Biiyaʼ guiraʼ ni nuu lu sitiu riʼ

guyé lu índice

 MODO BIBANEʼ

Ni jma nadxieeʼ huadii stipa naa guidxagaluáʼ guiráʼ ni maʼ huadideʼ

Ni jma nadxieeʼ huadii stipa naa guidxagaluáʼ guiráʼ ni maʼ huadideʼ

BIAʼ galaa iza stiʼ 1970, nexheʼ ndaaniʼ ti hospital. Ca dxi que napaʼ 20 iza, nacaʼ soldadu ne nabé huaraʼyaʼ. Nexheʼ ndaaniʼ Hospital General Valley Forge stiʼ Phoenixville, Pensilvania (Estados Unidos) purtiʼ gucuá ti guendahuará nabé malu naa. Cada media hora runi checar ti enfermeru presión stinneʼ ne biiyabe zeʼ hora ziyete ni. Jma huaniisi hombrehuiiniʼ que xcaadxi para naa ne biiyaʼ nabé cadxíbibe. Óraque gunabadiidxaʼ laabe: «Qué huayuu dxi gúʼyaluʼ ra gatiʼ ti binni, njaʼ». Dede biete xcolorbe ne gúdxibe naa: «Coʼ, qué huayuu dxi».

Guizáʼ naxoo ra nuaaʼ que. Xiñee nexheʼ ra hospital que dede mayaca gateʼ yaʼ. Lagudii lugar gabeʼ laatu.

YENDAYAʼ RA CAYACA GUERRA

Guca huaraʼyaʼ dxi guyaaʼ lu guerra cayaca Vietnam, purtiʼ racaniáʼ ndaaniʼ ti quirófano. Guizáʼ riuuladxeʼ gacaniáʼ cani huará ne cani gucaná. Rapaʼ gana gacaʼ ti doctor ni runi operar. Yendayaʼ Vietnam lu beeu julio iza 1969. Cumu nacubi yendayaʼ raqué la? bidiicabe naa ti semana para guiaaʼ horariu stiʼ guidxi que ne calor raca sentir raqué.

Cadi xadxí de cayuneʼ dxiiñaʼ ndaaniʼ hospital Mekong Delta ni nuu Dong Tam ra runi operárcabe binni, bizulú bieeteʼ stale helicóptero ni né stale binni gucaná lu guerra ne laaca neni jma gueʼtuʼ. Gucaʼ ti binni ni gunnaxhii xquidxi ne riuulaʼdxiʼ guni dxiiñaʼ. Riguʼdu listu ca soldadu ni bibaagu para gaca operarcaʼ ne riguʼdu laaca ndaaniʼ caadxi contenedor ni napa aire acondicionadu ni biquiiñedu casi quirófano. Cumu nabéʼ lugar que la? qué rándapeʼ ricá bieque doctor ni runi operar, ni rucaa anestesia ne chupa enfermero nuu ndaaniʼ lugar que, peru cayúnicabe stipa para gulácabe guiráʼ ni ganda. Biiyaʼ dxiʼbaʼ caadxi bolsa yaaseʼ ndaaniʼ ca helicóptero que ne guirutiʼ naʼ guindeteʼ cani. Gúdxicabe naa ndaaniʼ cani nuu ni biaana de ca soldadu ni biruuxe lu guerra. Ngue nga biiyaʼ ora yendayaʼ ra cayaca guerra que.

BIZULUÁʼ CUYUBEʼ DIOS

Nahuiineruáʼ dxi biziideʼ ni dxandíʼ

Chupa chonna iza ante chaaʼ lu guerra, maca byueniáʼ ca testigu stiʼ Jiobá diidxaʼ. Bisiidicabe  jñaaʼ de lu Biblia, peru qué ñuunísabe. Nabé riuuladxeʼ gucaadiaʼgaʼ guiráʼ ni rusiidicabe laabe. Ti dxi, gudideniáʼ padrastru stinneʼ ra zuba ti Yoo stiʼ Reinu ne gunabadiidxaʼ laabe: «Xi lugar riʼ pue». Óraque bicábibe naa: «¡Qué chuʼ dxi guidxíñaluʼ ca binni ca!». Cumu nadxieeʼ laabe ne napaʼ confianza laabe la? bicaadiaʼgaʼ ni nabe, ngue runi maʼ qué nuyubeʼ ca Testigu.

