Biiyaʼ guiraʼ ni nuu lu sitiu riʼ

guyé lu índice

 GUCANÉ BIBLIA LAACABE PARA BICHAACABE

Nabé bidxagayaaʼ ora biiyaʼ cadi nagana ni rusiidiʼ Biblia

Nabé bidxagayaaʼ ora biiyaʼ cadi nagana ni rusiidiʼ Biblia
  • IZA GÚLEBE: 1948

  • PADÉ LAABE: HUNGRÍA

  • NI NAQUIIÑEʼ GÁNNALUʼ: DEDE QUÉ RIDXÉLABE XI GÚNIBE PURTIʼ CUYÚBIBE TU GUSIENE LAABE CAADXI COSA RISACA

MODO BIBANEʼ DXIQUÉ.

Guleʼ ti lugar láʼ Székesfehérvár, ti guidxi nuu Hungría. Cumu maʼ napa guidxi riʼ jma de ti mil iza la? nga runi nápani stale historia. Nabé triste runeʼ sentir, purtiʼ qué ganda diʼ gusiaandaʼ guiráʼ yuubaʼ bisaana Segunda Guerra Mundial guidxi riʼ.

Bixhozebiidaʼ ne jñaabiidaʼ nga bisiniisicaʼ naa. Dede ridá nisa luaʼ ora rietenalaʼdxeʼ laacabe, peru jma riete nisa luaʼ ora guedasilú naa jñaabiidaʼ, Elizabeth. Laabe nga bisiidibe naa guneʼ cré Dios. Dede dxi napaʼ chonna iza maʼ runi orarnebe naa oración stiʼ padrenuestro guiráʼ gueelaʼ. Peru dxiruʼ maʼ bisaaʼ biaʼ 30 iza nga bieneʼ oración que.

Guyuaaʼ ra nuu bixhozebiidaʼ ne jñaabiidaʼ dxi nacaʼ xcuidi, purtiʼ runi bixhozeʼ ne jñaaʼ dxiiñaʼ dxi ne gueelaʼ para guindisaʼ chaahuicaʼ ti ndaa bueltu ti ganda sicaʼ ti yoo galán. Peru ridagulisaa familia stinneʼ chupa sábadu stiʼ cada beeu para guidoʼdo gueta. Riecheʼ ladxiduáʼ ora rietenalaʼdxeʼ ca dxi que.

Lu iza 1958 guca ni gudixhe ique bixhozeʼ ne jñaaʼ: guzíʼcabe ti yoo. ¡Yanna huaxa maʼ zanda cuezaniáʼ laacabe! Nabé nayecheʼ nuaaʼ raqué, peru qué nindaa guendanayecheʼ que, purtiʼ guca huará bixhozeʼ de cáncer ne gútibe gudiʼdiʼ si xhoopaʼ beeu.

Binidé ngue ladxiduáʼ. Rietenalaʼdxeʼ runeʼ orar sicaríʼ: «Dios, gunabaʼ ndaʼ lii gulaluʼ bixhozeʼ. ¡Guizáʼ caquiiñeʼ laabe! Xiñee qué nucaadiaʼguʼ naa pue». Dede rié bacaandaʼ stinneʼ, purtiʼ qué gannaʼ paraa nuu bixhozeʼ. Rinabadiidxaʼ laca naa: «Ñee zebe guibáʼ la? Ñee maʼ qué ziuu dxi guuyaʼ laabe la?». Dede ridxiicheʼ ora guuyaʼ xcaadxi xcuidi ni nabani bixhoze.

Stale iza guyaaʼ ra pantión guiráʼ dxi. Ruzuxibeʼ ra baʼ stiʼ bixhozeʼ ne runeʼ orar: «Dios, rinabaʼ lii gaʼbuʼ naa paraa nuu bixhozeʼ». Laaca rinabaʼ Dios gusiene naa xiñee bizáʼ laanu.

Bicaaʼ iqueʼ guiziideʼ diidxaʼ alemán dxi napaʼ 13 iza, purtiʼ rabeʼ zacané guiráʼ ca libru stiʼ ca alemán que naa gannaʼ  ca cosa ni racaladxeʼ. Lu iza 1967 yeguundaʼ ndaaniʼ ti scuela nuu guidxi Jena, dxiqué nuuni lu náʼ Alemania Oriental, maʼ gastiʼ guidxi riʼ yanna. Tobi biindasiáʼ guiráʼ libru stiʼ ca filósofo de Alemania, peru jma biindaʼ ca libru ni caníʼ xi pur nabani binni lu Guidxilayú. Neca bidxelaʼ caadxi cosa ni guyuuladxeʼ lúcani, peru nin tobi de laacani qué nuchá ladxiduáʼ. Ngue runi rinabaruaʼ Dios gusiene cani naa.

XIMODO GUCANÉ BIBLIA NAA PARA BICHAAʼ.

