Biiyaʼ guiraʼ ni nuu lu sitiu riʼ

guyé lu índice

«Caquiiñeʼ guni huantartu»

«Caquiiñeʼ guni huantartu»

GUCA si Andrea testigu stiʼ Jiobá, bizulú bicaalú xheelabe laabe. * Laabe nabe: «Qué rudiibe lugar naa chaaʼ reunión ne gúdxibe naa cadi guiniéʼ lá Dios. Nabé ridxiichibe gunadiágasibe lá Jiobá».

Laaca nabé nagana guca para Andrea gusiidiʼ ca xiiñiʼ de Dios, laabe nabe: «Qué lica rinabe gúnidu ni na Jiobá ra lidxeʼ. Nagaʼchiʼ bisiideʼ ca xiiñeʼ de Dios ne qué randa riniáʼ laacaʼ reunión».

Ni gudiʼdiʼ Andrea riʼ rusihuinni zanda guluíʼ tuuxa napa fe neca gucaalú binnilidxi laa. Peru laaca zacaca zanda guininu ora napa tuuxa ti guendahuará malu, ora gatiʼ xheelaʼ o ti xiiñiʼ ne ora ti binnilidxi tuuxa gusaana Jiobá. Xi zanda guni ti xpinni Cristu para cadi gucheené Dios ora gapa ca guendanagana riʼ yaʼ.

Apóstol Pablu bicabi: «Caquiiñeʼ guni huantartu» (Hebreos 10:36, TNM). Yanna, xi zanda gacané laanu para guni huantarnu yaʼ.

RUDII ORACIÓN STIPA LAANU

Tobi de ca cosa ni jma zanda gacané laanu para guni huantarnu ca guendanagana ni guidxaagalunu nga oración. Ne laani nga ni gucané Ana. Ti lunes huadxí, gúdxicabe laabe málasi guti xheelabe. Maʼ treinta iza de bichaganácabe. Ana guníʼ: «Maʼ qué ñuuruʼ dxi nibiguétabe de dxiiñaʼ. Deruʼ 52 iza nápabe».

Xi gucané laabe para gunda biʼniʼ huantarbe yaʼ. Gupa xidé bíʼnibe dxiiñaʼ sti biaje, ngue gucané laabe, purtiʼ naquiiñeʼ guiníʼ íquebe stale para ganda gúnibe xhiiñabe. Dxandíʼ, qué nusaana yuubaʼ que laabe. Ana rietenalaʼdxiʼ: «Rabeʼ Jiobá guiráʼ ni cazaacaʼ ne rinabaʼ laabe gudiibe naa stipa». Ñee bicabi Jiobá ca oración stibe la? Nanna dxíchibe bicabi Jiobá laabe. Ana guníʼ: «Pa qué niguixhedxí Dios ladxiduáʼ la? ñe xpiaaneʼ. Nabé riecheʼ nga gannaʼ zusibani Jiobá xheelaʼ ndaaniʼ Paraísu» (Filipenses 4:6, 7).

Qué rusaana Jiobá de gucaadiaga laanu, laa maca guníʼ zudii laanu guiráʼ ni caquiiñenu para cadi guchéʼnenu laa (Salmo 65:2). Nabé riguixhedxí ca diidxaʼ riʼ ladxidóʼ no, cadi dxandíʼ la? Cadi dxandíʼ gánnasinu ni rápanu stipa para guni huantarnu la?

RIGUU CA REUNIÓN CA GANA LAANU

Riquiiñeʼ Jiobá ca binni ridagulisaa para cuʼ gana laanu. Guidúʼyanu ni bizaaca dxiqué. Lu primé siglu que, nabé guzanándacabe ca xpinni Cristu de Tesalónica. Pur nga, Pablu gudxi laacabe ca diidxaʼ riʼ: «Lausieche saa cásica cayuni tu, ne cada tobi uyubi uzuhuaa chaahui stobi» (1 Tesalonicenses 2:14; 5:11). Gunda bidxiilú ca xpinni Cristu riʼ guendanagana que purtiʼ guyuucaʼ tobi si ne gunnaxhiisaacaʼ. Nabé galán ejemplu bisaanacabe para laanu, purtiʼ ra biʼniʼ huantárcabe que bisiidicabe laanu ti cosa nabé risaca.

Naquiiñeʼ gaca xhamígunu ca xpinni Cristu. Zacá qué zaca nagana para laanu cúʼsaanu gana laanu, jmaruʼ si ora guidxaagalunu xiixa guendanagana (Romanos 14:19). Dede Pablu gudiʼdiʼ lu stale guendanagana, peru gucané Jiobá laabe guni huantarbe. Guyuu biaje biquiiñeʼ Jiobá ca xpinni Cristu para gucanecaʼ laabe. Ngue runi ora biseendaʼ Pablu diuxi para caadxi hermanu ni nuu ndaaniʼ congregación de Colosas guníʼ ca diidxaʼ riʼ: «Ne nabé huasieche cabe naa» (Colosenses 4:10, 11). Cumu nabé gunnaxhii ca xpinni Cristu laabe la? gucanecaʼ laabe órapeʼ jma caquiiñebe ni. Zándaca laaca maʼ huayacané ca xhamígunu laanu cásica gucanécabe Pablu.

