Biiyaʼ guiraʼ ni nuu lu sitiu riʼ

GUCANÉ BIBLIA LAACABE PARA BICHAACABE

«Laca naa biyubeʼ ñateʼ»

«Laca naa biyubeʼ ñateʼ»
  • Iza gúlebe: 1978

  • Padé laabe: El Salvador

  • Ni naquiiñeʼ gánnaluʼ: Guyuube lu ti pandilla

MODO BIBANEʼ DXIQUÉ

«Pa dxandíʼ racaláʼdxiluʼ guiziidiluʼ de Dios la? cadi gusaanuʼ de gúʼndaneluʼ ca testigu stiʼ Jiobá». Guizáʼ bidxagayaaʼ ora gúdxicabe naa ca diidxaʼ que. Ca dxi que maʼ ziniáʼ ti tiempu de cayuundané ca Testigu naa. Peru para guiénetu xiñee bidxagayaaʼ la? chigüeniáʼ laatu ximodo bibaneʼ.

Guleʼ Quezaltepeque, ti guidxi stiʼ El Salvador. Gupa jñaaʼ 15 xiiñiʼ ne de lu xhoopaʼ ca zendaʼ naa. Bixhozeʼ ne jñaaʼ bíʼnicaʼ stipa pur gusiidicaʼ naa gacaʼ honradu ne guneʼ respetar ley. Ti testigu stiʼ Jiobá láʼ Leonardo ne chupa señora de repente yegánnacaʼ laadu para gusiidicaʼ laadu de ni zeeda lu Biblia. Peru naa qué ñuneʼ ni bisiidicabe naa ne seguidu bineʼ ni cadi jneza. Dxi maʼ napaʼ 14 iza, bizulú güee’ nisadxu’ni’ ne gucaʼ drogar né ca xhamiguaʼ ni guzayaniáʼ scuela. Tobi pur tobi bisaana scuela ne guyuucaʼ lu ti pandilla, ne bineʼ cásica bíʼnicabe. Puru lu calle guzadu guiráʼ dxi, bicaadu binni gudii laadu bueltu ne guláʼnadu pur ca viciu stidu.

Maʼ cani nuu lu pandilla que beeda gaca familia stinneʼ. Guníʼ iqueʼ cadi naquiiñeʼ gudxieedecheʼ laacabe. Casi ti dxi la? tobi de cani rizánedu que nabé guduʼbaʼ droga ne bicaalú ti vecinu stinneʼ. Ora cadíndecabe que vecinu stinneʼ bicueeza hombre que de nidinde ne bicaa ridxi puliciá. Guizáʼ bidxiicheʼ, ne bizuluáʼ guluaaʼ palu xcárrube para nundaabe xhamiguaʼ. Ora cayunedeyaʼ carru stibe que ne candaaʼ ca ventana stini la? bicaabe ridxi naa cuezadxiéʼ, peru qué nulabeʼ laabe.

Dxi napaʼ 18 iza gudindené pandilla stinneʼ ca puliciá ne gucalaʼdxeʼ nulaaʼ ti bomba laacaʼ, peru qué gannaʼ ximodo gúcheni lu nayaʼ. Rietenalaʼdxeʼ modo gucadé batanayaʼ dede bidegua’. Ne ora bibaneʼ ndaaniʼ hospital, bidieeʼ cuenta maʼ qué gapaʼ ti chu batanaya’, maʼ qué runadiagaʼ ladu derechu ne casi bicheepaʼ luaʼ derechu.

Neca biaanaʼ zaqué, casi biree de hospital que bibiguetaʼ ra nuu pandilla stinneʼ. Peru qué nindaa, gunaazeʼ puliciá naa ne biseguyoocaʼ naa. Raqué jmaruʼ si bidxaaga ca pandilleru. Guidubi dxi ma’ nuudu juntu, dede ora guendaréʼ hasta ora chigásidu. Ne laaca juntu ruzuludu rigúbadu marihuana.

