Nuu tiru riquiiñeʼ diidxaʼ eunuco para guiníʼcabe de ti hombre ni biʼniʼ castrárcabe laa. Tiempu gucuá Biblia runi castrárcabe tuuxa para guni castigárcabe laa o para gúnicabe laa esclavu. Pa gúʼyacabe jneza runi ti eunuco xiixa dxiiñaʼ la? riguucabe laa ti lugar ra nuu guiráʼ ca gunaa stiʼ ca rey. Biblia ruzeeteʼ gupa Hegai ne Saasgaz ca xheela ne ca jnadxii rey persa Asuero, nuu tu na laabe nga Jerjes I (Ester 2:3, 14).

Peru cadi guiráʼ ca eunuco ni ruzeeteʼ Biblia biʼniʼ castrárcabe laacaʼ. Caadxi binni nabé ruundaʼ nacaʼ biquiiñeʼ diidxaʼ eunuco para ti binni runi xhiiñaʼ rey. Tobi de laacabe nga Ébed-mélec, ti hombre guca xhamigu Jeremías ne zaqueca ti hombre runi xhiiñaʼ rey de Etiopía ni guniʼné Felipe. Zándaca gupa Ébed-mélec ti dxiiñaʼ risaca, purtiʼ gunda guyuube ora tiica si nezalú rey Sedequías (Jeremías 38:7, 8). Ne etíope biʼniʼ predicar Felipe que tesoreru stiʼ rey laa ne guyé ndaaniʼ guidxi Jerusalén para guni adorar Dios (Hechos 8:27).

Dxi guníʼ Jesús de ti juiciu ni chigaca, bizeetebe ca diidxaʼ riʼ: «Dxi ibigueta Hombre Biseenda Dios [...] zadxiña binni de irá guidxi ra nuu be. Zabee chu be caadxi lade xcaadxi, casi ribee chu pastor chiba lade dendxuʼ» (Mateo 25:31, 32). Xiñee guleechú ca pastor chiva lade dendxuʼ.

Ca pastor que rutaagulisaacaʼ dendxuʼ ne chiva ridxí para chigápacaʼ laacame. Peru huaxhinni riguucabe laacame ndaaniʼ currá para guiaapacame ti cadi guniná maniʼ duxhuʼ laacame, cadi cuana binni laacame ne cadi gáticame de nanda (Génesis 30:32, 33; 31:38-40). Ca pastor que riguucaʼ laacame ndaaniʼ gadxé gadxé currá ti cadi guniná chiva ca dendxuʼ maʼ guxana ne ca xiiñicaʼ. Ti libru ni cuzeeteʼ de guiráʼ cosa zeeda lu Biblia na laaca ribeechúcabe ca dendxuʼ para «guicaa barracu laacame, guxhiicabe laacame ne igá guicha ládicame» (All Things in the Bible). Ejemplu biquiiñeʼ Jesús riʼ zeeda ni de ti costumbre nabé binibiáʼ binni judíu, purtiʼ stale de laacaʼ gulézacaʼ ranchu.