Biiyaʼ guiraʼ ni nuu lu sitiu riʼ

guyé lu índice

«Ma cadxiña dxi ilá tu»

«Ma cadxiña dxi ilá tu»

«Lauzuhuaa chaahuiʼ, laindisa ique purti ma cadxiña dxi ilá tu.» (LUCAS 21:28)

DIIDXAʼ RIUUNDAʼ: 49 NE 43

1. Xi bizaaca ndaaniʼ guidxi Jerusalén lu iza 66. (Biiyaʼ dibuju ni zeeda ra ruzulú tema ri.)

LU IZA 66, ti soldadu de Roma láʼ Floro gulaʼnaʼ stale bidxichi stiʼ yuʼduʼ ni guyuu Jerusalén. Nabé bidxiichi ca judíu ne biiticaʼ stale soldadu stiʼ Roma ne bicaalucaʼ guidxi que. Menu de chonna beeu, Cestio Galo ni naca xaíque stiʼ Roma, guluu leʼ guidxi que né 30,000 saldadu. Ca judíu ni qué ruzuubaʼ diidxaʼ que yegucaachilucaʼ ndaaniʼ yuʼduʼ que. Qué nindaa yendá ca soldadu que ra nuu lindaa roʼ stiʼ guidxi que. Nabé bidxibi ca binni de guidxi que. Lii yaʼ, xi ñuni sentirluʼ pa ñuuluʼ raqué.

2. 1) Ora ñuuyaʼ ca xpinni Cristu naguucabe leʼ Jerusalén, xi ñaquiiñeʼ ñúnicaʼ. 2) Ximodo gunda bireecabe de ndaaniʼ guidxi que.

2 Chupa chonna iza ante, maca gudxi Jesús ca discípulo stiʼ xi chiguizaaca. Gúdxibe laacaʼ ca diidxaʼ riʼ: «Ne ora guʼya tu ma naguu soldadu leʼ Jerusalén la? lagana ma bidxiña dxi initilú ni ngue. Oraque cani nuu Judea uxooñe lu ca dani, ne cani nuu ndaani guidxi cadi iree» (Lucas 21:20, 21). Peru pa naguu ca soldadu que leʼ guidxi que,  ximodo guireecabe yaʼ. Jesús maca guníʼ zucueezadxí Dios ni (Mateo 24:22). Ne nguepeʼ nga ni bizaaca. Ni málasi ze ca romanu de Jerusalén. Bidii ndiʼ tiempu ca xpinni Cristu guzuubacaʼ stiidxabe ne guxooñecaʼ lu dani. Ne zaqué gunda bireecaʼ. * Lu iza 70, bibiguetaʼ ca romanu Jerusalén, ne biaje riʼ binitilucaʼ guidxi que. Peru guiráʼ cani bizuubaʼ stiidxaʼ Jesús bilacaʼ.

3. 1) Xi guendanagana zadxaagalunu maʼ cadi candaa. 2) Xidé chiguininu lu tema riʼ.

3 Maʼ cadi candaa, zadxaagalunu ti guendanagana cásica ni gupa ca xpinni Cristu de Jerusalén. Xi laani yaʼ. Laani nga gran tribulación, ni málasi guzulú. Cadi guiaandaʼ laanu ora gudxi Jesús ca discípulo stiʼ ni chiguizaaca Jerusalén, ne xi naquiiñeʼ gúnicaʼ, laaca caniʼbe ni chiguizaaca lu ca dxi stinu riʼ (Mateo 24:3, 21, 29). Lu primé siglu que, ca xpinni Cristu ni bizuubaʼ diidxaʼ bilacaʼ dxi binitilú Jerusalén. Ne ca dxi stinu riʼ, zalá ti gran muchedumbre dxi guinitilú guidxilayú stiʼ Binidxabaʼ (biindaʼ Apocalipsis 7:9, 13, 14). Pa racaláʼdxinu guilanu dxi riʼ la? naquiiñepeʼ nga guiénenu xi na Biblia chiguizaaca. Lu tema riʼ zaninu de ca cosa ni mayaca guizaaca ne xi naquiiñeʼ gúninu.

