Biiyaʼ guiraʼ ni nuu lu sitiu riʼ

guyé lu índice

Gupa lii de ca trampa stiʼ «lion ni canaguu beedxeʼ»

Gupa lii de ca trampa stiʼ «lion ni canaguu beedxeʼ»

«Lagataná, purti canazá binidxabaʼ, enemigu stitu, canananda laatu casi ti lion ni canaguu beedxeʼ, canayubi tu uxuuxe.» (1 PEDRO 5:8)

1. Xi biʼniʼ ti ángel ni guca xhamigu Jiobá.

DXIQUÉ guyuu ti ángel ni nabé guca xhamigu Jiobá. Peru ti dxi guyuuláʼdxibe ñuni adorar binni laabe lugar de ñuni adorarcaʼ Dios. Cumu qué nusaana de niníʼ íquebe ni la? bicheebe (Santiago 1:14, 15). Bidxiidéchebe Jiobá ne beeda gácabe «bixhoze gola enda rusiguii» (Juan 8:44). Qué gánnanu tu biree labe ante gucheebe, peru yanna rábinu laabe Binidxabaʼ.

2, 3. Xiñee rábicabe xhenemigu Jiobá «binidxabaʼ», «Diablu» ne «beenda yooxho» yaʼ.

2 Binidxabaʼ nga ni jma xhenemigu Jiobá ne laaca xhenemígube binni. Racané Biblia laanu guidúʼyanu pabiáʼ malu laabe. Luni rieeteʼ laabe nga Binidxabaʼ, ni riníʼ «tobi ni rucaalú». Ribee lá Biblia laabe zacá purtiʼ nanaláʼdxibe gobiernu stiʼ Jiobá ne rucaalube ni. Qué racalaʼdxiʼ Binidxabaʼ guni mandar Jiobá.

3 Lu Apocalipsis 12:9, rieeteʼ Diablu nga rábicabe xhenemigu Jiobá. Xiñee yaʼ. Purtiʼ diidxaʼ ca riníʼ ni «tuuxa ni  riníʼ xiixa ni cadi dxandíʼ de stobi». Ne Binidxabaʼ na rusiguii Jiobá. Laaca rábicabe laabe «beenda yooxho» purtiʼ biquiiñebe ti beendaʼ para bisiguiibe Eva, ne purtiʼ zeeda gácabe casi ti maniʼ ngola guizáʼ naduxhuʼ ne malu. Laabe qué racaláʼdxibe guni Jiobá ni maʼ bidii stiidxaʼ. Ne laaca racaláʼdxibe gunduuxebe guiráʼ xpinni Dios.

4. Xi zadúʼyanu lu tema riʼ.

4 Nanna dxíchinu Binidxabaʼ nga enemigu stiʼ Jiobá ne stiʼ xquidxi. Racaláʼdxibe gusaana de gúninu ni na Jiobá. Nga runi Biblia caguixhená laanu né ca diidxaʼ riʼ: «Lagataná, purti canazá binidxabaʼ, enemigu stitu, canananda laatu casi ti lion ni canaguu beedxeʼ, canayubi tu uxuuxe» (1 Pedro 5:8). Lu tema riʼ zadúʼyanu chonna razón ni zacané laanu cadi guiábanu lu ca trampa stiʼ Binidxabaʼ.

NAPA BINIDXABAʼ PODER

5, 6. 1) Bizeeteʼ caadxi ejemplu ni rusihuinni nabé napa ca ángel ca poder. 2) Xiñee na Biblia zanda guuti Binidxabaʼ binni.

