Biiyaʼ guiraʼ ni nuu lu sitiu riʼ

guyé lu índice

Tuu nga anticristo

Tuu nga anticristo

Cadi xadxí biree ti película ni láʼ Anticristo.

Ti discu stiʼ ti grupu ni nabé runibiáʼ binni lani Antichrist Superstar.

Ti libru ni bicaa Friedrich Nietzsche, ti filósofo ni bibani lu siglu 19, biree lani El anticristo.

Ca rey ne ca emperador ni bibani lu Edad Media que guleelacaʼ ca xhenemígucaʼ ca anticristo.

Martín Lutero, ti alemán ni biree de Iglesia católica ne gundisaʼ ique ni runibiáʼcabe casi Reforma, guleelabe ca papa de Roma que anticristo.

ANTICRISTO nga ti diidxaʼ ni huaquiiñecabe maʼ xadxí para guiníʼcabe de ca papa ne ca película de terror. Nga runi, qué ridxagayaanu guinabadiidxaʼ binni: Tuu nga anticristo. Ñee naquiiñepeʼ gánnanu ni la? Cumu gaayuʼ biaje riete diidxaʼ riʼ ndaaniʼ Biblia la? galán gánnanu xi rusiéneni de diidxaʼ riʼ.

MAʼ BIHUINNI TUU NGA ANTICRISTO

Apóstol Juan si nga biquiiñeʼ diidxaʼ anticristo riʼ ndaaniʼ Biblia. Xi guniʼbe de laani yaʼ. Lu primé carta bicaabe guniʼbe ca diidxaʼ riʼ: «Ma cadxiña dxi [...]. Ma huayuna diaga tu ziasa tobi ucaa lú Cristu, ne de ca yanna ma nuu stale cayuni casi chi guni ngue. Nga runi nanna nu ma cadxiña dxi que. Uyuu cabe lade nu peru cadi de laanu laacabe. Purti pa ñaca de laanu laacabe la? ñaana né cabe laanu [...].Tuu nga rusiguii pue. Ni na cadi dxandí Jesús nga ni nexhe gueeda que. Ni iníʼ zacá la? nga nga ni cucaa lú Cristu ca [anticristo, TNM], purti qué na guni cre laabe, nin Bixhoze be» (1 Juan 2:18, 19, 22).

Xi rusiidiʼ ca diidxaʼ riʼ laanu yaʼ. Guníʼ Juan de stale anticristo, zacá bisiénebe cadi ti binni si nga anticristo ca, sínuque stale. Laabe guniʼbe zusiguii ca binni riʼ xcaadxi —casi cadi Jesús diʼ nga Cristu— o qué zusiidicaʼ tupeʼ nga Jesucristu ne tuu nga Bixhoze. Nga runi, zanda gacaʼ tuuxa anticristo ora gusiguii xcaadxi ne náʼ laa nga Cristu o xiixa grupu ni náʼ laaca nga biseendaʼ Cristu, para si gápacaʼ xpínnicaʼ. Apóstol Juan bizeeteʼ «uyuu cabe lade nu», ca diidxaʼ riʼ rusihuínnicani maʼ qué ninácabe ninándacabe cani rusiidiʼ Biblia. Maca nuu grupu riʼ tiempu stiʼ Juan. Zándaca biquiiñebe diidxaʼ «ma cadxiña dxi» para guiniʼbe de ca últimu iza nabánibe casi últimu apóstol stiʼ Jesús.

Xiruʼ guníʼ Juan de anticristo ca yaʼ. Guniʼbe zusiidiʼ ni cadi dxandíʼ, cásica rusiidiʼ ca yuʼduʼ ca, nabe: «Ni runi cre beda gaca Jesucristu binni guidxilayú, laa napa Espíritu sti Dios. Ne pa qué runi cre cabe zacá la? qué gapa cabe Espíritu sti Dios sínuque napa cabe espíritu sti ni gueda ucaa lú Cristu [anticristo, TNM] que. Ma ru huayuna diaga tu zeeda be ne mápeca nuu be ndaani guidxilayú» (1 Juan 4:2, 3). Laaca guniʼbe de laani lu guiropa carta stibe ra na: «Nuu stale canazá canausiguii, ma na ca cadi dxandí beda aca Cristu binni guidxilayú. Cani caníʼ zacá la? cusiguii, ne cucaa lú Cristu [anticristo, TNM]» (2 Juan 7). Rihuinni dxichi ca para Juan la? anticristo ca nga ni rusiidiʼ ni cadi dxandíʼ de Jesús ne de ni bisiidiʼ.

