Biiyaʼ guiraʼ ni nuu lu sitiu riʼ

guyé lu índice

 RA CANIʼNÉ TI TESTIGU STIʼ JIOBÁ TUUXA

Xiñee naquiiñeʼ guietenaláʼdxinu guendaguti stiʼ Jesús guiráʼ iza.

Xiñee naquiiñeʼ guietenaláʼdxinu guendaguti stiʼ Jesús guiráʼ iza.

Para gánnaluʼ ximodo ruiʼné ti testigu stiʼ Jiobá binni diidxaʼ la? bixuiʼlú yeganna ti Testigu láʼ Linda ti gunaa láʼ Lucía.

«LAGUNI CASI CAYUNI NU RIʼ PARA GUIETENALADXI TU NAA»

Linda: Padiuxi, Lucía, ximodo nuuluʼ. Rapaʼ gana gabeʼ lii xiixa: guizáʼ biecheʼ ora biiyaʼ lii ra bietenaláʼdxidu guendaguti stiʼ Jesús. * Ximodo biiyaluʼ ni.

Lucía: Nabé guyuuladxeʼ ni. Peru, nannuʼ xi la? guníʼcabe chupa chonna cosa ni qué ñeneʼ. Runadiagaʼ riníʼ binni naquiiñeʼ guietenaláʼdxinu dxi gule Jesús lu Navidad ne dxi biasa lade gueʼtuʼ lu Nabaana, peru qué gannadiáʼ pa naquiiñeʼ guietenaláʼdxinu guendaguti stibe.

Linda: Ajaʼ. Nga nga ca saa ni jma runi binni. Peru para laadu, ca testigu stiʼ Jiobá la? jma risaca guietenaláʼdxidu guendaguti stiʼ Jesús guiráʼ iza. Pa napuʼ chupa chonna minutu la? zanda gusieneʼ ni lii.

Lucía: Napaʼ pue.

Linda: Laadu, ca testigu stiʼ Jiobá, rietenaláʼdxidu guendaguti stiʼ Jesús purtiʼ ngapeʼ nga ni biʼniʼ mandarbe laadu gúnidu. Guidúʼyanu xi guca gueelaʼ ante gatiʼ Jesús. Ñee redasilú lii gudoxhiné Jesús ca apóstol stiʼ la?

Lucía: Ajaʼ. Laani nga Últimu Guendaroxhi.

Linda: Laaca runibiáʼcabe ni casi Guendaroxhi stiʼ Señor. Laga cayaca guendaroxhi que nga gudxi Jesús ca discípulo stiʼ ximodo gaca ni. Zeeda ni guniʼbe lu textu stiʼ Lucas 22:19. Ñee zanda gúʼndaluʼ ni la?

Lucía: Zanda. Raríʼ na sicaríʼ: «Óraque ucuaa be pan, bidii be diuxquixe Dios ne gudiizi be ni lú caʼ, rabi be laacaʼ: “Ndi nga cuerpu stinne ni chi udiee pur laatu. Laguni casi cayuni nu riʼ para guietenaladxi tu naa”».

Linda: Xquíxepeʼ lii. Biiyaʼ xi guníʼ Jesús ra biluxe versículo riʼ: «Laguni casi cayuni nu riʼ para guietenaladxi tu naa». Ne ante guiníʼ Jesús ca diidxaʼ riʼ nga gudxi laacabe xi guietenaláʼdxicabe. Gudxi laacabe chigudii xcuerpu, o xquendanabani, pur ca discípulo stiʼ. Ne laaca ngaca nga ni guníʼ Jesús lu Mateo 20:28. Biiyaʼ xiná raríʼ: «Naa nga Hombre Biseenda Dios ne benda cadi para gacané cabe naa, sínuque para gacaniá laacabe ne para udiee xpida para ilá stale binni». Nga runi, casi testigu stiʼ Jiobá la? ridagulisaadu ti biaje lu ti iza para guietenaláʼdxidu sacrificiu biʼniʼ Jesús dxi bidii xquendanabani para bilá laanu. Zulá guendaguti stibe laanu pa guzúʼbanu diidxaʼ.

XI RIBEENDUNU PUR GUENDAGUTI STIʼ CRISTU

Lucía: Nabé runadiagaʼ riníʼ binni guti Jesús para gulá laanu. Peru qué riénediaʼ ximodo nga rulá guendaguti stibe laanu.

Linda: Rieneʼ lii. Cadi casi zeʼ diʼ binni zanda guiene ximodo nga rulá guendaguti stiʼ Jesús laanu.  Peru ndiʼ nga tobi de ca tema ni jma sicarú rusiidiʼ Biblia. Ñee zándaruʼ güinu diidxaʼ la?

Lucía: Zanda, náparuaʼ tiempu.

Linda: Násepeʼ biindaʼ de tema riʼ ne chigüeniáʼ ni lii modo ganda guiéneluʼ naa.

Lucía: Guníʼ, cucaadiagaʼ lii.

