Biiyaʼ guiraʼ ni nuu lu sitiu riʼ

guyé lu índice

Xi rusiidiʼ oración de padrenuestro laanu (guiropa ndaa)

Xi rusiidiʼ oración de padrenuestro laanu (guiropa ndaa)

«Nanna Bixhoze tu xii nga caquiiñe tu.» (MATEO 6:8)

1-3. Xiñee nanna dxichi ti hermana bicabi Jiobá ca oración stiʼ.

TI PRECURSORA regular láʼ Lana guyé Alemania lu iza 2012. Qué ziuu dxi guiaandaʼ laabe ni bizaacabe dxi mayaca guiluxe viaje stibe. Laabe nabe bicabi Jiobá chupa oración stibe. Primé que gúcani laga zebe para quíbabe lu avión. Laga zebe ndaaniʼ tren gunábabe Jiobá gacané laabe guidxélabe tuuxa guiníʼnebe de laa. Ora yendabe ra chicaabe avión que gúdxicabe laabe qué zaree avión stibe dxi que sínuque de sti dxi que. Gunábabe Jiobá gacané laabe purtiʼ maʼ cará xpuéltube ne qué gápabe paraa guiaanabe gueelaʼ que. Ndiʼ nga guiropa oración bíʼnibe.

2 Ora biluxe biʼniʼ orarbe, guniʼné ti binni laabe ne na rabi laabe: «Lana, xi cayúniluʼ raríʼ pué». Gúcasibe tobi de cani guzanebe scuela ne cheʼ Sudáfrica. Jñaa hombrehuiiniʼ riʼ ne jñaabiidaʼ yesaanacaʼ laa raqué. Ora gudxi Lana laacabe ni bizaaca, gúdxicaʼ laabe zanda chiguiaanabe ra lídxicaʼ. Ne laaca gunabadiidxacaʼ laabe stale cosa ni runi crebe ne de xhiiñaʼ Jiobá ni cayúnibe.

 3 Sti dxi que, bicábiruʼ Lana laacabe xcaadxi ni gunabadiidxacabe laa de Biblia. Ne ante guibiguétabe xquídxibe bicaabe paneza nabeza ca binni que ne númeru de teléfono sticaʼ ti ganda chiganna xcaadxi hermanu laacaʼ. Dede yanna nácabe precursora ne nanna dxíchibe bicabi Jiobá ca oración stibe (Salmo 65:2).

4. Xi zadúʼyanu lu tema riʼ.

4 Ora nápanu guendanagana, nagueendaca runi orarnu Jiobá. Ne laa rucaadiaga laanu ne riuulaʼdxiʼ gacané laanu (Salmo 34:15; Proverbios 15:8). Peru Jesús bisiidiʼ laanu lu oración de padrenuestro que nuu cosa ni jma risaca ni cadi naquiiñeʼ gusaana de guinábanu. Lu tema riʼ zadúʼyanu stapa cosa ni rieeteʼ lu oración de padrenuestro ne ximodo racanécani laanu cadi guchéʼnenu Dios (biindaʼ Mateo 6:11-13).

«DANÉ LAADU ENDARÓ TIDI NÉ DU DXI»

5, 6. Xiñee naquiiñeʼ guinábanu «endaró tidi né [nu] dxi» neca nápanu ni guidoʼno.

5 Qué nusiidiʼ diʼ Jesús laanu guinábanu «dané naa guendaró tideniáʼ dxi». Laabe bisiidibe laanu guininu «dané laadu endaró tidi né du dxi». Guidúʼyanu ximodo runi ti superintendente de circuito de África láʼ Victor ni bizéʼtenu riʼ. Laa guníʼ: «Rudieeʼ xquíxepeʼ Jiobá purtiʼ naa ne xheelaʼ qué riuʼdu xizaa pur ni guidoʼdo ne pur quíxedu ra nabézadu. Ca xpinni Cristu ni nadxiidu racanecaʼ laadu para gápadu cani. Peru rinabaʼ Dios gacané guiráʼ ca hermanu cadi gusaana de gúnicaʼ ni nabe neca qué gápacaʼ ni tiidinecaʼ dxi ne gudxiilucaʼ guidxilayú stiʼ Binidxabaʼ».

