Biiyaʼ guiraʼ ni nuu lu sitiu riʼ

guyé lu índice

«Biiya cabe» ca cosa ni bizabiruaa Dios

«Biiya cabe» ca cosa ni bizabiruaa Dios

«Neca caʼru icaa cabe ni bidii stiidxa Dios zudii laacabe, peru casi ñaca biiya cabe ni de zitu.» (HEBREOS 11:13)

1. Xiñee galán biʼniʼ Jiobá ra bidii laanu guenda de guxuíʼlunu ca cosa ni caʼruʼ guidúʼyanu. (Biiyaʼ foto ni cá ra ruzulú tema riʼ.)

LAANU casi binni guidxilayú randa ruxuíʼlunu cosa ni qué huadúʼyanu. Ne nabé galán biʼniʼ Jiobá ra bisigaʼdeʼ laanu guenda sicarú riʼ. Xiñee yaʼ. Purtiʼ pur laani zanda guiníʼ íquenu ca cosa sicarú ni cabézanu. Ne laaca zanda guiníʼ íquenu xi chigúninu ne quixhe íquenu gúninu ni jneza. Lu Biblia cayabi Jiobá laanu zudii stale cosa galán laanu despué. Dxandíʼ, caʼruʼ diʼ guidúʼyanu cani. Peru zanda guiníʼ íquenu cani ne gápanu fe dxandíʼ zácacani (2 Corintios 4:18).

2, 3. 1) Xi guiráʼ zanda guxuíʼlunu. 2) Xi zaninu lu tema riʼ.

2 Nuu binni riquiiñeʼ xquendabiaaniʼ para guiníʼ ique xiixa ni qué zazaaca. Guzéʼtenu ti ejemplu, ti dxaapahuiiniʼ zándaca guxuiʼlú dxiʼbaʼ deche ti mariposa ni zipapa. Peru qué zanda diʼ gaca ndiʼ. Peru laaca zanda guxuíʼlunu ca cosa ni dxandíʼ zazaaca. Guzéʼtenu ti ejemplu, jñaa profeta Samuel gúdxibe Jiobá zinebe xiiñibe chiguniné ca sacerdote dxiiñaʼ. Laabe guníʼ íquebe xi zazaaca dxi ca. Laabe maca gudixhe íquebe gúnibe ni, ngue runi qué niníʼ íquebe xiixa ni qué zanda guizaaca. Ora bixuíʼlube dxi que bidii ni stipa  laabe para gúnibe ni maca guniʼbe (1 Samuel 1:22). Zacaca nga laanu, naquiiñeʼ guiníʼ íquenu lu ca cosa ni maʼ guníʼ Jiobá chiguni, purtiʼ nanna dxíchinu dxandíʼ zúnibe cani (2 Pedro 1:19-21).

3 Stale xpinni Dios de dxiqué bixuíʼlucaʼ ximodo guni Dios ca cosa ni bizabiruaa. Xi guleendúcabe ora guníʼ íquecabe lu cani guníʼ Jiobá chiguni yaʼ. Xi ribeendunu ora riníʼ íquenu dxi guni Dios guiráʼ ni maʼ bizabiruaa yaʼ. Lu tema riʼ zaninu de laani.

BIXUIʼLÚCABE NI CHIGUNI DIOS NE BIQUIDXI NI FE STÍCABE

4. Xi gucané Abel guxuiʼlú zabani binni jma galán despué.

4 Abel nga primé hombre ni gupa fe lu cani bizabiruaa Dios. Laabe gúnnabe despué de bichee Adán ne Eva, gudxi Jiobá beendaʼ que: «Zucaaʼ gacananaláʼdxisaatu, lii ne gunaa ca, ne zaqueca ni za de lii ne ni za de laabe. Ni za de gunaa ca zucaache íqueluʼ ne lii zuninaluʼ xatini ñeebe» (Génesis 3:14, 15). Qué ñanna Abel ximodo chigaca ni na ca diidxaʼ riʼ. Peru nanna dxíchinu guníʼ íquebe ni stale. Zándaca guníʼ íquebe tuu nga chigucaalú beendaʼ ca ne zacané binni para gácacaʼ binni sin donda sti biaje. Ora guníʼ íquebe guiráʼ ndiʼ gucané ni laabe guxuíʼlube zabani binni jma galán despué. Laabe gúpabe fe zuni Dios guiráʼ ni maʼ guníʼ. Nga runi, ora bidii Abel ti ofrenda, guyuulaʼdxiʼ Jiobá ni. Biblia na: «Peru Abel la? bedané chupa chonna dendxuʼ ni jma huaniisi stiʼ, ni napa stale za. [...] Jiobá guyuulaʼdxiʼ ni bisigaʼdeʼ Abel laa» (Génesis 4:4 ne biindaʼ Hebreos 11:4).