Bibiguétasiaʼ de Vietnam bineʼ sentir caquiiñeʼ guyubeʼ Dios. Nabé biʼniʼ huará guerra que naa. Ruluíʼ guirutiʼ ganna xipeʼ cayaca ndaaniʼ guidxi que. Caníʼ binni cayuuti ca soldadu stiʼ Estados Unidos xcuidihuiiniʼ ne laaca caree binni calle para guiníʼ ni cayúnicabe.

Para ganda guiziideʼ de Dios guyaaʼ ndaaniʼ stale yuʼduʼ. Maca xadxí nadxieeʼ Dios, peru qué ñuuladxeʼ ni biiyaʼ raca ndaaniʼ ca yuʼduʼ que. Despué guyaaʼ ndaaniʼ ti Yoo stiʼ Reinu ni nuu Delray Beach (Florida). Rietenalaʼdxeʼ guca nga ti domingu stiʼ beeu febrero iza 1971.

Ora yendayaʼ biiyaʼ mayaca guiluxe libana ni cucaadiaga ca binni que, ngue runi biaanaʼ ra chiguiuundaʼ Torre stiʼ ni rapa. Qué rietenalaʼdxeʼ xi guníʼcabe, peru bidxagayaaʼ ora biiyaʼ cuyubi ca baʼduhuiiniʼ que guiráʼ textu lu Biblia sticaʼ. Ni binesiáʼ nga cucaadiagaʼ ne cayuuyaʼ ni cayúnicabe. Mápeca chiguireeʼ raqué bidxiña ti hermanu ni napa biaʼ 80 iza ra nuaaʼ. Gúdxibe naa labe Jim Gardner. Naazebe libru La verdad que lleva a vida eterna ne gúdxibe naa: «Ñuulaʼdxuʼ nicoouʼ libru riʼ la?». Oraqueca gunidu guidúʼyadu jueves siadóʼ para guidúʼndadu ni.

Ca dxi que runeʼ dxiiñaʼ ra urgencia stiʼ ti clínica ni nuu Boca Ratón (Florida), ne domingu guyaaʼ guendaridagulisaa que chiguneʼ dxiiñaʼ huaxhinni. Riuaaʼ dxiiñaʼ a las once ne rireeʼ a las siete, siadóʼ. Cumu huaxiéʼ dxiiñaʼ nuu dxi que la? bizuluáʼ cayuundaʼ libru ni bidiicabe naa. Bidxiña ti enfermera ra nuaaʼ ne guxha naa libru que, biiyabe ni ne nabe: «Cadi gaʼbuʼ naa maʼ cá íqueluʼ gácaluʼ de religión riʼ». Guxhaʼ libru que laabe ne gudxeʼ laabe: «Deruʼ galaa libru riʼ maʼ biindaʼ, peru mápeca cá iqueʼ gacaʼ de religión riʼ». Para biree gunaa que zeʼ ne biluxe biindaʼ libru que gueelaʼ queca.

