Biiyaʼ guiraʼ ni nuu lu sitiu riʼ

Ñee ruchiá ca testigu stiʼ Jiobá ca familia ca la? o racanécabe laacaʼ chuʼcaʼ tobi si

Ñee ruchiá ca testigu stiʼ Jiobá ca familia ca la? o racanécabe laacaʼ chuʼcaʼ tobi si

Ca testigu stiʼ Jiobá rúnidu stipa pur gacanedu familia stidu chuʼcaʼ tobi si ne zaqueca racanedu ca vecinu stidu. Rusisácadu familia stidu, purtiʼ nánnadu Dios nga gudixhestí ni (Génesis 2:21-24; Efesios 3:14, 15). Lu Biblia zeeda stale principiu ni racané binni de guiráʼ guidxi gapa ti guendaxheelaʼ nayecheʼ ne chuʼcaʼ tobi si.

Xi runi ca testigu stiʼ Jiobá para chuʼ binnilídxicaʼ tobi si

Primé, rúnidu stipa pur chinándadu ca conseju ni zeeda lu Biblia, ni racané laadu gannaxhiidu xheeladu ne gusiniisidu ca xiiñidu jneza (Proverbios 31:10-31; Efesios 5:22–6:4; 1 Timoteo 5:8). Zanda gacané Biblia ca familia ca chuʼcaʼ tobi si neca nápacaʼ gadxé gadxé religión (1 Pedro 3:1, 2). Guidúʼyanu xi guníʼ chupa chonna binni ora beeda gaca xheelacaʼ testigu stiʼ Jiobá:

  • «Nabé gudíndedu ca primé xhoopaʼ iza de bichaganadu ne qué ridxéladu xi gúnidu. Peru ora guca Ivete testigu stiʼ Jiobá, jma gunnaxhii naa ne jma gupa paciencia naa. Modo bichaabe que gucané ni para cadi nibiá xquendaxheeladu.» (Clauir, de Brasil)

  • «Ora Chansa, xheelaʼ, bizulú biindané ca testigu stiʼ Jiobá, qué ñuuladxeʼ, purtiʼ guníʼ iqueʼ ruchiácabe familia. Peru ra zidiʼdiʼ tiempu bidieeʼ cuenta huayacané Biblia xquendaxheeladu.» (Agness, de Zambia)

Guiropa, ora rucheechedu diidxaʼ rusíʼdidu ca xpecínudu ximodo zanda gacané Biblia laacaʼ lu ca tema ni zeeda riʼ:

  • Guyubi binni tu guichaganáʼ

  • Gudxiilucaʼ ca guendanagana gápacaʼ primé iza de bichaganacaʼ

  • Chúʼcabe galán né ca suégrucabe

  • Gánnacabe iquiiñecabe xpuéltucabe

  • Gusaana de tindediidxacabe

  • Guiziidicabe gutiidiláʼdxicabe stóndacabe

  • Gulídxecabe ca xiiñicabe

Ñee rapa ti familia guendanagana ora tobi de laacaʼ raca Testigu la?

Naquiiñeʼ gánnanu nuu biaje rápacaʼ guendanagana. Ti informe ni gulee empresa Sofres lu iza 1998, bizeeteʼ 1 de cada 20 guendaxheelaʼ rapa guendanagana ora tobi de laacaʼ raca testigu stiʼ Jiobá.

Jesús maca guníʼ ziuu biaje zapa ca xpinni guendanagana né binnilídxicaʼ (Mateo 10:32-36). Ti hombre ni ruundaʼ de historia láʼ Will Durant guníʼ, tiempu biʼniʼ mandar ca romanu guníʼcabe «ruchiá ca xpinni Cristu familia». * Ca dxi riʼ, nuu biaje zacaca riníʼcabe de ca testigu stiʼ Jiobá. Peru, ñee dxandíʼ nga ruchiá ca testigu stiʼ Jiobá familia la?

Tribunal Europeo de Derechos Humanos

Dxi guníʼcabe ca Testigu nga ruchiá ca familia ca, Tribunal Europeo de Derechos Humanos bizeeteʼ, stale biaje ca binni ni cadi naca Testigu nga qué rinacaʼ «guni respetarcaʼ derechu ni napa binnilídxicaʼ de gapa religión stiʼ ne guni ni nani». Tribunal que laaca guníʼ: «Ndiʼ nga guendanagana ridxaagalú ca familia ca ora gadxé gadxé religión nápacaʼ; ne cadi ca testigu stiʼ Jiobá si nga rapa guendanagana riʼ». * Ne neca qué riuulaʼdxiʼ familia stidu nácadu testigu stiʼ Jiobá, rúnidu stipa pur chinándadu conseju riʼ: «Neca uchee né cabe laatu, cadi uquixe tu ni la laacabe. [...] Laguni biaʼ ganda para cadi chuʼ dinde né tu irutiʼ. Zaa guni cabe ni laacabe peru cadi né rusi ca laatu» (Romanos 12:17, 18).

Xiiñeʼ runi cré ca testigu stiʼ Jiobá naquiiñeʼ guichaganacaʼ laaca sti Testigu yaʼ

Laadu casi Testigu, rinándadu conseju ni rudii Biblia ra na guichaganadu «ti xpinni Señor»; o guichaganadu ti binni ni runi cré laaca ni runi credu (1 Corintios 7:39). Dxandipeʼ racané conseju riʼ laadu. Casi ti tema ni biree lu ti revista ni láʼ Journal of Marriage and Family lu iza 2010 guníʼ, «ca guendaxheelaʼ ni napa ngueca religión ne ngueca ni runi crecaʼ» jma galán ribánicaʼ. *

Peru ca testigu stiʼ Jiobá qué rábicaʼ ca xpínnicaʼ gusaanacaʼ xheelacaʼ pa cadi naca Testigu. Biblia na: «Pa nuu tuuxa hermanu napa xheela ni qué runi cre Cristu la? cadi ilaa né xheela pa na xheela cueza né laa. Ne zaqueca pa nuu hermana napa xheela ni qué runi cre Cristu, ne na xheela cueza né laa la? laca cadi usaana xheelaʼ» (1 Corintios 7:12, 13). Laadu laaca rinándadu ni na conseju riʼ.

^ párrafo 17 Biiyaʼ libru ni láʼ César y Cristo, tomo II, yaza 405.

^ párrafo 18 Biiyaʼ veredicto ni láʼ Testigos de Jehová de Moscú contra Rusia, yaza 26 ne 27, párrafo 111.

^ párrafo 20 Biiyaʼ tema ni zeeda lu revista Journal of Marriage and Family, volumen 72, número 4, (agosto 2010), yaza 963.