5 Nabé napa ca ángel ca poder (Salmo 103:20). Jma nuu xpiaanicabe ne jma nadípacabe que laanu. Dxandíʼ, ca ángel ni nachaʼhuiʼ riquiiñecaʼ poder sticaʼ para gúnicaʼ ni jneza. Lu Biblia rieeteʼ de ti ángel ni biiti 185,000 soldadu ti gueelaʼ si, purtiʼ cucaalucaʼ xquidxi Dios. Nagana ñuni ti ejércitu ndiʼ peru jma nagana ñuni ti binni si ni (2 Reyes 19:35). Sti dxi, gulee ti ángel ca apóstol stiʼ Jesús de ndaaniʼ lidxi guiibaʼ. Bixhélebe ca puertaʼ que, guleebe ca apóstol que ne biseegube ca puertaʼ que sti biaje sin ñanna cani cayapa raqué (Hechos 5:18-23).

6 Racá ridúʼyanu, riquiiñeʼ ca ángel nachaʼhuiʼ ca poder sticaʼ para gúnicaʼ ni jneza. Peru Binidxabaʼ riquiiñeʼ poder stiʼ para guni cosa malu. Ne laa nabé napa poder. Nga runi Biblia na laabe nga «ni runi mandar» guidxilayú riʼ (Juan 12:31; 2 Corintios 4:4). Ne laaca nani zanda guutibe binni (Hebreos 2:14). Ca diidxaʼ riʼ qué riníʼ diʼ ni laapebe ruutibe guiráʼ binni. Yanna, xiñee na Biblia zanda guutibe binni yaʼ. Primé, purtiʼ laabe rucaabe binni gaca nanaladxisaacaʼ ne gucaalucaʼ sti binni. Guiropa, purtiʼ laabe nápabe donda bichee Adán ne Eva ne pur nga guiranu rucheʼnu ne rátinu (Romanos 5:12). Nga runi guníʼ Jesús ruuti Binidxabaʼ binni (Juan 8:44). Rihuinni dxíchica, nabé napa Binidxabaʼ poder.

7. Bizeeteʼ chupa chonna ejemplu ni rusihuinni napa ca demonio ca poder.

7 Ora rucáʼnanu Binidxabaʼ, laaca rucáʼnanu ca xpínnibe. Lade ca xpinni Binidxabaʼ nuu ca demonio, ca ángel malu (Apocalipsis 12:3, 4). Lu Biblia zeeda stale ejemplu ni rusihuinni jma nadípacabe que binni guidxilayú ne zanda guninácabe laacaʼ (Mateo 8:28-32; Marcos 5:1-5). Qué chuʼ dxi guiaandaʼ laanu nabé nadipaʼ Binidxabaʼ ne ca demonio stiʼ (Mateo 9:34). Jiobá si nga zanda gacané laanu para gudxiilunu laacabe.

NABÉ MALU BINIDXABAʼ

8. 1) Xi racalaʼdxiʼ Binidxabaʼ. (Biiyaʼ foto ni zeeda ra ruzulú tema riʼ.) 2) Xi huayuuyaluʼ cayaca ni rusihuinni nabé malu guidxilayú riʼ cásica Binidxabaʼ yaʼ.

8 Nabé malu Binidxabaʼ. Casi bidúʼyanu lu párrafo 4 stiʼ tema riʼ, Biblia na  zeeda gácabe casi ti lión ni riguu beedxeʼ purtiʼ nabé candaana. Neca maʼ naazebe guidxilayú ra nabáninu riʼ, peru racaláʼdxirube gúnibe jma (1 Juan 5:19). Laaca racaláʼdxibe gunitilube ca xpinni Cristu ni bibí ni nabániruʼ lu Guidxilayú ne ca «xcaadxi dendxu» (Juan 10:16; Apocalipsis 12:17). Nga runi, dede lu primé siglu cucaabe binni sánanda cani dxandíʼ xpinni Cristu ne laaca cayúnibe ni ca dxi riʼ.

9, 10. 1) Ximodo bicaalú Binidxabaʼ guidxi Israel. 2) Xiñee nabé bicaalú Binidxabaʼ guidxi Israel. 3) Ximodo rábiluʼ runi sentir Binidxabaʼ ora guchee ti xpinni Jiobá.