Jim Gardner, ti xpinni Cristu ni bibí, nga maestru ni bisiidiʼ naa ne laabe binibiaʼbe hermanu Russell

Primé ca ni gunabadiidxaʼ hermanu Gardner jueves yendá que nga: «Xi chiguidúʼndanu pue». Para rábibe naa: «Libru bidieeʼ lii que xa». Óraque gudxeʼ laabe: «Maʼ biindaʼ guidubi ni». Para nabe: «Neca primé capítulo si stini guidúʼndanu». Guizáʼ bidxagayaaʼ purtiʼ bisiénebe naa stale cosa ni qué ñuuyaʼ ora biindaʼ ni stubeʼ. Gúdxibe naa guyubeʼ stale textu lu Biblia canacaaʼ, ca dxi que napaʼ ti Biblia Versión del Rey Jacobo. Raqué huaxa maʼ cayunebiaʼyaʼ tuu nga Jiobá, Dios ni dxandíʼ. Siadóʼ que si chonna capítulo stiʼ libru que biindané Jim naa (zacá rabi ca xhamigu hermanu Gardner laa). Ne guiráʼ jueves ridúʼndadu chonna  capítulo. Nabé riuuladxeʼ ora maʼ cayuundanebe naa. ¡Guizáʼ riecheʼ purtiʼ bisiidiʼ ti ungidu ni binibiáʼ hermanu Russell naa de Biblia!

Chupa chonna semana despué mápeca cucheecheʼ diidxaʼ. Nabé gucané Jim naa nacubi cucheecheʼ diidxaʼ purtiʼ riuaaʼ nervioso, jmaruʼ si ora maʼ ziuudu de yoo pur yoo (Hechos 20:20). Bireeniaruaʼ laabe ne guizáʼ guyuuladxeʼ gucheecheʼ diidxaʼ. Dede nagasi riníʼ iqueʼ laani nga dxiiñaʼ jma risaca. ¡Gástiruʼ sti cosa jma galán que guninenu Dios dxiiñaʼ! (1 Corintios 3:9.)

RA BIZULUÁʼ GUNNAXHIEEʼ JIOBÁ

Yanna chigüeniáʼ laatu xiixa ni nabé risaca para naa: dxi bizuluáʼ gunnaxhieeʼ Jiobá (Apocalipsis 2:4). Cumu nadxieeʼ Jiobá la? nga huayacané para cadi guninapeʼ guiráʼ ni gudideʼ lu guerra que naa ne xcaadxi cosa huadxagaluáʼ (Isaías 65:17).

Cumu nadxieeʼ Jiobá la? nga huayacané para cadi guninapeʼ guiráʼ ni gudideʼlu guerra que naa ne xcaadxi cosa huadxagaluáʼ

Guyuaanisaʼ lu beeu julio iza 1971, lu Asamblea de Distrito ni biree lá «Nombre Divino» ndaaniʼ Estadiu stiʼ ca Yankees

Qué riaandaʼ naa ni bizaacaʼ ti dxi stiʼ iza 1971. Cadi xadxí de guladxi padrastru stinneʼ naa de ndaaniʼ ti yoo ra bidii naa cuezaʼ. Qué racaláʼdxibe cueza nin ti testigu stiʼ Jiobá ndaaniʼ yoo stibe. Ca dxi que huaxiéʼ bueltu napaʼ. Ra runeʼ dxiiñaʼ riguíxecabe naa cada chupa semana ne cadi xadxipeʼ de biquiiñeʼ bueltu biaxaʼ para sieʼ lari ni chigucheecheniáʼ diidxaʼ. Racaladxeʼ gusisaca binni Jiobá pur modo gacuaʼ lari. Neca naguuaaʼ chaahueʼ ti ndaa bueltu, peru nuu ni ndaaniʼ ti bancu nuu Michigan, ti guidxi nuu ladu guiaʼ de Estados Unidos, ra biniiseʼ. Cumu maʼ qué gapaʼ ra chaaʼ la? guseʼ ndaaniʼ carru stinneʼ chupa chonna gubidxa. Rugayaʼ guicha ruaaʼ ne riguiibeʼ ladeʼ ndaaniʼ ca bañu stiʼ ca gasolinera.

