Biiyaʼ guiraʼ ni nuu lu sitiu riʼ

guyé lu índice

 GUCANÉ BIBLIA LAACABE PARA BICHAACABE

Rabeʼ maʼ modo nabaneʼ que nga laani

Rabeʼ maʼ modo nabaneʼ que nga laani
  • IZA GÚLEBE: 1982

  • PADÉ LAABE: POLONIA

  • NI NAQUIIÑEʼ GÁNNALUʼ: GUDINDENIÁʼ BINNI, GUCUAYAʼ DROGA NE GUCALAʼDXEʼ ÑACAʼ TUUXA LU GUIDXILAYÚ RIʼ

MODO BIBANEʼ DXIQUÉ.

Guleʼ ndaaniʼ ti guidxihuiiniʼ de Polonia, gaxha de ra dxaagani Alemania. Biniiseʼ ti ranchu nuu dxi, ne napa stale yaga nagáʼ. Nabé gunnaxhii bixhozeʼ ne jñaaʼ naa ne bisiidicabe naa gacaʼ ti binni nachaʼhuiʼ, gucaaʼ iqueʼ scuela ne chaaʼ universidad.

Bizuluáʼ gupaʼ guendanagana dxi yeguundaʼ Derecho ndaaniʼ ti universidad nuu guidxi Wroclaw. Cumu nuaaʼ zitu de ra lidxeʼ la? bizuluáʼ bieeguaʼ binni runi cosa malu. Maʼ xadxí riuuladxeʼ fútbol, peru pur ca xhamiguaʼ que jma gunnaxhieeʼ deporte riʼ. Guyuaaʼ pur ti equipu de Varsovia. Guiráʼ fin de semana rinandaʼ equipu riʼ ra tiica chichítecaʼ. Ladu ziuudu que rixúdxidu, raca drogardu ne nuu biaje dede gudindenedu cani nuu pur sti equipu caguitené equipu stidu que. Rabeʼ zaqué zusiaandaʼ ni runeʼ guiráʼ dxi, neca nannaʼ pa guinaazeʼ puliciá naa maʼ qué zanda gunduuxeʼ carrera stinneʼ.

Naa ne ca xhamiguaʼ riuudu antro ne discoteca ne stale biaje gudindenedu xcaadxi banda ndaaniʼ cani. Stale biaje gunaazeʼ puliciá naa, peru biyubeʼ modo cadi guseguyoocabe naa, nuu biaje bigadxeʼ lu nácabe. Rabeʼ maʼ modo nabaneʼ que nga laani, peru nannaʼ cadi jneza ni cayuneʼ. Ngue runi, riaaʼ yuʼduʼ guiráʼ domingu para cadi guchiiñaʼ xquendabiaaneʼ naa.

XIMODO GUCANÉ BIBLIA NAA BICHAAʼ.

Lu iza 2004, yeganna chupa testigu stiʼ Jiobá naa ne gudxeʼ laacaʼ guibiguétacaʼ para güidu diidxaʼ de Biblia. Ra zidiʼdiʼ dxi biziideʼ ximodo naquiiñeʼ guibani ti ni dxandíʼ xpinni Cristu, ne pur ngue nabé bichiiñaʼ xquendabiaaneʼ naa. Nannaʼ naquiiñeʼ gusaanaʼ de xhudxeʼ, gacaʼ drogar ne de guieeguaʼ binni ni qué runi ni na Biblia. Bidieeʼ cuenta laaca naquiiñeʼ gusaanaʼ de tindeniáʼ binni. Neca nannaʼ naquiiñeʼ gusaanaʼ de guneʼ guiráʼ ngue, bineruáʼ cani.

Peru bichaa guiráʼ ni ti gueelaʼ yegucaaluaʼ xhono hombre. Rietenalaʼdxeʼ nexheʼ lu neza que caguucabe golpe naa ne cuchácabe patada iqueʼ. Naa rabeʼ raqué ñateʼ, ngue runi bineʼ orar: «Bitiidilaʼdxiʼ naa Jiobá, purtiʼ que ñuneʼ guiráʼ ni na Stiidxaluʼ. Pa guibaneʼ la? cayábecaʼ lii zuundaniáʼ ca Testigu Biblia ne zuchaaʼ  modo nabaneʼ». Neca né guiráʼ golpe que, bibaneʼ. Ne bineʼ ni bidieeʼ stiidxaʼ: biindaʼ Biblia.

