Biiyaʼ guiraʼ ni nuu lu sitiu riʼ

guyé lu índice

Cristu nga «enda nandxóʼ [...] sti Dios»

Cristu nga «enda nandxóʼ [...] sti Dios»

«Cristu nga enda nandxóʼ [...] sti Dios.» (1 CORINTIOS 1:24)

1. Xiñee guníʼ Pablu Cristu nga «enda nandxóʼ [...] sti Dios» yaʼ.

DXI guyuu Jesús lu Guidxilayú riʼ, biʼniʼ stale milagru ni nabé bidxagayaa binni. Pa guidúʼndanu de ca milagru riʼ lu Biblia jma zaguidxi fe stinu (Mateo 9:35; Lucas 9:11). Gunda biʼniʼ Jesús ca milagru riʼ purtiʼ bidii Jiobá poder laa. Nga runi apóstol Pablu na «Cristu nga enda nandxóʼ [...] sti Dios» (1 Corintios 1:24). Peru, xi rusiidiʼ ca milagru stiʼ Jesús laanu yaʼ.

2. Xi rusiidiʼ ca milagru ni biʼniʼ Jesús laanu.

2 Ca milagru stiʼ Jesús rusiidiʼ cani laanu stale cosa (Hechos 2:22). Pur laacani nánnanu ora maʼ guni mandar Jesús lu 1,000 iza, zúnibe milagru ni zacané guiráʼ binni ni guibani lu Guidxilayú riʼ. Ca milagru stibe laaca racané cani laanu gunibiáʼ chaahuinu ca guenda stibe ne stiʼ Jiobá. Lu tema riʼ zaninu de chonna milagru ni biʼniʼ Jesús ne zadúʼyanu ximodo zanda gacané cani laanu yanna ne despué.

 TI MILAGRU NI RUSIIDIʼ LAANU ZANDA GUDIʼNU NI CAQUIIÑEʼ STOBI

3. 1) Xi bizaaca lu ti guendaxheelaʼ ni guca ndaaniʼ guidxi Caná. 2) Xiñee biʼniʼ Jesús milagru riʼ yaʼ.

3 Biʼniʼ Jesús primé milagru stiʼ ora guca ti guendaxheelaʼ ndaaniʼ guidxi Caná. Qué gánnanu xiñee, peru birá vinu lu guendaxheelaʼ que. Ne pur ndiʼ zatuilú cani cachaganáʼ que, purtiʼ naquiiñeʼ guni tendercaʼ ca binni cheʼ guendaxheelaʼ que. Ngue runi gunabaʼ María Jesús gacané cani cachaganáʼ que. Xiñee yaʼ. Purtiʼ nanna dxíchibe xi guníʼ ca profeta de Jesús ne nánnabe zábicabe laa «Xiiñi Dios ni nuu ibáʼ» (Lucas 1:30-32; 2:52). Ngue runi zándaca guníʼ íquebe zanda gacané Jesús cani cachaganáʼ que. Peru ni nánnanu nga nuu Jesús ne María gacanecaʼ laacabe. Ngue runi biʼniʼ Jesús 380 litru nisa que vinu de ni jma galán (biindaʼ Juan 2:3, 6-11). Guirutiʼ nucaa Jesús ñuni milagru riʼ, peru bíʼnibe ni purtiʼ bizaaláʼdxibe binni. Laabe yenándabe ejemplu stiʼ Jiobá, purtiʼ laa rudii ni caquiiñeʼ binni.

4, 5. 1) Milagru ra biʼniʼ Jesús nisa que vinu, xi rusiidiʼ ni laanu. 2) Xidé riuʼnu seguru pur milagru biʼniʼ Jesús riʼ.

4 Né poder stiʼ Jiobá biʼniʼ Jesús nisa que vinu de ni jma galán. Bíʼnibe stale vinu para guiráʼ binni que. Milagru riʼ rusiidiʼ ni laanu rudii Jiobá ne Jesús ni caquiiñeʼ stobi ne dxandipeʼ rizaaláʼdxicabe de cani runi sentirnu. Ne laaca riuʼnu seguru zudii Jiobá laanu stale guendaró ndaaniʼ Paraísu. Biblia na: «Lu dani riʼ, Jiobá stiʼ ca ejércitu zuni para guiráʼ guidxi ti guendaró nanixe, ziuu vinu de ni jma galán, guendaró nanixe ni napa stale tuétano, vinu de ni jma galán ne ni maʼ biá» (Isaías 25:6).

5 Bixuiʼlú dxi maʼ guibáninu ndaaniʼ Paraísu, zuuyaʼ Jiobá cadi lica guiaadxaʼ laanu gastiʼ. Guiranu zápanu ti yoo sicarú ne guendaró nanixe. Ora riníʼ íquenu lu ca cosa galán ni chigudii Jiobá laanu, rucaani laanu gudiʼnu xquíxepeʼ laabe.

