Biiyaʼ guiraʼ ni nuu lu sitiu riʼ

guyé lu índice

Ñee ruuyaluʼ ximodo racané Dios lii la?

Ñee ruuyaluʼ ximodo racané Dios lii la?

«Dxandipeʼ zunibiáʼ ca xpinni Dios pabiáʼ nadipaʼ náʼ Jiobá.» (ISAÍAS 66:14)

DIIDXAʼ RIUUNDAʼ: 32 NE 26

1, 2. Xi riníʼ ique caadxi binni de Dios.

CA DXI stinu riʼ, stale binni riníʼ ique qué rizaalaʼdxiʼ Dios cani rúninu ne cani rizaacanu. Guzéʼtenu ti ejemplu. Lu beeu noviembre iza 2013, binitilú ti supertifón stale de ca isla stiʼ Filipinas. Gudiʼdiʼ si tifón que, guníʼ alcalde stiʼ tobi de ca guidxi que zándaca qué ñacané Dios laacaʼ purtiʼ cayuni sti cosa.

2 Xcaadxi binni riníʼ ique qué ruuyaʼ Dios guiráʼ ni rúnicaʼ (Isaías 26:10, 11; 3 Juan 11). Apóstol Pablu bizeeteʼ de caadxi binni ni qué nizaalaʼdxiʼ pa nuu Dios tiempu bibani. Gúcacabe binni malu, qué ñúnicabe ni jneza ne biyúbicabe puru si para laacabe (Romanos 1:28, 29).

3. 1) Xi naquiiñeʼ guinabadiidxanu laca laanu. 2) Ora riníʼ Biblia de «náʼ» Dios, xii nga cusiéneni.

3 Laanu nánnanu ruuyaʼ Jiobá guiráʼ ni rúninu. Peru naquiiñeʼ guinabadiidxanu laca laanu: «Ñee dxandíʼ runeʼ cré rizaalaʼdxiʼ Dios naa la? Ñee ruuyaʼ ximodo racanebe naa la?». Nabé riquiiñeʼ Biblia diidxaʼ «náʼ» Dios. Xii nga cayábini laanu yaʼ. Cusiéneni modo racané Jiobá ca xpinni. Biblia na: «Últimu la? bisigaanáʼ Jiobá ne gulee laadu de Egipto purtiʼ nadipaʼ náʼ, bichíbibe laacaʼ né ca señal ne ca milagru bíʼnibe» (Deuteronomio 26:8). Ne guníʼ Jesús zuuyaʼ caadxi binni Dios, o zudiicaʼ  cuenta cayacané Dios laacaʼ (Mateo 5:8). Ñee ruuyaluʼ «náʼ» Dios, o ximodo racanebe lii lu xquendanabániluʼ la? Biblia ruzeeteʼ de caadxi binni ni qué ñuuyacaʼ «náʼ» Dios ne laaca ruzeeteni de xcaadxi ni biʼyaʼ ni. Lu tema riʼ zadúʼyanu caadxi ejemplu. Ne lu sti tema ca zadúʼyanu ximodo racané fe stinu laanu gudiʼnu cuenta cayacané Dios laanu.

QUÉ NUDIICABE CUENTA PA CAYACANÉ DIOS XQUIDXI

4. Xiñee qué ñene ca xhenemigu Israel pa cayacané Jiobá xquidxi.

4 Biblia ruzeeteʼ de stale binni ni biʼyaʼ ximodo gucané Dios guidxi Israel. Guzéʼtenu ti ejemplu. Biʼniʼ Jiobá caadxi milagru para gucané xquidxi guiree de Egipto ne para biʼniʼ ganar stale guerra lu Layú ni Bizabiruaa Dios gudii laacaʼ (Josué 9:3, 9, 10). Gunna stale rey de guiráʼ ni biʼniʼ Jiobá. Neca zaqué, bidagulisaacaʼ para tíndenecaʼ «Josué ne Israel» (Josué 9:1, 2). Dxi gudindené ca rey riʼ Israel, laaca bidiicaʼ cuenta ximodo racané Dios xquidxi. Biiyacabe ximodo bicueeza Jiobá Gubidxa ne Beeu «dede ora binduuxeʼ guidxi que ca xhenemigu» (Josué 10:13). Peru guca ladxidóʼcabe naguidxi ne qué ninácabe ñénecabe pa Jiobá ngue cayacané xquidxi. Ngue runi biníticabe guerra que (Josué 11:20).