Ca dxi que yendayaʼ ra Yoo stiʼ Reinu chupa chonna hora ante guireʼdu chigucheechedu  diidxaʼ, bireesiaʼ de dxiiñaʼ. Bizuaaʼ carru stinneʼ atrá de Yoo stiʼ Reinu ra guirutiʼ cayuuyaʼ naa. Raqué bizulú cayetenalaʼdxeʼ guiráʼ ni bizaacaʼ Vietnam: xhoʼ stiʼ ca binni ni guyaʼquiʼ, ne rini ni daʼ ladu zizayaʼ. Bixuiʼluaʼ ca soldadu ni cucaa ridxi naa ne cayabi naa: «Zalaʼyaʼ la? ¡Gucané naa!». Naa nannaʼ záticabe, peru ruyubeʼ modo quixhedxiéʼ ladxidóʼcabe, ne runeʼ stipa pur cadi gudiicabe cuenta záticabe. Nabé bisiguuna ngue naa.

Huayuneʼ stipa para cadi gusaanaʼ de guneʼ ni na Jiobá, primé binni ni gunnaxhieeʼ, neca huadxagaluáʼ guendanagana

Bizuluáʼ cayuneʼ orar Jiobá dede nanda nisa luaʼ (Salmo 56:8). Ne guníʼ iqueʼ dxi guiasa ca binni ni maʼ guti. Óraque bidieeʼ cuenta xi chiguni Jiobá: ra gusibánibe ca gueʼtuʼ maʼ qué zietenaladxeʼ ca cosa ni biiyaʼ lu guerra que. Zabeebe yuubaʼ ni runi sentir guiráʼ binni ni huadxaagalú stale guendanagana. Dios zusibani guiráʼ hombrehuiiniʼ ni gutiʼ lu guerra que ne zudiibe lugar laacaʼ gunibiaʼcaʼ laabe (Hechos 24:15). Bineʼ sentir pabiáʼ nadxii Jiobá naa. Yendá ni bineʼ sentir que ndaaniʼ ladxiduáʼ. Qué ziuu dxi guiaandaʼ naa dxi que. Nga runi, dede yanna runeʼ stipa para cadi guiaandaʼ naa pabiáʼ nadxieeʼ Jiobá, jmaruʼ si ora maʼ cadideʼ lu xiixa guendanagana.

JIOBÁ HUAYACA NACHAʼHUIʼ NÉ NAA

Ora maʼ cayaca guerra, runi binni stale cosa malu, ne naa laaca bineʼ cani. Peru ni huayacané naa para cadi guniná cani bineʼ naa nga chupa textu ni nabé riuuladxeʼ. Primé textu ca nga Apocalipsis 12:10, 11, ra na maʼ biʼniʼ ganárcabe Binidxabaʼ, peru cadi pur ruísinu Stiidxaʼ Dios, sínuque pur rini stiʼ Dendxuhuiiniʼ. Guiropa textu ca nga Gálatas 2:20. Textu riʼ rusiidiʼ naa maʼ guti Jesucristu «pur naa». Pur rini stiʼ Jesús ruuyaʼ Jiobá naa ne maʼ bitiidiláʼdxibe guiráʼ ni bineʼ. Yanna ra maʼ bieneʼ ca nga racaneni naa gapaʼ conciencia stinneʼ nayá; nga rucaa naa guneʼ biaʼ gándatiʼ para gacaniáʼ binni gunibiáʼ Dios stinu ni riaʼ binni (Hebreos 9:14).

Ora riníʼ iqueʼ guiráʼ ni maʼ gudideʼ, rudieeʼ cuenta qué huasaana Jiobá de gapaʼ naa. Casi dxi gunna Jim ndaaniʼ carru stinneʼ raseʼ, oraqueca gúdxibe naa guinieniáʼ ti hermana ni ruquixe cuartu. Nannadxicheʼ biquiiñeʼ Jiobá Jim ne hermana que para gudii naa ti lugar galán ra ganda cuezaʼ. ¡Guizáʼ nachaʼhuiʼ Jiobá ne jneza modo rapa ca xpinni!

