Biiyaʼ guiraʼ ni nuu lu sitiu riʼ

guyé lu índice

 MODO BIBANEʼ

Runi Jairo ni na Dios, peru né guielú

Runi Jairo ni na Dios, peru né guielú

Bixuiʼlú si ximodo nibániluʼ pa ñaca lú siouʼ randa runiibiluʼ. Zacapeʼ nga nabani Jairo, bicheʼ. Peru cadi guiníʼ íqueluʼ nuube triste, purtiʼ maʼ nánnabe xi pur nabánibe neca nagana ra cadíʼdibe. Xi racané Jairo yaʼ. Primeru la? chigüeniáʼ lii historia stibe.

Gulené Jairo ti parálisis cerebral ni láʼ cuadriplejía espástica. * Nga runi qué rucueezabe xcuérpube. Cumu qué runi mandar cerebru stibe xcuérpube la? guidubi dxi maʼ cacá biéquebe. Nuu tiru dede runiná Jairo laca laa ora málasi guicá bieque. Ne pa qué gataná tuuxa ora zuhuaa gaxha de laabe la? nuu tiru rudiibe ti golpe laa. Triste gabeʼ ni laatu, peru stale biaje rundiibidu nabe ne ñeebe lu silla de rueda stibe para cadi gacanabe.

GUPA JAIRO STALE YUUBAʼ DXI ZINIISI

Nabé gupa Jairo stale yuubaʼ dxi maʼ ziniisi. Bizulú bidii ataque laabe dxi nápabe chonna beeu ne stale biaje dede riguixhedxini laabe. Cada biaje guiaanabe zaqué, ruuyaʼ modo rindisaʼ jñaaʼ laabe ne ruxooñené laabe ra hospital purtiʼ zácaxa maʼ gútibe.

Cumu nabé ruzutipa beela ladi Jairo la? guca pandu ca dxita ladi. Biʼniʼ operárcabe fémur stibe, dxita xáʼnabe ne pelvis stibe dxi nápabe 16 iza, purtiʼ biaaxha cani. Qué riaandaʼ diʼ naa pabiáʼ naná modo ruunaʼ Jairo huaxhinni tantu cayuubaʼ ladi gudiʼdiʼ si operación que.

Cumu qué lica randa runi bicheʼ gastiʼ la? riquiiñebe tu gacané laabe para gobe, gácube lari ne gátabe. Bixhozeʼ ne jñaaʼ nga cani jma racané laabe. Peru nabé rusietenaláʼdxicabe laabe cadi laasícabe nga racanécabe laabe para guibánibe, sínuque laaca racané Dios laabe.

BIDXÉLACABE STI MODO GUINIʼNÉCABE LAABE

Testigu stiʼ Jiobá bixhozeʼ ne jñaaʼ, nga runi dede dxi gule Jairo ruundanécabe laa ca relatu zeeda lu Biblia. Nánnacabe jma galán ribani binni ora gaca xhamigu Dios. Ne laaca nánnacabe zadxiña dxi guiándabe, neca nadá ládibe ne rudii ataque laabe guiráʼ ora. Peru stale biaje nisi maʼ caníʼ íquecabe pa riene Jairo ni rusiidiʼ Biblia.

Guidúʼyanu xi guca ti biaje, dxi nahuiiniruʼ Jairo. Cumu maʼ qué guidxela bixhozeʼ xi guni la? gudxi laabe: «¡Jairo, guníʼ xombre! Pa ñaca dxandíʼ nadxiiuʼ naa la? maʼ niníʼneuʼ naa». Oraqueca bidá nisa lú Jairo. Racaláʼdxibe guiniʼbe xi cayuni sentirbe, peru ridxi si randa rúnibe. Nabé biuubaʼ ladxidóʼ bixhozeʼ pur bisiguunaʼ laabe. Peru  laaca bidii bixhozeʼ cuenta riene Jairo laa, neca qué randa riníʼ.