Chinándanu ejemplu stiʼ Jesús ora iquiiñenu tiempu stinu para gacanenu xcaadxi binni (Biiyaʼ párrafo 6)

6. 1) Xi para biquiiñeʼ Jesús poder stiʼ. 2) Ximodo zanda chinándanu ejemplu stiʼ Jesús.

6 Qué ñuu dxi niquiiñeʼ Jesús poder stiʼ para ñuni ni racalaʼdxiʼ. Xi bíʼnibe dxi gucalaʼdxiʼ Binidxabaʼ ñúnibe ca guié que pan yaʼ. Qué ninabe ñúnibe ni (Mateo 4:2-4). Laabe biquiiñebe poder stibe para gacanebe binni. Ximodo zanda chinándanu ejemplu stibe yaʼ. Jesús guníʼ naquiiñeʼ gápanu costumbre de gacanenu binni (Lucas 6:38). Yanna, xi zanda gúninu pur laacabe yaʼ. Zanda guni invitarnu laacabe ti guendaró ra lídxinu. Laaca zanda cueenu tiempu para guinínenu laacabe despué de guendaridagulisaa, zándaca  gucaʼdiáganu tuuxa ni caquiiñeʼ guni ensayar libana stiʼ. Ne zándaca gacanenu tuuxa ni caziidiʼ gucheeche diidxaʼ. Cada biaje gudiʼnu ni caquiiñeʼ sti binni ne gacanenu laacaʼ, zinándanu ejemplu stiʼ Jesús.

«IRÁ XIXÉ BINNI QUE GUDÓ DEDE BIDXÁ NDAANI»

7. Xi guendanagana qué zusaana de chuʼ lu guidxilayú stiʼ Binidxabaʼ.

7 Ca dxi riʼ, stale binni pobre nabani ndaaniʼ Guidxilayú. Peru maca nuu guendanagana riʼ dede ca dxi gucuá Biblia. Jiobá gudxi ca israelita: «Qué ziuu dxi guiaadxaʼ binni pobre ndaaniʼ guidxilayú» (Deuteronomio 15:11). Ne ti gayuaa iza despué, guníʼ Jesús: «Ca pobre la? qué ziaadxa ca lade tu» (Mateo 26:11). Ñee gucaláʼdxibe niniʼbe qué zusaana de chuʼ pobre lu Guidxilayú riʼ la? Coʼ. Ni gucaláʼdxibe niniʼbe nga qué zusaana de chuʼ binni pobre lu guidxilayú stiʼ Binidxabaʼ. Peru maʼ gadxé zaca ni ndaaniʼ Paraísu ca. Ziuu guendaró para guiráʼ binni ne guirutiʼ zaca pobre.

8, 9. 1) Xi bicaa Jesús guni milagru ni rieeteʼ lu Mateo 14:14-21. 2) Xi runi sentirluʼ ora riníʼ íqueluʼ de milagru riʼ.

8 Salmo 145:16 na ruxheleʼ na Jiobá ne rudii binni guiráʼ ni caquiiñeʼ. Dxi guyuu Jesús lu Guidxilayú riʼ yenándabe ejemplu stiʼ Bixhózebe ne bidiibe binni guiráʼ ni caquiiñeʼ. Peru qué ñúnibe ni para nusihuínnibe nápabe stale poder. Bíʼnibe ni purtiʼ dxandipeʼ bizaaláʼdxibe laacaʼ. Guidúʼyanu ti ejemplu ni rieeteʼ lu Mateo 14:14-21 (biindaʼ ni). Mil binni yenanda Jesús ndaaniʼ stale guidxi (Mateo 14:13). Ra maʼ zixhinni, ca discípulo que biiyacaʼ maʼ bidxaga ca binni que ne candaanacaʼ. Ngue runi gúdxicabe Jesús gabi ca binni que checaʼ ne chisicaʼ xiixa ni gocaʼ. Xi biʼniʼ Jesús yaʼ.

9 Biyaanaʼ Jesús guiráʼ binni que né gaayuʼ si pan ne chupa benda. Xiñee bíʼnibe milagru riʼ yaʼ. Purtiʼ nadxiibe ca binni que ne rizaaláʼdxibe laacaʼ. Ne bidiibe laacaʼ stale guendaró purtiʼ Biblia na guirácabe gudócabe dede bidxá ndaanicabe. Bidii guendaró que stipa laacabe para gunda bibiguétacabe ra lídxicabe (Lucas 9:10-17). Guyuu stale guendaró dede biʼniʼ sobra 12 dxumi.