MAʼ BIZIIDEʼ MODO GUINIENIÁʼ BINNI

Lu beeu mayo iza 1971 gupa xidé guyaaʼ Michigan para chiguneʼ chaahueʼ caadxi cosa stinneʼ. Peru ante guireeʼ de ra nuu ca hermanu de Delray Beach, bichayaʼ cajuela stiʼ carru stinneʼ de libru ne revista. Biaʼ galaa neza mápeca gastiʼ nuu ndaaniʼ cajuela que. Ora guuyaʼ zanda guzuhuaadxiéʼ runeʼ ni para guiniéʼ né stale gana de Reinu. Bicheecheʼ diidxaʼ ndaaniʼ stale cárcel ne dede bidieeʼ tratadu ca hombre ni nu ra bañu stiʼ ca lugar ra riziilaʼdxiʼ cani zeʼ viaje. Nuu tiru riníʼ iqueʼ pa guca neca tobi de ca binni que Testigu (1 Corintios 3:6, 7).

Dxi nacubi caziideʼ ni na Biblia qué gánnadiaʼ ximodo naquiiñeʼ güeniáʼ binni diidxaʼ, jmaruʼ si ora guinieniáʼ binnilidxeʼ. Cumu nadxieeʼ Jiobá la? qué nidxibeʼ ora gunieniáʼ laacabe ni rusiidiʼ Biblia, peru nabé naduxhuʼ modo gunieniáʼ laacabe. Cumu guizáʼ nadxieeʼ guiropaʼ bicheʼ, John ne Ron, gucalaʼdxeʼ nucaaʼ laacabe niziidicabe ni na Biblia. Despué gupa xidé gunabaʼ laacabe gutiidiláʼdxicabe donda stinneʼ pur modo gunieniáʼ laacabe. Qué huasanaʼ de guinabaʼ lu oración guedandá dxi guiziidicabe ni dxandíʼ. Dede nagasi cusiidiʼ Jiobá naa ne maʼ biziideʼ naquiiñeʼ chuaaʼ cuidadu ora gucheecheʼ diidxaʼ ne ora gusiideʼ binni (Colosenses 4:6).

 XCAADXI BINNI NI NADXIEEʼ

Guiráʼ ora rietenalaʼdxeʼ pabiáʼ nadxieeʼ Jiobá, peru laaca qué rusiaandaʼ xcaadxi binni ni nadxieeʼ. Guiropa binni ni jma nadxieeʼ nga Susan, xheelaʼ. Maca racaladxeʼ guidxaagaʼ ti gunaa ni gacané naa guneʼ ni na Dios, ne biáʼsipeʼ Susan nga gunaa que. Nácabe ti gunaa nadxibalú ne riuuláʼdxibe gúnibe xhiiñaʼ Dios. Qué lica riaandaʼ naa ni biiyaʼ ti dxi yegannaʼ laabe, dxi nácadu novio. Biiyaʼ cayuundabe revista Torre stiʼ ni rapa ique lídxicabe, dxi nabézacabe Cranston (Rhode Island). Aque bidxagayaaʼ ora biiyaʼ cayuundabe ti tema ni qué riuundaʼ ndaaniʼ Yoo stiʼ Reinu ne cuyúbibe guiráʼ ca textu ni zeeda luni. Óraque guniéʼ: «¡Baʼdudxaapaʼ riʼ huaxa riuulaʼdxiʼ guni xhiiñaʼ Dios!». Bichaganadu lu beeu diciembre iza 1971 dede dxiqué hasta nagasi cayacanebe naa; guizáʼ rusiecheʼ nga naa. Ni riuuladxeʼ de laabe nga nadxiibe naa, peru jma nadxiibe Jiobá.

