Biiyaʼ guiraʼ ni nuu lu sitiu riʼ

GUCANÉ BIBLIA LAACABE PARA BICHAACABE

«Ruluíʼ ndaʼ maʼ napaʼ guiráʼ ni»

«Ruluíʼ ndaʼ maʼ napaʼ guiráʼ ni»
  • IZA GÚLEBE: 1962

  • PADÉ LAABE: Canadá

  • NI NAQUIIÑEʼ GÁNNALUʼ: Gúpabe ti vida inmoral

MODO BIBANEʼ DXIQUÉ

Guleʼ Montreal, ti guidxi jma naro’ba’ ni nuu lu provincia stiʼ Canadá de Quebec. Naa ne ti bizanaʼ jma huaniisi ne chupa bicheʼ guizáʼ gunnaxhii bixhózedu ne jñaadu laadu ora bisiniisicaʼ laadu ndaaniʼ ti barriu de Rosemont, ti lugar nabé galán. Nabé galán bibánidu raqué ne guendariuudxi.

Dxi nahuiineʼ, nabé guyuuladxeʼ guundaʼ Biblia. Rietenalaʼdxeʼ, dxi napaʼ 12 iza, nabé guyuuladxeʼ guundaʼ Nuevo Testamento ra caníʼ de xquendanabani Jesús. Bidxagayaaʼ modo gunnaxhiibe binni ne modo biabe laacaʼ, ne gupaʼ gana ñacaʼ casi laabe. Triste guininu ni, peru laga ziniiseʼ maʼ qué ñuneʼ ni ne bizulú bidxaagaʼ binni ni runi puru cosa dxabaʼ.

Bixhozeʼ guca saxofonista, bisaananebe naa saxofón stibe purtiʼ laaca guizáʼ guyuuladxeʼ guxhidxeʼ saa. Saa que nga ni jma gucuá iqueʼ guxhidxeʼ lu xquendanabaneʼ. Tantu guyuuladxeʼ ni nagueenda biziideʼ guxhidxeʼ guitarra. Despué, maʼ gupaʼ ti banda de rock né ca xhamiguaʼ, ruxhídxidu chupa chonna lugar ra raca saa. Caadxi productor famoso biiyacaʼ modo ruxhidxeʼ ne bíʼnicaʼ naa ti oferta, ngue runi bineʼ firmar ti contratu nabé risaca ne ti compañía ra raca grabar discu. Nabé binibiáʼcabe música stinneʼ ne guizáʼ rixidxi ni lu radiu de guidxi Quebec.

Ruluíʼ ndaʼ maʼ napaʼ guiráʼ ni. Nahuiineʼ, famoso naa ne runeʼ ganar stale bueltu ra guneʼ ni jma riuuladxeʼ. Riaa ra gimnasio ridxíʼ, runi entrevistárcabe naa, runeʼ firmar autógrafo ne rireeʼ lu televisión. Huaxhinni la? riuxhidxeʼ ne riaaʼ saa. Para guneʼ huantar públicu stinneʼ, bizulú guxudxeʼ ne despué maʼ gucaʼ drogar. Gupaʼ ti vida inmoral ne qué lica niníʼ iqueʼ ximodo gueeda guiluxeʼ.

Stale tu gupa envidia naa purtiʼ ruluíʼ nayecheʼ nabaneʼ. Peru dentru de naa la? runeʼ sentir cayaadxaʼ xiixa naa, jma ora nuaaʼ stubeʼ. Gucaʼ deprimir ne guyuaaʼ xizaa. Ni jma triste nga lu carrera ziaaʼ que, guti chupa productor stinneʼ de sida. Qué guiráʼ guidxagayaaʼ ngue. Guizáʼ riuuladxeʼ música, peru modo nabani ca binni que qué lica ñuuladxeʼ ni.

XIMODO GUCANÉ BIBLIA NAA BICHAAʼ

Neca napaʼ éxitu, bidieeʼ cuenta nabé feu modo nabani binni. ¿Xiñee nabé nuu cosa malu lu Guidxilayú? Guníʼ iqueʼ xiñee qué guni Dios gastiʼ. Bineʼ orar Dios ne gunabaʼ laabe guicábibe naa. Ti biaje laga nuaaʼ de vacación, bizulú biindaʼ Biblia sti biaje. Qué ñeneʼ chaahueʼ ni peru rabeʼ mayaca gueeda fin stiʼ binni guidxilayú.

