Biiyaʼ guiraʼ ni nuu lu sitiu riʼ

guyé lu índice

Bixuiʼlú ximodo zanda gácaluʼ casi Jiobá

Bixuiʼlú ximodo zanda gácaluʼ casi Jiobá

«Ma xiiñi Dios laatu ne nadxii laatu. Yanna laucaalaʼdxi gaca tu casi laa.» (EFESIOS 5:1)

1. Xi guenda maʼ bidii Jiobá laanu.

MAʼ BIDII Jiobá laanu ti guenda nabé risaca. Xi laani yaʼ. Guxuíʼlunu ximodo runi sentir binni ti guiénenu laacaʼ neca qué huadídinu ni cadíʼdicabe (biindaʼ Efesios 5:1, 2). Ximodo zanda iquiiñenu guenda riʼ para gácanu casi Jiobá yaʼ. Ne xiñee naquiiñeʼ gápanu cuidadu né cani riníʼ íquenu.

2. Ximodo runi sentir Jiobá ora ruuyaʼ cayacananu.

2 Maʼ bidii stiidxaʼ Jiobá ca xpinni Cristu ni bibí né espíritu santu guibánicaʼ guibáʼ sin qué chuʼ dxi gáticaʼ. Ne ca xcaadxi dendxuʼ maʼ bidii stiidxabe laacaʼ zápacaʼ ti guendanabani ni qué zaluxe lu Guidxilayú riʼ. Dxi gápanu guendanabani ni qué zaluxe riʼ, maʼ qué ziuu gastiʼ ni guniná laanu (Juan 10:16; 17:3; 1 Corintios 15:53). Peru Dios nanna nuuruʼ cosa ni runiná laanu. Ne runiná ni laabe. Guzéʼtenu ti ejemplu, Biblia na nabé gucaná Jiobá ora biiyaʼ cayacaná ca israelita ndaaniʼ guidxi Egipto (Isaías 63:9). Ne ra gudiʼdiʼ iza dxi bibiguetaʼ bicuí ca israelita yuʼduʼ que, gunna Jiobá cayuniná ca xhenemígucabe laacabe. Laabe nabe ora tuuxa guniná ca  xpínnibe, nabé racanabe casi ora nudxiganácabe bizalube (Zacarías 2:8). Nabé nadxii Jiobá laanu, nga runi racaláʼdxibe gacanebe laanu ora ruuyabe cayacananu. Nadxiibe laanu casi rannaxhii ti gunaa baʼduhuiiniʼ stiʼ (Isaías 49:15). Ximodo zanda chinándanu ejemplu stiʼ Jiobá yaʼ. Ora guxuíʼlunu ximodo ñuni sentirnu pa ñuʼnu lugar stiʼ binni ni cayacaná ca (Salmo 103:13, 14).

LAACA GUNNAXHII JESÚS BINNI

3. Xiñee biá Jesús binni ne gunnaxhiibe laacaʼ.

3 Dxi guyuu Jesús lu Guidxilayú, biénebe xi biʼniʼ sentir ca binni ni cayacaná neca laabe qué nidíʼdibe ra cadíʼdicaʼ. Nánnabe gucaná ca binni que pur ca xaíque yuʼduʼ. Laacaʼ nabé bisiguiicaʼ binni ne rucaacaʼ binni chinanda stale clase ley ni gudíxhecaʼ. Ne nabé bidxibi binni laacaʼ (Mateo 23:4; Marcos 7:1-5; Juan 7:13). Jesús qué nidxibi laacabe ne qué ñuni cré guiráʼ ni guníʼcabe. Peru biénebe modo runi sentir ca binni que ne nabé triste riuube ora ruuyabe cayacaná ca binni que. Guniʼbe zeeda gácacaʼ casi dendxuʼ ni qué gapa pastor (Mateo 9:36). Cumu biziidiʼ Jesús de Bixhoze la? ngue runi guyuube lugar stiʼ ca binni que, biabe laacaʼ ne gunnaxhiibe laacaʼ (Salmo 103:8).

