Biiyaʼ guiraʼ ni nuu lu sitiu riʼ

guyé lu índice

 TEMA STIʼ PORTADA | TUU NGA CA TESTIGU STIʼ JIOBÁ

Xi runi crécabe

Xi runi crécabe

Ca testigu stiʼ Jiobá runi credu «irá Xquiʼchi Dios, Espíritu Santu uníʼ xi icá, ne nuu ni para usiidi ni laanu» (2 Timoteo 3:16). Riquiiñedu Biblia para guizíʼdidu de Dios ni bizáʼ laanu ne laaca ruluíʼ ni laadu ximodo guibánidu nayecheʼ.

Biblia na: «Ti ganna binni lii, ni laluʼ Jiobá, lii si nga ni nuu jma luguiáʼ lu guidubi naca guidxilayú» (Salmo 83:18). Nga runi, Jiobá Dios si nga runi adorardu. Ne cumu testigu stibe laadu la? rúnidu stipa pur gusíʼdidu binni labe (Isaías 43:10-12).

Xpinni Cristu laadu ne runi credu Jesús nga «Xiiñi Dios», * ni beeda lu Guidxilayú riʼ ne beeda gaca Mesías (Juan 1:34, 41; 4:25, 26). Despué de guti Jesús, biasa de lade gueʼtuʼ ne bibiguetaʼ guibáʼ (1 Corintios 15:3, 4). Gudiʼdiʼ si ti tiempu gúcabe Rey lu Reinu stiʼ Dios (Apocalipsis 11:15). Reinu stiʼ Dios nácani ti gobiernu ni maʼ cayuni mandar ne zacané ni gaca Guidxilayú riʼ ti paraísu sti biaje (Daniel 2:44). Biblia na: «Cani nadóʼ zacaacaʼ guidxilayú, ne zabánicaʼ nayecheʼ purtiʼ ziuu stale guendariuudxi» (Salmo 37:11, 29).

«Ora ruundacabe Biblia, casi ñaca Dios peʼ caniʼné laacabe. Ne ora nápacabe xiixa guendanagana, ruyúbicabe lu Stiidxaʼ Dios ximodo guni chaahuicabe ni. [...] Para laacabe dede yanna nabani Stiidxaʼ Dios.» (Sacerdote católicu Benjamin Cherayath, lu periódicu Münsterländische Volkszeitung, Alemania)

Laadu, ca testigu stiʼ Jiobá, runi credu zanda gacané Biblia binni yanna (Isaías 48:17, 18). Nga runi, rúnidu stipa pur chinándadu ca mandatu stini. Qué rigúbadu gueza nin ti clase droga purtiʼ rúnidu ni rusiidiʼ Biblia ra na cadi naquiiñeʼ guni dxábadu xcuérpudu nin xquendabiaanidu (2 Corintios 7:1). Laaca qué rúnidu ca cosa ni na Biblia cadi jneza guni ti binni, casi xhudxi, guni cosa dxabaʼ ne cuanaʼ (1 Corintios 6:9-11).

^ párrafo 5 Biblia laaca ruzeeteʼ naca Jesús «tobi lucha Xiiñi» Dios purtiʼ lade guiráʼ cosa ni bizáʼ Jiobá qué niquiiñeʼ sti binni para nuzáʼ laabe. Ne laabe nga bizáʼ Jiobá primeru (Juan 3:18; Colosenses 1:13-15).