Biiyaʼ guiraʼ ni nuu lu sitiu riʼ

Ñee dxandíʼ maʼ qué rieegucabe cani rusaana religión stícabe la?

Ñee dxandíʼ maʼ qué rieegucabe cani rusaana religión stícabe la?

Qué rusaana de guiéʼgudu cani maʼ qué rucheeche diidxaʼ ne cani maʼ qué rié guendaridagulisaa, neca maʼ guyuunísacaʼ para gácacaʼ testigu stiʼ Jiobá. Laga rúnidu stipa pur gacanedu laacaʼ chuʼcaʼ galán nezalú Dios ne riguʼdu gana laacaʼ guibiguétacaʼ ra nuube.

Ora guni ti Testigu ni maʼ guyuunisa ti cosa nabé malu, zanda cueecabe laa ndaaniʼ neza binni ridagulisaa. Peru cadi guiráʼ diʼ biaje guni tuuxa ti cosa nabé malu nga raca expulsar. Pa gapa binni costumbre guni xiixa cosa dxabaʼ ni na Biblia cadi jneza ne qué gaca arrepentir la? zaca expulsar ne maʼ qué zadxaaga ca binni ridagulisaa laa. Nayaguieʼ modo na Biblia: «Lacuee ni cuchee ca lade tu» (1 Corintios 5:13).

Xi guizaaca xa pa gaca expulsar ti hombre ne nácaruʼ xheelabe ne ca xiiñibe testigu stiʼ Jiobá yaʼ. Neca maʼ qué zaniʼnécabe laabe de Dios, peru qué zaxélebe de ca binnilídxibe. Qué zusaana de guiniʼné xheelabe laabe ne zaníʼneruʼ ca xiiñibe laabe casi riniʼné binni bixhoze, zabánicabe casi modo maca biaacabe ndaaniʼ lídxicabe.

Zándaruʼ cheʼ cani maʼ guca expulsar ca guendaridagulisaa stidu ne pa gacaláʼdxicaʼ la? zanda gacané ca binnigola ni nuu ndaaniʼ neza binni ridagulisaa laacaʼ. Raca ni zacá para gacanécabe laacaʼ gusihuínnicaʼ racaláʼdxicaʼ gácacaʼ testigu stiʼ Jiobá stiʼ biaje. Ca expulsadu ni gucaanáʼ ca cosa dxabaʼ ne gusihuinni racalaʼdxiʼ guibani modo na ca principiu zeeda lu Biblia de guidubi ladxidóʼ la? zanda guibiguetaʼ ndaaniʼ neza binni ridagulisaa.