Biiyaʼ guiraʼ ni nuu lu sitiu riʼ

guyé lu índice

«Bitale fe stidu»

«Bitale fe stidu»

«Ucané naa gune cre jma.» (MARCOS 9:24)

DIIDXAʼ RIUUNDAʼ: 54 NE 24

1. Xiñee risaca gápanu fe. (Biiyaʼ foto zeeda ra ruzulú tema riʼ.)

ÑEE maʼ huanabadiidxaluʼ pa zulá Jiobá lii ora gueeda gran tribulación la? Hebreos 11:6 na caquiiñeʼ gápanu fe pa racaláʼdxinu guilanu, purtiʼ qué ziuulaʼdxiʼ Dios ni rúninu pa qué gápanu fe. Zándaca chuʼ tu guiníʼ ique guiráʼ binni zanda gapa fe. Peru 2 Tesalonicenses 3:2 na cadi guiráʼ binni napa fe. Guiropaʼ versículo riʼ rusihuínnicani nabé risaca gúninu stipa para gaca fe stinu naguidxi.

2, 3. 1) Xiñee risaca gaca fe stinu naguidxi. 2) Xi guendarinabadiidxaʼ zacábinu lu tema riʼ.

2 Apóstol Pedru guníʼ nabé risaca «ihuinni pa dxandí» nápanu fe (biindaʼ 1 Pedro 1:7). Cumu mayaca guzulú gran tribulación la? racaláʼdxinu gápanu fe ni zanda gacané laanu guilanu (Hebreos 10:39). Nga runi, naquiiñeʼ gúninu stipa ti gaca fe stinu jma naguidxi cada dxi. Zacatiʼ nga zanda gulá Jesús laanu ora gunitilú guidxilayú malu riʼ. Zanda guinábanu Jiobá ni gunabaʼ ti hombre Jesús: «Ucané naa gune cre jma» (Marcos 9:24). Laaca zanda guinábanu Dios ni gunabaʼ ca apóstol que Jesús: «Bitale fe stidu» (Lucas 17:5).

3 Lu tema riʼ zacábinu chonna guendarinabadiidxaʼ: Ximodo zanda gaca fe stinu naguidxi. Ximodo zanda gusihuínninu naguidxi fe stinu. Ne xiñee nánnanu zacané  Jiobá laanu gápanu fe pa guinábanu ni laa.

RACALAʼDXIʼ DIOS GACA FE STINU NAGUIDXI

4. Xi ejemplu zanda gacané laanu gaca fe stinu jma naguidxi.

4 Jiobá racalaʼdxiʼ gaca fe stinu naguidxi. Nga runi, lu Biblia bisaana Dios ejemplu stiʼ binni ni gupa stale fe (Romanos 15:4). Chupa chonna de laacabe nga Abrahán, Sara, Isaac, Jacob, Moisés, Rahab, Gedeón ne Barac (Hebreos 11:32-35). Peru laaca zanda guizíʼdinu de fe ni maʼ bisihuinni stale hermanu ca dxi stinu riʼ. *

5. 1) Ximodo bisihuinni Elías naguidxi fe stiʼ. 2) Xi zanda guinabadiidxanu laca laanu.

5 Tobi de ca ejemplu zeeda lu Biblia nga stiʼ Elías. Guidúʼyanu ximodo bisihuínnibe guizáʼ naguidxi fe stibe gaayuʼ biaje. Primé, ti dxi gudxi Elías rey Acab zadiʼdiʼ ti tiempu ra qué zudii Jiobá lugar guiaba nisaguié. Ne gudxi Elías laabe zácani purtiʼ Jiobá nga guníʼ ni (1 Reyes 17:1). Guiropa, gupa Elías confianza zudii Dios laa guiráʼ ni caquiiñeʼ ne ni caquiiñeʼ xcaadxi binni tiempu qué ziaba nisaguié que (1 Reyes 17:4, 5, 13, 14). Guionna, gupa Elías fe zanda gusibani Jiobá xiiñiʼ ti viuda (1 Reyes 17:21). Guidapa, biʼniʼ cré Elías zusaba Jiobá guí de guibáʼ para guzaaquiʼ sacrificiu stiʼ lu dani Carmelo (1 Reyes 18:24, 37). Ne gaayuʼ, ante guiluxe gusibá que, nanna dxichi Elías ziaba nisaguié sti biaje, ngue runi gúdxibe Acab: «Gudó ne güeʼ, purtiʼ maʼ zeeda xidxi ti nisaguié naroʼbaʼ» (1 Reyes 18:41). Despué de bidúʼyanu ca ejemplu riʼ, zanda guinabadiidxanu laca laanu: «Ñee naguidxi fe stinneʼ cásica fe gupa Elías la?».

