Biiyaʼ guiraʼ ni nuu lu sitiu riʼ

GUCANÉ BIBLIA LAACABE PARA BICHAACABE

Yánnaruʼ guyuaaniáʼ bixhozeʼ tobi si

Yánnaruʼ guyuaaniáʼ bixhozeʼ tobi si
  • IZA GÚLEBE: 1954

  • PADÉ LAABE: Filipinas

  • NI NAQUIIÑEʼ GÁNNALUʼ: Bixélebe de bixhózebe ni nabé gudiñe laacabe

MODO BIBANEʼ DXIQUÉ

Stale turista rigánnacaʼ ca cascada ni nabé runibiáʼ binni ni nuu gaxha de guidxi Pagsanján (Filipinas). Raqué biniisi bixhozeʼ, Nardo Lerón, lade binni pobre. Ra biiyabe ca cosa ni cadi jneza runi ca gobiernu, ca policía ne ra rúnibe dxiiñaʼ, ngue biʼniʼ laabe ti hombre ni cadxiichi stubi ne daʼ xiana.

Bixhozeʼ ne jñaaʼ nabé bíʼnicaʼ dxiiñaʼ para gusiniisicaʼ xhono xiiñicaʼ. Jma nga riuucabe ndaaniʼ ca dani que para gúʼyacabe ca cosecha stícabe ne qué riuupécabe yoo. Stale biaje naa ne Rodelio bicheʼ gupa xidé gúpadu ca bíchidu ne nabé gundaanadu. Qué ñápadu tiempu para niguítedu casi runi ca xcuidi. De lu gadxe iza laadu bizulú bínidu dxiiñaʼ ra ruzuhuaacabe yagahuiiniʼ. Maʼ zinedu caadxi coco guizáʼ nanaa lu ca dani ni nasoo que. Ora qué randa ruaʼdu cani rucaacabe laadu xhubiyudu cani.

Gupa xidé biʼniʼ huantardu ca golpe bidii bixhózedu laadu peru ni jma naná nga gúʼyadu modo riguíñebe jñaadu. Gucaláʼdxidu nucueezadu laabe peru qué ñanda diʼ. Naa ne Rodelio guníʼ stiidxadu guutidu bixhózedu ora guiniisidu. ¡Guizáʼ gucalaʼdxeʼ ñapaʼ ti bixhozeʼ ni ñannaxhii laadu!

Cumu nabé nagueenda ridxiichi bixhozeʼ la? bineʼ sentir triste ne bidxiicheʼ, ngue runi bireeʼ de ra lidxeʼ dxi napaʼ 14 iza. Gulezaʼ lu calle ti tiempu ne bizulú guduubaʼ marihuana. Bineʼ dxiiñaʼ ne ti lancha para chiniá’ ca turista que ti gúʼyacaʼ ca cascada que.

Despué de caadxi iza la? guyaaʼ universidad ni nuu Manila. Ca fin de semana que gupa xidé bineʼ viajar Pagsanján para guneʼ dxiiñaʼ, pur ngue huaxiéʼ tiempu gupaʼ para guundaʼ. Nagana guca xquendanabaneʼ ne qué guidxelaʼ pa ladu chaaʼ, qué randa rucueeza marihuana que ansiedad stinneʼ. Bizulú bineʼ prueba metanfetaminas, cocaína ne heroína. Pur ca droga que gupaʼ ti vida inmoral. Gulezaʼ lade binni pobre, ra qué raca ni jneza ne naná modo nabani binni. Gucananaladxeʼ gobiernu ne bigaaneʼ donda laa pur guiráʼ ngue. Gunabadiidxaʼ Dios: «¿Xiñee zacá nga guendanabani?». Peru nin ti religión ra guyaaʼ qué nicabi naa. Bizulú gucaʼ drogar jma purtiʼ maʼ qué guidxelaʼ xi guneʼ.