4. Xi biʼniʼ Jesús ora biiyaʼ cayacaná binni.

4 Cumu gunnaxhii Jesús binni la? ngue runi gucanebe laacaʼ ora gúʼyabe cayacanacaʼ. Biziidibe ndiʼ de Bixhózebe. Ti biaje, ca apóstol stiʼ Jesús guzacaʼ zitu para gucheechecaʼ diidxaʼ. Maʼ bidxágacabe ne cuyúbicabe ti lugar para guiziiláʼdxicabe. Peru bidii Jesús cuenta canayubi stale binni laa para gusiidibe laacaʼ ne biene caquiiñeʼ chuʼ tu gacané ca binni que. Ngue runi, «bizulú bisiidi laacabe stale cosa» (Marcos 6:30, 31, 34).

GUSIHUÍNNINU NADXIINU BINNI CÁSICA RUNI JIOBÁ

5, 6. Pa racaláʼdxinu gusihuínninu nadxiinu binni cásica Jiobá, xi naquiiñeʼ gúninu. Bizeeteʼ ti ejemplu. (Biiyaʼ foto ni zeeda ra ruzulú tema riʼ.)

5 Pa racaláʼdxinu gusihuínninu nadxiinu binni cásica runi Jiobá, naquiiñeʼ chuʼnu lugar stícabe. Quíxhenu ti ejemplu. Guxuíʼlunu ti hombrehuiiniʼ caníʼ ique de ti hermanu ni maʼ nagola ni qué ruuyaʼ chaahuiʼ ne riquiiñeʼ ti bastón. Hombrehuiiniʼ riʼ nanna guníʼ Jesús naquiiñeʼ gúninu binni ni riuuláʼdxinu gúnicabe laanu (Lucas 6:31). Zándaca primé guníʼ ique hombrehuiiniʼ riʼ ñuulaʼdxiʼ ñuni invitárcabe laa nichite fútbol. Peru despué bietenaláʼdxibe hermanu maʼ nagola riʼ maʼ qué ruuyaʼ chaahuiʼ ne qué zanda guxooñeʼ. Ngue runi guyuube lugar stiʼ hermanu riʼ ne gunabadiidxabe: «Pa ñacaʼ hermanu riʼ, xi ñuuladxeʼ ñúnicabe pur naa yaʼ».

6 Hombrehuiiniʼ riʼ racalaʼdxiʼ guxuiʼlú ximodo ñuni sentir pa ñaca ti binni ni maʼ nagola. Ngue runi riguixhe íquebe cueebe tiempu para hermanu riʼ ne gucaadiaga chaahuibe laa. Óraque rudiibe cuenta raca nagana para hermanu riʼ guundaʼ Biblia ne cheʼ de yoo pur yoo. Ne pur nga randa ruuyabe xiruʼ caquiiñeʼ hermanu riʼ. Yanna laanu, pa gúninu stipa pur guiénenu ximodo runi sentir xcaadxi binni ne gusihuínninu nadxiinu laa, zácanu casi Jiobá (1 Corintios 12:26).

Guca casi Jiobá ne biʼniʼ tratar binni galán (Biiyaʼ párrafo 7)

7. Ximodo zanda gacanenu ca hermanu ni cayacaná.

7 Nagana nga guiénenu ni cadiʼdiʼ sti binni jma pa qué huadídinu ni. Casi  nuu stale hermanu napa depresión o guendahuará ni láʼ ansiedad, xcaadxi huayapa accidente, xcaadxi pur maʼ bioʼxhoʼ ne xcaadxi purtiʼ bininácabe laacaʼ. Nuu tu cusiniisi xiiñiʼ stubi. Ne xcaadxi cayuni ni na Jiobá neca cadi xpinni Cristu binnilídxicaʼ. Guiranu nga nápanu gadxé gadxé guendanagana. Nga runi gadxé modo nga caquiiñeʼ gacanécabe laanu. Pur nga naquiiñeʼ gúninu stipa pur gacanenu ca hermanu ni cayacaná ne gusihuínninu nadxiinu laacaʼ. Ximodo yaʼ. Gucaʼdiáganu laacabe, guxuíʼlunu ni cayuni sentírcabe ne gúninu stipa pur guiénenu laacabe. Laaca zanda gusietenaláʼdxinu laacabe nanna Jiobá xi guendanagana nápacabe. Ne zanda gúninu xiixa pur laacabe. Pa gúninu guiráʼ ndiʼ, zácanu casi Jiobá (biindaʼ Romanos 12:15 ne 1 Pedro 3:8).