XIMODO GUZULÚ GRAN TRIBULACIÓN

4. Ximodo zuzulú gran tribulación.

4 Zuzulú gran tribulación ora guinitilú guiráʼ religión ni qué rusiidiʼ ni dxandíʼ. Biblia ribee lá cani «Babilonia, guidxi roʼ [...], jñaa irá gunaa dxaba» (Apocalipsis 17:5-7). Xiñee na Biblia zeeda gácacani casi ti gunaa dxabaʼ o ti gunaa ni rizá zacasi yaʼ. Purtiʼ ca xaíque stiʼ ca religión riʼ bisaanacaʼ Dios. Lugar de ninándacaʼ Jesús ne Reinu stiʼ, rúnicaʼ ni na ca gobiernu stiʼ guidxilayú. Ne rucaanacaʼ stale cosa ni rusiidiʼ Biblia para gusisaca binni laacaʼ jma. Laacaʼ qué runi adorarcaʼ Dios modo riuulaʼdxiʼ, casi runi cani bibí né espíritu santu (2 Corintios 11:2; Santiago 1:27; Apocalipsis 14:4). Peru, tuu nga chigunitilú ca religión ni qué rusiidiʼ ni dxandíʼ yaʼ. Lu Biblia rieeteʼ de «chii cachu» stiʼ ti «mani» de color naxiñáʼ. Maniʼ riʼ zeeda gaca Naciones Unidas, ne ca chii cachu stime zeeda gácacani guiráʼ ca gobiernu ni racané Naciones Unidas ca. Casi rieeteʼ lu Biblia, zucaa Jiobá ca gobiernu ca gunitilucaʼ ca religión ni qué rusiidiʼ ni dxandíʼ (biindaʼ Apocalipsis 17:3, 16-18).

5, 6. Ora guinitilú ca religión ni qué rusiidiʼ ni dxandíʼ, xiñee nánnanu qué zanitilú guiráʼ ca xpinni cani yaʼ.

5 Ora guinitilú ca religión ni qué rusiidiʼ ni dxandíʼ, ñee zati guiráʼ ca xpinni cani la? Coʼ. Xiñee nánnanu zacá ni yaʼ. Purtiʼ Biblia maca bizeeteʼ ziuu chupa chonna xaíque stiʼ religión ni rusiidiʼ ni cadi dxandíʼ nabánirucaʼ ne zaniʼcaʼ qué ñuu dxi ñuucaʼ lu ca religión ca. Ne de laacabe nga guníʼ profeta Zacarías ora bizeeteʼ ziuu tuuxa ni guca de religión ni cadi dxandíʼ zaníʼ: «“Cadi nacadiáʼ profeta. Nacaʼ ti hombre ni runi dxiiñaʼ lu layú, purtiʼ ti hombre de guidxilayú gucuaa naa dede dxi nahuiineʼ”. Ne ziuu tobi ni zabi laabe:  “Xii nga ca marca cá naluʼ pué”. Laabe zacábibe: “Nácacani marca pur gudíñecabe naa ra lidxi ca binni ni guizáʼ gunnaxhii naa”» (Zacarías 13:4-6).

6 Ora gucaalucabe ca religión ca, xi zazaaca né xquidxi Dios yaʼ. Jesús guníʼ: «Pa qué ucueeza dxí Dios lú ni la? irá xixé binni zati, peru pur ca xpinni be la? zucueeza be ni» (Mateo 24:22). Dxi bibani ca primé xpinni Cristu, bicueeza Jiobá de nucaalúcabe guidxi Jerusalén. Pur nga gunda bixooñeʼ «ca xpinni be», o cani bibí né espíritu santu. Zacaca nga zazaaca ca dxi stinu riʼ. Qué zudii Jiobá lugar gunitilú ca xaíque guidxi «ca xpinni». Para gápabe xquídxibe, zucueezabe primé ndaa stiʼ gran tribulación. Despué de primé ndaa riʼ ziuudxícabe ti tiempu.

