kina rengo du nga boro ima rengba ka nyaka rogo toro yo, ono sona na nyaka rogo toro yo adigongo te. Riahe du nasa boro ni sono. Si du Pauro aya ti ni we: “Nyanyaki riahe du tipa sosono aboro.” Gu banguapai si aida mo mangihe ka sonosa gamo idapase nga kaa ri gu riahe ari kindi nga ga toro. Wa mo nikaa manga gupai mo nawirikihe, gure nga  tatamana, mbiko Ziazia Kekeapai naya: “Tonatona mburu tatamana nga gere.” Si naida ani du na bakere gomoro tipa gu nyanyakipa rengo Yekova Barani nafuhe furani. (Asanza 4:5-7; 1 Petero 2:2) Ka ani du na bakere inoho rogo Ziazia Kekeapai kidu na bakere tatamana, si aidanga ani bihe nga ani parani nanyaki ti kura aboro te. Si naida ani naawisigo tirani awisigo kindi rukö andu ka rimo ku rogo rani yo. Pauro akepai ki ya: “Oni wísigi tironi si ngia oni rogo idapase yo; oni ásadi tironi.”2 AKorindo 13:5.

15. Tipagine du nyemuse ti ni na nyanyakipaha tipa boro sono rogo toro yo?

15 Kpoto boro ima rengba kadu nyanyaki na ni wenehe; ono si naida gupai nga ni naarihe ari kindi na kini ngerefuo kpotoni. Ginipai si aidaha tipa ani sono rogo toro yo na kini ndu ku mbatayo kindi kaa sona? Gu banguapai si aidaha nga nyemuse. Si naida ani naasona rogo gaani nyemuse yo tipa Yekova gbiati akuarani aidipase. Ka ani adunga na nyemuse ya, gaani inohe gbiati irisombori dunduko dunga na sunge ti ni te. (1 AKorindo 13:1-3) Nyemuse ima rengba ka undo rani ani nyaki rogo toro yo ki ndu kindi ku mbatayo kaa sona rogo toro yo.

MO MOI BERÃRO KUTI GU MAABANGIRISE YEKOVA AFUHE

16. Gini ngbatunga aberã Satana aida ani du na ni, na gine Yekova nafuhe furani tipa si banda berãrani?

16 Ani furanga tipa gu kurapai berewe nga gu rengbe ka undo rani ani sonosi gaani idapase. Tipa boro nyaki rogo toro yo wenengai na ki da ni ndikidi pefuo Kristo, si naida ni du na rugatinapai nibipa agu apai ni aberã kuriihe. Satana nga bazogo gi zegino re ima ino wai ka nanga berã aboro i tona berã gbegberẽ apai, ki du zanga maabangirise rogo raka, na ki du na bakere gberãrago. (AEfeso 2:2) Ngbatunga gu berãpai re nga kerepai, na si aidanga Kristano bere wo te. Ani na ngbarago nga Yekova nafu maabangirise afu furani, nga gu nabanda berãrani ti gbegberẽ aberã.

17. Waigu Fugo Mbori ayugo pa du maabangirise na nyanyakipaha na kpiapai?

 17 Ziazia Kekeapai ima tangara apapara gu ũvura nga ga toro nga gu si aida ani du na ni ka sovura kuti Satana gbiati gi zegino re. Bangua papara gi ũvura re nga kpakpari vura, du nga “maabangirise tipa bata.” (1 ATesaroniko 5:8) Agu asekere nanaasovura ti agu aregbo i aake Ziazia Kekeapai, i aima inoho nga i arengbanga ka ima kuti ngba vura zanga kpakpari vura te. Wa i anaambakada gu kpakpari re rogo mara yo na kpoto, si anaabanda ri boro be agu ahe i anaazumudoho. Kina wai kpakpari vura abanda ri sekere, kinawo a maabangirise abanda berãrani.

18, 19. Gini kpiapai Ziazia Kekeapai namangisunge nani ka yugo padu na maabangirise na nyanyaki paha?

18 Yesu ayugu wene kpiapai nibipa du na maabangirise. Mo tingidinga gupai namangi ko rogo gu yangara yuru nga ga ungako auru kpotosende. Mbembedi bakureako akusipa ko. Gu kurako ki oro rimoko. Aguyo ki mbuko ki oro gayo. Kina boro gako aboro ringara ki sa tiyo kutiko, kini kpari fu agu abanzengere nangia ga Roma yo tipa i imi ko. Ani ima rengba ka ya boro ho dagbarani areme nika gbia tini na ngbatunga gu asada Yesu agbiatiko na ni re te. Ginipai naundo ko? AEbere 12:2 nakaragapai ki ya: “Nga gu ko nahi pa wagiwagi ngua mbiko gu ngbarago nadu fu ko ku mbata yo, ki basa pa gaha zee, ki ima sunga pati kumbabe gu mbata nga ga Mbori.” Bangiri Yesu agonga ti “gu ngbarago nadu fu ko ku mbata yo” te.

