Biiyaʼ guiraʼ ni nuu lu sitiu riʼ

guyé lu índice

 GUCANÉ BIBLIA LAACABE PARA BICHAACABE

Gunabadiidxacabe naa chonna cosa ni bichaa xquendanabaneʼ

Gunabadiidxacabe naa chonna cosa ni bichaa xquendanabaneʼ
  • IZA GÚLEBE: 1949

  • PADÉ LAABE: ESTADOS UNIDOS

  • NI NAQUIIÑEʼ GÁNNALUʼ: RACALADXEʼ GANNAʼ XI PUR NABANEʼ

MODO BIBANEʼ DXIQUÉ.

Biniiseʼ Ancram, ti guidxihuiiniʼ nuu estadu stiʼ Nueva York. Nabé ziáʼ leche ribee binni ndaaniʼ ca granja nuu guidxihuiiniʼ riʼ, ne jma stale vaca nuu raríʼ que binni.

Qué ñaadxaʼ familia stinneʼ ra yuʼduʼ nuu guidxi que. Rietenalaʼdxeʼ rusiá bixhozebiidaʼ zapatu stinneʼ guiráʼ domingu siadóʼ ante chaaʼ ra yuʼduʼ. Riniáʼ ti Bibliahuiiniʼ naquichiʼ bisigaʼdeʼ jñaabiidaʼ naa. Bisiidicabe laadu —naa, ti bizanaʼ ne sti bendaʼ— gácadu binni runi dxiiñaʼ, guni respetardu ca vecinu ne gacanedu laacaʼ, ne gudiʼdu xquixe Dios pur cani nápadu.

Bireeʼ de ra lidxeʼ dxi maʼ huaniiseʼ ne gucaʼ maestra. Peru nuu stale cosa ni qué rieneʼ de Dios ne xi pur nabáninu. Chiguzeeteʼ ti ejemplu. Caadxi de ca baʼduscuela nuu ndaaniʼ salón stinneʼ que nuu xpiaanicaʼ, peru laaca nuu xcaadxi ni jma nanene riziidiʼ. Lade ca baʼduscuela que ruuyaʼ nuu baʼduʼ nazaaca, peru laaca baʼduʼ ni huará. Para naa la? cadi jneza diʼ ngue. Nuu tiru rabi bixhoze ca baʼduhuiiniʼ ni huará que naa: «Maʼ nga nga na Dios yaʼ». Rinabadiidxaʼ xiñee rudii Dios lugar galené ca baʼduhuiiniʼ que ti guendahuará, pa qué gápacaʼ donda.

Laaca riníʼ iqueʼ sicaríʼ: «Xi párapeʼ ndiʼ nabaneʼ lu Guidxilayú pue». Runeʼ sentir cadiʼdiʼ si ca iza que, peru caʼruʼ gunediáʼ xiixa ni dxandíʼ risaca. Dxandíʼ biniiseʼ ndaaniʼ ti familia nachaʼhuiʼ, guzayaʼ scuela roʼ ne napaʼ ti dxiiñaʼ ni nabé riuuladxeʼ. Peru runeʼ sentir nuuruʼ xi cayaadxaʼ naa. Riníʼ iqueʼ galán zié ni naa pa guichaganaʼyaʼ, gapaʼ xiiñeʼ, cuezaʼ ndaaniʼ ti yoo sicarú, guneʼ dxiiñaʼ ni riuuladxeʼ que dede ora gacaʼ jubilar, ne ora maʼ guiniiseʼ la? chisaanacabe naa ti lugar ra rápacabe ca binnigola. Peru rinabadiidxaʼ pa nuuruʼ xiixa ni jma galán.

XIMODO GUCANÉ BIBLIA NAA PARA BICHAAʼ.