GUNI TRATARNU BINNI GALÁN CÁSICA RUNI JIOBÁ

8. Xi gucané Jesús guni tratar xcaadxi binni galán.

8 Nabé galán runi tratar Jiobá binni, ne zaqueca runi Jesús (Lucas 6:35). Xi gucané Jesús para biʼniʼ tratar xcaadxi binni galán yaʼ. Bixuíʼlube ximodo zuni sentircaʼ pur ni gúnibe pur laacaʼ. Guzéʼtenu ti ejemplu. Ti dxi guyé ti gunaa ni maʼ biʼniʼ stale cosa malu ra nuube. Nabé biinaʼ gunaa riʼ dede bigádxebe ñee Jesús né nisa ni biete lube. Biiyaʼ Jesús maʼ guca arrepentir gunaa riʼ ne bidiibe cuenta pa qué gacanebe laa la? jmaruʼ si naná modo ziuu. Ngue runi gúdxibe laa galán ngue cayaca arrepentir ne bitiidiláʼdxibe donda stiʼ. Ti xaíque stiʼ ti religión qué ñuulaʼdxiʼ ni biʼniʼ Jesús que. Neca zaqué, laaca biʼniʼ tratar Jesús laabe galán (Lucas 7:36-48).

9. Pa racaláʼdxinu guni tratarnu xcaadxi binni galán cásica runi Jiobá, xi naquiiñeʼ gúninu yaʼ. Bizeeteʼ ti ejemplu.

9 Pa racaláʼdxinu guni tratarnu xcaadxi binni galán cásica Jiobá, xi naquiiñeʼ gúninu yaʼ. Ante guininu, naquiiñeʼ guiníʼ íquenu xi zuni sentírcabe. Nga zacané laanu gácanu nachaʼhuiʼ ne cadi guninanu ladxidóʼcabe. Pablu gudxi ca xpinni Cristu cadi naquiiñeʼ tíndecaʼ, «sínuque [gácacaʼ] nachaʼhui ne irá binni» (2 Timoteo 2:24). Guníʼ ique lu ca ejemplu riʼ. Xi gúniluʼ pa quixhe ique patrón stiluʼ guni xiixa ni cadi jneza yaʼ. Pa ti xpinni Cristu chindá ra Yoo stiʼ Reinu despué de stale beeu de qué huayé, xi gábiluʼ laabe yaʼ. Pa canagucheecheluʼ diidxaʼ ne gabi ti binni lii qué gapa tiempu para gucaadiaga lii, ximodo guicábiluʼ laabe yaʼ. O pa xheelaluʼ gabi lii xiñee qué ñábiluʼ laa de caadxi cosa chigúniluʼ, xi nicábiluʼ laabe yaʼ. Lu cani bizéʼtenu riʼ naquiiñeʼ guiníʼ íquenu ximodo zuni sentir xcaadxi binni ne xi zuni sentírcabe pur ni gábinu laacabe. Nga runi gúninu stipa pur guni tratarnu laacabe galán ne zacá zácanu casi Jiobá. Biblia na: «Ladxidóʼ binni ni runi ni jneza la? riníʼ ique ante guicabi, peru binni qué iquiiñeʼ la? nisi guendanadxabaʼ riree ruaa» (Proverbios 15:28).

GÁCANU BINNI NUU XPIAANIʼ CÁSICA JIOBÁ

10, 11. Ximodo zanda gácanu binni nuu xpiaaniʼ cásica Jiobá. Bizeeteʼ ti ejemplu.

10 Nabé nuu xpiaaniʼ Jiobá ne zanda gánnabe xi guiráʼ chiguizaaca despué. Qué zanda diʼ gánnanu xi chiguizaaca despué, peru zanda gácanu binni nuu xpiaaniʼ casi Jiobá. Ximodo yaʼ. Ante quixhe íquenu xi gúninu naquiiñeʼ guxuíʼlunu ximodo zuniná ni laanu o ximodo zuniná  ni xcaadxi binni. Cadi gácanu casi ca israelita. Laacaʼ qué niníʼ íquecaʼ xi zazaacacaʼ pa gucheenecaʼ Jiobá. Chaahuiʼ chaahuiʼ bixélecaʼ de Dios ne qué nudiicaʼ xquíxepeʼ laabe pur ni bíʼnibe pur laacaʼ. Bidii Moisés cuenta modo nuucabe, ngue runi guníʼ nácacabe binni ni gastiʼ xpiaaniʼ. Gudxi laacabe pa ñuu xpiaanicabe niníʼ íquecabe xi zabeendúcabe pur ni quixhe íquecabe gúnicabe (Deuteronomio 31:29, 30; 32:28, 29).

