Biiyaʼ guiraʼ ni nuu lu sitiu riʼ

guyé lu índice

«Jiobá Dios stinu laasibe nga Jiobá»

«Jiobá Dios stinu laasibe nga Jiobá»

«Bicaadiaga, Israel: Jiobá Dios stinu laasibe nga Jiobá» (DEUTERONOMIO 6:4).

DIIDXAʼ RIUUNDAʼ: 138 NE 2

1, 2. a) Xiñee nabé runibiáʼ binni ca diidxaʼ ni zeeda lu Deuteronomio 6:4. b) Xiñee guníʼ Moisés ca diidxaʼ riʼ.

NAPA ca judíu ti oración nabé risaca para laacaʼ ni biree lu Deuteronomio 6:4. Rábicabe oración riʼ shemá, purtiʼ laani nga primé diidxaʼ ni zeeda lu versículo riʼ lu diidxaʼ hebreu. Maʼ raca gayuaa iza nga de riníʼ stale judíu ca diidxaʼ riʼ siadóʼ ne ora guiluxe dxi para gusihuínnicaʼ ti Dios si nga runi adorarcaʼ.

2 Guníʼ Moisés ca diidxaʼ ca lu iza 1473 ante de ca dxi stiʼ Jesús, dxi cudii ti discursu para gaca despedir de ca israelita. Laacabe maʼ nuucabe lu ca layú stiʼ Moab, maʼ nuucabe listu para tiidicabe guiiguʼ Jordán ne guicaacabe layú ni guníʼ Dios gudii laacabe (Deuteronomio 6:1). Maʼ 40 iza de zaniruʼ Moisés lúcabe. Né ca diidxaʼ ca caguube gana laacaʼ ti gácacaʼ nadxibalú, gápacaʼ confianza Jiobá ne cadi gucheenecaʼ Dios. Xiñee yaʼ. Purtiʼ nánnabe zadxaagalucaʼ stale guendanagana. Ngue runi, gudxi si Moisés laacaʼ xiná Chii Mandamientu ne xcaadxi Ley stiʼ Jiobá que, bisietenalaʼdxiʼ laacabe ca diidxaʼ riʼ: «Bicaadiaga, Israel: Jiobá Dios stinu laasibe nga Jiobá. Ne  gunnaxhii Jiobá, Dios stiluʼ, de guidubi ladxidoʼloʼ ne guidubi xhiálmaluʼ ne guiráʼ stipa stiluʼ» (Deuteronomio 6:4, 5).

3. Xi guendarinabadiidxaʼ zacábinu lu tema riʼ.

3 Nanna ca israelita que ti cosa: Jiobá, Dios sticaʼ, «laasibe nga Jiobá». Ca israelita ni ruzuubaʼ diidxaʼ la? biʼniʼ adorarcaʼ ti Dios si, Dios stiʼ ca bixhozególacaʼ. Yanna, xiñee bisietenalaʼdxiʼ Moisés laacabe ca diidxaʼ que yaʼ. Cumu «laasibe nga Jiobá», ximodo zanda gacané nga laanu gannaxhiinu laabe de guidubi ladxidoʼno, guidubi xhiálmanu ne guiráʼ stipa stinu yaʼ. Ne xiñee risaca ca diidxaʼ zeeda lu Deuteronomio 6:4, 5 para laanu ca dxi riʼ.

JIOBÁ SI NGA DIOS STINU

4, 5. a) Xi riníʼ ca diidxaʼ «laasibe nga Jiobá». b) Xiñee maʼ gadxé Jiobá que ca dios stiʼ xcaadxi guidxi guyuu dxiqué.

4 Guirútiruʼ casi Jiobá. Ca diidxaʼ «laasibe nga Jiobá» riníʼ cani stale cosa. Tobi de laani nga Jiobá si nga tobi lucha Dios ne guirútiruʼ stobi casi laabe, ne qué zanda guchaaganu laabe sti binni. Xiñee guníʼ Moisés ca diidxaʼ riʼ yaʼ. Cadi para si gusihuínnibe cadi jneza guni cré binni trinidad. Jiobá bizáʼ guibáʼ ne Guidxilayú. Laabe nga Rey stiʼ universu ne tobi lucha Dios ni dxandíʼ. Gastiʼ sti dios casi laabe (2 Samuel 7:22). Ngue runi, ora guníʼ Moisés «laasibe nga Jiobá» la? bíʼnibe ni para gusietenaláʼdxibe ca israelita naquiiñeʼ guni adorarcaʼ Jiobá si. Cadi naquiiñeʼ gúnicabe casi runi ca binni de ca guidxi ni dxaagacabe, purtiʼ ca binni que runi adorarcaʼ stale dios falsu. Biʼniʼ cré ca binni que runi controlar ca dios sticaʼ chupa chonna cosa stiʼ Guidxilayú riʼ.

