Biiyaʼ guiraʼ ni nuu lu sitiu riʼ

guyé lu índice

 TEMA STIʼ PORTADA | ÑEE RACANÉ ORACIÓN BINNI LA?

Xiñee racalaʼdxiʼ Dios guni orarnu laa

Xiñee racalaʼdxiʼ Dios guni orarnu laa

Racalaʼdxiʼ Dios gaca xhamigu laanu

Ora ruiʼ chupa binni diidxaʼ jma raca xhamígucaʼ. Dios cayuni invitar laanu güinenu laa diidxaʼ ti gaca xhamígunu laa. Cayábibe laanu: «Laatu zucaarídxitu naa ne zeedatu para guni orartu naa ne zucaadiagaʼ laatu» (Jeremías 29:12). Ra tiidiʼ dxi de guininenu Dios zadxíñanu gaxha de laa ne «laa zadxiña gaxha» de laanu (Santiago 4:8). Biblia cayabi laanu: «Jiobá nuu gaxha de guiráʼ cani rinabaʼ gacanebe laacaʼ» (Salmo 145:18). Ora jma guni orarnu laabe, jma zaca xhamígunu laabe.

«Jiobá nuu gaxha de guiráʼ cani rinabaʼ gacanebe laacaʼ» (Salmo 145:18).

Racalaʼdxiʼ Dios gacané laanu

Jesús guníʼ: «Lácaxa nuu tuuxa lade tu, pa ninaba xiiñi laa ti gueta, nudii ti guie. O pa ninaba be laa ti benda, ñee nudii laabe ti beenda la? Pa laatu [...] nanna tu gudii tu ni galán xiiñi tu la? lágaxa Bixhoze tu ni nuu ibáʼ qué gudii ni galán cani inaba laa» (Mateo 7:9-11). Racalaʼdxiʼ Dios guni orarnu laa, purtiʼ rizaaláʼdxibe laanu ne nuube gacanebe laanu (1 Pedro 5:7). Dede cayábibe laanu guidxíñanu laabe ora guidxaagalunu guendanagana. Sicaríʼ na Biblia: «Cadi chuʼ tu xizaa de gastiʼ, sínuque lainíʼ né Dios. Lainaba laa irá ni caquiiñe tu, ne laudii diuxquixe laa» (Filipenses 4:6).

Guiráʼ binni caquiiñeʼ de Dios

Cani runi estudiar modo nabani binni huadiicaʼ cuenta nuu xiixa ni rucaa millón de binni guni orar. Dede né cani huaxiéʼ runi cré ne cani qué lica runi cré Dios. * Nga rusihuinni guyanu para chuʼnu gaxha de Dios ni bizáʼ laanu. Dede Jesús guníʼ: «Cadi pan si nga ibani né binni sínuque irá ca diidxa ni iree de ruaa Dios» (Mateo 4:4). Nga runi, caquiiñeʼ guni orarnu Dios gatigá.

Xi zazaaca pa guicaanu invitación de gaca xhamígunu Dios.

^ párrafo 8 Ti informe bidii Centro de Investigación Pew lu iza 2012 ndaaniʼ guidxi Estados Unidos na 11% de ca binni ni huaxiéʼ runi cré Dios ne cani qué lica runi cré Dios runi orarcaʼ ti biaje lu ti beeu.