11 Quíxhenu ti ejemplu para guiénenu ximodo zanda gácanu ti binni nuu xpiaaniʼ. Pa nápaluʼ novio o novia, bietenalaʼdxiʼ nuu biaje raca nagana gucueeza binni laa ne de gacalaʼdxiʼ gatané laabe. Ximodo zanda gusihuínniluʼ nácaluʼ ti binni nuu xpiaaniʼ yaʼ. Ora gucaanaluʼ ca cosa ni zanda uquiinde lii gúniluʼ ni cadi jneza. Qué chuʼ dxi gúniluʼ xiixa ni guxheleʼ lii de Jiobá. Cadi guiaandaʼ lii Dios cabeza gácaluʼ ti binni ni nuu xpiaaniʼ. Pa cadi nuu xpiaaniluʼ zanda gápaluʼ guendanagana (Proverbios 22:3).

GUIDUʼYAʼ CHAAHUINU XI RINÍʼ ÍQUENU

12. Xiñee naquiiñeʼ gápanu cuidadu de cani riníʼ íquenu.

12 Pa nácanu binni nuu xpiaaniʼ, zápanu cuidadu de ni riníʼ íquenu. Cani riníʼ íquenu zeeda gácani casi gui. Pa gápanu cuidadu zanda iquiiñenu gui para gúninu guendaró. Peru pa coʼ la? gui ca zanda guzaaquiʼ ni lídxinu ne guuti ni laanu. Zaqueca nga laanu, pa guiníʼ íquenu lu ca cosa sicarú ni rusiidiʼ Jiobá laanu, zabáninu galán. Peru pa guiníʼ íquenu cosa ni cadi jneza ne guxuíʼlunu nexhenenu tuuxa ni cadi xheelanu, zándaca dxandíʼ gueeda gúninu ni. Ne zacá zanda gusaana de gaca xhamígunu Jiobá (biindaʼ Santiago 1:14, 15).

13. Xi bixuiʼlú Eva.

13 Guidúʼyanu ejemplu stiʼ Eva, primé gunaa ni bizáʼ Dios. Jiobá gudxi Adán ne Eva cadi gocaʼ de «cuananaxhi stiʼ yaga stiʼ guendananna ni jneza ne ni cadi jneza» (Génesis 2:16, 17). Peru Binidxabaʼ gudxi Eva: «Qué zátiditu. Purtiʼ Dios nanna dxi goto cuananaxhi stini la? zaxeleʼ lutu ne zácatu casi laabe, ne zunibiaʼtu xii nga jneza ne ni cadi jneza». Gúdxibe laa zanda quixhe ique guni ni jneza ne ni cadi jneza. Bixuiʼlú Eva jma galán zabani. Qué nusaana de niníʼ íquebe ni ne bizulú guyuuláʼdxibe gobe de cuananaxhi que. Últimu la? gudobe ni. Despué gúdxibe xheelabe gó ni ne laa laaca gudó ni (Génesis 3:1-6). Ne pur nga, «biuu enda ruchee ndaani guidxilayú», ne rati binni pur guendaruchee ca (Romanos 5:12). Rihuinni dxíchica qué ñapa Eva cuidadu de ni guníʼ ique.

14. Xi riníʼ Biblia de gatané tuuxa ni cadi xheelaʼ.

 14 Dxandíʼ, qué ñuuné Eva tuuxa ni cadi xheelaʼ. Peru Biblia cayabi laanu malu nga guxuíʼlunu nexhenenu tuuxa ni cadi xheelanu. Jesús na pa ti hombre cadi gusaana de guiníʼ ique nexhené tuuxa ni cadi xheelaʼ, casi ñaca maʼ gutané laabe «neca qué ñuu né pe laabe» (Mateo 5:28). Apóstol Pablu laaca guníʼ cadi jneza guiníʼ íquenu ximodo gúninu ca cosa malu ni ñuuláʼdxinu ñúninu (Romanos 13:14).

15. 1) Xii nga ni jma risaca naquiiñeʼ gúninu. 2) Xiñee naquiiñeʼ gúninu stipa pur gúninu ni.