XIMODO GUCANÉ BIBLIA NAA PARA BICHAAʼ

Ca dxi bidaguayuaa’ que, yeganna Leonardo naa. Ora canidu diidxaʼ, bidiibe cuenta cá tatuaje lu nayaʼ derechu. Para gunabadiidxabe naa: «¿Ñee nannuʼ xi raca significar guionnaʼ puntu ni napuʼ lu tatuaje riʼ la?». «Nannaʼ pue», gudxeʼ laabe, «riniʼni sexo, droga, ne rock and roll». Peru óraque na Leonardo: «Naa rabeʼ riniʼni hospital, cárcel ne guendaguti. Maʼ guyuuluʼ hospital, ne maʼ nuuluʼ cárcel. Yanna maʼ nannuʼ xi zeeda».

Guluu bieque ni gudxi Leonardo que naa. Nápabe razón, purtiʼ laca naa biyubeʼ ñateʼ pur modo nabaneʼ que. Gudxi Leonardo naa pa zanda guni estudiarné naa Biblia. Gudxeʼ laabe zanda. Ni biziideʼ de lu Biblia que bicaa naa guchaaʼ modo nabaneʼ. Lu Biblia biziideʼ ca diidxaʼ riʼ: «Pa idxaagu ni nadxaba la? zacá ni lii» (1 Corintios 15:33). Nga runi, ni bineʼ primé nga biyubeʼ guidxaagaʼ gadxé clase binni. Para nga la? maʼ qué ñaaʼ ra raca reunir cani nuu lu pandilla que, ne bizuluáʼ guyaaʼ ca reunión stiʼ ca testigu stiʼ Jiobá ni raca ndaaniʼ cárcel que. Raqué binebiaʼyaʼ Andrés, laabe maʼ guyuunísabe casi testigu stiʼ Jiobá ndaaniʼ cárcel que. Biʼniʼ invitarbe naa ti guendaréʼ. Despué, maʼ qué niguʼbaʼ marihuana casi guzulú dxi, sínuque guiráʼ siadóʼ naa ne Andrés ridúʼndadu ti textu de lu Biblia.

Qué nindaa bidii cani nuu lu pandilla que cuenta maʼ cuchaa’. Tobi de ca xaíque que guníʼ caquiiñeʼ guiniʼné naa. Bidxibe’ purtiʼ qué ganna’ xi gúnibe naa ora gánnabe xi cá iqueʼ guneʼ, purtiʼ nagana nga guiree binni lu ti pandilla. Gúdxibe naa: «Cadúʼyadu maʼ qué huayelu’ ca reunión ni rápadu, sínuque maʼ rieluʼ né ca testigu stiʼ Jiobá. ¿Xi cá íqueluʼ?». Gudxeʼ laabe racalaʼdxeʼ guneʼ estudiar Biblia ne guchaaʼ modo nabaneʼ. Bidxagayaaʼ ora guniʼbe zuni respetar pandilla que naa pa gusihuinneʼ dxandí’ racalaʼdxeʼ gaca’ testigu stiʼ Jiobá. Óraque gúdxibe naa: «Pa dxandíʼ racaláʼdxiluʼ guiziidiluʼ de Dios la? cadi gusaanuʼ de gúʼndaneluʼ ca testigu stiʼ Jiobá. Ribézadu maʼ cadi guʼnuʼ cosa malu. Runeʼ felicitar lii. Jneza cayúniluʼ. Zanda gacané ca Testigu lii. Biʼniʼ estudiarnécabe naa dxi guyuaaʼ Estados Unidos ne caadxi de ca xfamilia’ nácacaʼ testigu stiʼ Jiobá. Cadi guidxíbiluʼ, ne cadi guireeluʼ gana». Cadxibeʼ ruaʼ, peru laaca guizáʼ nayecheʼ guyuaa’. Bidieeʼ xquíxepeʼ Jiobá. Bineʼ sentir casi ti pájaru ni guleecabe laa ndaaniʼ jaula, ne bieneʼ ni guníʼ Jesús riʼ: «Zanna tu ni dxandíʼ, ne zaladi tu ra cá tu yaga purtiʼ maʼ nanna tu ni» (Juan 8:32).