Linda: Primeru la? naquiiñeʼ guiénenu xi bizaaca dxi bichee Adán ne Eva ndaaniʼ jardín de Edén. Para nga naquiiñeʼ guidúʼndanu xiná Romanos 6:23. Zanda gúʼndaluʼ ni la?

Lucía: Zanda pue. Nani sicaríʼ: «Purti ni riaxa pecadu nga enda guti, peru ni rudii Dios nga enda nabani ni qué zaluxe, pur Cristu Jesús Señor stinu».

Linda: Xquíxepeʼ lii. Guiene chaahuinu textu riʼ. Biiyaʼ xiná ra ruzulú ni: «Ni riaxa pecadu nga enda guti». Nga nga ley gudixhe Dios dxi bizáʼ binni guidxilayú: castigu stiʼ pecadu, o stiʼ tuuxa ni guchee nga guendaguti. Peru dxi bizulú guidxilayú la? gastiʼ pecadu. Qué gapa diʼ Adán ne Eva pecadu dxi bizáʼ Dios laacaʼ. Ne laaca qué ñapa diʼ xiiñicabe pecadu ora ñale. Nga runi gastiʼ razón para gatiʼ binni. Ñanda nibani Adán ne Eva ne guiráʼ xiiñiʼ sin ñáticaʼ ne ñuucaʼ nayecheʼ. Peru, rietenalaʼdxuʼ xi pur ngue maʼ qué ñaca ni la?

Lucía: Pur gudó Adán ne Eva cuananaxhi gudxi Dios laacaʼ cadi gocaʼ.

Linda: Biaʼsi. Ne zacá nga bicheecabe; de laacabe biale cadi guzuubacabe stiidxaʼ Dios. Ngue runi beeda gácacabe binni napa pecadu. Naná zaguíxecabe pur ni bíʼnicabe ne laaca zaqueca zaguixe ca xiiñicabe ni.

Lucía: Peru, xiñee né laanu caguíxenu pur donda stícabe yaʼ.

Linda: Chitixheʼ ti ejemplu para guieʼnuʼ ni. Ñee huayuʼnuʼ pan ndaaniʼ ti molde la?

Lucía: Huayuneʼ pue, napaʼ ti molde pan.

Linda: Yanna bixuiʼlú guziʼluʼ tobi nacubi, peru ante iquiiñeluʼ ni, biaba ni ne bitaadxiʼ cueʼ ni. Ximodo raʼbuʼ guiree ca pan gaca ndaaniʼ ni yaʼ. Cadi dxandíʼ zaree cani nataadxiʼ la?

Lucía: Dxandíʼ pue.

Linda: Ngapeʼ nga ni guca dxi bicheené Adán ne Eva Dios, beeda gácacabe casi ti «molde taadxiʼ» pur pecadu stícabe. Cumu bicheecabe ante gápacabe xiiñicabe la? nga runi ralené ca xiiñicabe donda ne pecadu bisaananécabe laacaʼ. Ora ruzeeteʼ Biblia de pecadu la? cadi caníʼsini de ca cosa malu runi binni, sínuque laaca caniʼni de ti cosa nuu ndaaniʼ ladxidoʼno ni ruquiinde laanu gucheʼnu. Nga runi, neca caʼruʼ gálenu dxiqué ne neca qué gápanu donda pur ni biʼniʼ Adán ne Eva, guiranu ralenenu xiixa ni rucaa laanu gucheʼnu. Ne cadi guiaandaʼ lii xi bidúʼndanu lu Romanos 6:23: «Ni riaxa pecadu nga enda guti».

Lucía: Peru cadi jneza diʼ nga xa. Xiñee laanu ndiʼ quíxenu pur ni biʼniʼ Adán ne Eva yaʼ.

Linda: Dxandíʼ, cadi jneza diʼ nga. Peru guʼyaʼ chaahuinu xipeʼ nga guca. Para Dios la? naquiiñeʼ gatiʼ Adán ne Eva pur ni bíʼnicaʼ. Peru gudíxhebe gaca xiixa para ca xiiñiʼ Adán. Bixheleʼ Jiobá ti neza para ganda guireecaʼ ra bisaana Adán laacaʼ. Raríʼ nga rihuinni pabiáʼ risaca guendaguti stiʼ Jesús. Guidúʼndanu xiná Romanos 6:23 sti biaje. Primeru riníʼ versículo riʼ: «Ni riaxa pecadu nga enda guti», peru de racá maʼ ruzeeteni: «Ni rudii Dios nga enda nabani ni qué zaluxe, pur Cristu Jesús Señor stinu». Nga runi, guendaguti stiʼ Cristu nga ruxheleʼ ti neza para ganda guireʼnu lu náʼ pecadu ne guendaguti. *

 BILÁ DIOS LAANU LU NÁʼ GUENDAGUTI PUR JESÚS

Linda: Zeeda sti cosa lu versículo riʼ ni ñuuladxeʼ nusieneʼ lii.

Lucía: Xi laani yaʼ.

Linda: Biindaʼ xiná raríʼ: «Ni rudii Dios nga enda nabani ni qué zaluxe, pur Cristu Jesús Señor stinu». Yanna, pa Jesús nga gucaná ne gutiʼ para ganda guilanu, xiñee qué niníʼ versículo riʼ: «Ni rudii Jesús nga enda nabani» yaʼ. *

Lucía: Mmm. Qué gannadiáʼ.