5. Xi qué niná rey Acab ñuni cré.

5 Gudiʼdiʼ si iza, guyuu ti rey ni biʼyaʼ ximodo gucané Dios guidxi Israel stale biaje. Laabe nga rey Acab, ti rey nabé malu. Gudxi profeta Elías laabe maʼ qué ziábaruʼ nisaguié dede ora guiníʼ guiaba ni sti biaje (1 Reyes 17:1). Nánnanu Dios si nga zanda gudii poder Elías para guiníʼ padxí guiaba nisaguié sti biaje. Peru qué niná Acab ñuni cré ni. Despué gunabaʼ Elías Jiobá guiaba guí de guibáʼ, ne bicabi Jiobá oración stiʼ Elías. Laaca gudxi Elías Acab zusabaʼ Jiobá ti nisaguié naroʼbaʼ. Ne nguepeʼ nga ni guca (1 Reyes 18:22-45). Peru qué niná Acab ñuni cré pa Jiobá biʼniʼ ca milagru que. Xi rusiidiʼ cani bidúʼyanu lu párrafo riʼ ne lu párrafo ni gudídinu ca laanu yaʼ. Pa racaláʼdxinu guidúʼyanu ximodo racané Jiobá laanu la? naquiiñeʼ gatananu.

BIDIICABE CUENTA CAYACANÉ DIOS XQUIDXI

6, 7. Xi biene ca binni de Gabaón ne Rahab.

6 Tiempu stiʼ Israel que guyuu ti guidxi láʼ Gabaón. Ca binni de Gabaón riʼ maʼ gadxé laacaʼ de xcaadxi guidxi. Xiñee yaʼ. Purtiʼ binadiágacabe guiráʼ ni biʼniʼ Jiobá pur Israel ne bidiicabe cuenta racané Dios xquidxi. Ngue runi, lugar de nidindené ca gabaonita Israel la? biyúbicaʼ modo chuʼcaʼ tobi si né laacabe (Josué 9:3, 9, 10). Rihuinni dxíchica galán ngue ni biʼniʼ ca gabaonita ora bidiicaʼ cuenta racané Jiobá guidxi Israel.

7 Yanna guzéʼtenu de ti gunaa ni bidii cuenta racané Jiobá guidxi Israel, laabe nga Rahab. Cadi israelita diʼ laabe, peru binadiágabe gulee Jiobá Israel de Egipto. Ora yendá chupa hombre de Israel ra lídxibe, gúdxibe laacaʼ nanna dxíchibe zacané Jiobá laacaʼ guni ganarcaʼ xquídxibe. Ne neca nánnabe ziuube ne ziuu familia stibe ra naxoo pur fe ni nápabe Jiobá, biʼniʼ crebe de guidubi ladxidoʼbe zulá Dios laacabe (Josué 2:9-13; 4:23, 24).

8. Xi biene caadxi israelita.

8 Guzéʼtenu historia stiʼ Acab que sti biaje. Ora bíʼyabe cayaba guí de guibáʼ, qué ninabe ñuni crebe pa Dios ngue bicabi oración stiʼ Elías. Peru guyuu caadxi israelita ni biʼniʼ cré Dios ngue biʼniʼ milagru que. Ngue runi bicaacaʼ ridxi ne guniʼcaʼ: «¡Jiobá nga Dios ni dxandíʼ!» (1 Reyes 18:39).

9. Ximodo zanda guidúʼyanu «náʼ» Jiobá ca dxi riʼ.

 9 Maʼ bidúʼyanu caadxi ejemplu stiʼ binni ni qué nudii cuenta racané Dios ca xpinni ne ejemplu stiʼ xcaadxi binni ni bidii cuenta racanebe ca xpínnibe. Yanna riʼ laaca nuu stale xpinni Dios ni rudii cuenta dxandíʼ racanebe laanu. Ne racaláʼdxinu gácanu casi laacabe. Ximodo zanda guidúʼyanu «náʼ» Jiobá ca dxi riʼ yaʼ. Zanda guidúʼyanu ni né ladxidoʼno (Efesios 1:18). Para nga naquiiñeʼ gunibiáʼ chaahuinu Jiobá ne ca guenda stiʼ. Peru, xi racané laanu gudiʼnu cuenta racané Jiobá ca binni ni racalaʼdxiʼ guni ni nabe tiempu riʼ yaʼ.