6 Zándaca qué riaadxaʼ laanu ni guidoʼno, peru stale de ca hermanu stinu nabé pobre laacaʼ. Ne nuu tu cadiʼdiʼ lu stale desgracia. Naquiiñeʼ guni orarnu pur laacaʼ. Peru laaca zanda gúninu xiixa para gacanenu laacabe. Zanda gudiʼnu laacabe de ni nápanu. Ne laaca zanda gudiʼnu bueltu para cadi gusaana de gaca xhiiñaʼ Jiobá. Nánnanu ora rudiʼnu biaʼ nápanu racanenu ca hermanu ni caquiiñeʼ ni (1 Juan 3:17).

7. Xi ejemplu bisiidiʼ Jesús para gacané laanu cadi chuʼnu xizaa pur ca cosa ni caquiiñenu.

7 Despué de bisiidiʼ Jesús oración de padrenuestro, bidiibe ti ejemplu para gacanebe laanu cadi chúʼpenu xizaa pur ca cosa ni caquiiñenu para guibáninu. Laabe guniʼbe ca guieʼ ni riniisi lu layú qué riuucaʼ xizaa de xi gácucaʼ purtiʼ Jiobá rudii guiráʼ ni caquiiñeʼ cani. Laanu laaca cadi naquiiñeʼ chuʼnu xizaa pur cani iquiiñenu (Mateo 6:30-34). Naquiiñeʼ guiechenenu né ni nápanu cada dxi. Zanda guinábanu Dios ti lugar ra cuézanu, gápanu ti dxiiñaʼ para gápanu ni guibaninenu ne gacanebe laanu quixhe íquenu gúninu ni jneza ora huaranu. Peru nuu ti cosa ni jma risaca ni naquiiñeʼ guinábanu ora guni orarnu. Xi laani yaʼ.

8. Xi rusietenalaʼdxiʼ ca diidxaʼ «dané laadu endaró tidi né du dxi» laanu.

8 Ca diidxaʼ «dané laadu endaró tidi né du dxi» rusietenalaʼdxiʼ cani laanu naquiiñeʼ guinábanu Jiobá cadi gusaana de gusiidiʼ laanu ne gacané laanu para gaca xhamígunu laa. Xiñee rininu zacá yaʼ. Purtiʼ Jesús laaca guníʼ: «Cadi pan si nga ibani né binni sínuque irá ca diidxa ni iree de ruaa Dios» (Mateo 4:4).

«BISIAANDAʼ NI NUZÁʼBIDU LII»

9. Xiñee zanda guininu zeeda gaca ca donda stinu casi ora nuzáʼbinu Dios.

9 Lu oración de padrenuestro que guníʼ Jesús: «Bisiaandaʼ ni nuzáʼbidu lii» (Mateo 6:12, TNM). Ne sti biaje guniʼbe:  «Bisiaanda ni ruchéʼ né du lii» (Lucas 11:4). Guniʼbe ca diidxaʼ riʼ purtiʼ ca donda stinu zeeda gácacani casi ora nuzáʼbinu xiixa. Lu iza 1952, revista riʼ bisiene naquiiñeʼ gannaxhiinu Dios ne guzúʼbanu stiidxaʼ. Ora ruchéʼnenu laabe cadi cudiʼnu laabe ni caquiiñeʼ guicaabe. Nga runi nuzáʼbinu Dios. Revista que na pa Jiobá niná, ñanda nusaana de ñaca xhamigu laanu. Revista que bizeeteʼ: «Pecadu ca rusihuinni cadi nadxii tuuxa Dios» (1 Juan 5:3).

10. 1) Xiñee zanda gutiidilaʼdxiʼ Jiobá stóndanu. 2) Pur ni biʼniʼ Jiobá pur laanu, xi rucaani laanu gúninu.