5. Ora guníʼ ique Enoc xi zazaaca binni despué, ximodo gucané ni laabe.

5 Enoc nga sti hombre ni gupa fe lu cani bizabiruaa Dios. Bibánibe dxi guyuu stale binni ni guníʼ stale cosa malu de Jiobá. Zándaca guníʼ ique Enoc ca dxi guibani puru si binni ni guzuubaʼ stiidxaʼ Dios (biindaʼ Hebreos 11:5,6). Ra guníʼ íquebe xi chiguizaaca despué, ximodo gucané ni laabe yaʼ. Gucané ni laabe gácabe nadxibalú ne guiniʼbe zunitilú Dios guiráʼ binni malu (Judas 14, 15).

6. Xi zándaca bixuiʼlú Noé biaba si nisaguié naroʼbaʼ que.

6 Noé laaca gupa fe lu cani bizabiruaa Dios. Nga runi qué ñátibe dxi biaba nisaguié naroʼbaʼ que (Hebreos 11:7). Cumu nabé gúpabe fe la? gudiʼdiʼ si nisaguié naroʼbaʼ que biitibe maniʼ para bidiibe Dios ofrenda (Génesis 8:20). Peru guca binni malu sti biaje. Ti hombre láʼ Nemrod biʼniʼ mandarbe guidxi que ne biyúbibe modo gucaabe binni gudxiideche Jiobá (Génesis 10:8-12). Peru qué nusaana Noé de ñapa fe. Cásica Abel, Noé laaca bixuiʼlú dxi cuee Dios guendaruchee ne guendaguti. Ne zándaca laaca bixuíʼlube dxi maʼ qué chuʼ binni malu guni mandar. Laanu laaca zanda guiníʼ íquenu dxi ca, ne dxi riʼ jma maʼ gaxha nuuni (Romanos 6:23).

BIXUIʼLÚCABE DXI MAʼ GUNI DIOS NI MAʼ BIZABIRUAA

7. Xi zándaca bixuiʼlú Abrahán, Isaac ne Jacob zazaaca despué.

7 Abrahán, Isaac ne Jacob gunda bixuíʼlucaʼ ora guibani binni galán despué. Dios maca gudxi laacabe zaguu ndaayaʼ binni ni nabani lu guidubi Guidxilayú pur «ni za» de gunaa que (Génesis 22:18; 26:4; 28:14). Ne laaca gudxi laacabe zaroobaʼ familia stícabe dede gueeda gácani ti guidxi nabé naroʼbaʼ ne zabánicabe ndaaniʼ ti lugar nabé sicarú (Génesis  15:5-7). Abrahán, Isaac ne Jacob gunna dxíchicaʼ zuni Jiobá guiráʼ ni maʼ guníʼ. Nga runi gunda bixuiʼlúcabe maʼ nabani binnilídxicabe lugar ca. Dxandíʼ, qué huasaana Jiobá de gacané ca xpinni ni ruzuubaʼ diidxaʼ chuʼcaʼ seguru zabani binni casi bibani Adán ne Eva dxiqué.

8. Xi gucané Abrahán guzuubaʼ diidxaʼ ne gaca fe stiʼ naguidxi.

8 Abrahán ne xcaadxi xpinni Jiobá qué ñuuyacaʼ dxi biʼniʼ Dios guiráʼ ni maʼ guníʼ, purtiʼ gúticabe ante gácacani. Neca zacá gunda bixuiʼlúcabe cani chiguni Dios. Biblia na «casi ñaca biiya cabe ni de zitu ne bieche né cabe ni» (biindaʼ Hebreos 11:8-13). Gucané nga Abrahán guzuubaʼ diidxaʼ ne gaca fe stiʼ naguidxi neca gupa guendanagana. Gúnnabe biʼniʼ Jiobá guiráʼ ni guníʼ dxiqué ne guyuube seguru zuni Jiobá ni despué.

9. Ximodo gucané fe stiʼ Abrahán laa guni cré lu cani bizabiruaa Jiobá.

9 Cumu gupa Abrahán fe lu guiráʼ ni bizabiruaa Jiobá la? qué nusaanabe de ñúnibe guiráʼ ni biʼniʼ mandar laabe. Bisaanabe lídxibe ndaaniʼ guidxi Ur ne maʼ qué ñuu dxi nibézabe ndaaniʼ ti guidxi. Laabe gúnnabe qué zandaa nin ti guidxi, purtiʼ ca xaíque stícani qué rúnicaʼ ni na Jiobá (Josué 24:2). Gulézacabe dxi guni mandar Jiobá Guidxilayú riʼ. Biblia na Reinu ca nga «guidxi ni bicuí Dios [...], guidxi ni qué ziuu dxi initilú» (Hebreos 11:10). Abrahán, Abel, Enoc, Noé ne xcaadxi xpinni Dios de dxiqué biʼniʼ crecaʼ ziasa binni de lade gueʼtuʼ. Laga jma ruxuiʼlúcabe nabánicabe ndaaniʼ Paraísu, jma riguidxi fe stícabe (biindaʼ Hebreos 11:15, 16).