CA RAZÓN NI RUSIHUINNI CAYACANÉ JIOBÁ LAANU YANNA

10. Xi razón nápanu para guni crenu qué rusaana de gacané Jiobá ca binni ni racalaʼdxiʼ guni ni nabe. (Biiyaʼ foto ni zeeda ra ruzulú tema riʼ.)

10 Nápanu stale razón para guni crenu qué rusaana de gacané Jiobá ca binni ni racalaʼdxiʼ guni ni nabe. Gatigá runadiáganu ximodo ricabi Jiobá oración stiʼ ca binni canabaʼ gacanebe laacaʼ (Salmo 53:2). Guzéʼtenu ni guca ti Testigu láʼ Allan ora cucheeche diidxaʼ lu ti islahuiiniʼ stiʼ Filipinas. Ora caníʼnebe ti gunaa, málasi bizulú cayuunaʼ. Xi gúcabe yaʼ. Gúdxibe Allan gunábabe Dios siadóʼ que chiganna ca Testigu laabe. Maca biindané ca Testigu laabe Biblia dxi nahuiinibe. Peru despué bichaganabe, yendézabe sti lugar ne bisaana de gúʼndabe Biblia. Ngue runi cudiibe xquixe Dios, purtiʼ bicabi oración stibe nagueenda. Guyuunísabe ante gusaa ti iza.

Naquiiñeʼ gatananu para guidúʼyanu ximodo cayacané Jiobá laanu (Biiyaʼ párrafo 11 dede 13)

11, 12. 1) Ximodo huayacané Jiobá ca xpinni. 2) Bizeeteʼ ximodo gucané Jiobá ti hermana.

11 Tiempu riʼ laaca nabé huayacané Jiobá ca xpinni. Stale de laacabe gudúʼbacabe gueza, gudúʼbacabe droga ne biiyacabe pornografía ante gácacabe Testigu. Stale de laacabe riníʼcabe gucaláʼdxicabe nusaanacabe ca viciu riʼ, peru qué ñanda diʼ. Peru, ora gunábacabe gacané Jiobá laacabe la? bidii Dios laacabe «enda nandxóʼ stiʼ». Zacá gunda bisaanacabe ca viciu que (2 Corintios 4:7; Salmo 37:23, 24).

12 Laaca maʼ gucané Jiobá ca xpinni para ganda gudxiilucaʼ guendanagana sticaʼ. Guidúʼyanu ni bizaaca ti hermana láʼ Amy. Gunábacabe laabe chebe lu ti islahuiiniʼ nuu lu Pacífico para gacanebe cuiʼ ti Yoo stiʼ Reinu ne cuiʼ ti yoo para ca misioneru. Peru maʼ gadxé modo nabani binni raqué. Stale biaje qué rápabe nisa nin biaaniʼ, ne nabé rilaahua ndaaniʼ ca calle que. Ne laaca nahuiiniʼ cuartu stiʼ hotel ra nabézabe ne nabé ribánabe binnilídxibe. Ti dxi nabé nadipaʼ modo guníʼnebe ti hermana cayuninebe dxiiñaʼ. Ora biguétabe ra cuartu stibe, nabé feu modo biʼniʼ sentirbe. Gastiʼ ndaʼ biaaniʼ neza ra nabézabe dxi que. Óraque biʼniʼ orarbe Jiobá. Ora beeda biaaniʼ que, bidxélabe ti revista Torre stiʼ ni rapa ra zeeda ti tema ni né conseju para ca misioneru. Revista que caníʼ xi zanda guni binni ora ribanaʼ familia stiʼ ne xi zanda guni ora gadxé costumbre napa sti binni. Biʼniʼ sentir Amy casi ora Jiobá ngue caniʼné laa. Ne bidii ngue stipa laabe para cadi guireebe gana (Salmo 44:25, 26; Isaías 41:10, 13).