ZADÍʼDICABE PRUEBA NE ZACA JUZGÁRCABE

7, 8. 1) Dxi cueezadxi de gucaalúcabe ca religión, xi naquiiñeʼ gúninu. 2) Tiempu ca, xiñee zácanu gadxé de xcaadxi binni.

7 Despué de guinitilú religión ni rusiidiʼ ni cadi dxandíʼ naquiiñeʼ gusihuínninu pa dxandíʼ nadxiinu Jiobá. Jma nga stale binni zuyubi guiaapa «lade ca guie sti dani», o ca organización stiʼ guidxilayú riʼ (Apocalipsis 6:15-17). Peru laanu zuyúbinu gapa Jiobá laanu. Ñee naquiiñeʼ cuézanu málasi gaca stale binni xpinni Jiobá la? Coʼ. Ndaaniʼ guidxi Jerusalén, dxi ze ca soldadu que, stale de ca judíu qué ñácacaʼ xpinni Cristu. Cani maca naca xpinni Cristu que nga bizuubaʼ stiidxaʼ Jesús ne bireecaʼ de ndaaniʼ guidxi que. Zacaca nga zazaaca ora cueza de gucaalúcabe ca religión ni qué rusiidiʼ ni dxandíʼ, stale binni qué zuyúbicaʼ religión ni rusiidiʼ ni dxandíʼ. Peru laanu ca xpinni Jiobá naquiiñeʼ gusihuínninu nadxiinu laabe ne cayacanenu cani bibí né espíritu santu (Mateo 25:34-40).

8 Yanna, xi zazaaca tiempu ca yaʼ. Qué ganna chaahuinu. Peru zándaca jma nagana zabáninu ne napa xidé gusaananu stale cosa. Ca xpinni Cristu de Jerusalén, gupa xidé bisaanacaʼ lídxicaʼ ne gudíʼdicaʼ lu stale guendanagana para bilacaʼ (Marcos 13:15-18). Nga runi, naquiiñeʼ guinabadiidxanu laaca laanu: «Ñee nuaaʼ listu para gusaanaʼ stale de ca cosa ni napaʼ ne guibaneniáʼ né ni caquiiñesiáʼ la? Ñee zuneʼ intiicaʼ cosa para cadi gusaanaʼ Jiobá la?». Guníʼ ique tiempu ca laasinu nga zuni adorarnu Dios stinu neca guidxaagalunu intiica guendanagana, cásica biʼniʼ profeta Daniel (Daniel 6:10, 11).

9, 10. 1) Xi zaninu lu gran tribulación. 2) Xi zuni ca xhenemígunu ca dxi ca.

9 Lu gran tribulación maʼ qué zucheechenu ca diidxaʼ nacubi ne galán stiʼ Reinu. Maʼ biluxe tiempu guininu de laani. Maʼ bedandá dxi guinitilú guidxilayú malu riʼ (Mateo 24:14). Né stale guendanadxibalú zaninu xi chiguni Jiobá guiráʼ binni malu, ne ndiʼ zuniná ni laacaʼ. Zándaca ni guininu dxi ca nga mayaca guinitilú guidxilayú stiʼ Binidxabaʼ. Lu Apocalipsis 16:21 na zuuyaʼ binni ca diidxaʼ riʼ casi granizu naroʼbaʼ ne zaguudicaʼ Dios.

10 Xi zuni ca enemigu stinu ora gunadiágacaʼ ca diidxaʼ nadipaʼ riʼ yaʼ. Ezequiel guníʼ ni zaníʼ ique ti grupu  de guidxi ni láʼ Gog de Magog: «Zucaaluáʼ guidxihuiiniʼ ni guirutiʼ cayapa. Ziaaʼ luguiáʼ cani guirutiʼ cuchiiñaʼ laa, ni nabeza né guendariuudxi, guiráʼ cani nabeza sin lindaa, ni qué gapa tranca nin puertaʼ». Casi maca bizeeteʼ Ezequiel que, zacalaʼdxiʼ Gog gucaalú ne gunduuxeʼ ca xpinni Dios, purtiʼ zuuyabe laacaʼ casi «ti guidxi ni bidagulisaa lade guiráʼ guidxi roʼ, ti guidxi ni cutale bidxichi ne cosa risaca, cani nabeza galahuiʼ guidxilayú» (Ezequiel 38:10-12). Ca xpinni Jiobá ziuucaʼ «galahuiʼ guidxilayú», o guiráʼ binni zanda guʼyaʼ gadxé laacabe de xcaadxi binni. Óraque zucaalú ca guidxi roʼ ca cani bibí né espíritu santu ne cani cayacané laacabe.