10. Xi zazaaca né guendapobre.

10 Pur ca xaíque ni qué runi ni jneza ne ni ruyubi para laasi, nuu millón de binni pobre. Dede chupa chonna testigu stiʼ Jiobá huaxiéʼ nápacaʼ ni gocaʼ. Peru Dios zanda gudii guiráʼ ni caquiiñeʼ binni para guibani ne racaláʼdxibe gúnibe ni. Laabe maʼ bizabiruaabe cueebe guendapobre. Biblia na: «Ziuu stale biidxiʼ lu guidxilayú; lu ca dani ca jma stale ziuu. Cuananaxhi stini zaca casi Líbano, ne zadale binni ndaaniʼ ca guidxi ca casi riniisi guixi gaʼ lu guidxilayú» (Salmo 72:16). Maʼ cadi candaa, guiráʼ cani guzuubaʼ stiidxaʼ Dios zabánicaʼ lu ti guidxilayú ra maʼ qué ziuu binni malu ne binni pobre.

11. 1) Xiñee nanna dxíchinu maʼ cadi candaa zaquiiñeʼ Cristu poder stiʼ para gacané guiráʼ binni. 2) Ora riníʼ íquenu cani chiguni Cristu, xi rucaa cani laanu gúninu.

11 Dxi guyuu Jesús lu Guidxilayú riʼ, chonna iza arondaʼ bíʼnibe milagru ndaaniʼ chupa chonna guidxi (Mateo 15:24). Peru yanna maʼ nácabe rey, ne  ora guni mandarbe 1,000 iza zacanebe guiráʼ binni (Salmo 72:8). Né ca milagru biʼniʼ Jesús riʼ, bisihuinni racalaʼdxiʼ iquiiñeʼ poder stiʼ para gacané laanu. Nga runi nanna dxíchinu maʼ cadi candaa zúnibe ni. Ora riníʼ íquenu ni, zucaa ni laanu iquiiñenu tiempu stinu ne stipa stinu para gacanenu binni (Salmo 45:1; 49:3). Dxandíʼ, qué zanda diʼ gúninu milagru. Peru zanda guinínenu binni de ca cosa galán ni rieeteʼ lu Biblia. Ne nga nga ni naquiiñeʼ gúninu (Romanos 1:14, 15).

JIOBÁ NE JESÚS RUCUEEZACAʼ CANI RIZAACA LU GUIDXILAYÚ

12. Xiñee nanna dxíchinu riene chaahuiʼ Jesús ca cosa ni rizaaca lu Guidxilayú.

12 Biblia na ora bizáʼ Dios Guidxilayú la? Jesús guyuu cueʼbe «casi tobi ni runi xhiiñabe jnézapeʼ», o ti artesanu nabé nanna (Proverbios 8:22, 30, 31; Colosenses 1:15-17). Nga runi riene chaahuiʼ Jesús ca cosa ni rizaaca lu Guidxilayú casi bi yooxhoʼ ni riasa lu nisadóʼ, ne nánnabe gucueezabe cani.

Ora guiníʼ íqueluʼ xiñee biʼniʼ Jesús milagru, xii nga ni jma ridxagayaaluʼ (Biiyaʼ párrafo 13 ne 14)

13, 14. Bizeeteʼ ti ejemplu ni rusihuinni rucueeza Jesús cani rizaaca lu Guidxilayú.

13 Dxi guyuu Jesús lu Guidxilayú riʼ, bisihuinni zanda gucueeza cani rizaaca luni. Casi ti biaje biquiiñebe poder stibe para bicueezabe «ti bi yooxho» (biindaʼ Marcos 4:37-39). Ti hombre ni nanna de tema riʼ guníʼ bi yooxhoʼ que gúcani ti bi nabé nadipaʼ ne za yaaseʼ, rayu ne biaba dxacha nisaguié. Clase bi riʼ nga ni runitilú guiráʼ cosa. Apóstol Mateo laaca guníʼ de bi yooxhoʼ riʼ (Mateo 8:24).

14 Bixuiʼlú ni bizaaca dxi riʼ. Cadxelasaa ca ola que barcuhuiiniʼ ra zécabe ne cayuu nisa ndaaniʼ ni. Nabé nadipaʼ caxidxi bi yooxhoʼ que ne barcuhuiiniʼ que caniibi cheríʼ chericaʼ. Neca zaqué, nisiaasiʼ Jesús purtiʼ maʼ bidxaga. Peru ca discípulo que nabé cadxíbicaʼ. Ngue runi bicuaanicaʼ laabe ne gúdxicaʼ laabe maʼ chigáticaʼ (Mateo 8:25). Xi biʼniʼ Jesús yaʼ. Biásabe ne gúdxibe bi que ne nisadóʼ que: «¡Guta dxi!» (Marcos 4:39). ¡Ne guleza bi que! Rihuínnica rucueeza Jesús cani rizaaca lu Guidxilayú.