10 Caquiiñenu gutiidilaʼdxiʼ Jiobá donda stinu guiráʼ dxi. Laabe zanda gutiidiláʼdxibe donda stinu purtiʼ guti Jesús pur laanu raca biaʼ 2,000 iza. Naquiiñeʼ gudiʼnu xquíxepeʼ Jiobá pur ni bisigaʼdeʼ laanu riʼ. Pa qué ñati Jesús pur laanu, qué ñanda nilanu de lu náʼ guendaruchee ne guendaguti. Biblia na: «Pa gacalaʼdxiʼ tobi de laacabe gulá neca ti biʼchiʼ la? nin nga qué zanda guni, nin quixe Dios para ganda guilabe (biaʼ caquiiñeʼ guiaxa para guilácabe nabé caru ni ne guirutiʼ qué zanda quixe ni); ti guibánibe sin qué chuʼ dxi gátibe ne qué gúʼyabe baʼ» (Salmo 49:7-9 ne biindaʼ 1 Pedro 1:18, 19). Ca diidxaʼ: «Bisiaanda ni ruchéʼ né du lii» rusietenalaʼdxiʼ cani laanu laaca caquiiñeʼ ca hermanu stinu guendaguti stiʼ Jesús. Rihuinni dxíchica laaca racalaʼdxiʼ Jiobá guiníʼ íquenu laacabe ne chúʼcabe gaxha de laabe. Ti modo zanda gúninu ni nga gutiidiláʼdxinu stóndacabe ora gucheenécabe laanu. Stale biaje cadi naróʼbapeʼ cani rúnicabe laanu. Ora rutiidiláʼdxinu ca bíʼchinu ne ca bizáʼnanu rusihuínninu nadxiinu laacabe ne laaca rusihuínninu rudiʼnu xquíxepeʼ Jiobá pur rutiidilaʼdxiʼ stóndanu (Colosenses 3:13).

Pa racaláʼdxiluʼ gutiidilaʼdxiʼ Dios stóndaluʼ, naquiiñeʼ gutiidiláʼdxiluʼ donda stiʼ stobi (Biiyaʼ párrafo 11)

11. Xiñee naquiiñeʼ gutiidiláʼdxinu donda stiʼ stobi.

11 Cumu nácanu binni ruchee la? zándaca nuu biaje raca nagana para laanu gutiidiláʼdxinu donda stiʼ ca hermanu (Levítico 19:18). Ne pa gábinu xcaadxi binni ni biʼniʼ hermanu ca laanu, zándaca chúʼcabe pur laanu ne guidxiichinécabe hermanu ca. Ne nga zándaca guxhéleni ca hermanu. Pa guizaaca nga ne qué guyúbinu modo gaca chaahuiʼ ni la?  cusihuínninu cadi cudiʼnu xquíxepeʼ pur guti Jesús pur laanu (Mateo 18:35). Pa qué gutiidiláʼdxinu donda stiʼ stobi, laaca qué zutiidilaʼdxiʼ Jiobá stóndanu (biindaʼ Mateo 6:14, 15). Ne pa racaláʼdxinu gutiidilaʼdxiʼ Jiobá stóndanu la? qué chuʼ dxi gúninu xiixa cosa nabé malu (1 Juan 3:4, 6).

«CADI UDIIU LUGAR CUBA YU BINIDXABA LAADU»

12, 13. 1) Xi bizaaca Jesús despué de guyuunisa. 2) Pa guchéʼnenu Dios, xiñee qué zanda guininu sti binni napa donda. 3) Xi bisihuinni Jesús ra qué nusaana de nuzuubaʼ stiidxaʼ Dios.