XIMODO ZANDA GACA FE STINU NAGUIDXI

6. Pa racaláʼdxinu gaca fe stinu naguidxi, xi naquiiñeʼ guinábanu Dios.

6 Pa racaláʼdxinu gaca fe stinu naguidxi la? naquiiñeʼ guinábanu Dios gudii laanu espíritu santu. Xiñee yaʼ. Purtiʼ fe riʼ nga tobi de ca guenda ni rudii espíritu (Gálatas 5:22). Ne bisietenalaʼdxiʼ Jesús laanu guinábanu Jiobá gudiiruʼ laanu espíritu stiʼ ne laaca guniʼbe rudii Dios ni guiráʼ binni guinabaʼ ni laa (Lucas 11:13).

7. Biquiiñeʼ ti ejemplu para gusiéneluʼ xi naquiiñeʼ gúninu ti gaca fe stinu jma naguidxi.

7 Yanna, pa maʼ naguidxi fe stinu yaʼ. Pa zacá ni la? naquiiñeʼ gúninu stipa para cadi guirá ni. Xiñee yaʼ. Purtiʼ zeeda gaca fe riʼ casi ti bele. Primé la? zándaca naroʼbaʼ bele riʼ. Peru, pa qué ugúʼrunu yaga luni la? zazuíʼ ni. Ngaca nga ni rizaaca né fe stinu. Pa qué racaláʼdxinu guirá ni la? naquiiñeʼ guidúʼndanu Biblia guiráʼ dxi ne gucáʼ íquenu guiénenu ni. Zacatiʼ nga zannaxhiinu Jiobá jma ne zannaxhiinu Biblia, ne zaca fe stinu jma naguidxi.

8. Xi sti cosa zacané laanu gaca fe stinu naguidxi.

8 Para cadi gusaana de gaca fe stinu naguidxi la? cadi naquiiñeʼ diʼ chuʼnu conforme né cani bizíʼdinu ante chuʼnísanu (Hebreos 6:1, 2). Zanda guidúʼndanu ximodo huayaca cumplir caadxi profecía zeeda lu Biblia. Ne ora maʼ cadúʼndanu Biblia, naquiiñeʼ guidúʼyanu  pa dxandíʼ cusihuínninu naguidxi fe stinu (biindaʼ Santiago 1:25 ne 2:24, 26).

9, 10. 1) Ximodo racané ca hermanu laanu gaca fe stinu naguidxi. 2) Ximodo racané ca reunión stinu laanu gaca fe stinu naguidxi. 3) Xiñee raca fe stinu naguidxi ora rucheechenu diidxaʼ.

9 Apóstol Pablu guníʼ xi zanda gúninu casi xpinni Cristu, zanda ugúʼsaanu gana laanu «pur fe sti[n]u» (Romanos 1:12). Xii ndiʼ caniʼbe yaʼ. Cusiénebe raca fe stinu jma naguidxi ora ridagulisaanenu ca hermanu, jmaruʼ si pa guidxaaganu cani qué nixeleʼ de Jiobá ora gudíʼdicaʼ ra nagana (Santiago 1:3). Cani cadi dxandíʼ xhamigu laanu la? zusiracaʼ fe stinu, peru cani dxandíʼ xhamigu laanu la? zacanecaʼ laanu gaca fe stinu jma naguidxi (1 Corintios 15:33). Nga runi cayabi Biblia laanu cadi guiáʼdxanu ca reunión stinu, purtiʼ racá nga rigúʼsaanu gana laanu (biindaʼ Hebreos 10:24, 25). Ne laaca racané ni rizíʼdinu lu ca reunión riʼ laanu para gaca fe stinu jma naguidxi. Romanos 10:17 na ridale fe stinu ora jma maʼ zizíʼdinu ni zeeda lu Biblia. Nga runi naquiiñeʼ guinabadiidxanu laca laanu: «Ñee riaaʼ guiráʼ reunión la?».

10 Sti cosa ni zacané laanu gaca fe stinu naguidxi nga gusíʼdinu xcaadxi binni ni zeeda lu Biblia. Xiñee yaʼ. Purtiʼ rizíʼdinu gápanu confianza Jiobá ne gácanu nadxibalú ora rucheechenu diidxaʼ, cásica guca ca primé xpinni Cristu (Hechos 4:17-20; 13:46).

