Si gu ku mbatayo

Mo gu kuti tangaratangara ariihe

ADezire Yekova

Mo sia fugo Zande

 KURA APAI

Vo ũdadarii—Gini regbo na Tipagine?

Vo ũdadarii—Gini regbo na Tipagine?

Ti gini regbo na tipagine si aida dee vo ũdadarii rogo agu apai yo nga ga irisombori? Ani makianga gupai ga Mbori toro adu kugii Pauro ko kehe tipa gipai re. Ko ayugu wai furani rengbe ani ka manga agu adiaberã du ni wenehe, nga gu nafu taarimo fu Mbori. (1 AKorindo 11:3-16) Pauro agumba pa meme apai biata nga gu si aida ani berẽkuriihe: (1) gu mangaapai naida dee vo ũdadarii, (2) gu ba si aida ri vo ũdadarii rogo, na (3) ndu gupai si aida ri mangipai ti ni kuti gi rugute re.

Mangaapai. Pauro afura tipa apai ue: kparakpee gbiati gumbapai ni sangbanebi. (Veresi 4, 5) Kparakpee nga fura na Yekova rogo iriso yo. Areme, gumbapai ni sangbanebi narukuba agu ayugopai du mburuhe rii Ziazia Kekeapai nga gu agu aKristano nga abatungusipai amangaha. Ya mo Pauro aida ka gumba gupai nga si naida dee vo ũdadarii ti agu aregbo dunduko ri akparakpee watadu ho ri ayugo gu rengo ni nga ga Ziazia Kekeapai? Oó. Gu ba ri amanga kparakpee rogo watadu gu regbo ri ayugopai ti ni du rengbe ka ida gupai nga ri vo ũdadarii watadu ka ri vo ngaha ya.

Gu ba watadu regbo si aida ri vo riri ti ni. Pauro ape pa aregbo watadu aba ue, aborokporo gbiati dungurati. Ko aya:  “Ri de ki ngia kumba; . . . gu de ka kpara kpe watadu gumba pai ni ku riri, ri nawasi riri.” (Veresi 3, 5) Rogo gu mbakadapai nga ga aborokporo, kumbakudee du nga gu boro Yekova namoi ni ni rii dee. Kinagu ka ri ayugongo irisa tipa ga kumbari pagbia ya, si du ka ri wasi ko ti ni ni manga ri agu apai Yekova nafuhe fu ko. Ni kpiapai, ka si du nga ri nawisigo Ziazia Kekeapai na boro kumbari ki du kinaho, si naida ri yugu irisa tipa gako pagbia ni vo ri ũdadarii. Si naida ri mangihe amanga wo singia ko zi bapatiza watadu ko aziongo ho te, bambiko ko nga bariikporo. * Ka singia ri naida ka manga kparakpee watadu ka yugopai ho du gu wiiri ni nga kumbagude naima zio bapatiza, si naida ri vo ũdadarii avo a, angianga mbiko gupai nga ko nga bariikporo ya, ono mbiko gu pagbia i afuhe fu gu kumba zi bapatiza rogo gu dungurati nga ga aKristano.

Pauro afura tipa gu ba nga dungurati ki ya: “Ono si ngia gu boro nati kangu, sinorani adu nga wo te, nga ga Mbori akanisa a te.” (Veresi 16) Rogo gu dungurati nga ga aKristano, i fu pagbia fu agu akumba naima zio bapatiza. (1 Timoteo 2:11-14; AEbere 13:17) Kina akumba sa i amaa yo ni abaakumba gbiati amoundo abaakumba, na ki fu gu pagbia fuyo naye be Mbori ka ngerafuo gako akandoro. (Amokedi 20:28) Ono ti kura aregbo, si ima rengba ka du nga gu dee nga Kristano mangi gu sunge kina agu akumba naima zio bapatiza ninaamangaha. Ni kpiapai, si rengbe ka du nga ri mangi gu dunguratise nga ga sunge tungusapai ka wirina ni kumba adunga ho ka mangaha ya. Watadu ri ima rengba ka wisigo Ziazia Kekeapai na boro nga gu i aima manga mbakadapai tipaha. * Bambiko ngbatunga agu awisigopai re nga kina papara agu apai nga ga gu dungurati nga  ga aKristano, si naida ri vo ũdadarii avo tipa ka yugo gupai nga ri namanga gu sunge nidu fu kina akumba.

