Biiyaʼ guiraʼ ni nuu lu sitiu riʼ

guyé lu índice

 CA TEMA NI ZEEDA LU CA PRIMÉ YAZA | ÑEE RIUULÁʼDXILUʼ XHIIÑALUʼ LA?

Riuulaʼdxuʼ guʼnuʼ dxiiñaʼ nadipaʼ la?

Riuulaʼdxuʼ guʼnuʼ dxiiñaʼ nadipaʼ la?

Ora bidxiibaʼ Alejandro  * sti caja ndaaniʼ camión stiʼ empresa ra runi dxiiñaʼ, gucuaalaʼdxiʼ ne guníʼ ique: «Qué zindáyadiaʼ zitu né dxiiñaʼ riʼ, peru paraaruʼ ndiʼ chaaʼ pue. Ñee zadxiña dxi cueenduáʼ xiixa ni jma galán la? ¡Zuluaʼsiaʼ nibaneʼ jma galán pa maʼ qué ñunepiáʼ dxiiñaʼ!».

Cadi Alejandro si nga nuu zacá, nuuruʼ stale binni ni qué riuulaʼdxiʼ guni dxiiñaʼ nadipaʼ. Guidúʼyanu xi guníʼ ti mecánicu láʼ Aaron: «Stale binni nabé rituilú ora guni ti dxiiñaʼ “huaxiéʼ risaca”. Ne riníʼ íquecaʼ zusaanacaʼ ni cásipeʼ guiree sti dxiiñaʼ jma galán».

Yanna, xiñee riníʼ ique stale binni qué zanda guni dxiiñaʼ nadipaʼ yaʼ. Zándaca purtiʼ ñuuláʼdxicabe nibánicabe cásica nabani ca binni ricu ni ridiʼdiʼ lu tele, ruluíʼ gastiʼ cadi cayaadxaʼ laacaʼ ne nuucaʼ nayecheʼ. Guzéʼtenu xi guníʼ Mateo, ti hombre ni runi dxiiñaʼ ndaaniʼ ti taller de mantenimientu: «Stale tu riníʼ ique sicaríʼ: “Cani runi dxiiñaʼ nadipaʼ nga cani qué nireendú”.». Ngaca nga ni huayuuyaʼ Sebastián, ti hombre ni runi dxiiñaʼ de conserje. Guidúʼyanu xi guniʼbe: «Maʼ huaxiéʼ riuulaʼdxiʼ binni guni dxiiñaʼ, peru ñuulaʼdxiʼ ñuni ganar biaʼca biʼniʼ ganar dxiqué».

Neca zacá, nuuruʼ stale binni ni riuulaʼdxiʼ guni dxiiñaʼ nadipaʼ. Guidúʼyanu xi guníʼ Daniel, ti hombre de 25 iza ni runi dxiiñaʼ de pión né ti empresa ni rucuí yoo: «Riuu binni nayecheʼ ora runi dxiiñaʼ, jmaruʼ si pa cayuni ni para gapa ni caquiiñeʼ». Zacaca riníʼ ique Andrés, laa napa 23 iza: «Para ganda chuʼ binni nayecheʼ la? caquiiñeʼ guni dxiiñaʼ. Qué ziuudiouʼ nayecheʼ pa qué guʼnuʼ dxiiñaʼ, ne laaca zareeu gana».

Xiñee riuulaʼdxiʼ Daniel ne Andrés gúnicaʼ dxiiñaʼ nadipaʼ yaʼ. Purtiʼ zinándacabe ca conseju zeeda lu Biblia. Nabé rucaa Biblia binni gucaa ique guni dxiiñaʼ ne racaneni laa cadi guiree gana, peru cadi ngasi, sínuque laaca rusiidini binni chuʼ nayecheʼ ora maʼ cayuni dxiiñaʼ.

Xi conseju zeeda lu Biblia zanda gacané lii chuʼluʼ nayecheʼ né dxiiñaʼ stiuʼ yaʼ. Runi invitardu lii gúʼndaluʼ chupa chonna de laacani lu sti tema ca.

^ párrafo 3 Bidxaa lácabe.