Biguetaʼ Hungría lu iza 1970 ne raqué binebiaʼyaʼ ti baʼdudxaapaʼ láʼ Rose, ni beeda gaca xheelaʼ. Dxiqué napa Hungría ti gobiernu comunista, ngue runi, qué nindaa de bichaganadu, bireʼdu guidxi que ne yebiʼdu Austria. Rábidu guireʼdu de raqué ne chuudu Sydney, ti guidxi stiʼ Australia, ra nabeza ti xtiuaʼ.

Qué nindaa bidxelaʼ dxiiñaʼ guidxi Austria. Ti dxi guca xiixa ni cadi cabezaʼ: gudxi tobi de ca hombre runeniáʼ dxiiñaʼ naa zanda guicabi Biblia guiráʼ ni racaladxeʼ gannaʼ ne bidiibe naa chupa libru ni cusiidiʼ de Biblia. Nagueenda biindaʼ ca libru que. Peru, cumu racaladxeʼ guiziideʼ jma la? bicaaʼ ra nuu ca binni biʼniʼ ca libru que, ca testigu stiʼ Jiobá, ne gunabaʼ laacaʼ xcaadxi publicación.

Dxipeʼ cusaʼdu ti iza de bichaganadu, beeda ganna ti hombrehuiiniʼ Testigu laadu. Beedanebe ca publicación ni gunabaʼ que ne gúdxibe naa pa zacaa ti cursu para guiziideʼ jma de Biblia. Qué lica niníʼ iqueʼ ni chupa biaje. Cumu nabé rapaʼ gana guiziideʼ la? rudiicabe cursu naa chupa biaje lu ti semana, ¡tapa hora rindaa cursu que cada biaje!

Guizáʼ guyuuladxeʼ modo biquiiñeʼ ca Testigu Biblia para bisiidicaʼ naa stale cosa. Ora biluíʼcabe naa lá Dios lu Biblia stinneʼ ni nuu lu diidxaʼ húngaro, nabé bidxagayaaʼ. Maʼ ziniaaʼ 27 iza de riaaʼ mixaʼ, peru qué huayuu dxi gunadiagaʼ pa Jiobá nga láʼ Dios. Nabé bidxagayaaʼ ora biiyaʼ cadi nagana ni rusiidiʼ Biblia. Tobi de cani biziideʼ nga qué lica ganna diʼ ca gueʼtuʼ gastiʼ, nuucabe casi tuuxa ni cá bacaandaʼ laa (Eclesiastés 9:5, 10; Juan 11:11-15). Laaca biiyaʼ zadxiña dxi gueeda ti guidxilayú cubi ra «ma qué ziuu ru enda guti» (Apocalipsis 21:3, 4). Yanna huaxa maʼ «rune cre zusibani Dios gueʼtuʼ» lu guidxilayú cubi stiʼ ne racá nga cabezaʼ guuyaʼ bixhozeʼ sti biaje (Hechos 24:15).

Gucané Rose naa de guidubi ladxidóʼ. Nagueenda bizíʼdidu stale cosa ne bindúʼxedu libru que chupa beeu si. Riuudu guiráʼ guendaridagulisaa stiʼ ca Testigu; nabé bidxagayaadu ora bidúʼyadu pabiáʼ nadxiisaacabe, modo ridxaagalúcabe binni ne modo nuucabe tobi si (Juan 13:34, 35).

Bidii gobiernu stiʼ Australia permisu laadu para ganda guiuʼdu guidxi que iza 1976. Cásipeʼ yendadu, biyúbidu ca Testigu ne pur modo bidxaagalúcabe laadu biʼniʼ sentirdu casi ora ñuʼdu ra lídxidu. Gúcadu testigu stiʼ Jiobá lu iza 1978.

XI MAʼ GULEENDUÁʼ.

Yanna huaxa maʼ bidxelaʼ tu guicabi guiráʼ ni gulee xpacaandaʼ dede dxi nahuiineʼ. Ne cumu nuaaʼ gaxha de Jiobá la? ruuyaʼ laabe casi Bixhozeʼ (Santiago 4:8). Peru cadi ngasi, laaca cabezaʼ guidxiña dxi guuyaʼ bixhozeʼ ndaaniʼ Paraísu ni maʼ guníʼ Dios chiguni (Juan 5:28, 29).

Biguétadu Hungría lu iza 1989 para gusíʼdidu ca binnilídxidu, ca xhamígudu ne xcaadxi binni cani maʼ bizíʼdidu lu Biblia. Nabé riéchedu purtiʼ maʼ gucanedu gayuaa binni guiziidiʼ de Dios. Jma de setenta de laacabe maʼ guca Testigu, ládecabe nuu jñaaʼ ni nadxieeʼ.

Diecisiete iza gunabaʼ Dios nicabi guiráʼ ni racaladxeʼ gannaʼ, yanna riʼ maʼ gudiʼdiʼ 39 iza dede dxi bicábibe cani naa. Dede yanna runeʼ orar, peru maʼ ndiʼ nga ni rabeʼ laabe: «Nadxieeʼ lii, Bixhozeʼ ni nuu guibáʼ, xquíxepeʼ lii pur bicábiluʼ guiráʼ ni racaladxeʼ gannaʼ dede dxi nahuiineʼ».