Linda: Dxi maʼ qué nuzuubaʼ Adán ne Eva stiidxaʼ Dios ndaaniʼ jardín de Edén que, bicheenecaʼ laabe. Guizáʼ biuubaʼ ladxidóʼ Dios pur ngue. Peru oraqueca bidxela Jiobá modo gaca chaahuiʼ ni: gueeda tobi de ca xiiñibe ni nuu guibáʼ ndaaniʼ Guidxilayú, guibani casi ti binni qué gapa donda ne gudii xquendanabani para cuee guiráʼ binni lu náʼ pecadu. * Guendanabani bidii Jesús pur laanu riʼ nga ti cosa risaca bisigaʼdeʼ Dios laanu. Peru cadi ngasi nga laani. Ñee maʼ huaníʼ íqueluʼ xi biʼniʼ sentir Dios ora biiticabe Jesús la?

Lucía: Coʼ, qué huaníʼ íquediaʼ ni.

Linda: Cayuuyaʼ caadxi juguete raríʼ. Ñee napuʼ xiiñuʼ la?

Lucía: Napaʼ chupa; ti hombrehuiiniʼ ne ti dxaapahuiiniʼ.

Linda: Cumu napuʼ xiiñuʼ la? zanda guxuíʼluluʼ xi biʼniʼ sentir Jiobá guibáʼ ora biʼyaʼ gutiʼ Xiiñiʼ. Ximodo raʼbuʼ biʼniʼ sentirbe ora gunaazecabe Jesús, ora biʼniʼ búrlacabe laa ne ora gudíñecabe laa yaʼ. Guníʼ ique si pabiáʼ biuubaʼ ladxidoʼbe ora bíʼyabe yuubaʼ cadiʼdiʼ Xiiñibe lu yaga ra bicaacabe laa para gatiʼ.

Lucía: Qué huayuu dxi guiníʼ iqueʼ ni. ¡Nanna pabiáʼ biuubaʼ ladxidóʼ Dios yaʼ!

Linda: Qué gánnadinu xipeʼ nga biʼniʼ sentir Dios. Peru Biblia rusiene laanu xipeʼ nga bicaa laabe gudiibe lugar tiidiʼ Xiiñibe guiráʼ yuubaʼ que. Juan 3:16 cusiéneni né caadxi diidxaʼ nabé sicarú. Zanda gúʼndaluʼ ni la?

Lucía: Zanda pue. Nani sicaríʼ: «Purti nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe».

Bisihuinni Dios pabiáʼ nadxii laanu ora bidii lugar gatiʼ Xiiñiʼ para gulá laanu

Linda: Xquíxepeʼ lii. Biiyaʼ xiná ra ruzulú versículo riʼ sti biaje. Racá na: «Nadxii xhaata Dios binni guidxilayú». Maʼ biiyuʼ xi bicaa Dios guseendaʼ Xiiñiʼ lu Guidxilayú ne gatiʼ pur laanu la? Bíʼnibe ni purtiʼ nadxiibe laanu. Qué huayuuruʼ sti binni guni zacá. Modo bisihuinni Dios nadxii laanu riʼ nga rietenaláʼdxidu casi testigu stiʼ Jiobá, guiráʼ biaje gusaa Jesús sti iza de guti. Ximodo ruuyaluʼ ni bisieneʼ lii riʼ yaʼ.

Lucía: Biaʼsi. Xquíxepeʼ lii pur guleeluʼ tiempu para bisiéneluʼ ni naa.

Ñee rapuʼ gana guiene chaahuiluʼ ti tema zeeda lu Biblia la? Ñee racalaʼdxuʼ gannuʼ de xiixa costumbre o de xiixa ni runi cré ca testigu stiʼ Jiobá la? Pa zacá ni la? runi invitardu lii guinabadiidxaluʼ ni laacabe ora guʼyuʼ laacabe. Ziuuláʼdxicabe güinécabe lii diidxaʼ.

^ párrafo 5 Ti biaje lu ti iza ridagulisaa ca testigu stiʼ Jiobá para guietenaláʼdxicaʼ sacrificiu biʼniʼ Jesús pur laanu, ne rúnicabe ni gueelaʼ rusaa iza de gútibe. Iza riʼ zácani viernes 3 de abril.

^ párrafo 32 Sti artículo gueeda lu tema riʼ zusiene ximodo nga rulá sacrificiu stiʼ Jesús laanu de pecadu ne xi naquiiñeʼ gúninu para gacaneni laanu.

^ párrafo 36 Biblia na gadxé binni nga Dios ne gadxé binni nga Jesús. Pa racalaʼdxuʼ gannuʼ jma la? biiyaʼ capítulo 4 stiʼ libru Xipeʼ ndiʼ cusiidiʼ Biblia, ni biʼniʼ ca testigu stiʼ Jiobá.

^ párrafo 38 Biindaʼ Génesis 3:15.