5 Guzéʼtenu caadxi ejemplu. Ca egipciu que biʼniʼ adorarcaʼ Ra, dios stiʼ Gubidxa; Nut, diosa stiʼ guibáʼ, Geb, dios stiʼ Guidxilayú, ne Hapi, dios stiʼ guiiguʼ Nilo. Ne laaca biʼniʼ adorarcaʼ stale maniʼ. Peru ra biseendaʼ Jiobá chii plaga que, bisihuinni jma napa poder que ca dios falsu que. Para ca binni de Canaán la? Baal nga dios ni jma risaca. Biʼniʼ crécabe rudii dios falsu riʼ guendanabani. Laaca biʼniʼ crécabe laabe nga dios stiʼ guibáʼ, stiʼ nisaguié ne stiʼ ca tormenta. Ndaaniʼ stale guidxi, gupa binni confianza zapa Baal laacaʼ (Números 25:3). Peru ca israelita que naquiiñeʼ guietenaláʼdxicaʼ «Jiobá nga Dios ni dxandíʼ», gástiruʼ stobi. «Laasibe nga Jiobá» (Deuteronomio 4:35, 39).

6, 7. a) Xi sti cosa riníʼ ca diidxaʼ «laasibe nga Jiobá». b) Ximodo bisihuinni Dios laasi nga Jiobá.

6 Qué ruchaa Jiobá modo laa ne runi ni riníʼ. Lade ca diidxaʼ «laasibe nga Jiobá» zeeda diidxaʼ «laasibe», ndiʼ laaca riníʼ zanda gápanu confianza laabe ne rúnibe ni maʼ guniʼbe. Qué ruchaa diʼ Jiobá, rábibe binni xi chigúnibe ne riniʼbe ni dxandíʼ. Ximodo rihuinni zacá ni yaʼ. Guzéʼtenu ti ejemplu. Gúdxibe Abrahán zacaa ca xiiñiʼ layú ni maca guniʼbe guicaacaʼ. Qué nuchaa Jiobá ni gudixhe ique ne biʼniʼ stale milagru para bidii laacabe layú que gudiʼdiʼ si 430 iza (Génesis 12:1, 2, 7; Éxodo 12:40, 41).

7 Gayuaa iza despué, guníʼ Jiobá naca ca israelita testigu stiʼ ne gúdxibe laacaʼ: «Ngueca nga naa. Ante de naa qué ñaʼ diʼ sti Dios, ne despué de naa qué huayuu diʼ stobi». Ne laaca bisihuinni Jiobá qué ruchaa ni maʼ gudixhe ique guni ora guníʼ: «Guiráʼ tiempu ngueca nga naa» (Isaías 43:10, 13; 44:6; 48:12). Dxandíʼ, para ca israelita que la? ti ndaayaʼ ngue gúnicaʼ ni na Jiobá, ti Dios ni qué ruchaa ne zanda gápacabe confianza laa guiráʼ ora. Ne ngaca nga ndaayaʼ nápanu yanna (Malaquías 3:6; Santiago 1:17).

8, 9. a) Xi ribeza Jiobá guni ca xpinni. b) Xi guníʼ Jesús ni rusihuinni pabiáʼ risaca ca diidxaʼ guníʼ Moisés.

 8 Ni gudxi Moisés ca israelita que laaca bisietenalaʼdxiʼ ni laacaʼ qué zusaana de gannaxhii Jiobá laacaʼ ne zápabe laacaʼ. Peru laaca guleza Jiobá guni adorárcabe laasi ne gannaxhiicabe laa de guidubi ladxidóʼcabe, guidubi xhiálmacabe ne guiráʼ stipa stícabe. Ne ora tiica naquiiñeʼ guiniʼnécabe ca xiiñicabe de Jiobá. Pa gúnicabe zaqué, dede ca joven que zuni adorarcaʼ Jiobá si (Deuteronomio 6:6-9).

