Biiyaʼ guiraʼ ni nuu lu sitiu riʼ

Maʼ nápadu jma de 165,000 exhibidor para gucheechenedu diidxaʼ

Maʼ nápadu jma de 165,000 exhibidor para gucheechenedu diidxaʼ

Maʼ biaa binni guʼyaʼ ca testigu stiʼ Jiobá gucheeche diidxaʼ de yoo pur yoo. Peru yanna laaca maʼ ruuyaʼ binni laacabe né ca exhibidor ni rucheechenécabe diidxaʼ.

Ca dxi riʼ nabé maʼ caquiiñeʼ exhibidor para guireeche diidxaʼ. Ne bizulú ni ndaaniʼ guidxi Nueva York lu beeu noviembre 2011.Biquiiñeʼ ti grupu de Testigu ti mostrador ra guluucaʼ publicación ni gacané binni ganna de Biblia. Nabé galán cani guleendúcabe pur modo bíʼnicabe riʼ, ngue runi gudixhe íquedu gaca ni ndaaniʼ xcaadxi guidxi.

Lu beeu marzo 2015 que maʼ yendá 165,390 exhibidor o carruhuiiniʼ ndaaniʼ ca congregación stiʼ ca testigu stiʼ Jiobá ni nuu lu guidubi guidxilayú. Ne laaca maʼ biseendacabe mexaʼ, quiosco ne xcaadxi tipu de exhibidor.

Jma nga rié ca Testigu de yoo pur yoo para güíneca’ binni de Biblia, peru laaca nabé galán cani huabeendúcabe né ca exhibidor ca. Guidúʼyanu xi bizaaca chupa chonna biaje.

Ndaaniʼ guidxi Perú bidxiña ti hombre láʼ Raúl ca Testigu ni zuhuaané ti exhibidor ne gúdxibe laacaʼ: «Paraa huayuutu pue. Maʼ chonna iza canayubeʼ laatu. Dede bidieeʼ xquixe Dios ora biiyaʼ carruhuiiniʼ stitu».

Rucheeche ca Testigu diidxaʼ neza ra nabeza Raúl, peru qué riuube ra lídxibe ridxíʼ, nin fin de semana. Gudxi Raúl laacabe biindané ca testigu stiʼ Jiobá laa Biblia dxiqué ne yanna maʼ racalaʼdxiʼ guʼndanécabe laa sti biaje. Ngue runi gudíxhecabe padxí chigánnacabe laabe.

Bidxiña ti guendaxheelaʼ ni nahuiiniruʼ ra nuu ti exhibidor ndaaniʼ guidxi Bulgaria ne gucuaacaʼ libru Ximodo guibanineluʼ binnilídxiluʼ nayecheʼ. Bibiguétacabe ti semana despué ne zinécabe Libru stinneʼ de ca historia stiʼ Biblia ne libru Guizíʼdinu de Maestru Ni Jma Nanna Gusiidiʼ. Testigu ni zuhuaa cueʼ exhibidor que gunabadiidxaʼ laacabe panda xiiñicabe. Bicábicabe laa: «Caʼruʼ gápadu nin tobi, peru pa chuʼ dxi gápadu la? rápadu gana gunibiaʼbe Dios. Ne biáʼsipeʼ ca libru riʼ nga caquíʼñedu».

Ne ndaaniʼ guidxi Ucrania la? bidxiña ti hombre nacu uniforme stiʼ soldadu ra nuu chupa hermana zuhuaané exhibidor ne gúdxibe laacaʼ: «Badudxaapacaʼ, lagabi naa padxí gueeda Armagedón». Hombre riʼ cadi xadxí de guyé lu guerra ni guca Ucrania. Pur guiráʼ ni cayaca lu Guidxilayú maʼ bidiibe cuenta mayaca gueeda Armagedón ne rinabadiidxabe xiñee caʼruʼ guni Dios xiixa. Bisiene ca Testigu que laabe né Biblia caʼruʼ guni Dios ni pur caadxi razón ni napa, peru maʼ cadi candaa zabeebe guiráʼ cosa malu. Gucuaa hombre que revista Torre stiʼ ni rapa ne ¡Despertad! ne libru ¿Existe un Creador que se interese por nosotros?

Ndaaniʼ guidxi Macedonia, laga cucheeche ca Testigu diidxaʼ né ti carruhuiiniʼ, gudxi ti hombrehuiiniʼ laacaʼ maʼ biindaʼ ca revista stinu ne yanna maʼ rapa gana guicaa libru Xipeʼ ndiʼ cusiidiʼ Biblia. Ora bidiicabe ni laa gudxi laacabe nagueendaca zié ra biblioteca para guʼndaʼ ni.

Chupa hora despué, biindaʼ si hombrehuiiniʼ que 79 yaza stini, bibiguetaʼ ne gudxi laacabe: «Ruchaa libru riʼ xquendanabani binni. Maʼ bidieeʼ cuenta cadi jneza modo riníʼ iqueʼ lu stale cosa. Jneza guiráʼ ni na libru riʼ. Yanna maʼ bichaa modo ruuyaʼ guendanabani».