9 Ti lión ni candaana qué riá diʼ maniʼ ni chitó nin ante nin despué de guutime laa. Zacaca nga Binidxabaʼ qué riá diʼ ca binni ni rucaalú. Guidúʼyanu ximodo bicaalube guidxi Israel. Laabe bicaabe ca israelita casi Zimrí chúʼnecaʼ ni cadi xheelacaʼ ne xcaadxi casi Guehazí guicaacaʼ ni cadi sticaʼ. Nabé bininá ndiʼ laacabe. Ne nanna dxíchinu guizáʼ biecheʼ Binidxabaʼ ora bicheecaʼ (Números 25:6-8, 14, 15; 2 Reyes 5:20-27).

Nabé riecheʼ Binidxabaʼ ora guchee ti xpinni Jiobá (Biiyaʼ párrafo 10)

10 Xiñee nabé biyubi Binidxabaʼ gucaalú guidxi Israel yaʼ. Purtiʼ nánnabe de guidxi riʼ nga chigale Mesías. Ne nánnabe zunitilú Mesías riʼ laabe ne zusihuinni Jiobá si nga napa derechu de guni mandar (Génesis 3:15). Cumu qué ñacalaʼdxiʼ Binidxabaʼ ñuu ca israelita que galán nezalú Jiobá la? bíʼnibe guiráʼ ni nuu lu nabe para gucaabe laacaʼ gucheecaʼ. Qué lica ñabe David dxi guyuuné ti gunaa ni cadi xheelaʼ. Ne laaca qué ñabe Moisés dxi maʼ qué ñanda ñuu lu Layú ni Bizabiruaa Dios gudii laacaʼ. Guizáʼ riecheʼ Binidxabaʼ ora guchee ti xpinni Dios. Riquiiñebe ca cosa riʼ para guni búrlabe Jiobá (Proverbios 27:11).

11. Xiñee gucalaʼdxiʼ Binidxabaʼ nuchee Sara.

11 Peru jma guca nanalaʼdxiʼ Binidxabaʼ familia ra chigale Mesías.  Guzéʼtenu ti ejemplu, guietenaláʼdxinu ni bizaaca ora gudxi Jiobá Abrahán zúnibe laa «ti guidxi roʼ» (Génesis 12:1-3). Dxi guyuu Abrahán ne Sara Egipto, rey stiʼ guidxi que yené Sara para guichaganáʼ laabe. Peru Jiobá bilá Sara. Biblia na: «Ne laaca biiyaʼ ca príncipe stiʼ Faraón laabe, ne gúdxicaʼ Faraón pabiáʼ sicarú gunaa riʼ, ngue runi yenécabe gunaa riʼ ra lidxi Faraón. Ngue runi bininá Jiobá Faraón ne binnilidxi né stale plaga pur Sarai, xheelaʼ Abrán» (biindaʼ Génesis 12:15, 17). Zacagá gucalaʼdxiʼ sti rey de guidxi Guerar ñuni ante gale Isaac (Génesis 20:1-7). Ñee Binidxabaʼ ngue bicaa ca rey riʼ chuuláʼdxicaʼ Sara la? Qué ruzeeteʼ diʼ Biblia ni. Peru guietenaláʼdxinu bisaanabe guiráʼ luju ni gúpabe ndaaniʼ guidxi Ur para guibánibe ndaaniʼ ti yoo de lari. Zándaca gucalaʼdxiʼ Binidxabaʼ niquiiñeʼ guiráʼ luju stiʼ rey que para niguite laabe ne zaqué nucheenebe xheelabe ne Jiobá. Nabé ñuulaʼdxiʼ Binidxabaʼ nucheenebe Jiobá ti zaqué maʼ qué ñale Mesías que de laabe. Qué lica ñabe gunaa riʼ pa nibiá xquendaxheelaʼ, modo ñuuyaʼ binni laa ne nusaana de ñaca xhamigu Jiobá. ¡Aque malu nga Binidxabaʼ xa!