9 Cumu qué ruchaa Jiobá ni riguixhe ique guni la? ca dxi stinu riʼ ribézabe guni ca xpínnibe cásica biʼniʼ ca israelita que. Nga runi, pa racaláʼdxinu chuulaʼdxiʼ Jiobá modo runi adorarnu laa la? naquiiñeʼ guni adorarnu laasibe ne gannaxhiinu laabe de guidubi ladxidoʼno, xquendabiaaninu ne guiráʼ stipa stinu. Jesús guníʼ laani nga mandamientu jma risaca ne bisihuinni pabiáʼ risaca ca diidxaʼ guníʼ Moisés que (biindaʼ Marcos 12:28-31). Yanna guidúʼyanu ximodo zanda gusihuínninu runi crenu «Jiobá Dios stinu laasibe nga Jiobá».

JIOBÁ SI NGA GUNI ADORARNU

10, 11. a) Ximodo nga runi adorarnu Jiobá si. b) Ximodo bisihuinni ca hombrehuiiniʼ hebreu que runi adorarcaʼ Jiobá si.

10 Jiobá nga tobi lucha Dios ni runi adorarnu. Qué chuʼ dxi guni adorarnu sti dios ne cadi uguʼnu idea o práctica stiʼ religión falsa ora maʼ cayuni adorarnu Jiobá. Cadi naca si Jiobá ti Dios ni jma risaca que xcaadxi dios ne jma nápabe poder que laacaʼ, sínuque laabe nga Dios ni dxandíʼ. Nga runi, laasibe nga naquiiñeʼ guni adorarnu (biindaʼ Apocalipsis 4:11).

11 Lu libru stiʼ Daniel rieeteʼ de tapa hombrehuiiniʼ hebreu: Daniel, Hananías, Misael ne Azarías. Ximodo bisihuínnicabe runi adorárcabe Jiobá si yaʼ. Qué ninácabe ñócabe guendaró ni cadi naquiiñeʼ gó ca xpinni Dios. Qué niná guionnaʼ xhamigu Daniel riʼ nuzuxíbicaʼ xañee ti bidóʼ de oro ni biʼniʼ rey stiʼ Babilonia. Nanna dxíchicabe Jiobá si nga naquiiñeʼ guni adorárcabe. Ngue runi qué nusaana de nuzuubacabe stiidxabe (Daniel 1:1–3:30).

12. Pa racaláʼdxinu guni adorarnu Jiobá si, xi naquiiñeʼ gúninu.

12 Naquiiñeʼ gúninu ni na Jiobá primé lu xquendanabáninu. Pa racaláʼdxinu guni adorarnu laasibe la? naquiiñeʼ gápanu cuidadu ti cadi gúninu sti cosa lugar de gúninu ni nabe. Xidé ndiʼ naquiiñeʼ chuʼnu cuidadu yaʼ. Lu Chii Mandamientu que gudxi Jiobá ca xpinni qué zanda diʼ guni adorarcaʼ xcaadxi dios. Cadi naquiiñeʼ guni adorárcabe ninruʼ sti cosa (Deuteronomio 5:6-10). Ca dxi stinu riʼ, runi adorar binni stale cosa ne nuu binni raca nagana para laa gudii cuenta pa cayuni ni. Peru qué huachaa diʼ Jiobá ne dede yanna qué racalaʼdxiʼ guni adorarnu sti cosa. Zaqueca ca dxi stinu riʼ «laasibe nga Jiobá». Nga runi, guidúʼyanu xi zanda gúninu ti cadi guni adorarnu sti cosa.

13. Xii nga ca cosa ni zanda guxheleʼ laanu de Jiobá.

13 Caadxi cosa ni zanda guxheleʼ laanu de Jiobá nga ni rieeteʼ lu Colosenses 3:5 (biindaʼ ni). Versículo riʼ cusiene: ora rachelunu gápanu jma la? zeeda gaca ni casi ora ñuni adorarnu bidóʼ. Xiñee yaʼ. Purtiʼ ora riuuláʼdxinu gápanu stale cosa risaca o gápanu stale bueltu, runi controlar ni laanu dede reeda gaca ni casi ti dios ni napa poder. Guiráʼ pecadu ni rieeteʼ lu Colosenses 3:5 laaca rachelú binni guni cani. Pa chuuláʼdxinu gúninu guiráʼ cosa riʼ, zannaxhiinu cani jma que biaʼ nadxiinu  Dios. Pa gúninu zacá, casi ora ñuni adorarnu sti dios, ne zusihuínninu maʼ cadi «laasibe nga Jiobá» para laanu. Qué chuʼ dxi gúninu zacá.