«CA PROFETA NI NA ZEEDA DE DIOS» NE «HOMBRE NUU NÉ BINIDXABAʼ»

Sicaríʼ gudixhená Jesús: «Laguuya gá laatu ne ca profeta ni na zeeda de Dios peru cadi dxandí ni, purti casi guiuu cabe laatu ruluíʼ nadóʼ cabe casi dendxuʼ, peru ndaani ladxidóʼ cabe naduxhu cabe casi gueuʼ»

Stale iza ante gucaa Juan de anticristo riʼ, gudixhená Jesús ca discípulo stiʼ ne ca diidxaʼ riʼ: «Laguuya gá laatu ne ca profeta ni na zeeda de Dios peru cadi dxandí ni, purti casi guiuu cabe laatu  ruluíʼ nadóʼ cabe casi dendxuʼ, peru ndaani ladxidóʼ cabe naduxhu cabe casi gueuʼ» (Mateo 7:15). Laaca gudixhená apóstol Pablu de guendanagana riʼ ca xpinni Cristu de Tesalónica né ca diidxaʼ riʼ: «Nin de ti modo qué chi udii tu lugar usiguii cabe laatu. Purti qué zadxiña dxi que [dxi stiʼ Jiobá, TNM], dede qué gaca irá ni ma nexhe gacaʼ. Ziasa stale binni zucaa lú Dios, ne laca zeeda ti hombre nuu né binidxabaʼ, ni ma nexhe initilú» (2 Tesalonicenses 2:3).

Rusihuinni cani maʼ bidúʼyanu riʼ maca nuu ca profeta ni na zeeda de Dios ne caadxi maestru ni ribee gana ca xpinni Cristu bibani lu primé siglu que. Guiráʼ cani bisiidiʼ ni cadi dxandíʼ de Jesús ne cani bisiidiʼ ni cadi jneza de cani bisiidibe nuucaʼ lade cani na Juan naca «anticristo». De laacabe nga guníʼ Pablu «ni ma nexhe initilú», nga rusihuinni xi riníʼ ique Jiobá guniné laacabe.

¡LAGAPA LAATU NÉ ANTICRISTO!

Dede yanna cayúniruʼ anticristo ca dxiiñaʼ. Ca dxi stinu riʼ nuu binni ne grupu ni qué runi cré Jesús ne cani bisiidiʼ. Laapecabe rúnicabe pur gusiidicabe binni caadxi cosa ni cadi jneza para guni cré laaca Jesús nga Jiobá, Bixhoze. Naquiiñeʼ gápanu laanu para cadi quítecabe laanu. Guidúʼyanu chupa cosa ni huaguite stale binni.

Lu ca siglu maʼ gudiʼdiʼ, stale Iglesia ni na zinanda Cristu rusiidicaʼ de Trinidad. Riníʼcabe ti Dios si nga Jiobá ne Jesús. Zacá nga zeeda gaca ca yuʼduʼ riʼ anticristo, purtiʼ cadi cusiidicabe tupeʼ nga Dios ne tupeʼ nga Jesús, casi ñaca nucaachicabe ni. Cumu nucaachicabe cani la? qué ganda diʼ gunibiáʼ binni Dios ne gúnicaʼ casi biʼniʼ Jesús neca racaláʼdxicaʼ gúnicaʼ ni, casi rusiidiʼ Biblia (1 Corintios 11:1, Santiago 4:8).

Sti modo caguite ca Iglesia ca binni nga cabeecabe lá Dios, Jiobá, lu Biblia stícabe ne riníʼcabe mal de ca Biblia ni zeedani lu. Qué nidxíbicabe né ni bíʼnicabe riʼ, purtiʼ lá Jiobá zeedani biaʼ gadxe mil biaje ndaaniʼ Biblia. Xi huabeendú binni né modo rusiidicabe riʼ yaʼ. Runi laani stale binni qué ganna diʼ tupeʼ nga Dios.

Peru nuu xcaadxi binni ni maʼ biziidiʼ lá Dios nga Jiobá ne pur nga maʼ randa riuucaʼ gaxha de laabe. Ngapeʼ nga ni bizaaca Richard, qué rusiaandabe dxi guníʼnebe ti guendaxheelaʼ de testigu stiʼ Jiobá. Laabe nabe: «Bisiidicabe naa lá Dios nga Jiobá ndaaniʼ Biblia. Nabé bidxagayaaʼ ora gunnaʼ napa Dios lá. Qué ñuu dxi niníʼ iqueʼ nga». Dede dxiqué, bizulube bíʼnibe guiráʼ ni biziidibe lu Biblia lu xquendanabánibe, ti ganda gusiéchebe Jiobá. Richard guníʼ: «Ra gunnaʼ tu láʼ Dios gucaneni naa gaca xhamiguaʼ laabe».

Lu ca siglu maʼ gudiʼdiʼ, millón de binni qué ganda gunibiáʼ Dios runi anticristo ca, casi ñaca nuucaʼ lu ti gueelacahui. Pa guʼndaʼ chaahuinu ni na Biblia ca la? zánnanu tupeʼ nga anticristo ca ne qué zaguítebe laanu (Juan 17:17).

Apóstol Juan na anticristo ca nga ni rusiidiʼ ni cadi dxandíʼ de Jesús ne de ni bisiidiʼ