Biiyaʼ guiraʼ ni nuu lu sitiu riʼ

guyé lu índice

 GUCANÉ BIBLIA LAACABE PARA BICHAACABE

Zeʼ dxi jma ziyacaʼ binni malu

Zeʼ dxi jma ziyacaʼ binni malu
  • IZA GÚLEBE 1952

  • PADÉ LAABE ESTADOS UNIDOS

  • NI NAQUIIÑEʼ GÁNNALUʼ NABÉ NAGUEENDA RIDXIICHIBE

MODO BIBANEʼ DXIQUÉ:

Biniiseʼ ndaaniʼ stale barriu ra dxaʼ binni qué iquiiñeʼ ndaaniʼ guidxi Los Ángeles (California, Estados Unidos), ne nabé runibiáʼ binni ca lugar riʼ, purtiʼ rutoocabe droga ne nuu stale banda. Lade xhoopaʼ xiiñiʼ bixhozeʼ ne jñaaʼ naa nga baʼduʼ guiropa.

Dxi nahuiineʼ nabé yené jñaaʼ laadu ndaaniʼ yuʼduʼ stiʼ ti grupu evangélicu. Peru dxi jma maʼ biniiseʼ guiráʼ ni riníʼcabe raqué riuuni ti ladu diagaʼ ne rireeni sti ladu. Guiráʼ domingu riguundaʼ lade coro stiʼ yuʼduʼ que, peru ndaaniʼ semana riaaʼ ra rúnicabe xiixa saa ra ridxé ique binni, rigubaʼ droga ne rataniáʼ tutiica gunaa.

Nabé nagueenda ridxiicheʼ, pa gucaalúcabe naa la? maca zitiñeʼ laacabe. Intiica naazeʼ riquiiñeʼ ni para gunenaʼyaʼ binni cucaalú naa. Qué lica ñacané ni biziideʼ ra yuʼduʼ que naa. Laga guniéʼ sicaríʼ: «Señor ruquixe ni, ne nuaaʼ para gacaniáʼ laabe». Dxi mayaca guiuʼnu iza 1970, dxi napaʼ biaʼ 18 iza, guyuuladxeʼ modo riníʼ ique ti grupu ni riuu lu política ni runibiáʼcabe casi Panteras Negras, laacabe rucaalúcabe para gaca respetar derechu stiʼ binni. Bidaaguáʼ ti grupu de baʼduscuela ni rucaalú pur ca derechu riʼ. Nuu biaje rúnidu marcha ne pur ngue maʼ qué riuu clase.

Peru qué ñuaaʼ conforme né guiráʼ ni bineʼ que. Xiana stinneʼ bicaani naa guneʼ cosa jma malu. Naa ne ca xhamiguaʼ riuudu cine para guidúʼyadu película ra cayuninácabe ca esclavu de África ni nuu Estados Unidos. Cumu nabé bidxiichidu pur ca cosa ni cadi jneza rúnicabe binni la? bininadu caadxi hueruhuiiniʼ nuu ndaaniʼ cine que ne guyuudu ndaaniʼ ca barriu ra nuu binni hueru para quíñedu laacaʼ.

Ca dxi que, naa ne ca bicheʼ nabé maʼ bínidu stale cosa malu ne gúpadu stale guendanagana né ca puliciá. Tobi de ca bicheʼ ni jma nahuiiniʼ guyuu lade ti banda nabé malu ne bidxaagaʼ laacabe. Zeʼ dxi jma ziyacaʼ binni malu.

XIMODO GUCANÉ BIBLIA NAA PARA BICHAAʼ:

Bixhoze ne jñaa ti xhamiguaʼ testigu stiʼ Jiobá laacaʼ, ne biʼniʼ invitárcabe naa chaaʼ ti guendaridagulisaa. Primé biaje yeniáʼ laacabe bidieeʼ cuenta nabé gadxé ca binni que. Guirácabe nápacabe ti Biblia ne riquiiñecabe ni. ¡Dede cani jma nahuiiniʼ rudiicaʼ libana! Nabé bidxagayaaʼ  ora gunnaʼ Jiobá nga lá Dios, ne riníʼcabe ni ora maʼ caníʼcabe de laabe (Salmo 83:18). Neca nuu binni de gadxé gadxé lugar laa raqué la? rihuínnica cadi nanaláʼdxicabe binni de sti raza.

Primé ga, qué ninaʼyaʼ nusiidicabe naa de Biblia, peru guyuuladxeʼ chaaʼ guendaridagulisaa. Ti gueelaʼ, laga nuaaʼ ra cayaca guendaridagulisaa, caadxi xhamiguaʼ guyecaʼ ti conciertu ne guluucabe golpe ti hombrehuiiniʼ dede biiticabe laa ne biaananécabe ti chamarra de guidi stibe. Sti dxi que guizáʼ cayéchecabe pur ni bíʼnicabe. Dede ora cayaca juzgárcabe bisihuínnicabe ruluíʼ gastiʼ qué ñúnicabe. Stale de laacabe bieguyoocabe biaʼ dxi nabánicabe. ¡Guizáʼ biecheʼ purtiʼ qué niniáʼ laacabe! De dxi que nga gudixheʼ iqueʼ guchaaʼ modo nabaneʼ ne bizuluáʼ biindaʼ Biblia.

