Biiyaʼ guiraʼ ni nuu lu sitiu riʼ

guyé lu índice

Ñee Pedru nga guca primé papa la?

Ñee Pedru nga guca primé papa la?

«Cardenal Jorge Mario Bergoglio S. I. maʼ bibí para gaca Sumo Pontífice númeru 265 ni chichuu lugar stiʼ Pedru.» (VATICAN INFORMATION SERVICE, GUIDXI VATICANO, 13 STIʼ MARZO 2013)

«Obispo stiʼ Roma nga xaíque Yuʼduʼ purtiʼ laa nga gucuaa lugar stiʼ San Pedru, ni bidii Jesucristu dxiiñaʼ risaca riʼ primé.» (LA PRIMAUTÉ DE LʼÉVEQUE DE ROME DANS LES TROIS PREMIERS SIÈCLES [LA PRIMACÍA DEL OBISPO DE ROMA EN LOS PRIMEROS TRES SIGLOS], NI BICAA VINCENT ERMONI, 1903)

«Pa tuuxa guiníʼ [...] cadi dxandíʼ gucuaa Romano Pontífice lugar stiʼ Pedru la? naquiiñeʼ cueecabe laa.» (PRIMÉ CONCILIO VATICANO, 18 STIʼ JULIO 1870)

PARA millón de católicu ni nuu lu Guidxilayú, ni gudíxhecabe lu primé Concilio Vaticano ni guca iza 1870 que nga ni jma risaca para Yuʼduʼ ne laani nga ni rusiidicabe. Peru ni risaca nga gánnanu pa rusiidiʼ Biblia ni. Ñee papa Francisco nga biaana lugar stiʼ apóstol Pedru la? Ñee Pedru nga guca primé papa la?

«LU GUIÉ RIʼ CHIGUCUÉʼ YUʼDUʼ STINNEʼ»

Lu Concilio Vaticano ni guca 1870 gudíxhecabe modo guiénecabe Mateo 16:16-19 ne Juan 21:15-17. Ora guidúʼndanu ca versículo riʼ ne xcaadxi relatu ni zeeda lu Biblia ra byuiʼné Jesús Pedru diidxaʼ, zadúʼyanu biʼniʼ apóstol riʼ ti dxiiñaʼ risaca dxi bizulú bidale ca xpinni Cristu. Ne dxi binibiáʼcabe, guníʼ Jesús zuluíʼ Pedru naca casi ti guié pur modo laa (Juan 1:42). Peru, ñee bidii Jesús laabe ti puestu jma risaca la?

Lu Mateo 16:17 ne 18 ridúʼndanu ca diidxaʼ guníʼ Jesús. Racá na: «Ne naa cayabeʼ lii: “Lii nga Pedru [ni riníʼ lá ca nga «Ti Pedasu Guié»], ne lu guié riʼ chigucuéʼ Yuʼduʼ stinneʼ, ne nin Guendaguti qué zanda guchiá ni”». * Ñee caníʼ Jesús Pedru, ti binni guidxilayú, nga chigaca xaíque stiʼ «Yuʼduʼ» o congregación la? Ñee jma risaca dxiiñaʼ chigúnibe que xcaadxi xpinni Cristu la? Ximodo biene ca apóstol que ca diidxaʼ riʼ yaʼ. Lu ca Evangeliu rieeteʼ gudinde diidxarúcabe despué de guníʼ Jesús ca diidxaʼ que de tu laa nga jma risaca ládecabe (Mateo 20:20-27; Marcos 9:33-35; Lucas 22:24-26). Pa nudii Jesucristu ti puestu jma risaca Pedru, ñee nidinde diidxarúcabe tuu nga ni jma risaca la?

Xi biene Pedru né ca diidxaʼ guníʼ Jesús que yaʼ. Cumu judíu laabe la? nánnabe nuu caadxi profecía ni cuzeeteʼ de ti «guié» o ti «guié nuaʼ xiixa» (Isaías 8:13, 14; 28:16; Zacarías 3:9). Ora bicaa Pedru carta ra nuu xcaadxi xpinni Cristu,  bisiénebe Jesucristu, Mesías, nga «guié» ni maca bieeteʼ gueeda que. Biquiiñeʼ apóstol riʼ diidxaʼ griegu petra para guiníʼ de Cristu, laca diidxaʼ ni biquiiñeʼ Jesús lu Mateo 16:18 (1 Pedro 2:4-8).

Apóstol Pablu laaca qué nusaana de ñuni xhiiñaʼ Cristu. Ñee guníʼ íquebe bidii Jesús ti dxiiñaʼ jma risaca Pedru la? Guníʼ Pablu risaca dxiiñaʼ biʼniʼ Pedru ndaaniʼ congregación lu primé siglu. Bizeetebe zeeda gaca apóstol riʼ «tobi de ca pilar ni naaze Yuʼduʼ stiʼ Dios». Para Pablu la? nuuruʼ binni ni zeeda gaca casi pilar stiʼ yuʼduʼ stiʼ Dios (Gálatas 2:9). Ne pa nibí Jesús Pedru para ñaca xaíque stiʼ ca xpinni, ñee raʼbuʼ niníʼ Pablu ruuyaʼ xcaadxi xpinni Cristu que laabe casi tobi de ca pilar ni naaze Yuʼduʼ stiʼ Dios la?