19 Gini ngbarago du nadu fuko ku mbatayo re? Ko aima ino gupai nga ka ko du na hipai, ko nika fubee sa ziasi rimo Yekova. Ko nika yugo Satana ni irazire ngba bakere gene kisusi. Gu kura maabangirise ho susi gure narengbe ka fu ngbarago fu Yesu susi te! Ko aima ino gupai a nga Yekova nika fu maku afu fuko kpaima tipa gako ruru mangapai, ko aima ino gu weneapai naandu ka manga fuko ku mbatayo ngbutuko fuo ko ga fuo Bako. Yesu abanda agi amaabangirise re berãko yo ti gu kere aregbo re dunduko. Kina gu bangisapai re si aida  ani mangihe. Ngbarago kinaho a du furani ku mbatayo. Yekova ima fu gu mamu furani nga ga fubee tipa ka undo ka ziasi bakere rimoko. Ani ima rengba ka yugo Satana ni irazire ni sia ani Yekova ni gaani Bakere Bakindo na ni banda ani tirani rogo gu nyemuse yo nga ga gu Barani du ngbangbaturũ yo ka kina gine vura manga amanga vurũ.

20. Ginihe rengbe ka undo ro mo banda wene berã na ki kakuti gamo maabangirise?

20 Anga Yekova naida gbua ka fu mosoro fu gako ruru amoyambu te, boro ko naida na kpotoko yo dunduko ka mangaha wo. (Yesaya 30:18; mo gedi Maraki 3:10.) Ko na ngbarago ka fu agu ahe fu gako amoyambu du nyemuhe kpotoyo yo. (Atambuahe 37:4) Sidu, mo banda gamo maabangirise nyanyaki kuti agu apai Yekova nakido paha ku mbatayo. Ka mo mbunga Satana ko nangi berãro na gu gako gbegberẽ aberãpai du rogo gi gako zegino re ya. Ka mo bi gupai nga gu toro nga ga gi zegino re narimo ku berãro yo, mo mangi kparakpee fu Yekova nyanyaki tipa “gu zereda nga ga Mbori nagasi rugatinapai dunduko.” Gu ga Mbori zereda re nika banda ngbaduro yo gbiati gamo aberãpai.AFiripoio 4:6, 7.

21, 22. (a) Gini bakere maabangirise “bakere rimbasa aboro” abihe na nyanyaki paha? (b) Ginipai dagba agu amaabangirise yo du aKristano na ni mo abihe na nyanyakipaha gbe, gamo diaberã nga gine?

21 Nairiwo gu wene maabangirise du foro ku mbatayo re!  Kangia mo nga papara gu “bakere rimbasa aboro,” nika kura “rogo bakere gberãngbi,” mo berẽnga pa gu wene raka mo nika rakaha. (Yugoti 7:9, 14) Wa Satana na gako adaimona nikaa dunga ho ti gu regbo re ya, mo nika gbia gu zereda ka mo aruganga tiro na paha awere ya. Da dagbarani nahianga gu wene raka du zanga gu gbegberẽ mangaapai nga ga Satana? Wa gu gbegberẽ mangaapai re nikaa dunga ya, si adu nipa ngbarago ka mangasunge ka sa kpotosende ni paradizo tii gu rugapai nga ga Yesu na agu aboro ko nika zogarago nayo ngbangbaturũ yo du bangeyo nga 144,000! Ani napido gu regbo na ngbadurani yo dunduko akaza gbiati agu apai nasa aboro i nye kubayo nikaa dunga ti ni berewe ya, gu regbo ani kaa dia agu aboro kugume i nika zingisa yo be kpio, gu regbo ani nika raka ngba gu gene Mbori aida ani raki ngbaha! Wa ani kaa mbeda ka da ni rengberengbe rani, gu kura bakere mosoro nikaa mbeda furani yee, gu mosoro du paha rogo ARomo 8:21, nga “gu taarimo nga ga awiri Mbori.”

22 Yekova naida mo gbia bakere ranirii susi gu mo aberã paha. Tipa mo gbia gu ranirii re, si naida mo du na giasangba. Ya mo mo abingoho nga rẽarẽ tipa mo mangi asadatise na omero dunduko tipa kaa giasangba Yekova na auru dunduko te? Sidu tie, mo mangi asadatise na omero dunduko tipa ka sonosa tiro rogo gamo ziazia idapase, tipa ka nye rogo ga Mbori nyemuse yo nyeanye kindi!

^ genewaraga 12 Aboro-birĩ-inohe gumba gupai nga kpotorani na ahe kina ti ni nga gu nasa rani ani ini wai angbazunga rani awo na kini ini wai ka wo ti ni. Ni kpiapai, guhe re nasa boro ni ta beni na kisikisi bangiri ni.