15 Biblia laaca cayabi laanu naquiiñeʼ guiníʼ íquenu ni racalaʼdxiʼ Jiobá gúninu ne cadi guiníʼ íquenu gápanu stale bidxichi. Qué ziuu dxi gacané bidxichi laanu guibáninu nayecheʼ ne maʼ cadi chuʼnu xizaa (Proverbios 18:11). Jesús guníʼ pa ti hombre guni stipa pur gapa stale bidxichi ne maʼ cadi guni ni na Jiobá primé la? naca ti hombre nahuati. Neca ricu laa, «qué gapa gasti ni risaca nezalú Dios» (Lucas 12:16-21). Risaca nga gúninu stipa pur gúninu ni riuulaʼdxiʼ Dios, purtiʼ zeeda gácani casi ora niguu chaahuinu «ni risaca ibáʼ» (Mateo 6:20). Ne zacá ziuʼnu jma nayecheʼ ne zusiéchenu Jiobá (Proverbios 27:11). Jma risaca nga gaca xhamígunu Dios que guiráʼ bidxichi nuu lu guidxilayú riʼ.

CADI CHUʼNU XIZAA

16. Xi zanda gúniluʼ pa nuu xiixa ni naguu xizaa lii.

16 Pa gacaláʼdxinu gácanu ricu lu guidxilayú riʼ, zápanu jma guendanagana (Mateo 6:19). Jesús bisiidiʼ pa qué gusaana de guiníʼ íquenu gápanu bidxichi, nabé nagana zaca para laanu gúninu ni na Jiobá primé lu xquendanabáninu (Mateo 13:18, 19, 22). Nuu xcaadxi binni nabé riuucaʼ xizaa purtiʼ ruxuíʼlucaʼ zazaacacaʼ stale cosa malu. Pa guiníʼ íquenu zacá zándaca gaca huaranu ne gusaana de gápanu confianza Jiobá. Biblia cayabi laanu ni nabé riuu xizaa raca deprimir, peru riéchebe ora gunadiágabe ti diidxaʼ sicarú (Proverbios 12:25). Nga runi, xi zanda gúniluʼ pa nuu xiixa ni nabé riguu xizaa lii yaʼ. Guniʼné ti Testigu ni runibiáʼ chaahuiʼ lii. Zándaca jñaaluʼ o bixhózeluʼ, xheelaluʼ o tuuxa ni nabé xhamíguluʼ. Laacabe zanda gacanécabe lii gápaluʼ confianza Jiobá ne gacanécabe lii gatadxí ladxidoʼloʼ.

17. Ximodo racané Jiobá laanu ora nuunu xizaa.

17 Jiobá nga ni jma riene laanu ne zanda gacanebe laanu ora nuu xiixa ni naguu xizaa laanu. Pablu bicaa: «Cadi chuʼ tu xizaa de gastiʼ, sínuque lainíʼ né Dios. Lainaba laa irá ni caquiiñe tu, ne laudii diuxquixe laa. Ne óraque zaguixhe dxí ladxidóʼ to dede iruti zanda guiene ximodo ni. Ma qué zadxibi ladxidóʼ to, ne zata dxí xquenda biaani tu, purti nuu né tu Cristu Jesús tobi si» (Filipenses 4: 6, 7). Nga runi pa nabé nuuluʼ xizaa, guníʼ ique lu guiráʼ ni cudii Jiobá laanu para cadi gusaana de gaca xhamígunu laabe. Riquiiñebe ca hermanu ni ridagulisaanenu para gacanebe laanu, casi ca binnigola, mozo ni nuu xpiaaniʼ, ca ángel ne Jesús.

18. Xii nga cani zanda guxuíʼlunu.

18 Lu tema riʼ maʼ bizíʼdinu ximodo zanda guxuíʼlunu gácanu casi Jiobá ne guiénenu ximodo runi sentir xcaadxi (1 Timoteo 1:11; 1 Juan 4:8). Maʼ bidúʼyanu ziuʼnu jma nayecheʼ pa gusihuínninu nadxiinu xcaadxi binni ne guni tratarnu laacaʼ galán, pa guiníʼ íquenu xi zabeendunu pur cani quixhe íquenu gúninu ne cadi chuʼnu xizaa. Nga runi, guxuíʼlunu ximodo zaca Paraísu ca ne guxuíʼlunu ximodo zanda gácanu casi Jiobá (Romanos 12:12).