13. Ximodo nánnanu huayacané Jiobá ca xpinni para guiniʼcaʼ pur derechu ni nápacaʼ de gucheechecaʼ diidxaʼ.

13 Laaca huayacané Jiobá ca xpinni para guiniʼcaʼ pur derechu ni nápacaʼ de gucheechecaʼ diidxaʼ (Filipenses 1:7). Ora gacalaʼdxiʼ ca gobiernu gucueezacaʼ laanu de gucheechenu diidxaʼ, riuunu nezalú ca tribunal para gacanecaʼ laanu. Maʼ biʼniʼ ganarnu biaʼ 268 casu nezalú ca tribunal  ni jma risaca nuu lu guidubi Guidxilayú. Dede iza 2000 hasta nagasi maʼ biʼniʼ ganarnu 24 casu nezalú Tribunal Europeo de Derechos Humanos. Rihuinni dxíchica guirutiʼ qué zanda gucueeza Jiobá de gacané xquidxi. Biblia na: «¡Laguuyaʼ! Lácaxa nachucu náʼ Jiobá para cadi gulá, ne cadi nacuaataʼ diʼ diágabe para cadi gunadiágabe» (Isaías 59:1; Isaías 54:17).

14. Xi xcaadxi razón nápanu para guni crenu racané Jiobá laanu.

14 Xi xcaadxi razón nápanu para guni crenu racané Jiobá laanu. Tobi de laacani nga purtiʼ cucheechenu diidxaʼ lu guidubi Guidxilayú (Mateo 24:14; Hechos 1:8). Stobi nga purtiʼ nuunu tobi si né guiráʼ ca xpinni Dios, neca de gadxé gadxé guidxi laanu. Gástiruʼ sti grupu lu Guidxilayú ni nuu tobi si casi laanu. Dede binni ni qué runi ni na Jiobá rudii cuenta «dxandí nuu né Dios laa[n]u» (1 Corintios 14:25). Racá ridúʼyanu nápanu stale razón para guni crenu cayacané Dios laanu. Biblia na: «Ne dxandipeʼ zuuyacabe, ne ziecheʼ ladxidóʼcabe, ne zaguiʼbaʼ xigaa dxita ládicabe cásica riguiʼbaʼ xigaa guixi gáʼ. Ne dxandipeʼ zunibiáʼ ca xpinni Dios pabiáʼ nadipaʼ náʼ Jiobá, peru zadxiichinebe ca xhenemígube» (Isaías 66:14). Lii yaʼ. Ñee ruuyaluʼ ximodo racané Jiobá lii lu xquendanabániluʼ la?

ÑEE RUUYALUʼ XIMODO CAYANÉ DIOS LII LA?

15. Xiñee nuu tiru zándaca qué zadúʼyanu ximodo racané Jiobá laanu.

15 Nuu tiru zándaca qué zadúʼyanu ximodo racané Jiobá laanu. Xiñee yaʼ. Zándaca purtiʼ nuunu xizaa pur ca guendanagana stinu ne guni laacani guiaandaʼ laanu ximodo gucané Jiobá laanu stale biaje dxiqué. Ngapeʼ nga ni bizaaca Elías. Gúcabe ti hombre nadxibalú. Peru ora gucalaʼdxiʼ reina Jezabel ñuuti laabe, biaandaʼ laabe ximodo gucané Jiobá laabe dxiqué. Nabé bidxíbibe, dede riníʼ Biblia gunábabe gátibe (1 Reyes 19:1-4). Xi caquiiñeʼ gúnibe para gacanécabe laabe ne cadi guireebe gana yaʼ. Caquiiñeʼ guyúbibe Jiobá para gacané laabe (1 Reyes 19:14-18).