Dungu apai nga ga irisombori aidanga gupai nga dee vo ũdadarii ya. Ni kpiapai, si aidanga ri vo ũdadarii ho ri akaragapai ni ti regbo dunguratise, ho ri atungusapai ni na kumbari, na gu kura wirina naima zio bapatiza, watadu ho ri awisigopai ni na kini mangi kparakpee na gu wiiri ata ziongo bapatiza ya te. Rengo ngaha nga, kura asanahe ima rengba ka kura, na ka si dunga wirina ni dee ainongopai tipa kura pai te, ri ima rengba ka manga wetekapai. Ka ri du kindi na kapa na ka sangbakpotoriyo fõ ri ri vo ũdadarii, ri ima rengba ka mangaha wo, gbegberẽpai nga ni te, awa duhe rogo gi sura re.

Ndu mangaha. Rogo veresi 10, ani nabi nduapai yo ue si aida aida ti ni gu Kristano nga dee vo ũdadarii: “Gi pai re de ka du na ũyugo pa zoga ri ti riri, bambiko amaraika.” Ni bambataha, gu fugo du ane nga, “ũyugo pa zoga.” Pa vo ũdadarii nayugo gupai fu dee nga ri ima ino pa gu pagbia Yekova nafuhe fu agu akumba naima zio bapatiza rogo dungurati. Sidu, si nayugo gari nyemuse fu Yekova Mbori na padu ri ni ruru ri. Kura ue ndupai nga “bambiko amaraika.” Waigu du pa vo dee ũdadarii na sangbanaha kurii amaraika?

Amaraika na ngbarago ka bi pagbia si ni mangi rogo ga Yekova riigbu, ngbangbaturũ yo na auru kpotosende. I nagbia undo agbia a ti gu kpiapai nga ga kpakpa aboro rogo gi bangiri ba re. Bambiko i dunduko a si aida i yugu gayo ranigose tipa ga Yekova mbakadapai, nga gu gu kura amaraika aamanganga ha kusayo ya. (Yuda 6) Awere, amaraika ima rengba ka bi agu adee du na bakere inohe rogo raka na ki du na bakere birĩ mangapai ti gu kura akumba nga aguyo naima zio bapatiza rogo dungurati, ono agi adee re kini yugu  gayo ranigose kindi fu gu pagbia nga ga agu awirina re. Ti kura aregbo, si rengbe ka du nga agu adee re nga mbedimbedi aKristano nga aguyo nika zogarago na Yesu ngbangbaturũ yo. Ngbatunga agu adee re nika gbia gu bakere mamu kii kisusi gu du amaraika na ni, na i nika zogarago na Yesu Kristo ngbangbaturũ yo. Gure nga bawene kpiapai fu amaraika si aida i wirikihe awere! Nairiwo gu bawene mamu du adee na ni ka yugo giasangba rogo umbasitise yo ku bangiri amirioni amaraika!

^ genewaraga 3 Si aidanga gu diakumba nga Kristano mangi kparakpee kuari ho du gu kumbari ni nga ndikidi idipase te, kinagu ka pai mangi ko nga gu ka ko arengbanga ti ni ka mangaha ya, wa gu kaza ka ká na fugoko.

^ genewaraga 1 Ndupai ho dee vo ũdadarii ho ri awisigo Ziazia Kekeapai ni na boro nga gu i aima manga mbakadapai tipaha na gu wirina nga kumba aziongo bapatiza ya, na angianga kumbari ya te.