Gudiʼdiʼ si tiempu, bidii bixhozeʼ ne jñaaʼ cuenta runiibilú Jairo nagueenda nuu tiru. Casi ora niquiiñebe guielube para «niniʼbe» xi caníʼ íquebe ne xi cayuni sentirbe. Pa qué guiénecabe laabe la? jmaruʼ si ricá biéquebe ne rúnibe ridxi. Peru ora guiénecabe xi seña cayúnibe ne gudiicabe ni racaláʼdxibe la? ruxídxibe. Zaqué nga rudii Jairo xquixe laacabe.

Ti biaje bisiene ti terapeuta laadu nuu ti modo para guinínedu bicheʼ. Gudxi doctora riʼ laadu gusigáʼnadu nezalube ora guinabadiidxadu laabe ti cosa ne gábidu laabe guyadxibe ladu derechu pa racaláʼdxibe xiixa, peru guyadxibe ladu bigaʼ pa qué racaláʼdxibe ni. Zaqué nga maʼ gunda biénedu xi racalaʼdxiʼ Jairo.

DXI BICHAA XQUENDANABANI JAIRO

Chonna biaje lu ti iza runi ca testigu stiʼ Jiobá asamblea ra riziidicaʼ de Dios ne rié gayuaa o mil binni ora gaca cani. Nabé riecheʼ Jairo ora gunadiaga libana ni ridiʼdiʼ para cani chichuunisa. Ti biaje, dxi nápabe 16 iza, gunabadiidxaʼ bixhozeʼ laabe: «Jairo, ñee laaca racaláʼdxiluʼ chúʼnisaluʼ la?». Oraqueca biiyadxibe náʼ bixhozeʼ ladu derechu. De raqué maʼ gunabadiidxaʼ laabe: «Ñee maʼ biʼniʼ orarluʼ Dios ne maʼ guʼdxuʼ laa racalaʼdxuʼ guʼnuʼ ni na biaʼ dxi nabanuʼ la?». Laaca biiyadxibe náʼ bixhozeʼ ladu derechu. Óraque nga bidiʼdu cuenta maʼ bidii Jairo xquendanabani Jiobá.

Byuiʼnécabe laabe diidxaʼ de Biblia chupa chonna biaje, raqué laaca bidiicabe cuenta maʼ riene Jairo pabiáʼ risaca chúʼnisa binni. Ngue runi, lu iza 2004 gunabadiidxacabe laabe ti cosa nabé risaca: «Maʼ bidiiluʼ lii Jiobá para guʼnuʼ ni na la?». Biiyadxí Jairo luguiáʼ para bicabi, purtiʼ ngue nga seña gunábacabe laa guni para guiníʼ maʼ racalaʼdxiʼ chúʼnisa. Guyuunisa bicheʼ dxi napa 17 iza ne zaqué nga beeda gácabe testigu stiʼ Jiobá.

QUÉ RUSAANA DE GUYADXIBE CANI CHIGUNI DIOS

Lu iza 2011 bidxela ti modo nacubi para ganda guiniʼné Jairo binni: ti ordenador ni runi controlar binni ora guniibi guielú ne zanda guni activar intiica icono nuu lu pantalla stini. Pa quiñe laga binni lu ti icono o guyadxí ni ti ratuhuiiniʼ la? zeeda gácani casi ora nudii clic luni. Bidxela ti pantalla stibe ne guluucabe chupa chonna símbolo ni zanda iquiiñebe para guiníʼnebe binni. Ora riguiñe laga Jairo lu tobi de laacani la? riníʼ ordenador que ca diidxaʼ ni cá lu pantalla stini.

 Dxi jma maʼ ziziidiʼ Jairo de lu Biblia la? jma bicaani laa chuulaʼdxiʼ gusiidiʼ binni de Dios. Ora maʼ cadúʼndadu Biblia guiráʼ semana, nisi maʼ cayuuyadxí Jairo naa ne ordenador stiʼ. Zacá nga rinábabe naa gucaaʼ ni racaláʼdxibe guiniʼbe ora guinabadiidxacabe xiixa para guicabi binni ra Yoo stiʼ Reinu. Ximodo rúnibe ni yaʼ.