Ra maʼ cayuundaʼ Biblia, biziideʼ biʼniʼ ayunar Jesús cuarenta dxi lu desiertu (Mateo 4:1, 2). Guníʼ iqueʼ, pa guneʼ zaqueca, zándaca guuyaʼ Dios, ngue runi gudixheʼ ti fecha para guzuluáʼ. Chupa semana ante guzuluáʼ ayuno que bixhidxi chupa testigu stiʼ Jiobá ra puertaʼ lidxeʼ, ne guluaaʼ laacabe casi ora maca cabezaʼ laacabe. Biiyadxiéʼ lú tobi de laacabe, ni lá Jacques, ne gudxeʼ laa: «¿Ximodo zanda chuʼnu seguru nabáninu lu ca últimu dxi stiʼ guidxilayú riʼ yaʼ?». Bixhélebe Biblia stibe ne biindanebe naa 2 Timoteo 3:1-5. Bineʼ laacabe stale pregunta ne bidxagayaa modo bicábicabe, dxandíʼ cani ne siempre biquiiñecabe Biblia para bicábicabe naa. Despué de yegánnacabe naa chupa chonna biaje, bidieeʼ cuenta cadi caquiiñeʼ guneʼ ayunar.

Bizulú biindané ca Testigu naa Biblia. Despué bigayaʼ guicha iqueʼ ne bizulú guyaaʼ guiráʼ reunión ndaaniʼ Yoo stiʼ Reinu. Guizáʼ sicarú modo bidxaagalúcabe naa ra reunión stícabe, ngue bicaa naa chuaaʼ seguru maʼ bidxelaʼ ni dxandíʼ.

Peru gupaʼ xidé bichaaʼ xquendanabaneʼ para guneʼ guiráʼ ni caziideʼ lu Biblia. Bisaanaʼ vida inmoral ni ziniáʼ que ne maʼ qué ñacaʼ drogar. Ne laaca cadi naquiiñeʼ guyubeʼ puru si para naa ne guyubeʼ modo gacaniáʼ xcaadxi binni. Cumu solteru naa ne maʼ napaʼ chupa xiiñeʼ la? caquiiñeʼ gapaʼ laacabe en sentidu emocional ne espiritual. Ngue runi, bisaanaʼ dxiiñaʼ runeʼ que ne gucuaaʼ ti dxiiñaʼ ndaaniʼ ti fábrica ra huaxiéʼ gudíxecabe naa.

Ni dxandíʼ la? nabé nagana guca para naa guchaaʼ xquendanabaneʼ. Laga cusaanaʼ de gacaʼ drogar, biabaʼ lu viciu que chupa chonna biaje (Romanos 7:19, 21-24). Peru ni jma guca nagana para naa nga gusaanaʼ vida inmoral ziniáʼ que. Nabé bisidxaga dxiiñaʼ stinneʼ que naa ne cumu huaxiéʼ riaxaʼ la? qué racané diʼ ni naa. Yanna, rindaa chonna beeu para guneʼ ganar biaʼ bineʼ ganar chupa hora dxi gucaʼ músicu.

Oración ca nga ni gucané naa stale para gunda bisaanaʼ ca viciu stinneʼ. Ne ra biindaʼ Biblia guizáʼ gucané ni naa. Rietenalaʼdxeʼ chupa chonna versículo stiʼ Biblia ni nabé guluu gana naa. Tobi de laani nga 2 Corintios 7:1, cayabi laanu, casi xpinni Cristu caquiiñeʼ gusianu laanu «de irá ni runi dxaba xcuerpu nu ne espíritu stinu». Sti textu ni gucané naa gusaanaʼ ca cosa dxabaʼ ni bineʼ nga Filipenses 4:13 ra ná: «Intiisi zanda gune purti nuu né Cristu naa ne racané naa». Bicabi Jiobá ca oración stinneʼ ne gucanebe naa guieneʼ ne guneʼ guiráʼ ni caziideʼ de lu Biblia. Nga gucané naa gudieeʼ xquendanabaneʼ laabe (1 Pedro 4:1, 2). Guyuaanisaʼ casi testigu stiʼ Jiobá lu iza 1997.

XI MAʼ GULEENDUÁʼ

Nuaaʼ seguru, pa qué nusaanaʼ modo bibaneʼ dxiqué, maʼ gueʼtuʼ naa yanna. Peru yanna dxandipeʼ nayecheʼ nuaaʼ. Peru xheelahuiineʼ, Elvie, beeda gaca ti ndaayaʼ para naa. Guirópadu nácadu ministru de tiempu completu ne riuuláʼdxidu stale gusíʼdidu binni ni dxandíʼ zeeda lu Biblia. Guizaa nayecheʼ nuaaʼ ne dxátipa ladxiduáʼ. Rudieeʼ xquíxepeʼ Jiobá purtiʼ gulidxi naa ra nuu (Juan 6:44).