Lu iza 1972, ca estudiante de Filipinas guca organizarcaʼ para gucaalucaʼ gobiernu. Bidaguáʼ tobi de ca grupo que ne bilúxedu lu guendaridinde. Gunaazecabe stale ne chupa chonna beeu despué gudixhe ca gobiernu que ley para guiaapaʼ xquídxicaʼ.

Biguetaʼ lu calle, peru yanna maʼ ridxibeʼ quita guni ca autoridad naa xiixa pur guyuaaʼ lu guendaridinde que. Para gándaruʼ sieʼ droga la? bizulú gulaʼnaʼ ne guyuaaniáʼ jma gunaa ni napa bueltu ne de sti guidxi. Qué nizaaladxeʼ pa gateʼ o pa guibaneʼ.

Jñaaʼ ne tobi de ca bicheʼ ni jma nahuiiniʼ bizulú biindacaʼ Biblia né ca testigu stiʼ Jiobá. Guizáʼ bidxichi bixhozeʼ ne bizaaquiʼ ca publicación ni nápacabe. Peru biʼniʼ huantárcabe ne gúcacabe Testigu.

Ti dxi, guniné ti Testigu bixhozeʼ de ca promesa stiʼ Dios ni caníʼ de que zaca ni jneza lu Guidxilayú (Salmo 72:12-14). Guyuulaʼdxiʼ bixhozeʼ ca promesa riʼ ne gudixhe ique guiziidiʼ jma de Biblia. Cadi de ti gobiernu ni nachaʼhuiʼ si biziidibe laaca biziidibe xi ribeza Dios guni ti hombre ni maʼ bichaganáʼ ne napa xiiñiʼ (Efesios 5:28; 6:4). Despué laabe ne ca bicheʼ gúcacabe Testigu. Cumu guyuaaʼ zitu de familia stinneʼ la? qué ñanna gastiʼ.

XIMODO GUCANÉ BIBLIA NAA BICHAAʼ

Lu iza 1978 yendezaʼ Australia. Nin ne ndaaniʼ guidxi ra nuu guendariuudxi ne ra nabánicabe galán qué nidxelaʼ ñatadxí xquendabiaaneʼ. Guxudxeruáʼ ne gucaʼ drogar. Despué, iza queca, yeganna ca testigu stiʼ Jiobá naa. Guyuuladxeʼ ni bisiidicabe naa lu Biblia ra ziuu binni tobi si, peru guca nagana para naa gapaʼ confianza laacabe.

Despué biguetaʼ Filipinas chupa chonna semana si. Ca bicheʼ gúdxicaʼ naa cayuni bixhozeʼ stipa pur guchaa modo laa, peru cumu daʼ xiana ndaaniʼ ladxiduáʼ la? qué ninaʼyaʼ ñuuyaʼ laabe.

Bizanaʼ ni jma nahuiiniʼ bisiene naa né Biblia xiñee nuu stale guendananá ne qué raca ni jneza ndaaniʼ Guidxilayú. Bidxagayaaʼ, ximodo ganda guicabi ti dxaapahuiiniʼ ni qué ganna gastiʼ ca pregunta ni huayuneʼ. Ante chaaʼ bidii bixhozeʼ naa libru Usted puede vivir para siempre en el paraíso en la Tierra. * Gúdxibe naa: «Maʼ cadi guyubuʼ. Libru riʼ zacané lii guidxélaluʼ ni cuyúbiluʼ». Gúdxibe naa guyubeʼ ca testigu stiʼ Jiobá ora chindayaʼ Australia.

