Biiyaʼ guiraʼ ni nuu lu sitiu riʼ

guyé lu índice

 CANI NAGUU CHAAHUIʼ XQUIDXI DIOS

«Bedané Jiobá laatu Francia para guiziiditu ni dxandíʼ»

«Bedané Jiobá laatu Francia para guiziiditu ni dxandíʼ»

DEDE nahuiiniʼ Antoine Skalecki maʼ runi dxiiñaʼ ndaaniʼ ti mina ra riree buu. Guizáʼ nagana para guireenebe ti caballu ni rigúʼbanebe buu que ndaaniʼ ca túnel cahui nuu 500 metru ndaaniʼ yú. Gupa xidé biseendaʼ familia stibe laabe dxiiñaʼ, purtiʼ guizáʼ gucaná bixhózebe dxi bixiá ti mina. Gaʼ hora runi Antoine dxiiñaʼ guiráʼ dxi, ne bilá ñátibe ti biaje dxi bixiá ti mina.

Caadxi herramienta biquiiñeʼ ca mineru de Polonia; mina ni nuu Dechy, gaxha de Sin-le-Noble, ra biʼniʼ Antoine Skalecki dxiiñaʼ

Stale binni de Polonia ni yendeza Francia lu década stiʼ 1920 ne 1930, gúpacaʼ xiiñicaʼ raqué, tobi de ca baʼduhuiiniʼ gule raqué nga Antoine. Xiñee nuu stale binni de Polonia Francia yaʼ. Purtiʼ biluxe si Primera Guerra Mundial que beeda gaca Polonia ti guidxi libre sti biaje, xi si la? nabé stale binni nabeza guidxi que. Peru Francia caquiiñeʼ stale binni guni dxiiñaʼ ndaaniʼ ca mina ra riree buu, purtiʼ guti jma de ti millón hombre lu guerra que. Ngue runi biʼniʼ guiropaʼ guidxi roʼ que ti contratu lu septiembre iza 1919, ne dxi gunda iza 1931 maʼ nuu 507, 800 binni de Polonia Francia, stale de laacaʼ yendézacaʼ lu ca layú ra nuu ca mina que, ladu guiaʼ de guidxi Francia.

Ca binni de Polonia ni nabé runi dxiiñaʼ que, laaca beedanecaʼ costumbre ne religión sticaʼ Francia. Yanna ra maʼ napa Antoine 90 iza, rietenalaʼdxiʼ ca diidxaʼ riʼ: «Nabé runi respetar bixhozebiidaʼ Joseph, Biblia, purtiʼ nga nga ni bisiidiʼ bixhózebe laabe». Guiráʼ domingu, racu ca familia de Polonia ca lari jma sicarú sticaʼ ora maʼ zecaʼ yuʼduʼ, cásica bíʼnicaʼ dxi guyuucaʼ xquídxicaʼ. Qué rizaaláʼdxicabe pa riníʼ ca xpecínucabe laacabe, ca binni de Francia que, purtiʼ laacaʼ huaxiéʼ riuuláʼdxicaʼ chuʼcaʼ lade ti religión.

Ndaaniʼ guidxi Nord-Pas-de-Calais nga primé biaje gunna ca binni de Polonia de ca Binni Ruundaʼ Biblia, laacaʼ maca cucheechecaʼ diidxaʼ raqué dede iza 1904. Lu iza 1915 bizulú biree revista The Watch Tower (La Torre del Vigía) guiráʼ beeu lu diidxaʼ polaco ne lu iza 1925, bizulú biree revista The Golden Age (La edad de oro). Gucané ca revista riʼ stale familia para biziidicaʼ de Biblia ne laaca gucané libru El Arpa de Dios ni biree lu diidxaʼ polaco laacabe.

Pur ti xtiuʼ Antoine nga binibiáʼ familia stibe ca Binni Ruundaʼ Biblia, dxi guyé primé reunión lu  iza 1924. Laaca iza que nga biʼniʼ ca Binni Ruundaʼ Biblia primé asamblea lu diidxaʼ polaco ndaaniʼ guidxi Bruay-en-Artois. Nin ti beeu de guca asamblea que, guyé Joseph Rutherford raqué, ti representante ni biseendaʼ Betel nuu Brooklyn, ne bidii ti libana ra bidagulisaa biaʼ chupa mil binni ndaaniʼ guidxi que. Guizáʼ biecheʼ hermanu Rutherford ora biʼyaʼ nuu stale binni de Polonia raqué, dede guníʼ: «Bedané Jiobá laatu Francia para guiziiditu ni dxandíʼ. Yanna maʼ laatu ne ca xiiñitu gacanetu ca binni de Francia. Cayaadxaruʼ guireeche diidxaʼ, nga runi zacané Jiobá ti ganda chuʼ jma binni gucheecheʼ diidxaʼ».

¡Nguepeʼ nga ni guca! Ca xpinni Cristu de Polonia que bicheechecaʼ diidxaʼ né stale gana cásica rúnicaʼ dxiiñaʼ ndaaniʼ ca mina que. Nuu de laacabe biguetaʼ xquidxi para gusiidiʼ binni ca cosa sicarú ni maʼ biziidicaʼ. Lade cani biguetaʼ que nuu Teofil Piaskowski, Szczepan Kosiak ne Jan Zabuda.

Stale de laacabe biaana Francia ne bicheecherucaʼ diidxaʼ né stale gana raqué. Lu asamblea general ni guca iza 1926 ndaaniʼ guidxi Sin-le-Noble, gurí 1,000 binni lu sección stiʼ ca de Polonia ne gurí 300 lu sección stiʼ ca de Francia. Sicaríʼ bizeeteʼ Anuario iza 1929: «Guyuunisa 332 hermanu de Polonia iza riʼ». Ante guzulú Segunda Guerra Mundial, nuu 84 neza binni ridagulisaa Francia, 32 de laacani diidxaʼ polaco.

Dxi zeʼ ca hermanu de Polonia ti asamblea ndaaniʼ guidxi Francia. Letreru ca na: «Ca testigu stiʼ Jiobá»

Lu iza 1947, biʼniʼ invitar gobiernu de Polonia ca binni yebíʼ Francia que guibiguétacaʼ xquídxicaʼ, ne zaqué biʼniʼ stale testigu stiʼ Jiobá. Cumu bicheechenécabe ca hermanu de Francia que diidxaʼ né stale gana la? ngue runi iza que bidale cani rucheeche diidxaʼ 10%. Lu chonna iza ni gudiʼdiʼ despué bidale cani rucheeche diidxaʼ 20, 23, ne 40%. Cumu bidale cani nacubi la? biseendaʼ sucursal de Francia caadxi superintendente de circuito lu iza 1948 para gacanecaʼ laacabe. Biseendacabe gaayuʼ hermanu, tapa de Polonia, tobi de laacabe nga Antoine Skalecki.

Cásica né gana biʼniʼ ca binni de Polonia que dxiiñaʼ ndaaniʼ ca mina que, zaqueca nga bicheechecabe diidxaʼ, nga runi stale de ca testigu stiʼ Jiobá de Francia familia stícabe laacaʼ. Dede yanna cayuu binni de sti guidxi lade ca testigu stiʼ Jiobá. Chupa chonna de ca hermanu riʼ maʼ biguétacaʼ xquídxicaʼ; xcaadxi la? biaanacaʼ raqué. Peru guirácabe rucheechecabe diidxaʼ né gana cásica biʼniʼ ca primé binni de Polonia yendeza Francia. (Cani naguu chaahuiʼ xquidxi Dios Francia.)