12 Lu oración de padrenuestro, Jesús guníʼ: «Cadi udiiu lugar cuba yu binidxaba laadu». Ndiʼ rusietenalaʼdxiʼ laanu ni bizaaca Jesús despué de guyuunisa. Jiobá biiyaʼ «pa zuni [Jesús] ni na» Binidxabaʼ (Mateo 4:1; 6:13). Xiñee bidiibe lugar gaca nga yaʼ. Purtiʼ Adán ne Eva bidxiidéchecaʼ Dios casi xaíque sticaʼ ne caquiiñeʼ guihuinni ndiʼ: Ñee bizáʼ Jiobá binni ne xiixa defectu la? Ñee zanda guzuubaʼ ti binni ni qué ñalené donda stiidxaʼ Dios ora gucaacabe laa guchee la? Ñee jma galán zabani binni guidxilayú pa guni mandarcaʼ laca laacaʼ, casi guníʼ Binidxabaʼ que la? (Génesis 3:4, 5). Laaca guniʼbe nin ti binni ni qué ñalené donda zuzuubaʼ stiidxaʼ Dios ora gucaa tuuxa laa guchee. Biseendaʼ Jiobá Jesús lu Guidxilayú riʼ para guihuinni pa dxandíʼ ngue ni guníʼ Binidxabaʼ. Peru despué zahuinni guiráʼ ni. Ne dxi ca, guiráʼ cani nabani guibáʼ ne lu Guidxilayú zánnacaʼ Jiobá nga ni jma nanna guni mandar.

13 Jiobá naca ti Dios nayá, nga runi qué ziuu dxi gucaabe tuuxa binni guchee. Ni dxandíʼ la? Binidxabaʼ nga rucaa binni guchee (Mateo 4:3). Peru de laanu nga riaana guidúʼyanu pa zúninu ni nabe o pa coʼ (biindaʼ Santiago 1:13-15). Guiníʼ íquenu de Jesús. Xi bíʼnibe ora gucalaʼdxiʼ Binidxabaʼ nucaa laabe nucheebe yaʼ. Nagueendaca bicaanabe laa ne gúdxibe laa ni cá lu Stiidxaʼ Dios. Gudixhe ique Jesús cadi gucheené Jiobá. Peru qué niree Binidxabaʼ gana. Guleza sti tiempu para gucaa laabe gucheebe (Lucas 4:13). Neca zacá, qué nusaana Jesús de nuzuubaʼ stiidxaʼ Dios. Zacá bisihuínnibe ti binni ni qué ñalené donda zanda guzuubaʼ stiidxaʼ Jiobá neca guidxaagalú xiixa cosa ni jma nagana. Ca dxi riʼ, Binidxabaʼ laaca ruyubi modo gucaa laanu guchéʼnenu Jiobá.

14. Xi naquiiñeʼ gúninu pa racaláʼdxinu gucáʼnanu ca trampa stiʼ Binidxabaʼ.

14 Guiráʼ ni guníʼ Binidxabaʼ dxi bidxii deche Adán ne Eva Dios casi xaíque sticaʼ chiguihuínniruʼ pa dxandíʼ cani. Nga runi cudiiruʼ Jiobá lugar Binidxabaʼ gucaa laanu gucheʼnu. Peru cadi guiaandaʼ laanu cadi Dios diʼ nga rucaa laanu gucheʼnu. Laabe nápabe confianza laanu ne racanebe laanu. Peru qué rucaabe laanu guzúʼbanu stiidxabe. Rudiibe lugar laanu cuinu xi gúninu, pa zuzúʼbanu stiidxabe o pa coʼ. Xi naquiiñeʼ gúninu pa racaláʼdxinu gucáʼnanu ca trampa stiʼ Binidxabaʼ yaʼ. Naquiiñeʼ gaca xhamígunu Jiobá ne cadi gusaana de guinábanu laabe gacanebe laanu. Ximodo zanda guicábibe laanu yaʼ. Guidúʼyanu.

Cadi gusaana de chuʼluʼ jma gaxha de Jiobá ne cadi gusaana de gucheecheluʼ diidxaʼ né stale gana (Biiyaʼ párrafo 15)

15, 16. 1) Gunáʼ nga caadxi de ca trampa ni naquiiñeʼ gucáʼnanu. 2) Tu napa donda pa guiábanu lu trampa riʼ.