15. Xiñee nánnanu rucueeza Jiobá cani rizaaca lu Guidxilayú riʼ.

15 Jiobá nga bidii poder Cristu para gucueeza cani rizaaca lu Guidxilayú. Nga runi nanna dxíchinu laaca zanda gucueeza Jiobá cani. Casi ante guiaba nisaguié naroʼbaʼ que, guniʼbe: «De raríʼ xcadxe si gubidxa zusabaʼ nisaguié lu guidxilayú riʼ cuarenta dxi ne cuarenta gueelaʼ» (Génesis 7:4). Éxodo 14:21 na biquiiñeʼ Dios «ti bi nadipaʼ ni zeeda neza ra rindani gubidxa» para gunda bíʼnibe nisadóʼ chupa ndaa. Ne Jonás 1:4 na sti biaje bisábabe «ti bi reciu lu nisadóʼ». Ratadxí ladxidoʼno gánnanu zucueeza Dios cani rizaaca lu Guidxilayú riʼ ndaaniʼ Paraísu.

16. Xiñee ratadxí ladxidoʼno gánnanu rucueeza Jiobá ne Jesús cani rizaaca lu Guidxilayú.

16 Xiñee ratadxí ladxidoʼno gánnanu rucueeza Jiobá ne Jesús cani rizaaca lu Guidxilayú riʼ yaʼ. Purtiʼ nga rusihuinni ora guni mandar Cristu lu 1,000 iza maʼ qué zuniná huracán, tsunami, volcán ne xu laanu. Qué zadxíbinu gaca desgracia casi xu, purtiʼ zapa Jiobá guiráʼ binni (Apocalipsis 21:3, 4). Nanna dxíchinu zaquiiñeʼ Cristu poder stiʼ Dios para gucueeza guiráʼ ni rizaaca lu Guidxilayú.

 CHINÁNDANU EJEMPLU STIʼ DIOS NE STIʼ CRISTU

17. Ximodo zanda chinándanu ejemplu stiʼ Dios ne stiʼ Cristu.

17 Ximodo zanda chinándanu ejemplu stiʼ Dios ne stiʼ Cristu yaʼ. Neca qué zanda diʼ gúninu milagru, peru zanda gúninu ni na ca diidxaʼ riʼ: «Cadi gusaana de gacaneluʼ tuuxa ni caquiiñeʼ ni, pa nuu lu naluʼ gúniluʼ ni» (Proverbios 3:27). Ora racaná tobi de ca xpinni Cristu, zanda gudiʼnu ni caquiiñecaʼ ne quixhedxinu ladxidoʼcaʼ (Proverbios 17:17). Ora guizaaca xiixa desgracia nga jma caquiiñeʼ gacanenu laacabe. Guzéʼtenu ti ejemplu. Nabé bininá ti huracán ra lidxi ti hermana viuda. Ora yegacané ca hermanu laabe guniʼbe nabé rudiibe xquíxepeʼ Dios purtiʼ nácabe testigu stiʼ Jiobá, cadi pur si bidii ca hermanu que ni caquiiñebe, sínuque purtiʼ gucanecaʼ laabe chuʼbe jma gaxha de Jiobá. Zacagá bizaaca ti hermana ni caʼruʼ guichaganáʼ. Qué nidxélabe xi ñúnibe ora bininá ti bi yooxhoʼ lídxibe. Peru ca hermanu biiyacaʼ xi cazaacabe ne gucanecaʼ laabe gaca chaahuiʼ ni. Laabe guniʼbe qué nidxélabe ximodo ñábibe ca hermanu que xi cayuni sentirbe. Ne guniʼbe: «Xquíxepeʼ lii, Jiobá». Guiranu rudiʼnu xquíxepeʼ pur nápanu bíʼchinu ne bizáʼnanu ni riuu xizaa pur laanu. Peru jma rudiʼnu xquíxepeʼ Jiobá ne Jesucristu pur rápacaʼ laanu.

18. Ora riníʼ íqueluʼ xiñee biʼniʼ Jesús milagru, xii nga ni jma ridxagayaaluʼ.

18 Dxi guyuu Jesús lu Guidxilayú, bisihuinni laa «nga enda nandxóʼ [...] sti Dios». Peru qué ñuu dxi ñúnibe ca milagru que para gusisaca binni laabe o para ñúnibe ni racaláʼdxibe. Bíʼnibe ca milagru riʼ purtiʼ dxandíʼ gunnaxhiibe binni ne gucaláʼdxibe gacanebe laacaʼ. Lu sti tema ca zaninu jma de laani.