Naa, Susan ne ca xiiñidu Paul ne Jesse

Naa ne Susan gúpadu chupa xiiñidu, Jesse ne Paul. Qué huasaana Jiobá laacabe biaʼ dxi nabánicabe (1 Samuel 3:19). Cumu dxandipeʼ nadxiicabe Jiobá la? riníʼ binni jneza bisiniisidu laacabe. Dede nagasi rúnicabe ni na Jiobá purtiʼ qué huasaana de gannaxhiicabe laa. Maʼ zinécabe jma de gande iza cayúnicabe xhiiñaʼ Jiobá casi precursor ne laaca huayúnicabe dxiiñaʼ Betel. Laaca riecheʼ  purtiʼ napaʼ chupa xuaalidxeʼ ni nadxii Jiobá, Stephanie ne Racquel, laacaʼ zeeda gácacaʼ casi xiiñeʼ. Bichaganáʼ Jesse ne Paul gunaa ni nadxii Jiobá de guidubi ladxidóʼ (Efesios 6:6).

Ante chigucheechedu diidxaʼ dxi nacaʼ superintendente de circuito

Despué de guyuaanisaʼ bineʼ xhiiñaʼ Jiobá biaʼ dieciséis iza ndaaniʼ estadu stiʼ Rhode Island. Raqué bidxelaʼ binni ni guca xhamiguaʼ. Rietenalaʼdxeʼ pabiáʼ galán bineniáʼ ca binnigola ni nuu raqué dxiiñaʼ. Laaca rudieeʼ xquíxepeʼ ca superintendente de circuito purtiʼ nabé gucanecaʼ naa ca dxi yegánnacaʼ laadu. Nabé risaca para naa guneʼ dxiiñaʼ né ca xpinni Cristu ni qué huasaana de gannaxhiicaʼ Jiobá. Lu iza 1987 yendézadu estadu stiʼ Carolina del Norte para gacanedu guireeche diidxaʼ; raqué laaca nápadu xhamígudu. *

Nabé guyuuláʼdxidu dxi bicheechedu diidxaʼ juntu ca lugar ra jma caquiiñeʼ tu gucheeche diidxaʼ

Lu beeu agosto 2002, biʼniʼ invitárcabe naa ne Susan chuudu Betel ni nuu Patterson (Estados Unidos). Bineʼ dxiiñaʼ ra Departamentu de Serviciu, ne Susan biʼniʼ dxiiñaʼ ra riaʼriʼ lari. Guizáʼ riuuláʼdxibe gúnibe dxiiñaʼ raqué. Lu beeu agosto 2005, guyuaaʼ lade cani nuu lu Grupu ni Zaniruʼ. Guníʼ iqueʼ nabé naroʼbaʼ dxiiñaʼ que. Nabé guyuu xheelaʼ xizaa pur dxiiñaʼ bidiicabe naa ne zaqueca pur ca viaje ni zúnidu. Qué riuuláʼdxibe chebe lu avión, peru yanna maʼ qué riétedu luni. Susan na huayacané ca diidxaʼ ni rabi xheelaʼ xcaadxi hermanu ni nuu lu Grupu ni Zaniruʼ laa. Zándapeʼ guiniéʼ racanebe naa biaʼ gándatiʼ ne nga rucaa naa jmaruʼ gannaxhieeʼ laabe.

Ndaaniʼ oficina stinneʼ napaʼ stale foto risaca para naa. Rusietenalaʼdxiʼ cani naa guiráʼ cosa sicarú ni huazaaca lu xquendanabaneʼ. Maʼ gucuaaʼ stale ndaayaʼ pur qué huasaana de gannaxhieeʼ Jiobá.

Guizáʼ riuuladxeʼ chuaaniáʼ familia stinneʼ tobi si

^ párrafo 31 Pa racaláʼdxiluʼ gánnaluʼ ximodo huayuni hermanu Morris xhiiñaʼ Jiobá, biiyaʼ revista La Atalaya 15 stiʼ marzo iza 2006, yaza 26.