12, 13. 1) Xi biʼniʼ Binidxabaʼ ora gule Jesús. 2) Ximodo rábiluʼ ruuyaʼ Binidxabaʼ ca hombrehuiiniʼ ne ca dxaapahuiiniʼ ni cayuni xhiiñaʼ Jiobá ca dxi riʼ yaʼ.

12 Gayuaa iza despué gule Jesús. Cadi purtiʼ sicarú baʼduhuiiniʼ riʼ guiníʼ íquenu biá Binidxabaʼ laa. Laabe nánnabe za baʼduhuiiniʼ riʼ de familia stiʼ Abrahán ne despué zaca Mesías. Ne zunitilú guiráʼ ni maʼ bíʼnibe (1 Juan 3:8). Ñee guníʼ ique Binidxabaʼ malu nga guuti ti baʼduhuiiniʼ la? Coʼ. Qué rulábibe pa cayúnibe ni jneza o ni cadi jneza. Nagueendaca biyúbibe modo guutibe Jesús. Xi bíʼnibe yaʼ.

13 Ora gunna rey Herodes maʼ gule «rey sti ca judíu», guizáʼ bidxiichi ne biyubi guuti laabe (Mateo 2:1-3, 13). Ne pur nga, biʼniʼ mandarbe gatiʼ guiráʼ baʼduhuiiniʼ de chupa iza o menu de guidxi Belén ne ca guidxihuiiniʼ ni nuu gaxha de laani (biindaʼ Mateo 2:13-18). Bilá Jesús dxi biiticabe guiráʼ baʼduhuiiniʼ que. Peru xi rusiidiʼ ndiʼ laanu de Binidxabaʼ yaʼ. Qué lica risaca xquendanabani binni para laabe, ne nin xquendanabani ca baʼduhuiiniʼ ca. Rihuinni dxichi zeeda gaca Binidxabaʼ casi ti lión ni canaguu beedxeʼ. Qué chuʼ dxi guiaandaʼ laanu nabé malu laabe.

RACALAʼDXIʼ BINIDXABAʼ GUSIGUII LAANU

14, 15. Ximodo rusiguii Binidxabaʼ binni.

14 Jiobá naca ti Dios ni nabé nadxii binni (1 Juan 4:8). Ti modo si napa Binidxabaʼ para guxheleʼ binni de Dios, ne laani nga quítebe laacaʼ. Ximodo yaʼ. Rucaabe binni guiníʼ ique cadi «[ca]quiiñeʼ chuʼ gaxha de Dios». O gucaabe laacaʼ guiníʼ íquecaʼ cadi caquiiñeʼ gaca xhamígucaʼ Dios (Mateo 5:3TNM). Maʼ bisiguii Binidxabaʼ stale binni ti cadi guiziidicaʼ ni dxandíʼ de Dios (2 Corintios 4:4).

15 Nanna Binidxabaʼ racalaʼdxiʼ Jiobá guni adorarnu laasi (Éxodo 20:5). Nga runi rusiguiibe binni ne jma nga  riquiiñebe ca religión ni rusiidiʼ ni cadi dxandíʼ para gúnibe ni. Nabé riéchebe ora rucaabe binni guni adorar ca bixhozegola, cani bizáʼ Dios, ca maniʼ ne xcaadxi cosa, lugar de ñuni adorarcaʼ Jiobá. Ca binni ni runi guiráʼ ndiʼ, runi crecaʼ riuulaʼdxiʼ Dios cani rúnicaʼ, peru qué iquiiñeʼ guiráʼ ni rúnicabe ca. Zacagá bizaaca ca israelita ca dxi bibani profeta Isaías. Gucalaʼdxiʼ Jiobá ñacané laacabe ora guníʼ zeeda gaca religión ni rusiidiʼ ni cadi dxandíʼ casi guendaró ni maʼ biuʼdxuʼ. Gúdxibe laacaʼ cadi naquiiñeʼ quíxecaʼ pur xiixa ni qué zuchá ndaanicaʼ. Ne laaca guniʼbe: «Lagucaadiaga chaahuiʼ naa, ne lagó ni galán» (Isaías 55:2).

