Biiyaʼ guiraʼ ni nuu lu sitiu riʼ

Ñee naguixhe ca testigu stiʼ Jiobá ximodo gápacaʼ novia o novio la?

Ñee naguixhe ca testigu stiʼ Jiobá ximodo gápacaʼ novia o novio la?

Ca testigu stiʼ Jiobá runi credu pa chinándadu cani rusiidiʼ Biblia ne ca mandatu zeeda luni zacané cani laadu quixhe íquedu gúnidu ni riuulaʼdxiʼ Dios ne ni gacané laadu (Isaías 48:17, 18). Cadi laadu gudíxhedu cani zeeda lu Biblia, peru rinándadu cani lu xquendanabánidu. Guidúʼyanu caadxi de laacani, cani caníʼ de ora gapa tuuxa novia, o novio. *

  • Cadi lica naquiiñeʼ guibiá ti guendaxheelaʼ (Mateo 19:6). Para laadu, ca testigu stiʼ Jiobá, ora maʼ napa tuuxa novia o novio zacá nga ruzulú binni para guedandá dxi guichaganáʼ. Nga runi, cadi guendariguite nga gápacabe novia o novio.

  • Zanda gapa binni novia o novio ora maʼ zanda guichaganáʼ. Jma galán guichaganáʼ binni ora maʼ gudiʼdiʼ tiempu ra ruzulú ribani ladxidóʼ ne ruquiinde laa gatané tuuxa (1 Corintios 7:36).

  • Zanda gapa binni novia o novio pa nuu libre para guichaganáʼ. Para Dios cadi purtiʼ maʼ guca divorciar tuuxa nga zanda guichaganáʼ sti buelta. Zanda guichaganabe pa ni guca xheelabe guyuuné sti binni (Mateo 19:9).

  • Ti xpinni Cristu ni racalaʼdxiʼ guichaganáʼ naquiiñeʼ guyubi tuuxa ni naca xpinni Cristu si (1 Corintios 7:39). Nga riníʼ naquiiñeʼ gaca xnóviabe o xnóviobe tuuxa ni naca testigu stiʼ Jiobá ni maʼ guyuunisa purtiʼ zinanda cani runi crenu, cadi riuulaʼdxiʼ si cani (2 Corintios 6:14). Maca rinabaʼ Dios cani runi adorar laa guichaganacaʼ cani runi cré laaca ni runi crécabe (Génesis 24:3; Malaquías 2:11). Ca binni ni ruundaʼ de tema riʼ nacaʼ ribeendú binni ni galán pa tobi si ni runi crecaʼ. *

  • Ca baʼduʼ naquiiñeʼ guzuubacaʼ stiidxaʼ bixhózecaʼ ne jñaacaʼ (Proverbios 1:8; Colosenses 3:20). Cani nabézaruʼ ra nuu bixhoze ne jñaa, naquiiñeʼ guzuubacaʼ stiidxacabe, casi panda iza laacabe maʼ zanda gápacabe novia o novio ne xi zanda gúnicabe.

  • Biblia na «cada tobi zuaʼ donda stiʼ» (Gálatas 6:5). Nga runi, pa chinándadu ni na Biblia cada tobi zanda quixhe ique pa gapa novia o novio ne tu né. Nuu caadxi rihuinni nuu xpiaanicaʼ ora ruyúbicaʼ conseju stiʼ ca Testigu ni huaniisi ni rizaalaʼdxiʼ laacaʼ (Proverbios 1:5).

  • Stale de ca cosa ni runi cani napa novia, o novio, pecadu naroʼbaʼ cani. Biblia na malu nga inmoralidad sexual. Cani nuu luni nga gatané binni tuuxa ni cadi xheelaʼ, xhubináʼ ra naca tuuxa hombre o gunaa, o gapa sexo oral o anal ne xcaadxi cosa casi laacani (1 Corintios 6:9-11). Ne pa ti pareja cudisaacaʼ bixiduʼ laacaʼ ne caguiidxi dede guxuíʼlucaʼ casi ora ñápacaʼ relación sexual la? maʼ cayúnicaʼ cosa «nadxabaʼ», neca cadi cayápacaʼ relación sexual (Gálatas 5:19-21). Ora binni ruiʼ «diidxaʼ guidxa» casi ora ratané ti hombre ti gunaa la? laaca malu nga na Biblia (Colosenses 3:8).

  • Riguite ladxidóʼ binni laa (Jeremías 17:9). Zanda gucaa ni binni guni xiixa ni nanna cadi jneza. Para cadi gucaa ladxidóʼ ca pareja ca laacaʼ gúnicaʼ cosa malu la? cadi galán diʼ chúʼcabe stúbicabe ti lugar ra zanda gúnicabe cosa malu. Para cadi guizaaca nga, galán chizácabe né xcaadxi binni o né tuuxa ni zanda gapa laacabe (Proverbios 28:26). Ca xpinni Cristu ni caʼruʼ guichaganáʼ naquiiñeʼ gánnacaʼ nuu stale peligru pa guyúbicaʼ novia o novio lu Internet, ne jmaruʼ si purtiʼ huaxiéʼ runibiáʼcabe binni ca (Salmo 26:4).

^ párrafo 2 Nuu cultura qué rapa binni novia o novio ante guichaganáʼ. Biblia cadi cuzeeteʼ diʼ pa caquiiñeʼ gaca ti hombre ne ti gunaa novio ti tiempu para guichaganacaʼ. Ne cadi cuzeeteʼ diʼ ni pa caquiiñepeʼ gácacabe novio para guichaganácabe.

^ párrafo 6 Zacá ruzeeteʼ ti revista ni caníʼ de guendaxheelaʼ ne de familia. Revista que na «bíʼnicabe chonna estudiu caadxi pareja ni maʼ nápacaʼ stale iza de bichaganacaʼ (jma de 25 iza) ne bisihuinni ca estudiu que jma rindaa ca guendaxheelaʼ ca pa ngueca religión sticaʼ ne ni runi crecaʼ» (Marriage & Familia Review, volumen 38, númeru 1, yaza 88, 2005).