Ti biaje, naa ne xcaadxi maestra gucuaadu vacación lu ti verano ne guyuudu Europa. Yegunibiaʼdu abadía stiʼ Westminster, catedral stiʼ  Notre-Dame nuu París ne Vaticano, laaca guyuudu ndaaniʼ xcaadxi yuʼduʼ. Guiráʼ ladu guyaaʼ guirutiʼ nicabi cani rinabadiidxaʼ que. Ne dxi maʼ biguetaʼ ra lidxeʼ, Sloatsburg (Nueva York), guyaaruaʼ ndaaniʼ xcaadxi yuʼduʼ, peru laaca guirutiʼ nusiene chaahuiʼ naa ni racaladxeʼ gannaʼ.

Ti dxi, tobi de ca baʼduscuela nuu ndaaniʼ salón stinneʼ que —ti dxaapahuiiniʼ de 12 iza— gunabadiidxaʼ naa chonna cosa. Primé, gunabadiidxabe naa pa nannaʼ testigu stiʼ Jiobá laabe. Gudxeʼ laabe nannaʼ. Guiropa, gunabadiidxabe naa pa ñuuladxeʼ ñannaʼ jma de ca testigu stiʼ Jiobá. Laaca gudxeʼ laabe ñuuladxeʼ. Guionna, gunabadiidxabe naa paneza lidxeʼ. Ora gudxeʼ laabe paneza la? bidiʼdu cuenta tobi si neza ra nabézadu. Qué ñuu dxi niníʼ iqueʼ pa nuchaa guionnaʼ cosa gunabadiidxabe naa que xquendanabaneʼ.

Gudiʼdiʼ si dxi, beeda dxaapahuiiniʼ que ra lidxeʼ lu ti bicicleta para gusiidiʼ naa de Biblia. Gunabadiidxaʼ laabe ni maca gunabadiidxaʼ xaíque stiʼ xcaadxi religión. Xi si la? biquiiñeʼ dxaapahuiiniʼ riʼ Biblia para bicabi guiráʼ ni gunabadiidxaʼ laa. ¡Qué guirá guneʼ cré pa maca xadxí nuu cani lu Biblia!

Jma maʼ galán bineʼ sentir pur guiráʼ ni biziideʼ lu Biblia. Nabé bidxagayaaʼ ora biiyaʼ xiná 1 Juan 5:19: «Naaze dxiichi binidxaba idubi guidxilayú». Gutadxí ladxiduáʼ ora gunnaʼ qué gapa Dios donda pur guiráʼ yuubaʼ cadiʼdiʼ binni lu Guidxilayú, sínuque Binidxabaʼ nga napa donda, ne maʼ cadi candaa diʼ para guni chaahuiʼ Dios guiráʼ ni cayaca (Apocalipsis 21:3, 4). Bidieeʼ cuenta cadi nagana para guiene binni ni rusiidiʼ Biblia. Né maestrahuiiniʼ de 12 iza ni bisiidiʼ naa que bieneʼ ti cosa nabé risaca: pa dxandíʼ ni cusiidiʼ tuuxa la? dxandíʼ ni, gastiʼ naca pa nahuiinibe o pa maʼ huaniisibe.

Neca zaqué, rapaʼ gana gannaʼ pa dxandíʼ runi ca testigu stiʼ Jiobá ni rusiidicaʼ binni. Nabé rabi dxaapahuiiniʼ que naa naquiiñeʼ gapa cani dxandíʼ xpinni Cristu paciencia ne gácacaʼ nachaʼhuiʼ (Gálatas 5:22, 23). Ngue runi rabeʼ chiguuyaʼ pa dxandíʼ ni. Naapiaʼ bineʼ pur chindayaʼ maʼ huadxí ra lidxeʼ dxi rusiidibe naa. Ne rinabadiidxaʼ pa cabézarube naa ne pa zadxiichibe. Ora bedandayaʼ ra lidxeʼ, biiyaʼ zúbabe lu ca escalón nuu entrada que. Bixooñebe dede ra nuu carru stinneʼ ne gúdxibe naa: «Mápeca ndaʼ chaaʼ ra lidxeʼ ne chitidxeʼ jñaaʼ guiniʼné puliciá ne guiníʼ ra hospital. Cumu qué redandaluʼ huadxí para guidúʼndanu la? guníʼ iqueʼ gúcaluʼ xiixa. ¡Guizáʼ maʼ nuaaʼ xizaa!».