11. 1) Xi naquiiñeʼ gánnanu de modo gaca ca cosa ca lu gran tribulación. 2) Xi zuni ca xhenemigu Dios ora gúʼyaca ca «seña» ni guihuinni yaʼ.

11 Xi zazaaca despué yaʼ. Biblia na zazaaca stale cosa, peru qué ruzeeteʼ diʼ ni xi chiguizaaca primé ne xi chiguizaaca despué. Zándaca chupa chonna de ca cosa ca zazaacacani dxi queca. Ora bizeeteʼ Jesús de dxi guinitilú guidxilayú stiʼ Binidxabaʼ, guníʼ: «Zahuinni seña ibáʼ, adxé zahuinni gubidxa ne beeu ne ca luceru. Ne irá binni guidxilayú zadxibi dede qué zadxela xi guni ora guna diaga pabiáʼ reciu caxidxi cadiñe ntaa nisadóʼ. Zadxibi binni dede zieeguʼ, purti ma nuu xizaa xi chi aca ndaani guidxilayú. Zaniibi dxacha irá ni cá ibáʼ. Oraque zuuya cabe Hombre Biseenda Dios, zeeda lade za de riaʼqui biaani ne stale enda nandxóʼ» (Lucas 21:25-27; biindaʼ Marcos 13:24-26). Xii nga ca «seña» riʼ yaʼ. Ñee dxandipeʼ zadúʼyanu seña guibáʼ la? Naquiiñeʼ cuézanu para gánnanu ni. Peru intiica si gaca ca seña riʼ, nánnanu guizáʼ zadxibi ca xhenemigu Dios ora gúʼyacaʼ cani.

Cadi naquiiñeʼ guidxíbinu purtiʼ nánnanu zulá Jiobá laanu (Biiyaʼ párrafo 12 ne 13)

12, 13. 1) Xi zuni Jesús dxi gueeda de «riaʼqui biaani ne stale enda nandxóʼ» yaʼ. 2) Xi zuni ca xpinni Jiobá dxi ca yaʼ.

12 Xi zuni Jesús ora gueeda de «riaʼqui biaani ne stale enda nandxóʼ» yaʼ. Zaguube ndaayaʼ cani qué nusaana de nuzuubaʼ stiidxaʼ Dios ne zuni castigarbe cani qué nuzuubaʼ stiidxaʼ (Mateo 24:46, 47, 50, 51; 25:19, 28-30). Ximodo zúnibe ni yaʼ. Laca laabe bisiénebe ni sicaríʼ: «Dxi ibigueta Hombre Biseenda Dios la? zeeda casi rey, zedané irá ca ángel stiʼ, ne zabí para guni mandar. Ne zadxiña binni de irá guidxi ra nuu be. Zabee chu be caadxi lade xcaadxi, casi ribee chu pastor chiba lade dendxuʼ. Ne zuzuhuaa be ca dendxu ladu derechu stibe ne ca chiba ladu bigaʼ» (Mateo 25:31-33). Ndiʼ riníʼ zuni juzgar Jesús guiráʼ binni. Pa gúʼyabe ti binni ni qué ruzuubaʼ diidxaʼ zaniʼbe naca tobi de ca «chiba» ne zaniʼbe naquiiñeʼ guinitilú. Peru pa gúʼyabe ti binni ruzuubaʼ diidxaʼ la? zaniʼbe naca «dendxuʼ» ne zudiibe lugar laa gapa ti guendanabani ni qué zaluxe (Mateo 25:46).

