Stale iza huasiene ca libru ne ca revista stinu Gog stiʼ guidxi Magog nga Binidxabaʼ biree si de guibáʼ. Bisiene ca libru ne ca revista stinu ni zacá, purtiʼ libru stiʼ Apocalipsis na Binidxabaʼ nga xaíque stiʼ cani cucaalú xquidxi Dios ni nuu lu guidubi Guidxilayú (Apocalipsis 12:1-17). Biénenu Gog nga sti lá ni napa Binidxabaʼ.

Peru modo biénenu ni dxiqué, bicaani stale binni guinabadiidxaʼ stale cosa. Primé, Jiobá gúdxibe Gog xi chigúnibe para gunitilube laa: «Zó guiráʼ clase maniʼ ripapa lii ne laaca zó ca maniʼ guiʼxhiʼ lii» (Ezequiel 39:4). Ne laaca guniʼbe: «Dxi que zudieeʼ Gog [...] ra igaachiʼ ndaaniʼ guidxi Israel [...]. Ne raqué napa xidé gucaachicabe Gog ne guiráʼ xpinni» (Ezequiel 39:11). Peru, ñee zanda gó «guiráʼ clase maniʼ ripapa» ne «ca maniʼ guiʼxhiʼ» ti espíritu la? Ximodo zanda igaachibe lu Guidxilayú yaʼ. Ne lu Biblia qué rieeteʼ zó maniʼ Binidxabaʼ o zucaachicabe laa; ni nani nga zadeguyoobe ndaaniʼ ti bizé ti mil iza (Apocalipsis 20:1, 2).

Ne Biblia na ra guiluxe ti mil iza zaree Binidxabaʼ de ndaaniʼ dxa bizé roʼ ne «zusiguii binni idubi naca guidxilayú. Zusiguii Gog ne Magog ne zuni laacabe tobi si para ucaa lú né cabe laa» (Apocalipsis 20:8). Pa Binidxabaʼ nga Gog, ximodo zanda gusiguiibe Gog yaʼ. Nga runi, cadi Binidxabaʼ diʼ nga Gog ni rieeteʼ lu libru stiʼ Ezequiel ne ni rieeteʼ lu Apocalipsis.

Yanna, tuu nga Gog stiʼ guidxi Magog yaʼ. Para guicábinu guendarinabadiidxaʼ riʼ, naquiiñeʼ gánnanu tuu nga chigucaalú xquidxi Dios. Biblia na zucaalú Gog stiʼ guidxi Magog, peru laaca ruzeeteʼ ni de «rey de ladu guiaʼ» ne zaqueca «ca rey sti guidxilayú» (Ezequiel 38:2, 10-13; Daniel 11:40, 44, 45; Apocalipsis 17:14; 19:19). Ñee gadxé gadxé nga cani chigucaalú xquidxi Dios la? Ruluíʼ si coʼ. Zándaca tobi si nga chigucaalú peru gadxé gadxé lá. Ximodo nánnanu ni yaʼ. Purtiʼ Stiidxaʼ Dios cayabi laanu guiráʼ ca guidxi roʼ nuu lu Guidxilayú ziuucaʼ tobi si para gucaalucaʼ xquidxi Dios ne zacá zuzulú guerra ni láʼ Armagedón (Apocalipsis 16:14, 16).

 Ora ruchaaganu ca textu stiʼ Biblia ni caníʼ de ora gucaalúcabe xquidxi Dios, rihuinni dxichi cadi Binidxabaʼ diʼ nga Gog stiʼ guidxi Magog, sínuque ti grupu de guidxi roʼ. Yanna, tuu nga xaíque stiʼ grupu riʼ yaʼ. Ñee laabe nga «rey de ladu guiaʼ» la? Cadi nuunu seguru, peru zándaca, purtiʼ zacagá nga ni gudxi Jiobá Gog: «Zeedaluʼ dede lugar ra nuuluʼ, dede ca lugar jma zitu ni nuu ladu guiaʼ, lii ne stale guidxi, guirácabe dxíʼbacabe maniʼ, ti grupu naroʼbaʼ de binni, dede ti ejércitu naroʼbaʼ» (Ezequiel 38:6, 15).

Zacagá bizeeteʼ Daniel, ti profeta ni bibani ca dxi stiʼ Ezequiel, laa guníʼ sicaríʼ de rey de ladu guiaʼ: «Zánnabe stale cosa ni zuchiiñaʼ laabe, dede ra rindani gubidxa hasta ladu guiaʼ, ne dxandipeʼ zadxiichibe ne zareebe para gunitilube stale guidxi. Ne zucuibe ca tienda risaca stibe lade nisadóʼ ne dani risaca ne sicarú; ne raqué zátibe, ne guirutiʼ tu zacané laabe» (Daniel 11:44, 45). Zacagá nga ca diidxaʼ ni zeeda lu Ezequiel ni caníʼ xi zuni Gog (Ezequiel 38:8-12, 16).

Xi zazaaca ora gucaalúcabe xquidxi Dios riʼ yaʼ. Daniel na: «Ca dxi que zuzuhuaa Miguel [Jesucristu] [lu Armagedón], príncipe ni jma risaca ni cayapa [dede lu iza 1914] ca xiiñiʼ xquídxiluʼ. Ne dxandipeʼ ziuu ti tiempu zapa binni yuubaʼ [gran tribulación] ni qué huayuu dxi guizaaca dede dxi guyuu ca guidxi roʼ. Ne ca dxi que, zalá xquídxiluʼ, guiráʼ ni cá lá lu libru que» (Daniel 12:1). Ni gulí Dios para guni dxiiñaʼ riʼ nga Jesús. Ne laaca rieeteʼ ni lu Apocalipsis 19:11-21.

Yanna, lu Apocalipsis 20:8 rieeteʼ de Gog ne Magog. Tuu nga Gog ne Magog yaʼ. Ra guiluxe ti mil iza, zuzulú últimu prueba ne ziuu binni ni zudxiideche Jiobá. Ca binni riʼ zaca nanaláʼdxicaʼ ca xpinni Jiobá cásica guca nanalaʼdxiʼ grupu de guidxi ni bicaalú xquidxi Dios ante guzulú Armagedón, ne Biblia na grupu de guidxi riʼ nga Gog stiʼ guidxi Magog. Peru ngueca nga ni cabeza guiropaʼ grupu ni naca xhenemigu Dios riʼ: zanitilucaʼ ne maʼ qué ziuuruʼ dxi guidúʼyanu laacaʼ (Apocalipsis 19:20, 21; 20:9). Nga runi biaʼsi nga guiree lá guiráʼ cani gucaalú xquidxi Dios ra maʼ ziluxe ti mil iza Gog ne Magog.

Laanu cani qué rusaanaʼ de guidúʼndanu Biblia maʼ nuunu gánnanu tuu nga «rey de ladu guiá». Peru tutiica gaca xaíque stiʼ grupu riʼ, nuunu seguru de chupa cosa: 1) Gog stiʼ guidxi Magog ne ca xpinni zanitilucaʼ, ne 2) Jesucristu, Rey stinu ni maʼ cayuni mandar, zulá xquidxi Dios ne zinebe laacaʼ ndaaniʼ ti guidxilayú cubi ra dxandipeʼ ziuu guendariuudxi ne gastiʼ ni guchiiñaʼ laacaʼ (Apocalipsis 7:14-17).