16, 17. 1) Xiñee gudxi Jesús Pedru: «Biree de ra nuaa, binidxabaʼ». 2) Ximodo racalaʼdxiʼ Binidxabaʼ gusiguii laanu yaʼ.

16 Laaca zanda gusiguii Binidxabaʼ ca xpinni Dios ni ruzuubaʼ diidxaʼ. Guietenaláʼdxinu ni bizaaca Jesús ora gudxi ca discípulo stiʼ mayaca gatiʼ. Cumu nabé nadxii Pedru Jesús la? gúdxibe laa cadi chuʼ xizaa. Peru Jesús gudxi laabe: «Biree de ra nuaa, binidxabaʼ» (Mateo 16:22, 23). Xiñee gudxi Jesús laabe zacá yaʼ. Purtiʼ nanna Jesús naquiiñeʼ gatiʼ para gulá binni ne gusihuínnibe rusiguii Binidxabaʼ. Nabé risaca ni cazaaca que. Peru cadi tiempu diʼ ngue para niníʼ ique Jesús gastiʼ cayaca. Nánnanu ñuulaʼdxiʼ Binidxabaʼ nusaana Jesús de ñataná.

17 Maʼ cadi candaa para guinitilú guidxilayú malu riʼ. Nga runi laaca nabé risaca tiempu nabáninu riʼ. Peru Binidxabaʼ racalaʼdxiʼ guiníʼ íquenu casi ora gastiʼ cazaaca ne jma guicá íquenu ca cosa ni nuu lu guidxilayú riʼ. Racaláʼdxibe guiníʼ íquenu cayaadxaruʼ stale para guinitilú guidxilayú malu riʼ o guiníʼ íquenu qué ziuu dxi guinitilú ni. Peru cadi zacá diʼ ni. Cadi gusaana de gatananu ne cadi guiaandaʼ laanu nabáninu lu ca últimu dxi (Mateo 24:42).

18, 19. 1) Xi racalaʼdxiʼ Binidxabaʼ guni crenu. 2) Ximodo racané Jiobá laanu.

18 Laaca racalaʼdxiʼ Binidxabaʼ gucaa laanu guni crenu cadi nadxii Jiobá laanu ne qué ziuu dxi gutiidilaʼdxiʼ donda stinu. Peru laaca cadi dxandíʼ ni. Biblia na: «Qué zusiaanda [Dios] irá enda nachaʼhui ni huayuni tu ca xpinni purti nadxii tu laa» (Hebreos 6:10). Casi maʼ bidúʼyanu ca, rusisaca Jiobá guiráʼ ni rúninu pur laa (biindaʼ 1 Corintios 15:58). Ni nánnanu nga cadi nadxii Jiobá Binidxabaʼ ne qué zutiidilaʼdxiʼ stóndabe. Nga runi cadi gudiʼnu lugar gusiguii Binidxabaʼ laanu.

19 Lu tema riʼ bidúʼyanu nabé napa Binidxabaʼ poder, malu laa ne racalaʼdxiʼ gusiguii laanu. Peru zanda gudxiilunu laabe purtiʼ Jiobá nga cayacané laanu. Biblia cayabi laanu gunáʼ nga ca trampa stiʼ Binidxabaʼ ti gatananu (2 Corintios 2:11). Peru cadi naquiiñeʼ si gánnanu xii nga ca trampa ca. Naquiiñeʼ gudxiilunu cani. Nga runi Biblia na: «Cadi ulabi tu binidxabaʼ, stubi stubi zaxele de laatu» (Santiago 4:7). Lu sti tema ca zadúʼyanu chonna trampa ni riquiiñeʼ Binidxabaʼ ne xi zanda gúninu para cadi guiábanu lúcani.