13 Biblia na ora ca binni ni zeeda gaca «chiba» gudiicaʼ cuenta chiguinitilucaʼ «dxi que nga guʼna» guiracaʼ (Mateo 24:30). Yanna, xi zuni cani bibí né espíritu santu ne xcaadxi xpinni Dios yaʼ. Zúnicabe ni guníʼ Jesús riʼ: «Ora guʼya tu uzulú gaca irá nga la? lauzuhuaa chaahuiʼ, laindisa ique purti ma cadxiña dxi ilá tu» (Lucas 21:28).

 ZUZAANICABE LU REINU STIʼ DIOS

14, 15. 1) Xi zazaaca despué de gucaalú Gog de Magog xquidxi Dios. 2) Xii nga caníʼ Biblia ora ruzeeteʼ «utopa [Jesús] ca xpinni».

14 Xi zazaaca despué de gucaalú Gog de Magog xquidxi Dios yaʼ. Biblia na: «Zuseenda [Jesús] ca ángel sti para utopa ca xpinni ni nuu idubi naca guidxilayú, cásica cani nuu gaxha zaqueca cani nuu zitu» (Marcos 13:27; Mateo 24:31). Ñee riníʼ ca diidxaʼ riʼ óraca nga cuí Dios cani cheʼ guibáʼ la? Coʼ. Ñee caniʼni dxi ca nga guicaa cani bibí né espíritu santu ni nuuruʼ lu Guidxilayú riʼ sellu final ca la? Laaca coʼ, purtiʼ sellu riʼ zacaacabe ni ante guzulú gran tribulación (Mateo 13:37, 38; Apocalipsis 7:1-4). Yanna, xii nga riníʼ Biblia ora ruzeeteʼ «utopa [Jesús] ca xpinni» yaʼ. Riníʼ ni ora chiné Jesús cani bibí né espíritu santu ni nuuruʼ lu Guidxilayú riʼ guibá (1 Tesalonicenses 4:15-17; Apocalipsis 14:1). Zazaaca ndiʼ despué de gucaalú Gog de Magog xquidxi Dios (Ezequiel 38:11). Ne casi maca guníʼ Jesús: «Dxi ca nga guzaani cani nachaʼhui ra runi mandar Dios, casi ruzaani gubidxa» (Mateo 13:43). *

15 Stale binni runi cré zuuyacaʼ Jesús dxi guibiguetaʼ para guni mandar lu Guidxilayú ne Jesús ziné laacabe guibáʼ né cuerpu de beela stícabe. Ñee nga nga ni chiguizaaca cani bibí né espíritu santu ni nuuruʼ lu Guidxilayú riʼ la? Coʼ, purtiʼ Biblia rusiidiʼ guirutiʼ zuuyaʼ Jesús ora guibiguetaʼ. Ruzeeteni zeedabe ne «zeda yete be de ibáʼ lade za» ne «zahuinni seña ibáʼ ma chi ibigueta Hombre  Biseenda Dios» (Mateo 24:30). Ne laaca ruzeeteʼ Biblia «qué zanda chuʼ cuerpu ni napa nu ndaani guidxilayú ri ra runi mandar Dios». Yanna, ximodo nga cheʼ cani bibí né espíritu santu ni nuuruʼ lu Guidxilayú riʼ guibáʼ yaʼ. Biblia na primé «zuchaa Dios laacabe dxi xhidxi últimu trompeta que. Ne zaca ni ti ratu huiini casi ora riguiñe laga cabe» (biindaʼ 1 Corintios 15:50-53). * Nga runi, cani bibí ni nuuruʼ lu Guidxilayú ne cuzuubacaʼ stiidxaʼ Dios ziecaʼ juntu guibáʼ né ti cuerpu de espíritu nagueendaca.

16, 17. Xi naquiiñeʼ gaca ante guichaganáʼ Dendxuhuiiniʼ.