RACANÉ CA BINNIGOLA LAANU

Laaca riquiiñeʼ Jiobá ca binnigola ni nuu ra ridagulisaanu para gacanecaʼ laanu. Ca hombre  ni nanna stale riʼ «zeeda gácacaʼ casi ti lugar ra zanda chuʼ binni ora cundubi bi ne ra gucaachilú binni ora cayaba dxacha nisaguié, casi nisa ziguxooñeʼ ndaaniʼ ti guidxi ra gastiʼ nisa, casi bandáʼ stiʼ ti guié ngola lu ti desiertu» (Isaías 32:2). ¡Nabé riguixhedxí ca diidxaʼ riʼ ladxidoʼno! Ñee riquiiñeluʼ ni cusigaʼdeʼ Jiobá lii riʼ la? Modo racané ca binnigola ne modo riguixhedxicaʼ ladxidóʼ binni zudii ni stipa lii para cadi guireeluʼ gana.

Dxandíʼ, ca binnigola ca qué rúnicaʼ milagru. Binni gulené donda laacabe, nápacabe guendahuará ne «laca binni guidxilayú» laacabe casi laanu (Hechos 14:15). Peru neca zacá, nabé racanécabe laanu ora runi orarnécabe laanu (Santiago 5:14, 15). Ti hermanu de Italia ni maʼ napa iza de cayuni huantar ti guendahuará láʼ distrofia muscular, guníʼ sicaríʼ: «Cumu ruuyaʼ nabé nadxii ca binnigola naa ne qué rusaanacaʼ de chigánnacaʼ naa la? nabé racané cani naa guneʼ huantar». Pa nápaluʼ xiixa guendanagana, racalaʼdxiʼ Jiobá guinábaluʼ laa gacané lii.

RACANÉ XHIIÑAʼ DIOS LAANU PARA GUNI HUANTARNU

Peru nuuruʼ jma cosa ni zacané laanu guni huantarnu. Tobi de laani nga cadi gusaana de gúninu xhiiñaʼ Dios. Guidúʼyanu xi biʼniʼ ti hermanu de 39 iza láʼ Juan, biiyaʼ doctor nápabe ti tipu cáncer ni qué runibiaʼpeʼ binni. Laabe guniʼbe: «Nabé triste guyuaaʼ purtiʼ nahuiineruáʼ para gapaʼ guendahuará que». Ne nápabe ti xiiñibe de chonna iza. Laabe nabe: «Maʼ cadi xiiñisidu chiguni tender xheelaʼ, sínuque laaca zuni tenderbe naa ne ca cita ni napaʼ né doctor». Ca quimioterapia ni ricabe nabé rusirá ni stipa stibe ne rusiúʼchani ladxidoʼbe. Ne sti cosa, bixhózebe mayaca gatiʼ ne caquiiñeʼ tu gapa laa.

Ximodo bidxiilú Juan ne binnilidxi guendanagana riʼ yaʼ. Laabe guniʼbe: «Neca rusidxaga guendahuará que naa, qué nusaana de ñúnidu guiráʼ ni canabaʼ Jiobá laadu. Nuu biaje nagana raca ni para laadu, peru qué riaadxadu ca guendaridagulisaa ne rigucheechedu diidxaʼ, ne laaca rápadu adoración en familia». Gunna Juan para ganda gudxiilú binni ca guendanagana ca naquiiñeʼ chuʼ jma gaxha de Dios. Xi zanda guni cani cadiʼdiʼ lu xiixa guendanagana casi cani maʼ bizéʼtenu ca yaʼ. Juan guníʼ: «Despué de gánnaluʼ xi guendanagana nápaluʼ, zuuyaluʼ ximodo zudii Jiobá stipa lii ne zannaxhii lii, ne nga zacané lii para gatadxí xquendabiaaniluʼ. Jiobá zanda gudii laanu stipa ni caquiiñenu. Naa nga caniéʼ ni purtiʼ naa maʼ gudideʼ ni».

Dxandíʼ, ra gacané Jiobá laanu zanda guni huantarnu intiica guendanagana ni nápanu o ni gápanu. Biʼniʼ orar Jiobá, gupa xhamíguluʼ ra ridagulisaaluʼ, gunabaʼ ca binnigola gacané lii ne cadi gusaana de gúniluʼ xhiiñaʼ Jiobá. Pablu guníʼ: «Caquiiñeʼ guni huantartu», ne Jiobá zacané laanu para guni huantarnu.

^ párrafo 2 Bidxaa lá chupa chonna de laacabe.