Ora maʼ cayaca ti guendaridagulisaa la? né stale paciencia ruyubi Jairo lu pantalla que xi icono gudii clic. Óraque nga runadiágadu guiníʼ ordenador que xi racaláʼdxibe. Dede ruxidxinebe laadu, purtiʼ nánnabe guizáʼ riguube gana laadu. Ti xhamígube láʼ Alex, guníʼ: «Ora gunadiagaʼ guicabi Jairo lu ti tema stiʼ Biblia ni cadúʼndadu la? nabé ridxagayaaʼ».

Riquiiñeʼ Jairo ti ordenador ra rudii clic né guielú para guicabi ra Yoo stiʼ Reinu ne para gucheeche diidxaʼ

Laaca riquiiñeʼ Jairo guielú para gusiidiʼ binni xi runi cré. Para ganda gúnibe ni la? rudiibe clic lu icono ra rihuinni ti jardín ne nuu binni de guiráʼ raza tobi si ne guiráʼ clase maniʼ. Óraque riníʼ ordenador que: «Biblia na zaca Guidxilayú riʼ ti paraísu ne maʼ qué ziuu guendahuará nin guendaguti; Apocalipsis 21:4». Pa chuulaʼdxiʼ binni guiziidiʼ jma la? rudii Jairo sti clic ne riree sti ridxi: «Ñuulaʼdxuʼ nudieeʼ lii ti cursu para niziidiluʼ jma de lu Biblia la?». Guizáʼ bidxagayaadu ora gúnnadu gucuaa bixhozebiidaʼ invitación que. Biéchedu stale ora bidúʼyadu modo gucané sti testigu stiʼ Jiobá Jairo para gusiidiʼ laabe ni zeeda lu Biblia. Chaahuiʼ chaahuiʼ biziidiʼ bixhozebiidaʼ jma ne guyuunisa lu beeu agosto iza 2014 lu ti asamblea ni guca Madrid. ¡Guizáʼ biéchedu dxi que!

Laaca nabé ridxagayaa ca maestru stiʼ Jairo laa ora gúʼyacaʼ pabiáʼ naroʼbaʼ fe stiʼ. Rosario, tobi de ca maestra rudii terapia laabe, guníʼ: «Pa chuʼ dxi guiníʼ iqueʼ chuaaʼ ndaaniʼ ti religión la? ziaaʼ lade ca testigu stiʼ Jiobá. Maʼ biiyaʼ racané fe stiʼ Jairo laa chuulaʼdxiʼ guibani, neca nagana modo nuu».

Dede riaaniʼ lú Jairo cada biaje guʼndaʼ promesa stiʼ Biblia riʼ: «Binni nachiitaʼ ñee zaguiʼbaʼ dani casi runi ti bidxiña, ne ni qué riníʼ zucaa ridxi né stale guendanayecheʼ» (Isaías 35:6). Laaca riree Jairo gana nuu tiru, peru qué rusaana de chuʼ nayecheʼ, purtiʼ cayuni ni na Dios ne nuu gaxha de ca xhamigu. Guendanayecheʼ ne fe stibe rusihuínnicani ti cosa nabé risaca: neca cadídinu intiica guendanagana, nápanu razón para chuʼnu nayecheʼ ndaaniʼ Guidxilayú riʼ, pa cayúninu ni na Jiobá.

^ párrafo 5 Parálisis cerebral nga diidxaʼ ni riquiiñeʼ para guiníʼcabe de ti guendahuará napa cerebru stiʼ binni ne pur laani qué randa runiibi xcuerpu. Tuuxa ni napa parálisis cerebral rudii ataque laa, qué rindaana ne qué randa riníʼ. Cuadriplejía espástica riʼ nga ti parálisis jma malu; binni napa ni richonga ladi ne qué randa ruaʼ ique.