16. Xi zanda gacané laanu guidúʼyanu modo racané Jiobá laanu ora cadídinu ra nagana.

 16 Laaca cásica ni bizaaca Elías nga bizaaca Job. Nabé guyuube xizaa pur ca guendanagana stibe ne qué ñuuyabe cani casi ruuyaʼ Jiobá (Job 42:3-6). Yanna, laanu yaʼ. Ora cadídinu ra nagana la? zándaca laaca qué zadúʼyanu ximodo cayacané Jiobá laanu. Xi zanda gacané laanu guidúʼyanu ni yaʼ. Guidúʼndanu Biblia ne guiníʼ íquenu lu ca relatu ne ca conseju zeeda luni. Ora gudiʼnu cuenta ximodo cayacanécani laanu gudxíʼlunu ca guendanagana stinu, zeeda gaca ni casi ora niniʼné Dios laanu. Óraca jmapeʼ zuni crenu nuu Jiobá ne zanda guininu casi guníʼ Job: «Yanna maʼ cayuuyapeʼ guieluaʼ lii».

Zanda iquiiñeʼ Jiobá laanu para gacanenu sti binni (Biiyaʼ párrafo 17 ne 18)

17, 18. 1) Ximodo zándaca huayacané Jiobá laanu lu xquendanabáninu. 2) Ximodo huayacané Jiobá chupa chonna de ca xpinni tiempu riʼ.

17 Ñee ruuyaluʼ ximodo racané Jiobá lii lu xquendanabániluʼ la? Nuu hermanu ruzeeteʼ gucané Dios laacaʼ para gunda bidxélacaʼ religión ni dxandíʼ. Xcaadxi riníʼ ique gucané Jiobá laacaʼ ora binadiágacaʼ xiixa ni guníʼ ti hermanu ra Yoo stiʼ Reinu. Laaca nuu tu riníʼ gucané Dios laa ora bicabi oración stiʼ. Ne laaca nuu tu ruzeeteʼ gucané Jiobá laa ugaanda xiixa ni gudixhe ique para guni jma lu xhiiñabe. Xcaadxi riníʼ bidii Jiobá ni caquiiñecaʼ dxi bisaanacaʼ ti dxiiñaʼ ni ribee tiempu sticaʼ para checaʼ reunión ne para gucheechecaʼ diidxaʼ (Hebreos 13:5). Pa gaca xhamígunu Jiobá la? zanda guidúʼyanu guiráʼ modo racanebe laanu.

18 Guzéʼtenu ni guca Sarah, ti hermana de Kenia. Laabe ruundanebe ti baʼdudxaapaʼ de Biblia, peru ruluíʼ qué rusisaca baʼdudxaapaʼ que guiráʼ ni caziidiʼ. Biʼniʼ orar Sarah Jiobá ne gunabadiidxaʼ pa zaa gusaanaʼ de gusiidiʼ laabe. Peru casi biluxe biʼniʼ orarbe, guniʼné baʼdudxaapaʼ que laabe pur teléfono para guinabadiidxaʼ laabe pa zanda chinebe laa reunión. ¡Nabé bidxagayaa Sarah! Pa gatananu la? laaca zanda guidúʼyanu ximodo cayacané Jiobá laanu. Asia nuu ti hermana láʼ Rhonna, laa guníʼ naquiiñeʼ tiidiʼ tiempu para guizíʼdinu guidúʼyanu ximodo racané Jiobá laanu. Ne ora ridúʼyanu ni, runi sentirnu nayecheʼ, purtiʼ rudiʼnu cuenta rizaalaʼdxiʼ Jiobá laanu.

19. Xi naquiiñeʼ gúninu pa racaláʼdxinu guidúʼyanu ximodo racané Dios laanu.

19 Pa racaláʼdxinu gúʼyanu ximodo racané Dios laanu la? laaca naquiiñeʼ gápanu ladxidoʼno nayá (Mateo 5:8). Para nga naquiiñeʼ guiníʼ íquenu lu ca cosa sicarú ne cadi gúninu cosa malu (biindaʼ 2 Corintios 4:2). Lu tema riʼ maʼ bidúʼyanu naquiiñeʼ gaca xhamígunu Jiobá pa racaláʼdxinu guidúʼyanu ximodo racanebe laanu. Lu sti tema ca, zazíʼdinu ximodo racané fe stinu laanu guidúʼyanu ximodo racané Jiobá laanu lu xquendanabáninu.