Sti dxi gunabadiidxaʼ laabe xiixa ni nannaʼ nagana para ti dxaapahuiiniʼ napa 12 iza. Rapaʼ gana guuyaʼ pa zacábibe naa intiica gueeda ndaaniʼ íquebe. Ora gudxeʼ ni laabe, biiyadxibe naa ne guniʼbe: «Nabé nagana ni gunabadiidxuʼ naa riʼ. Chigucaaʼ ni lu guiʼchiʼ para guinabadiidxaʼ ni bixhozeʼ ne jñaaʼ». Sti biaje beeda gudiibe clase naa que beedanebe ti revista Torre stiʼ ni rapa ra zeeda ni gunabadiidxaʼ laabe que. Nguepeʼ nga ni jma guyuuladxeʼ de ca testigu stiʼ Jiobá: lu ca publicación stícabe biiyaʼ modo ricabi Biblia cani racaladxeʼ gannaʼ. Bidiiruʼ dxaapahuiiniʼ que clase naa, ne gudiʼdiʼ si ti iza gucaʼ testigu stiʼ Jiobá. *

XI MAʼ GULEENDUÁʼ.

Dxi maʼ bisiénecabe naa guiráʼ ni racaladxeʼ gannaʼ la? pa ñanda si ñueniaʼ ni guiráʼ binni (Mateo 12:35). Primé que la? qué ñuulaʼdxiʼ diʼ familia stinneʼ ca cosa nacubi caziideʼ, peru chaahuiʼ chaahuiʼ maʼ guyuudxícabe. Bizulú biziidiʼ jñaaʼ ni zeeda lu Biblia ante gatiʼ. Dxandíʼ qué ñuunísabe, peru nannaʼ gudixhe íquebe gúnibe ni na Jiobá.

Bichaganaʼyaʼ Elias Kazan lu iza 1978, ne lu 1981 biʼniʼ invitárcabe laadu para chigúnidu dxiiñaʼ Betel nuu Estados Unidos. * Triste gabeʼ ni laatu, peru guti Elias gudiʼdiʼ si tapa iza. Cumu bidiicabe lugar guiaanaʼ Betel la? gucaneni naa para cadi guicá íquepiaʼ yuubaʼ stinneʼ que ne gudixhedxini ladxiduáʼ.

Lu iza 2006 bichaganaʼyaʼ Richard Eldred, sti hermanu runi dxiiñaʼ Betel. Naa ne Richard nuurudu Betel ne riuuláʼdxidu dxiiñaʼ stidu. Bieneʼ stale cosa ni bichaa xquendanabaneʼ dxi bineʼ estudiar Biblia... peru bizulú guiráʼ ni dxi gunabadiidxaʼ ti dxaapahuiiniʼ naa chonna cosa.

^ párrafo 16 Maʼ gucané dxaapahuiiniʼ riʼ ne ca bizaʼnaʼ gaayuʼ maestru sticaʼ guiénecaʼ Biblia ne gácacaʼ testigu stiʼ Jiobá.

^ párrafo 18 Diidxaʼ Betel riniʼni: «Lidxi Dios». Zacá nga láʼ ca oficina ni riquiiñeʼ ca testigu stiʼ Jiobá lu guidubi Guidxilayú (Génesis 28:17, 19; nota). Cani runi dxiiñaʼ raríʼ runibiáʼcabe laacaʼ casi familia Betel ne racanécabe para guiroobaʼ dxiiñaʼ runi ca testigu stiʼ Jiobá.