15 Riquiiñeʼ Jiobá espíritu santu stiʼ para gacané laanu gucáʼnanu ca trampa stiʼ Binidxabaʼ. Laaca riquiiñebe Biblia ne congregación stibe para quixhenabe laanu de ca trampa stiʼ Binidxabaʼ. Rábibe  laanu cadi iquiiñenu stipa stinu, tiempu ne bueltu stinu lu ca cosa ni qué zaquiiñenu. Guidúʼyanu ni bizaaca ti guendaxheelaʼ ni naca Testigu láʼ Espen ne Janne. Laacaʼ nabézacaʼ ndaaniʼ ti guidxi stiʼ Europa ra nabé nuu bidxichi. Stale iza gúcacabe precursor ti lugar ra nabé caquiiñeʼ tu gucheeche diidxaʼ. Peru yanna maʼ nápacabe chupa xiiñicabe ne maʼ qué zanda gácacabe precursor. Espen guníʼ: «Yanna ra maʼ qué randa rúnidu jma lu xhiiñaʼ Jiobá, gatigá rinábadu laabe gacanebe laadu para cadi guiábadu lu ca trampa stiʼ Binidxabaʼ. Rinábadu laabe gacanebe laadu chuʼdu jma gaxha de laabe ne cadi gusaana de gucheechedu diidxaʼ né stale gana».

16 Sti trampa ni naquiiñeʼ gucáʼnanu nga pornografía. Nuu tu ruuyaʼ pornografía purtiʼ qué rusaana de guiníʼ ique cosa malu. Nga runi pa guiábanu lu trampa ca, qué zanda ugáʼninu donda Binidxabaʼ o guidxilayú malu stiʼ. Xiñee yaʼ. Purtiʼ qué zanda gucaacabe laanu gúninu cosa malu. Peru stale xpinni Cristu huacaanacaʼ trampa riʼ. Nga runi laaca zanda gucáʼnanu ni (1 Corintios 10:12, 13).

«BILÁ LAADU DE LU NÁ BE»

17. 1) Ximodo rusihuínninu racaláʼdxinu gapa Jiobá laanu de Binidxabaʼ. 2) Maʼ cadi candaa, xi zuni Jiobá.

17 Ora rininu «bilá laadu de lu ná» Binidxabaʼ, canábanu Jiobá gapa laanu de laabe. Ximodo rusihuínninu racaláʼdxinu gapa Jiobá laanu yaʼ. Ra «cadi [gácanu] de guidxilayú ri’» nin gannaxhiinu «ni nuu ndaaniʼ» ni (Juan 15:19; 1 Juan 2:15-17). Maʼ cadi candaa, zuseguyoo Jiobá Binidxabaʼ ne zunitilube guidxilayú malu stiʼ. Laga cabézanu guni Jiobá nga, naquiiñeʼ guietenaláʼdxinu nabé cadxiichi Binidxabaʼ purtiʼ nanna maʼ huaxiéʼ dxi napa. Zúnibe intiica si para gusaana de gúninu ni na Jiobá. Nga runi cadi naquiiñeʼ gusaana de guinábanu Dios gapa laanu de Binidxabaʼ (Apocalipsis 12:12, 17).

18. Xi naquiiñeʼ gúninu pa racaláʼdxinu guibáninu ndaaniʼ ti guidxilayú ra maʼ qué ziuu Binidxabaʼ.

18 Pa racaláʼdxinu guibáninu ndaaniʼ ti guidxilayú ra maʼ qué ziuu Binidxabaʼ la? naquiiñeʼ gúninu cani rieeteʼ lu oración de padrenuestro. Ximodo yaʼ. Ra guinábanu Dios gueeda Reinu stiʼ, guisaca lá ne gaca ni na lu Guidxilayú riʼ. Cadi gusaana de guni crenu zudiibe laanu ni caquiiñenu guiráʼ dxi para guibaninenu ne para cadi gusaana de guzúʼbanu stiidxabe.