Biiyaʼ guiraʼ ni nuu lu sitiu riʼ

Biluíʼcabe binni guiráʼ ni napa jw.org lu ti feria de libru

Biluíʼcabe binni guiráʼ ni napa jw.org lu ti feria de libru

Lu ti feria internacional de libru ni guca Toronto, biluíʼcabe libru ni guca imprimir ne ni zanda guindeteʼ binni lu internet, gúcani ra runibiáʼcabe casi Centro Metropolitano de Convenciones stiʼ guidxi Canadá 13 dede 16 stiʼ noviembre 2014 ne guyé jma de 20,000 binni lugar riʼ.

Lade ca binni nuu raqué laaca guyuu ca testigu stiʼ Jiobá, laacaʼ gudíxhecaʼ ti puestu ni nabé ribidxi stale binni ne napa stale cosa. Gúpacaʼ ti mostrador ra guluucaʼ stale tableta para guluiʼcaʼ binni modo iquiiñeʼ sitiu nuu lu Internet, jw.org.

Tobi de ca xaíque stiʼ feria que guníʼ: «Nabé nacubi guiráʼ ni nápatu lu sitiu de Internet stitu. Galán pa ñuuyaʼ xcaadxi de ca xaíque stiʼ ca editorial nuu raríʼ modo ruluiʼtu ca publicación stitu». Stale de cani guyé feria riʼ bizeetecaʼ nabé galán modo rihuinni sitiu jw,org ne cadi lica nagana para iquiiñeʼ binni ni, ricábini cani nabé rinabadiidxaʼ binni. Laaca nabé guyuuláʼdxicabe modo racané sitiu riʼ binni lu ca guendanagana sticaʼ ne cani nabé riguu xizaa laacaʼ.

Ca Testigu ni biʼniʼ tender puestu que bidiicaʼ cuenta qué runibiáʼ stale de ca binni guyé raqué sitiu jw.org. Stale de laacaʼ gunacaʼ guicaacaʼ ti tarjeta de contactu o tratadu ni láʼ Tu zanda guicabi cani jma racalaʼdxiʼ binni ganna ne stale de laaca guniʼcaʼ zabiguetaʼ ziuucaʼ lu sitiu de Internet riʼ ne xcaadxi de laacaʼ gunábacaʼ chigánnacabe laacaʼ ra lídxicaʼ.

Cumu viernes que rúnicabe «día del niño» la? biluíʼ ca Testigu que ca binni guyé raqué ca videu zeeda lu «La pizarra animada» ni nuu lu sitiu jw.org. Stale baʼduscuela ne maestru sticaʼ bizuhuaadxicaʼ para gúʼyacaʼ cani.

Biʼniʼ felicitar ti hombre de Chicago, ni runi dxiiñaʼ ndaaniʼ ti empresa ni runi imprimir Biblia, ca Testigu purtiʼ nabé sicarú Traducción del Nuevo Mundo de las Santas Escrituras ni nápacaʼ lu puestu sticaʼ. Ne gunábabe ti tarjeta de contactu para guiníʼnebe ca binni ni biʼniʼ ni.

Sitiu de Internet stidu riʼ nuu ni lu jma de 700 idioma. Ca binni yeguuya feria riʼ biiyacaʼ ni lu 16 idioma: amárico, bengalí, chino, coreano, diidxastiá, francés, griego, gujarati, hindi, inglés, portugués, sueco, tamil, tigriña, urdu ne vietnamita.

Tobi de ca Testigu ni cayuni tender puestu que bidii cuenta jma riuulaʼdxiʼ binni ora guluíʼcabe laacaʼ sitiu riʼ lu Internet que gabisícabe laacaʼ de laani. Laaca guniʼbe: «Galanpeʼ nga gunda biluidu binni guiráʼ ni nápadu lu sitiu de Internet stidu».