Biiyaʼ guiraʼ ni nuu lu sitiu riʼ

Ñee runi cré ca testigu stiʼ Jiobá Antiguo Testamento la?

Ñee runi cré ca testigu stiʼ Jiobá Antiguo Testamento la?

Runi credu. Ca testigu stiʼ Jiobá nánnadu de Dios zeeda Biblia «ne nuu ni para usiidi ni laanu» (2 Timoteo 3:16). Lu Biblia zeeda Antiguo ne Nuevo Testamento. Para cadi gucaʼdu binni guiníʼ ique maʼ gudiʼdiʼ cani zeeda lu Antiguo Testamento, laadu ca testigu stiʼ Jiobá ribeeladu ni Stiidxaʼ Dios ni gucuá lu diidxaʼ hebreu. Ne Nuevo Testamento ribeeladu ni Stiidxaʼ Dios ni gucuá lu diidxaʼ griegu.

Xiñee cadi naquiiñeʼ gucaa náʼ ca xpinni Cristu Antiguo Testamento

Biquiiñeʼ Dios apóstol Pablu para gucaa ca diidxaʼ riʼ: «Irá ni ucuá lu Xquiʼchi Dios ucuá para usiidi laanu» (Romanos 15:4). Nga runi, nánnadu nabé risaca ca diidxaʼ zeeda lu Stiidxaʼ Dios ni gucuá lu diidxaʼ hebreu. Luni zeeda conseju ne historia ni zanda gacané laanu.

  • Historia. Stiidxaʼ Dios ni gucuá lu diidxaʼ hebreu rusiene chaahuiʼ ximodo bizáʼ Dios Guidxilayú ne ximodo beeda guiaana binni lu náʼ pecadu. Ni cusiene ni riʼ racané laanu gánnanu padé ziúpanu ne xiñee rátinu (Génesis 2:7, 17). Laaca cayabi Stiidxaʼ Dios ni gucuá lu diidxaʼ hebreu laanu ximodo gucané Dios caadxi binni bibani dxiqué ni gudiʼdiʼ lu guendanagana casi cadídinu yanna (Santiago 5:17).

  • Conseju ni racané laanu. Lu Stiidxaʼ Dios ni gucuá lu diidxaʼ hebreu zeeda libru ni láʼ Proverbios ne Eclesiastés, lúcani cá stale conseju ni zanda gacané laanu tiempu riʼ. Casi, ximodo guibani familia stinu nayecheʼ (Proverbios 15:17), ximodo gúninu dxiiñaʼ ne gápanu tiempu guiziiláʼdxinu (Proverbios 10:4; Eclesiastés 4:6), ne ximodo guibani cani nahuiiniʼ nayecheʼ (Eclesiastés 11:9–12:1).

Laaca galán guni estudiarnu Ley gucuaa Moisés casi ni cá lu Torá, o lu Pentateuco (ca primé gaayuʼ libru stiʼ Biblia). Neca qué rinanda ca xpinni Cristu ni na Ley riʼ, peru ca principiu zeeda luni zanda gacanécani laanu guibáninu nayecheʼ (Levítico 19:18; Deuteronomio 6:5-7).