Yenandaʼ conseju stiʼ bixhozeʼ ne bidxelaʼ ti Yoo stiʼ Reinu stiʼ ca testigu stiʼ Jiobá gaxha de ra lidxeʼ, guidxi Brisbane. Gucuaaʼ ti cursu bíblicu. Lu ca profecía stiʼ Biblia, casi capítulo 7 stiʼ Daniel ne capítulo 9 stiʼ Isaías, biziideʼ de que gobiernu stiʼ Dios zuni ni jneza ne laa zuni gobernar laanu despué. Ne laaca biziideʼ mayaca gaca Guidxilayú riʼ ti paraísu. Gucalaʼdxeʼ ñuulaʼdxiʼ Jiobá modo naa, peru nannaʼ caquiiñeʼ gucueezaʼ naa de cani runeʼ sentir ne gusaanaʼ ca droga que, nisadxuʼniʼ ne modo nabaneʼ que. Bisaanaʼ gunaa nabezaniáʼ que ne laaca bisaanaʼ ca viciu que. Laga ziniisi confianza ni napaʼ Jiobá, gunabaʼ laabe gacanérube naa para guchaaʼ modo naa.

Chaʼhuiʼ chaʼhuiʼ bieneʼ dxandíʼ zanda guchaa ni caziideʼ que ti binni. Biblia ná pa laanu gúninu stipa la? zanda guchaʼnu modo laanu (Colosenses 3:9, 10). Laga cayuneʼ stipa para guchaaʼ modo naa, bidieeʼ cuenta maʼ bichaa bixhozeʼ modo laa casi modo gudxi ca bicheʼ ni naa. Lugar de nidxiicheʼ ne ñuuyaʼ bixhozeʼ casi ti enemigu, gucalaʼdxeʼ ñuneʼ chaahueʼ guendanagana que né laabe. Últimu bineʼ perdonar laabe ne guleeʼ guiráʼ xiana gupaʼ de dxi nahuiineʼ que ndaaniʼ ladxiduáʼ.

XI MAʼ GULEENDUÁʼ

Dxi nahuiineʼ bineʼ casi biʼniʼ xcaadxi binni para gunenaʼyaʼ stobi. Ne biaʼsi peʼ ngue ni ná Biblia pur modo naa que. Cumu bidxaagaʼ binni ni runi ni cadi jneza la? gucaʼ casi laacabe (1 Corintios 15:33). Peru lade ca testigu stiʼ Jiobá bidxelaʼ cani dxandíʼ xhamiguaʼ ni gucané guchaaʼ modo naa. Ne ládecabe binebiaʼyaʼ xheelaʼ, Loretta. Guirópadu bisíʼdidu binni zanda gacané Biblia laacaʼ.

Cayahuaniáʼ xheelaʼ ne ca xhamiguaʼ ti guendaró

Pur gucané Biblia bixhozeʼ, beeda gaca ni qué lica niníʼ iqueʼ ñaca: gunnaxhiibe jñaaʼ stale, gúcabe humilde ne nadóʼ. Ora bidúʼyadu despué de guyuaanisaʼ casi testigu stiʼ Jiobá lu iza 1987, gudiidxibe naa ne ngue nga primé biaje bíʼnibe ni.

Jma de treinta y cinco iza biʼniʼ predicar bixhozeʼ ne jñaaʼ mensaje de esperanza ni rudii Biblia. Beeda gácabe ti hombre runi dxiiñaʼ, nachaʼhuiʼ ne nabé binibiáʼcabe laabe purtiʼ gucanebe binni. Ra gudiʼdiʼ iza bineʼ respetar laabe ne gunnaxhieeʼ laabe. Guyuaaʼ orgulloso purtiʼ bixhozeʼ laabe. Gútibe lu iza 2016, rietenalaʼdxeʼ laabe né stale cariñu, purtiʼ nannaʼ guirópadu bichaʼdu modo laadu ra yenándadu guiráʼ ca principiu stiʼ Biblia. Maʼ cadi nanaladxeʼ laabe. Ne nabé rudieeʼ xquíxepeʼ purtiʼ bidxelaʼ bixhozeʼ ni nuu ibáʼ, Jiobá, laa cayuni prometer gunduuxeʼ ca guendananá ni ridxaagalú ca familia.

^ párrafo 20 Ni gulee ca testigu stiʼ Jiobá. Maʼ qué riree ni.