Biiyaʼ guiraʼ ni nuu lu sitiu riʼ

Xiñee qué riná ca testigu stiʼ Jiobá guicacaʼ rini

Xiñee qué riná ca testigu stiʼ Jiobá guicacaʼ rini

Cani riníʼ binni ne cani dxandíʼ

Ni riníʼ binni: Qué rié ca testigu stiʼ Jiobá doctor purtiʼ qué runi crecaʼ pa zacané medicina laacaʼ.

Ni dxandíʼ: Laadu ca Testigu, rúnidu stipa pur guyúbidu doctor ni guni tender laadu galán. Ora gaca huará o gaca operar tobi de laadu —o tobi de ca binnilídxidu— ruyúbidu doctor ne cirujanu ni nanna ximodo gusianda binni sin iquiiñeʼ rini. Ne nayecheʼ nuudu pur guiráʼ ni maʼ randa runi ca doctor yanna. Guiráʼ modo riquiiñecabe para gusiándacabe ca Testigu sin rini maʼ nuu tu riquiiñeʼ cani ndaaniʼ xcaadxi guidxi roʼ. Yanna riʼ, tutiisi zanda cuí xiixa tratamientu ni qué zaguu xquendanabani ra naxoo. Casi ora guicá binni rini la? zanda gapa xiixa guendahuará, gacaná defensa napa lu xcuerpu o guchee ca doctor.

Ni riníʼ binni: Rusianda ca testigu stiʼ Jiobá binni pur fe ni napa.

Ni dxandíʼ: Qué huayuu dxi gusiándadu binni pur fe ni napa.

Ni riníʼ binni: Nabé caru ca tratamientu ni nuu para cadi guicá binni rini.

Ni dxandíʼ: Biáʼsipeʼ biaʼ saca ca tratamientu ricaadu para cadi guicadu rini nga riguíxedu. *

Ni riníʼ binni: Guiráʼ iza rati stale Testigu, dede né baʼduhuiiniʼ, purtiʼ qué rinacaʼ guicacaʼ rini.

Ni dxandíʼ: Cadi dxandíʼ ni riníʼ ca binni riʼ. Yanna nabé maʼ runi ca cirujanu operación nagana sin gucaacaʼ rini binni, casi gúnicaʼ operación ortopédica, guni operarcaʼ ladxidóʼ binni ne guchaacaʼ órganu stícabe. * Stale biaje juntu rianda ca binni ni qué riná guicá rini né cani ricá ni, ne nuu tiru jma nagueenda rianda cani qué ricá ni, neca nahuiinicaʼ. * Dxandipeʼ la? guirutiʼ qué zanda guiníʼ zati tuuxa binni huará pa qué guicá rini o zabánibe pa guicabe ni.

Xiñee qué riná ca testigu stiʼ Jiobá guicacaʼ rini

Qué ricadu rini pur cani rizíʼdidu ndaaniʼ religión stidu ne cadi purtiʼ si qué nadu guicaadu xiixa tratamientu. Cásica Antiguo Testamento ne Nuevo Testamento cayabi laadu cadi guidoʼdo rini nin guicadu ni (Génesis 9:4; Levítico 17:10; Deuteronomio 12:23; Hechos 15:28, 29). Ne Dios na rini ca nga guendanabani (Levítico 17:14). Nga runi, laadu ca Testigu, rinándadu mandatu zeeda lu Biblia ra na cadi guidoʼdo rini nin guicadu ni purtiʼ runi respetardu Dios ni bidii laanu guendanabani.

Maʼ bichaa modo riníʼ ique ca doctor

Yanna maʼ zanda gúnicabe ca operación jma nagana sin iquiiñecabe rini

Dxiqué guníʼ ique ca doctor zaguucaʼ xquendanabani binni ra naxoo pa gudiicaʼ xiixa tratamientu sin rini dede guniʼcaʼ cayuuti binni laca laa pa guinabaʼ clase tratamientu riʼ. Peru maʼ bichaa modo riníʼ ique binni lu ca últimu iza riʼ. Casi lu iza 2004, biree ti tema lu ti revista ni caníʼ de medicina ni na: «Stale de ca modo huaquiiñecabe para guni tendércabe ca testigu stiʼ Jiobá maʼ laacani nga chiguiquiiñeʼ lu ca iza zeeda riʼ». * Ne libru ni láʼ Medicina transfusional, ni biree lu iza 2010, bizeeteʼ: «Guiráʼ modo riquiiñecabe para guni tendércabe ca Testigu zacanécani laadu para “guni operardu sin rini” ne gúnidu cani lu intiica operación».

Stale doctor ni nuu lu guidubi Guidxilayú maʼ bidxélacaʼ modo para cadi guxhiicaʼ rini ora maʼ cayuni operarcaʼ ti ganda gúnicaʼ operación jma nagana sin iquiiñecaʼ rini. Dede ca guidxi ra nabé pobre binni maʼ riquiiñecabe ca tratamientu riʼ ne stale binni ni cadi naca Testigu rinabaʼ guicaa cani.

^ párrafo 8 Medicina transfusional, yaza 14; Transfusion and Apheresis Science, volumen 33, númeru 3, yaza 349.

^ párrafo 10 Revista Española de Cardiología, volumen 59, númeru 5, yaza 507 dede 509; Acta Médica Colombiana, volumen 26, númeru 5, yaza 261; The Journal of Thoracic and Cardiovascular Surgery, volumen 134, númeru 2, yaza 287 ne 288; Texas Heart Institute Journal, volumen 38, númeru 5, yaza 563; Basics of Blood Management, yaza 2; Continuing Education in Anaesthesia, Critical Care & Pain, volumen 4, númeru 2, yaza 39.

^ párrafo 10 Revista de la Federación Argentina de Cardiología, volumen 34, númeru 3, yaza 407 ne 408; Revista Española de Cardiología, volumen 60, númeru 7, yaza 727 dede 731.

^ párrafo 14 Continuing Education in Anaesthesia, Critical Care & Pain, volumen 4, númeru 2, yaza 39.