Ti biaje gudindené Pablu apóstol Pedru purtiʼ biʼniʼ menu caadxi xpinni Cristu, despué bicaa Pablu ca diidxaʼ riʼ: «Gudindeniáʼ laabe purtiʼ cadi jneza ni bíʼnibe» (Gálatas 2:11-14). Ca diidxaʼ guníʼ Pablu riʼ, cusihuinni cani qué nibí diʼ Jesús Pedru para gaca xaíque Yuʼduʼ o congregación stiʼ, ne qué nibibe nin sti binni guidxilayú, sínuque nánnabe Jesucristu nga xaíque stiʼ congregación. Nanna dxichi Pablu «guié que nga Cristu» (1 Corintios 3:9-11; 10:4).

«LII NGA PEDRU...»

Yanna, ximodo zanda guiénenu ca diidxaʼ: «Lii nga Pedru, ne lu guié riʼ chigucuéʼ Yuʼduʼ stinneʼ» yaʼ. Para guiénenu relatu riʼ la? naquiiñeʼ guidúʼndanu guidubi ni. Xidé ngue caníʼ Jesús ne Pedru pue. Casi gunabadiidxaʼ Jesús ca discípulo stiʼ: «Tu rábitu naa». Casi zeʼ Pedru guníʼ: «Lii nga Mesías, Xiiñiʼ Dios ni nabani». Gudxi Jesús laabe jneza ngue modo bicábibe ne gudxi laabe zucuí «Yuʼduʼ» o congregación stiʼ lu ti «guié» jma naguidxi, ne guié ca nga Jesucristu, guié ni bisihuinni Pedru napa fe (Mateo 16:15-18).

Ximodo zanda guiénenu ca diidxaʼ «Lii nga Pedru, ne lu guié riʼ chigucuéʼ Yuʼduʼ stinneʼ

Nga runi, stale de cani rábicabe «Padres de la Iglesia» (cani gudixhestí cani runi cré ca católicu)  bizeetecaʼ Cristu nga guié ni cuzeeteʼ Mateo 16:18. Ti ejemplu de laani nga ni guníʼ Agustín de Hipona lu siglu gaayuʼ, laabe nabe: «Sicaríʼ guníʼ Señor: “Lu guié riʼ chigucuéʼ Yuʼduʼ stinneʼ”; purtiʼ Pedru guníʼ: “Lii nga Cristu, Xiiñiʼ Dios ni dxandíʼ”. Óraque bicabi Señor: “Lu guié ni cuzeeteluʼ riʼ zucuéʼ Yuʼduʼ stinneʼ”». Stale biaje bizeeteʼ Agustín «Cristu nga guié» que.

Pa ñaca nibani Agustín yanna ne ca binni ni riníʼ ique casi laabe, ñuuyaʼ binni laacabe casi ora cucaalúcabe modo rusiidiʼ Iglesia Católica. Peru cadi laasícabe. Teólogo Ulrich Luz de Suiza guníʼ pa ñuni juzgar Concilio Vaticano ni guca lu iza 1870 guiráʼ ca erudito o ca binni ni rusiene de Biblia nabani yanna, nihuinni laaca cucaalucaʼ ni gudíxhecabe que, purtiʼ nacaʼ «guié» que nga Jesús.

ÑEE PAPA NGA BIAANA LUGAR STIʼ PEDRU LA?

Qué lica rieeteʼ diidxaʼ «papa» tiempu stiʼ apóstol Pedru. Maʼ lu siglu gaʼ nga biquiiñeʼ stale obispo de gadxé guidxi diidxaʼ ca ládecaʼ. Qué ñunadiágapeʼ binni diidxaʼ riʼ ante de siglu once, sínuque maʼ despué biquiiñecabe ni para guiníʼcabe de tuuxa jma risaca. Qué ñuni cré ca primé xpinni Cristu gucuaa apóstol Pedru ti guenda ni jma risaca ne laaca qué ñuni crecaʼ pa ziuu stobi lugar stibe. Nga runi, ti erudito alemán láʼ Martin Hengel guníʼ: «Nin historia ne nin teología qué ruzeeteʼ pa nuu ti “puestu” para gaca tuuxa papa».

Yanna, ñee Pedru nga guca primé papa la? Ñee guyuuruʼ xcaadxi binni lugar stibe la? Ñee rusiidiʼ Biblia naquiiñeʼ chuʼ ti xaíque, papa, casi rusiidiʼ ca binni católicu la? Coʼ. Jesucristu nga gudixhestí yuʼduʼ o congregación ni dxandíʼ ne laa nga xaíque stini (Efesios 2:20). Galán guinabadiidxanu laca laanu: «Ñee maʼ bidxelaʼ yuʼduʼ ni dxandíʼ stiʼ Cristu la?».

^ párrafo 8 Guiráʼ textu zeeda lu tema riʼ biree cani lu Biblia El libro del Pueblo de Dios, ni riquiiñeʼ Vaticano lu Internet.