11. 1) Xiñee guca fe stiʼ Josué ne Caleb naguidxi. 2) Ximodo zanda chinándanu ejemplu stiʼ Josué ne Caleb.

11 Ora ridúʼyanu modo ricabi Jiobá ca oración stinu ne modo racanebe laanu, laaca raca fe stinu jma naguidxi. Ngapeʼ nga ni bizaaca Josué ne Caleb. Dxi yeguuyacabe ximodo nuu layú guníʼ Jiobá chigudii laacabe que, bisihuínnicabe nápacabe stale fe. Ne guca fe stícabe jma naguidxi ra gudiʼdiʼ iza, purtiʼ biiyacabe qué nusaana de ñacané Jiobá laacabe. Ngue runi gudxi Josué ca israelita qué nusaana de ñuni Jiobá guiráʼ ca cosa sicarú ni bidii stiidxaʼ laacabe. Oraqueruʼ bidiibe conseju riʼ laacaʼ: «Laguidxibi Jiobá ne laguni ni nabe». Ne laaca guniʼbe: «Peru naa ne binnilidxeʼ la? zúnidu ni na Jiobá» (Josué 23:14; 24:14, 15). Pa gápanu confianza Jiobá la? zadúʼyanu ximodo racanebe laanu, ne zaca fe stinu jma naguidxi (Salmo 34:8).

XIMODO RUSIHUÍNNINU NAGUIDXI FE STINU

12. Ximodo rusihuínninu naguidxi fe stinu.

12 Discípulo Santiagu guníʼ: «Naa zanda ulué lii dxandí rune cre purti rune jneza» (Santiago 2:18). Né ca diidxaʼ riʼ cayabi Santiagu laanu rusihuínninu naguidxi fe stinu pur ca cosa ni rúninu. Guidúʼyanu caadxi modo ra zanda gusihuínninu fe stinu.

Pa gúninu biaʼ gándatiʼ para gucheechenu diidxaʼ la? zusihuínninu naguidxi fe stinu (Biiyaʼ párrafo 13)

13. Xiñee rihuinni nápanu fe ora rucheechenu diidxaʼ.

13 Rusihuínninu nápanu fe ora rucheechenu diidxaʼ. Xiñee yaʼ. Purtiʼ zacá rusihuínninu runi crenu maʼ gaxha zeeda fin ne «qué zandaani» (Habacuc 2:3). Pa racaláʼdxinu gánnanu pa naguidxi fe stinu la? naquiiñeʼ guinabadiidxanu laca laanu: «Ñee dxandíʼ risaca para naa gucheecheʼ diidxaʼ la? Ñee cayuneʼ biaʼ gándatiʼ para güeniáʼ guiráʼ binni de Dios la? Ñee ruyubeʼ modo para gucheecheʼ diidxaʼ jma la?» (2 Corintios 13:5). Pa gúninu stipa pur  gucheechenu diidxaʼ la? zusihuínninu naguidxi fe stinu (biindaʼ Romanos 10:10).

14, 15. 1) Ximodo zanda gusihuínninu nápanu fe lu xquendanabáninu. 2) Ximodo bisihuinni ti familia de Asia naguidxi fe stiʼ.

14 Sti modo rusihuínninu nápanu fe nga ora runi huantarnu ca guendanagana ridxaagalunu. Pa huaranu, pa careʼnu gana, pa nápanu depresión, pa pobre laanu o pa cadídinu xcaadxi guendanagana la? naquiiñeʼ guni crenu zacané Jiobá ne Jesús laanu «ora caquiʼñe nu tu acané laanu» (Hebreos 4:16). Pa guinábanu Jiobá gacané laanu la? zusihuínninu nápanu fe laa. Jesús na zanda guinábanu Dios «endaró tidi né [nu] dxi» (Lucas 11:3). Lu Biblia zeeda stale ejemplu ni rusihuinni zanda gudii Jiobá laanu intiica cosa ni caquiiñenu. Casi dxi qué ñaba nisaguié guidxi Israel que, bidii Jiobá guendaró ne nisa Elías. Biblia na «siadoʼroʼ riné ca biaʼquiʼ pan ne beela ra nuube, ne laaca rinecaʼ pan ne beela ra nuube huadxí», ne reʼbe nisa ndaaniʼ ti guiiguʼ (1 Reyes 17:3-6). Laanu laaca zanda gápanu confianza zudii Jiobá ni caquiiñenu para guibáninu.