16 Ñee cásipeʼ chindá 144,000 de cani bibí guibáʼ, maca guichaganáʼ Dendxuhuiiniʼ la? (Apocalipsis 19:9.) Coʼ. Naquiiñeʼ gaca sti cosa ante. Guietenaláʼdxinu zucaalú Gog xquidxi Dios laga nuuruʼ de cani bibí lu Guidxilayú riʼ (Ezequiel 38:16). Xi zúninu ora gucaalú Gog xquidxi Dios yaʼ. Biblia na: «Cadi naquiiñeʼ diʼ tíndetu biaje riʼ. Laguzuhuaa dxiichiʼ ne laguuyaʼ modo chigulá Jiobá laatu». Ne laaca nani: «Cadi guidxíbitu ne cadi gacadítitu» (2 Crónicas 20:17). Casi maʼ bidúʼyanu, ti tiempuhuiiniʼ despué de guzulú gucaalú Gog xquidxi Dios, cani bibí né espíritu santu ziecaʼ guibá. Xi zazaaca despué yaʼ. Apocalipsis 17:14 cusiene xi zuni ca xhenemigu xquidxi Dios: «Zucaa lú ca Dendxu huiini que». Peru textu riʼ na zuni ganar Dendxuhuiiniʼ que ne cani «guridxi Dios laaca ne ulí laaca para aca ca xpinni be ne qué zusaana ca laabe». Nga runi Jesús ne ca 144,000 rey ni guni mandarné laabe guibáʼ zulacaʼ xquidxi Dios ni nuu lu Guidxilayú riʼ.

17 Zasaca lá Jiobá ora gueeda Armagedón (Apocalipsis 16:16). Ca binni zeeda gaca casi «chiba» zanitilucaʼ. Maʼ qué zácaruʼ cosa malu lu Guidxilayú, ne zalá gran muchedumbre. Ora maʼ gudiʼdiʼ Armagedón, óracaruʼ nga guichaganáʼ Dendxuhuiiniʼ ca, casi rusiene Apocalipsis ni (Apocalipsis 21:1-4). * Zannaxhii Jiobá ca binni ni guilá lu Guidxilayú ne zudii laacabe stale cosa galán. Né stale gana nga ribézanu guedandá dxi sicarú ca (biindaʼ 2 Pedro 3:13).

18. Xi naquiiñeʼ gúninu yanna ra maʼ nánnanu xi chiguizaaca maʼ cadi candaa yaʼ.

18 Xi naquiiñeʼ gúninu yanna ra maʼ nánnanu xi chiguizaaca maʼ cadi candaa yaʼ. Apóstol Pedru na naquiiñeʼ guiníʼ íquenu tu clase binni naquiiñeʼ gácanu. Naquiiñeʼ gaca xquendanabáninu nayá, gannaxhiinu Dios ne cadi guchéʼnenu laa, ne cadi guiaandaʼ laanu maʼ cadi candaa para guedané Jiobá dxi stiʼ. Pedru laaca bizeeteʼ: «Hermanu ni nadxiee caʼ, laga cabeza tu gueeda be la? laguni pur idxela be laatu cayuni tu jneza ne gasti donda nuu luguiá tu ne nuu né tu laabe tobi si» (2 Pedro 3:11, 12, 14). Nga runi, guni adorarnu Jiobá sin guni crenu cani rusiidiʼ ca religión ni qué rusiidiʼ ni dxandíʼ ne cadi gusaana de chuʼnu pur rey ni rudii guendariuudxí laanu, Jesucristu.

^ párrafo 2 Biiyaʼ Torre stiʼ ni rapa 15 stiʼ abril 2012, yaza 25 ne 26.

^ párrafo 14 Biiyaʼ Torre stiʼ ni rapa 15 stiʼ julio 2013, yaza 13 ne 14.

^ párrafo 15 Cuerpu de beelaʼ stiʼ cani bibí né espíritu santu ni nabániruʼ lu Guidxilayú riʼ qué ziécani guibáʼ (1 Corintios 15:48, 49). Zándaca zanitilú cuerpu de beela stícabe cásica binitilú cuerpu stiʼ Jesús.

^ párrafo 17 Lu Salmo 45 rieeteʼ primé naquiiñeʼ tinde rey ca ne óracaruʼ guichaganáʼ. Ndiʼ racané laanu gánnanu xi chiguizaaca primé ne xi chiguizaaca despué.