Cumu nanaladxeʼ binni de sti raza la? nabé bidxagayaaʼ modo runi ca testigu stiʼ Jiobá. Casi dxi guyé ti testigu stiʼ Jiobá de raza hueru sti guidxi, bisaananebe ti familia de raza negru ca xiiñibe. Laaca biiyaʼ ora bidii ti familia de raza hueru lugar chindeza ti hombrehuiiniʼ ra lídxicaʼ, de raza negru, purtiʼ qué gapa paraa cueza. Raqué biiyaʼ rinanda ca testigu stiʼ Jiobá ca diidxaʼ ni guníʼ Jesucristu ni zeeda lu Juan 13:35 ra na: «Pa ganaxhii saa tu zacá la? zanna binni xpinne laatu». Bidieeʼ cuenta bidxelaʼ cani dxandíʼ xpinni Cristu.

Pur cani biziideʼ lu Biblia, biiyaʼ caquiiñeʼ guchaaʼ modo naa. Bineʼ stipa ti gusihuinneʼ nacaʼ binni nadóʼ, peru cadi de diidxaʼ ruaa si, sínuque gusihuinneʼ dxandíʼ maʼ bichaaʼ (Romanos 12:2). Chaahuidugá bichaaʼ modo naa ne lu beeu enero iza 1974 guyuaanisaʼ ne gucaʼ testigu stiʼ Jiobá.

Bineʼ stipa para gusihuinneʼ maʼ nacaʼ binni nadóʼ, peru cadi de diidxaʼ ruaa si, sínuque gusihuinneʼ dxandíʼ maʼ bichaaʼ

Neca maʼ guyuaanisaʼ bineruáʼ stipa para bicueezaʼ naa. Casi ti dxi, canagucheechedu diidxaʼ ndaaniʼ ti barriu ra nuu caadxi familia, biiyaʼ ziné ti gubaanaʼ radiu ni nuu ndaaniʼ xcarruaʼ. Guzayanandaʼ laabe. Ra mayaca guinaazeʼ laabe, bisábabe ni ne zebe. Ora gudxeʼ grupu ziniáʼ que xi gucaʼ, ti xpinni Cristu gudxi naa: «Xi ñuʼnuʼ pa ninaazuʼ laabe yaʼ». Ne ni gunabadiidxabe naa que bidieeʼ cuenta nuuruʼ ni naquiiñeʼ guchaaʼ lu xquendanabaneʼ.

Lu beeu octubre, iza 1974, gucaʼ precursor. Biquiiñeʼ biaʼ ti gayuaa hora lu ti beeu para gusiideʼ binni de Biblia. Despué biʼniʼ invitárcabe naa chiguneʼ dxiiñaʼ Betel stiʼ ca testigu stiʼ Jiobá ni nuu Brooklyn (Nueva York). Lu iza 1978, bibiguetaʼ Los Ángeles para gapaʼ jñaaʼ purtiʼ huará. Chupa iza despué bichaganaʼyaʼ Aarhonda. Nabé gucanebe naa biaʼ tiempu gúpadu jñaaʼ dede dxi gutiʼ. Despué biʼniʼ invitárcabe laadu chuudu Scuela stiʼ Galaad stiʼ Watchtower. Bilúxesidu scuela que biseendacabe laadu de misioneru guidxi Panamá, ne dede nagasi nuurudu lugar riʼ.

Dede dxi guyuaanisaʼ, nuu biaje huayaca nagana gucueezaʼ naa. Nuu tiru qué riaanaʼ paxaraa para cadi tindeʼ ne xcaadxi biaje ruyubeʼ modo cadi guidxiicheʼ nagueenda. Stale tu laa huayabi naa jneza cayuneʼ ora gucueezaʼ naa dede né xheelaʼ huayabi ni naa, ne naa ridxayagaaʼ ni runeʼ. Qué riniediáʼ pur naa si nga cuchaaʼ. Runeʼ cré rihuinni poder ni napa Biblia para guchaa modo nabani binni (Hebreos 4:12).

XI MAʼ GULEENDUÁʼ:

Huayacané Biblia naa gannaʼ xi pur nabaneʼ ne maʼ bisiidiʼ ni naa gacaʼ binni nadóʼ. Maʼ qué riguiñeʼ binni, sínuque racaniáʼ laacaʼ gunibiaʼcaʼ Dios. Dede ne tobi de cani guca xhenemiguáʼ ra scuela maʼ bisiideʼ laa de Biblia. Guyuunísasibe gulézadu ndaaniʼ tobi si yoo ti tiempu ne dede yanna xhamígudu. Dede nagasi naa ne xheelaʼ maʼ gucanedu jma de ochenta binni gaca testigu stiʼ Jiobá.

Nabé rudieeʼ xquíxepeʼ Jiobá purtiʼ cayacanebe naa guibaneʼ nayecheʼ, maʼ nannaʼ xi pur nabaneʼ ne nuaaʼ lade cani dxandíʼ xpinni Cristu.