Pa guni huantarnu ca guendanagana ridxaagalunu guiráʼ dxi la? zusihuínninu naguidxi fe stinu (Biiyaʼ párrafo 14)

15 Nanna dxíchinu zanda gudiʼnu ni caquiiñeʼ familia stinu pa chinándanu ca conseju zeeda lu Biblia. Biiyaʼ xi bizaaca ti familia de Asia. Ti dxi bidii hermanu que cuenta cuxheleʼ dxiiñaʼ stiʼ laa de Jiobá. Laabe ne xheelabe rápacabe gana gúnicabe ni na Mateo 6:33 ne Proverbios 10:4. Ngue runi guníʼ stiidxacabe gusaana hermanu riʼ xhiiñaʼ ne gúnicabe guendaró para gutoocabe ti gápacabe ni guibaninécabe. Na xheelaʼ hermanu riʼ bíʼnicaʼ dxiiñaʼ nadipaʼ, peru cumu gupa Jiobá laacabe la? qué ñuu dxi ñaadxaʼ ni ñócabe. Ñee maʼ huadxagaluluʼ xiixa guendanagana ni gucané lii iguidxi fe stiuʼ la?

16. Xi zabeendunu pa gápanu confianza Jiobá.

16 Qué chuʼ dxi guiaandaʼ laanu  zacané Jiobá laanu pa gápanu confianza laa ne gúninu ni canabaʼ laanu. Ngapeʼ nga ni caníʼ Pablu ora bietenalaʼdxiʼ ni guníʼ profeta Habacuc: «Ni ma bixá stonda ra bini cre la? zabani» (Gálatas 3:11; Habacuc 2:4). Ne laaca guníʼ Pablu napa Dios poder para gacané laanu, ne nuu tiru qué lica ruxuíʼlunu ximodo chigúnibe ni (Efesios 3:20). Laanu rúninu biaʼ gándatiʼ para guni adorarnu Dios, peru nánnanu nuu cosa ni qué zanda gúninu. Nga runi rudiʼnu ni jma galán de laanu ne nápanu confianza zaguu Jiobá ndaayaʼ ca stipa stinu. Cadi dxandíʼ rudiʼnu xquíxepeʼ laabe pur racanebe laanu la?

ZUTALE JIOBÁ FE STINU PA GUINÁBANU NI LAA

17. 1) Xi biʼniʼ Jesús ora gunabaʼ ca apóstol laabe gutálebe fe sticaʼ. 2) Xiñee nánnanu zutale Jiobá fe stinu pa guinábanu ni laa.

17 Despué de bidúʼndanu tema riʼ, zándaca laaca zuni sentirnu cásica biʼniʼ sentir ca apóstol que ora gúdxicaʼ Jesús: «Bitale fe stidu» (Lucas 17:5). Nabé sicarú modo bicabi Jesús laacabe lu saa stiʼ Pentecostés iza 33. Dxi que biseendabe espíritu santu ne gucanebe laacaʼ guiene chaahuicaʼ xi racalaʼdxiʼ Dios. Nabé gucané ngue para guca fe stícabe jma naguidxi. Ne gucané ngue laacabe para gunda bicheechecabe diidxaʼ casi qué huayuu dxi chuʼ tu guni ni (Colosenses 1:23). Maʼ guníʼ Jiobá zudii laanu intiica cosa ni guinábanu laa «pa inaba nu ni riulaʼdxi Dios gaca» (1 Juan 5:14). Nga runi, pa nápanu fe ora guinábanu laabe xiixa la? zudiibe ni laanu.

18. Ximodo riguu Jiobá ndaayaʼ cani naguidxi fe stiʼ.

18 Pa guni crenu Jiobá de guidubi ladxidoʼno la? zaguube ndaayaʼ laanu ne zutálebe fe stinu ora guinábanu ni laabe. Zaca fe stinu jma naguidxi ne «zacané ni para ihuinni ma nuu [nu] para chuʼ [nu] ra runi mandar» Reinu stiʼ Dios (2 Tesalonicenses 1:3, 5).

^ párrafo 4 Caadxi de laacabe nga Lillian Gobitas Klose, Feliks Borys ne Josephine Elias. Zanda gúʼndaluʼ historia stícabe lu ¡Despertad! 22 stiʼ julio iza 1993, lu ¡Despertad! 22 stiʼ febrero iza 1994 ne lu ¡Despertad! stiʼ septiembre iza 2009.