Caadxi de cani guca xhamiguaʼ, rudiicaʼ naa droga para si gú’yaca’ pa zaguubaʼ ni. Ni dxandíʼ la? guyuu biaje biaba’ lu trampa que. Peru ra zidiʼdiʼ dxi, guizáʼ bineʼ orar de guidubi ladxiduáʼ, ne gunda bisaanaʼ ca viciu que (Salmo 51:10, 11).

Bireesiáʼ de cárcel que, stale tu guníʼ ique zabiguetaʼ guibaneʼ casi dxiqué, peru qué ñuneʼ ni. Lugar de ngue, stale biaje guyaaʼ ra cárcel peru para guinieniáʼ xcaadxi presu de ni caziideʼ. Raqué, cani guca xhamiguaʼ que gúnnaca’ maʼ bichaaʼ modo naa. Peru ca enemigu stinneʼ, cadi zaqué diʼ guníʼ íquecaʼ. Ti dxi laga cayuneʼ predicarniáʼ ti hermanu, málasi bidxiña caadxi binni laadu, nácasini cani nuu lu ti pandilla ni bicaalú laadu dxiqué. Naazecaʼ guiibaʼ ne nuucaʼ guuticaʼ naa. Ne diidxaʼ nadóʼ ne valor gudxi hermanu que laacabe maʼ cadi nuaadiáʼ lu ti pandilla. Peru naa bineʼ stipa pur gucueezaʼ laca naa. Despué de gudíñecabe naa gúdxicabe naa maʼ cadi guibiguetaʼ raqué, óraque bidiicabe lugar chuudu. Gucané Biblia naa para bichaaʼ xquendanabaneʼ, purtiʼ pa ñúnicabe ni naa dxiqué la? nuquixe ni laacabe. Yanna ma’ rinandaʼ conseju stiʼ Biblia ni zeeda lu 1 Tesalonicenses 5:15, ra ná: «Laguuya gá qué chi uquixe tu ni guni binni laatu, sínuque lagaca nachaʼhui ne irá hermanu, ne zaqueca cani qué runi cre».

Dede dxi maʼ naca’ testigu stiʼ Jiobá, runeʼ stipa pur gacaʼ honradu, neca raca ni nagana. Peru ni racané naa nga Jiobá, ca conseju stiʼ Biblia ne ca xhamiguaʼ. Qué racala’dxe’ guibiguetaʼ guibaneʼ casi dxiqué (2 Pedro 2:22).

XI MAʼ GULEENDUÁʼ

Guca’ ti hombre ni riuula’dxi’ tinde ne nabé ridxiichi. Pa naa ñuneʼ seguir modo ziaaʼ que, seguru maʼ guteʼ. Guiráʼ ni biziideʼ lu Biblia bichaa cani modo naa. Bisaanaʼ ca viciu ni gupaʼ ne biziideʼ gacaʼ nadóʼ né cani guca xhenemiguáʼ (Lucas 6:27). Yanna napa’ xhamiguaʼ ni racané naa gapa’ cualidad galán (Proverbios 13:20). Maʼ nuaaʼ nayecheʼ ne nannaʼ xi pur nabaneʼ, purtiʼ cayuneʼ ni ná ti Dios ni racalaʼdxiʼ guni perdonar guiráʼ cosa malu bineʼ (Isaías 1:18).

Lu iza 2006, guyaaʼ scuela para ca evangelizador ni naca solteru. Caadxi iza despué, bichagana’yaʼ xheelahuiineʼ ne gúpadu ti dxaapahuiiniʼ. Yanna riquiiñeʼ tiempu stinneʼ para gacaniáʼ xcaadxi binni guiziidicaʼ ca principiu ni zeeda lu Biblia ni gucané naa. Laaca nacaʼ ancianu de congregación ne runeʼ stipa pur gacaniáʼ cani nahuiiniʼ para cadi gúnicaʼ casi bineʼ dxiqué. Lugar de nuyube’ ñateʼ la? yanna cuyubeʼ guibaneʼ sin qué chuʼ dxi gateʼ casi cayuni prometer Dios ni lu Biblia.