Lu iza 2006 yendezaʼ ndaaniʼ guidxi Inglaterra. Nuaaʼ cuaaʼ chaahueʼ ti ndaa bueltu ne guibiguetaʼ Polonia para gapaʼ ti título jma risaca de Derecho. Ra cayuundaʼ Biblia, biindaʼ ti versículo ni bicaa naa guiníʼ iqueʼ stale. Apóstol Pablu bicaa ca diidxaʼ riʼ: «Irá ni ma qué iquiiñe ni para naa, purti ma binebiaʼya Cristu Jesús Señor stinneʼ, ne laa si risaca para naa. Bisaana irá xixé ni para zinanda laabe, ne ma casi guixi ni para naa, purti ni jma racaladxe nga laabe» (Filipenses 3:8). Cásica naa, laaca biindaʼ Pablu de ley ne nabé malu guca (Hechos 8:3). Peru bidiibe cuenta nuu sti modo jma galán zanda guibánibe: gúnibe ni na Dios ne gúnibe stipa pur chinándabe Jesús. Ora guníʼ iqueʼ ejemplu stiʼ Pablu, bidieeʼ cuenta cadi caquiiñeʼ diʼ gapaʼ bidxichi nin gacaʼ binni malu para chuaaʼ nayecheʼ. Ngue runi, guníʼ iqueʼ pa gunda bichaa Pablu la? laaca zanda guchaaʼ. Gudixheʼ iqueʼ guiaanaʼ Inglaterra ne maʼ cadi guundaruaʼ jma ra universidad.

Ra jma ziyunebiaʼyaʼ Jiobá bineʼ sentir jma gaxha guyuaaʼ de laabe. Biniibi ladxiduáʼ ora biziideʼ nuube gutiidiláʼdxibe donda stiʼ cani dxandíʼ racalaʼdxiʼ guchaa modo laa (Hechos 2:38). Ora riníʼ iqueʼ ca diidxaʼ ni zeeda lu 1 Juan 4:16, ra na «de Dios nga reeda enda ranaxhii» rieneʼ xiñee nanaláʼdxibe tinde binni.

Guyuuladxeʼ chuaaʼ nayecheʼ cásica nuu ca testigu stiʼ Jiobá

Laaca biniibi modo naca ca Testigu ladxiduáʼ. Rihuinni dxíchica rúnicabe stipa pur chinándacabe ca principiu zeeda lu Biblia. Guyuuladxeʼ chuaaʼ nayecheʼ cásica nuucabe. Despué de bineʼ stale stipa bichaaʼ modo nabaneʼ, ne lu iza 2008 guyuaanisaʼ ne zaqué gucaʼ ti testigu stiʼ Jiobá.

Naa ne Esther riuuláʼdxidu gusíʼdidu xcaadxi binni de Biblia lu diidxaʼ polaco

XI MAʼ GULEENDUÁʼ.

Despué de gucaʼ ti binni riuulaʼdxiʼ gapa bueltu, gudinde, guca drogar, guxudxi ne tobi ni guzá nanda deporte, bichaa Biblia naa ne yanna maʼ nacaʼ ti binni ni riuulaʼdxiʼ gusiidiʼ ni na Stiidxaʼ Dios xcaadxi. Dede yanna riuuladxeruáʼ fútbol, peru maʼ para ti ratu si ora gastiʼ cayuneʼ.

Nayecheʼ nabaneʼ né xheelaʼ Esther, ti xpinni Cristu nabé sicarú. Riuuláʼdxidu gusíʼdidu xcaadxi binni de Biblia lu diidxaʼ polaco ladu noroeste stiʼ Inglaterra. Yánnaruʼ nga maʼ riuaaʼ nayecheʼ, qué ruchiiñaʼ xquendabiaaneʼ naa ne maʼ nannaʼ nuu xi pur nabaneʼ.