Zapada barangbase nisase nga gu bibiriko mangapai naba gberãrago ti Yekova, na si nagbarasa berã boro ki sa ni ni naaberãpa mbiisa kina gani nyemuapai. Gu boro namanga gupai re, ni nasonosa gu bipai tipa aboro nga i gbua nga ũ kodaba, du sunge yo gbua nga mbiisa gani nyemupai. Kodaba nada bangirini gbua ni guhe du tipa ka mbiisa gani nyemu kodaba angianga gupai du fu arogotise tipa i yugu nyemuse dagbayo ya. Ono si nambiisa ga boro nyemu kodaba gbua tipa guru regbo. Nirengo, kuba gupai nga si imi ‘apa kpotorani yo dũ auru kpotosende no; pa bari, na meteka,’ zapada barangbase nisase nazingisa nyemu agu apai re kina kumbatayo.AKorosaio 3:5.

Gu mokedi nangia Pauro akepai ki ya: “Amangure, ani gírisi tirani be gu meteka dunduko nga ga borose na toro, nimbakadi ziaziapai nzunzu rogo gunde ti Mbori.” (2 AKorindo 7:1) Ka si du nga mo nasota asota ka mangapai kuti gu rugute re, ka omero batingo mo ki mbu manga asadatise ya. Yekova ‘zaaza tipa ka vu’ rani na ki undo rani. (Atambuahe 86:5; Ruka 11:9-13) Gu ome mo amangaha tipa ka diabe gu gbegberẽ mangapai re, ka si vura du vurũ nga si naida aida ka dia bero ti kura aregbo, si nayugo gupai nga mo naida aida ka mbu gu mangapai re. Gu kurapai berewe si aidanga bangiro go ti ni ya nga “Mbori nga bahe ti kpotorani yo, ini apai dũ.” (1 Yoane 3:20) Anga kina gaani ingapai sa Mbori abihe te; ko nabi boro naabani. Wa duhe nga ko ima ino gupai du tipa rani wenengai, ko nadega tuko kuti gaani kpe tipa inapai na bakere nunga. Sidu, ka omero batingo  ti manga kparakpee fuko kakaka ya, a wakina gu gude nandu fuo bai ho du u ni rogo kpakarapai. Yekova nika undo ro aundo tipa mo du na gigiri sangbakpotoseyo berewe. (Atambuahe 51:1-12, 17; Yesaya 1:18) Ono si naida mo naamangapai amanga ringbisihe kuti gamo kparakpee. Ni kpiapai, si naida mo ne agu ahe dunduko nayugokpia kundiri aboro, gbiati gbegberẽ kpamiatise. *

Ka si du nga gene bero wa ka mo dibe gu gbegberẽ mangapai re te, mo fura tipaha na vunguro watadu gu wirina naima nyaka rogo toro yo. *Asanza 1:8, 9; 1 ATesaroniko 5:14; Tito 2:3-5.

^ genewaraga 2 Gu kura aboro naamanga gupai tipa ka bandatiyo ti bi agu ahe nayugo kundiri aboro nga kaa mangasunge na agu ahe du wa Internet kina dagba aboro. Gu kura aboro nangbe kura ambakadapai ku rogo gayo akompiuta nga gu nakiso gene be gu gbegberẽ ahe nazingisa nyemu kodaba ho i aweteka internet ni. Ono si aidanga boro kido kuti agu ahe re na kpotoni yo dunduko te.

^ genewaraga 1 Tipa agu apai rengbe mo ka mangaha tipa ka diabe gu mangapai re: Mo sa berãro si naaberã kurii kurapai kia. (AFiripoio 4:8) Ka mo naabingo agu ahe nika zingisa nyemu kodaba ya. (Atambuahe 119:37) Mo mangi kparakpee tipa ‘gu bakere tandu susi.’ (2 AKorindo 4:7) Mo fu tiro sa agu amangapai nga ga aKristano.1 AKorindo 15:58.