14. Ximodo caguixhená apóstol Juan laanu.

14 Zacagá nga ca diidxaʼ guníʼ apóstol Juan ni caguixhená laanu. Laa guníʼ «riulaʼdxi binni guni ni na ique ne gapa irá ni guʼyaʼ, ne gaca tuuxa nezalú ca xcaadxi». Ne laaca bisiénebe pa nadxii tuuxa ca cosa ni nuu lu guidxilayú «cadi nadxii Dios» laa (1 Juan 2:15, 16). Nga runi, gatigá naquiiñeʼ gúʼyanu ximodo nuunu. Zándaca gudiʼnu cuenta riuuláʼdxinu xiixa diversión, riuuláʼdxinu modo nabani binni guidxilayú, modo rácucaʼ lari ne modo ruzuchaahuicaʼ. O zándaca gacaláʼdxinu chuunu universidad para gápanu stale «cosa risaca» lu Guidxilayú (Jeremías 45:4, 5). Peru maʼ gaxha nuu guidxilayú cubi stiʼ Dios. Nga runi, guietenaláʼdxinu ca diidxaʼ guníʼ Moisés. Pa dxandíʼ riénenu ne runi crenu «Jiobá Dios stinu laasibe nga Jiobá» la? zuni adorarnu laasibe ne zúninu ni nabe modo riuuláʼdxibe (Hebreos 12:28, 29).

GACANENU CHUʼ CA HERMANU TOBI SI

15. Xiñee bisietenalaʼdxiʼ Pablu ca xpinni Cristu Jiobá si nga Dios sticaʼ.

15 Ca diidxaʼ «laasibe nga Jiobá» laaca rusietenalaʼdxiʼ cani laanu racalaʼdxiʼ Jiobá chuʼnu tobi si ne quixhe ique guiranu gúninu ni nabe lu xquendanabáninu. Stale de ca xpinni Cristu de primé siglu que de Judea laacaʼ, Grecia, Roma ne de xcaadxi guidxi. Gúpacaʼ gadxé gadxé cultura, gadxé costumbre ne gadxé gadxé modo guníʼ íquecaʼ. Ngue runi, guca nagana para chupa chonna de laacaʼ gúnicaʼ ni maʼ biziidicaʼ o gucaanacaʼ ca práctica gúpacaʼ dxiqué. Ngue runi, gupa xidé bisietenalaʼdxiʼ apóstol Pablu laacabe nápacabe ti Dios si, ne laabe nga Jiobá (biindaʼ 1 Corintios 8:5, 6).

16, 17. a) Xi profecía cayaca cumplir ca dxi stinu riʼ. b) Ximodo huayaca ni na profecía riʼ. c) Xi zándaca gucaa laanu maʼ cadi chuʼnu tobi si.

 16 Xi zanda guininu de ca xpinni Cristu ni nabani tiempu riʼ yaʼ. Profeta Isaías guníʼ ziuu binni de guiráʼ guidxi tobi si para guni adorarcaʼ Jiobá ora «mayaca guiluxe ca dxi que». Ca binni riʼ zaniʼcaʼ: «Zusiidibe laanu ca neza stibe, ne zazanu lu ca nezahuiiniʼ stibe» (Isaías 2:2, 3). Nabé riéchenu ora ridúʼyanu cayaca ni na profecía riʼ. Ne pur nga stale de ca hermanu stinu nácacaʼ de gadxé gadxé lugar, riniʼcaʼ gadxé gadxé idioma ne nápacaʼ gadxé cultura. Peru guiranu cayuni adorarnu Jiobá tobi si. Dxandíʼ, zándaca ziuu guendanagana ládenu pur cani bizéʼtenu riʼ.

Ñee rúninu stipa para gacanenu chuʼ ca hermanu tobi si la? (Biiyaʼ párrafo 16 dede 19).

