Biiyaʼ guiraʼ ni nuu lu sitiu riʼ

guyé lu índice

 CANI RUUNDAʼ REVISTA RIʼ RACALÁʼDXICAʼ GÁNNACAʼ

Tu bizáʼ Dios

Tu bizáʼ Dios

Sicaríʼ gudxi ti hombre xiiñiʼ ni napa gadxe iza: «Maʼ raca stale stale iza, bizáʼ Dios Guidxilayú ne guiráʼ cosa ni nuu luni. Laaca bizaʼbe Gubidxa, Beeu ne ca estrella». Biaana hombrehuiiniʼ que ti ratu caníʼ ique, de raqué gunabadiidxabe bixhózebe: «Apá... peru tu bizáʼ Dios yaʼ».

Para na bixhózebe rabi laabe: «Guirutiʼ. Dios maca xadxí de nuu». Biene xcuidihuiiniʼ riʼ ni gudxi bixhoze laa óraque. Peru ra maʼ ziniisibe jma racaláʼdxibe gánnabe de laani. Raca nagana para laabe guiénebe nuu tuuxa ni qué ñapa ra bizulú xquendanabani. Zándaca guiníʼ íquebe: «Ximodo nga yaʼ. Pa dede guibáʼ ne Guidxilayú riʼ guyuu tu bizáʼ ni». Peru caʼruʼ diʼ guicábibe guendarinabadiidxaʼ que: padé beeda Dios yaʼ.

Xi riníʼ Biblia de laani yaʼ. Zanda guininu cásica bicabi hombre bizéʼtenu ca xiiñiʼ. Sicaríʼ gudxi Moisés Jiobá: «Ante gale ca dani ca, o nuzaʼluʼ Guidxilayú ne layú ni rudii ni gó binni, [...] guiráʼ dxi huadiʼdiʼ ne guiráʼ dxi chitiidiʼ lii nga Dios» (Salmo 90:1, 2). Ne profeta Isaías guníʼ xiixa cásica ca diidxaʼ ni bidúʼndanu ca: «Qué huayánnaluʼ, o qué huayunadiágaluʼ la? Jiobá, Ni bizáʼ dede ra bidubi guidxilayú, laabe nga ti Dios ni qué ziuu dxi gusaana de gácabe ni» (Isaías 40:28). Ne carta ni bicaa Judas na «qué ziuu dxi guiaana dxí de isaca» Dios (Judas 25).

Ca versículo riʼ rusihuínnicani «qué ziuu dxi guiaana dxí Dios de guni mandar», casi guníʼ apóstol Pablu de laabe (1 Timoteo 1:17). Laabe maʼ xadxí de nuube neca guibiguétanu atrá stale tiempu. Ne qué ziuu dxi gátibe (Apocalipsis 1:8). Dios qué gapa ra bizulú ne qué gapa ra guiluxe; nga nga tobi de ca guenda nápabe.

Xiñee raca nagana para laanu guiénenu nga yaʼ. Purtiʼ cadi xadxí ribáninu ne pur nga jma gadxé modo rugábanu ca iza ca de modo rugabaʼ Jiobá cani. Quíxhenu ti ejemplu, para laabe ti mil iza zeeda gácani casi ti dxi, purtiʼ laabe maʼ xadxí de nuube (2 Pedro 3:8). Guidúʼyanu ejemplu riʼ. Ti uxharu ribani biaʼ 50 dxi. Ñee ñanda ñéneme xii nga guibani tuuxa 70 ne 80 iza, biaʼ ribani binni la? Qué ñanda diʼ. Pue laanu zeeda gácanu casi uxharu ca ora guchaaganu laanu né Dios ni bizáʼ guiráʼ xixé ni nuu. Qué zanda diʼ guchaaganu biaʼ riénenu ne biaʼ riene Dios (Isaías 40:22; 55:8, 9). Nga runi nuu caadxi cosa de laabe ni qué zanda guiénenu.

Nécapeʼ gaca nagana para laanu guiénenu qué gapa Dios ra bizulú ne ra guiluxe la? jneza guiníʼ íquenu zacá. Pa ñuu tu nuzáʼ Dios, maʼ ngue nga ñeeda gaca ni Bizáʼ guiráʼ xixé ni nuu. Peru Biblia na Jiobá nga bizáʼ guiráʼ xixé ni nuu (Apocalipsis 4:11). Ne laanu nánnanu guyuu ti tiempu qué ñuu diʼ guiráʼ ni nuu guibáʼ (Génesis 1:1, 2). Ximodo beeda chuu guiráʼ ni yaʼ. Napa xidé maʼ nuu Dios para tiempu ca. Ne laaca maʼ nuube ante chuʼ tuuxa ni napa poder, casi primé Xiiñibe ne ca ángel (Job 38:4, 7; Colosenses 1:15). Ante guzulú guzáʼ Dios guiráʼ ni nuu, guyuube stúbibe. Laabe guirutiʼ tu nuzáʼ laabe, purtiʼ gastiʼ nuu dxicá ne guirutiʼ nuu aparte de laabe.

Rihuinni nuu ti Dios ni qué gapa ra bizulú ne ra guiluxe purtiʼ laabe bizaʼbe laanu ne laabe bizaʼbe guibáʼ ne Guidxilayú. Maʼ xadxí de nuu Dios ni gudixhe ximodo guni guibáʼ ne Guidxilayú riʼ dxiiñaʼ ne ca ley stícani. Laasibe nga zanda gudiibe guendanabani guiráʼ ni nuu (Job 33:4).