17 Yanna, ximodo ridúʼyanu ca hermanu de sti guidxi yaʼ. Zándaca riníʼcabe gadxé idioma, gadxé modo rácucabe lari, gadxé costumbre nápacabe o dede gadxé clase guendaró stícabe. Ñee rucáʼnanu ca hermanu riʼ la? Ñee ridxaaganu cani napa si cultura ne costumbre stinu la? Ximodo ridúʼyanu ca ancianu jma nahuiiniʼ que laanu ni nuu neza ra nabézanu o ca ancianu de sti raza o cultura yaʼ. Pa qué chuʼnu cuidadu la? zándaca maʼ qué ziuʼnu tobi si pur cani bizéʼtenu riʼ.

18, 19. a) Xi conseju zeeda lu Efesios 4:1-3. b) Xi naquiiñeʼ gúninu para chuʼnu tobi si né ca hermanu.

18 Xi zanda gúninu para cadi gápanu ca guendanagana ni maʼ bizéʼtenu ca yaʼ. Ni zanda gacané laanu nga conseju ni bidii apóstol Pablu ca xpinni Cristu de Éfeso, ti guidxi nabé ricu ne ra nuu binni de stale cultura (biindaʼ Efesios 4:1-3). Pablu bizeeteʼ de caadxi cualidad casi cadi gudxiibaʼ binni laca laa, gaca nadóʼ, gapa paciencia ne gannaxhii. Guiráʼ cualidad riʼ, zeeda gaca cani casi ca pilar ni naaze ti yoo. Para guihuinni galán ti yoo la? naquiiñeʼ gúnicabe dxiiñaʼ nadipaʼ. Ngue runi gudxi Pablu ca xpinni Cristu de Éfeso gúnicaʼ stipa para guyúbicaʼ chuʼ ca hermanu tobi si.

19 Guiranu naquiiñeʼ gúninu stipa para gacanenu chuʼ ca hermanu tobi si. Xi naquiiñeʼ gúninu yaʼ. Primé, naquiiñeʼ gusihuínninu ca cualidad bizeeteʼ Pablu casi cadi gudxiibaʼ binni laca laa, gaca nadóʼ, gapa paciencia ne gannaxhii. Ne guiropa, gúninu stipa pur cadi chúʼdinde ca hermanu. Ca problema ni rapa ca hermanu ndaaniʼ ti congregación la? reeda gaca cani casi ora nicá bi ti pilar. Maʼ qué riuu ca hermanu tobi si ora rizaaca nga. Nga runi, naquiiñeʼ gúninu stipa pur guni chaahuinu ca guendanagana stinu. Zacá qué zadindenenu ca hermanu stinu ne ziuʼnu tobi si.

20. Ximodo rusihuínninu riénenu «Jiobá Dios stinu laasibe nga Jiobá».

20 «Jiobá Dios stinu laasibe nga Jiobá». Nabé riguu ca diidxaʼ riʼ gana laanu. Nabé gucané ca diidxaʼ riʼ ca israelita para biʼniʼ huantarcaʼ guiráʼ guendanagana gúpacaʼ dxi biuucaʼ lu layú ni guníʼ Dios gudii laacaʼ ne ora gucuaacaʼ ni. Laaca zudii ca diidxaʼ riʼ stipa laanu para tiidinu lu gran tribulación ne cadi chuʼdindenenu ca hermanu ne chuʼnu tobi si ndaaniʼ Paraísu. Ñee riénenu «Jiobá Dios stinu laasibe nga Jiobá» la? Pa zacá ni, cadi gusaana de guni adorarnu laasibe. Cadi gusaana de gannaxhiinu laabe ne gúninu ni nabe de guidubi ladxidoʼno, xquendabiaaninu ne guiráʼ stipa stinu. Cadi gusaana de gúninu stipa pur chuʼnu tobi si né ca hermanu ne cadi chuʼdindenenu laacaʼ. Pa gúninu cani bizéʼtenu riʼ, zaníʼ Jesús nácanu casi dendxuʼ ne zábibe laanu ca diidxaʼ riʼ: «Ma guluu Bixhoze ndaaya laatu, yanna latáʼ laicaa ra ma nexhe chaahui para laatu dede ante cha guidxilayú» (Mateo 25:34).