10. Xiñee galán biʼniʼ Sara ora bixuiʼlú ximodo chiguni Jiobá cani maʼ bizabiruaa.

10 Guininu de Sara, xheelaʼ Abrahán. Laabe laaca gúpabe fe lu cani bizabiruaa Jiobá. Gudxi Jiobá Abrahán ca diidxaʼ riʼ: «Zudieeʼ lii ti xiiñiluʼ ni gale de laabe». Ne laaca gúdxibe Abrahán: «Zaguaaʼ ndaayaʼ laabe, ne dxandipeʼ zeeda gácabe guidxi roʼ; ca rey stiʼ ca guidxi ca zareecaʼ de laabe» (Génesis 17:16). Neca napa Sara 90 iza ne qué gapa xiiñiʼ, bixuíʼlube dxi maʼ nápabe baʼduhuiiniʼ ni gudxi Dios laabe zápabe que. Ne nánnanu bixuíʼlube ximodo zaroobaʼ familia stibe dede gueeda gaca ti guidxi roʼ (Hebreos 11:11, 12). Pur nga, jma biguidxi fe stibe. Ne casi bidii stiidxaʼ Jiobá, gupa Sara ti xiiñiʼ, láʼ Isaac. Gucané nga laabe chuʼbe seguru zuni Jiobá xcaadxi cosa ni maʼ guníʼ. Pa guiníʼ íquenu guiráʼ ni maʼ bidii stiidxaʼ Jiobá laanu la? laaca zaca fe stinu jma naguidxi.

QUÉ NUSAANA DE NINÍʼ ÍQUEBE LU NI CHICAABE

11, 12. Xiñee cada dxi tiidiʼ jma gunnaxhii Moisés Jiobá.

11 Moisés laaca gupa stale fe lu cani bizabiruaa Jiobá. Biniisibe casi ti príncipe ndaaniʼ guidxi Egipto. Peru jñaabe ne bixhózebe hebreu laacaʼ ne bisiidicaʼ laabe de Jiobá. Bisiidicaʼ laabe guníʼ Jiobá zabee ca hebreu de esclavu ne zudiibe laacaʼ ti lugar galán para guibánicaʼ (Génesis 13:14, 15; Éxodo 2:5-10). Laga jma guníʼ ique Moisés cani bizabiruaa Jiobá la? jma gunnaxhiibe laa. Gunnaxhiibe laa stale ngue runi qué ninabe ñápabe bidxichi o ñácabe ti binni risaca.

12 Biblia na nabé gupa Moisés fe, ngue runi dxi maʼ huaniisibe, qué ninabe ñácabe ni za de binnilidxi rey stiʼ Egipto. Biblia na qué ninabe «ñeche né be irá ni [nápabe], [...] chupa  chonna si gubidxa», sínuque «ulí be acaná né be ca binni xquidxi be». Para laabe la? qué risaca «irá ni nuu ndaani guidxi Egipto». Ni jma bisisácabe nga gácabe ti binni ni gulí Dios. Xiñee yaʼ. Purtiʼ guníʼ íquebe lu premiu ni maca guníʼ Dios gudii laabe (Hebreos 11:24-26).

13. Xi guleendú Moisés ora guníʼ ique cani bidii stiidxaʼ Jiobá.

13 Nanna dxíchinu nabé guníʼ ique Moisés ni bidii stiidxaʼ Jiobá de cuee ca hebreu de esclavu. Cásica xcaadxi xpinni Dios, Moisés laaca gunna maca guníʼ Jiobá zulá binni de guendaguti (Job 14:14, 15; Hebreos 11:17-19). Cumu qué nusaana Moisés de niníʼ ique lu cani bidii stiidxaʼ Dios la? biénebe nabé nadxii Dios binni. Ndiʼ bicaa laabe gannaxhiibe Dios jma ne gápabe jma fe laa. Ne laaca gucané ni laabe ti qué nucheenebe Dios biaʼ dxi bibánibe (Deuteronomio 6:4, 5). Ne qué lica nidxíbibe ora gucalaʼdxiʼ rey stiʼ Egipto ñuuti laabe, purtiʼ gúnnabe zudii Jiobá laabe ti premiu despué (Éxodo 10:28, 29).

BIXUIʼLÚ GUIRÁʼ NI CHIGUNI REINU STIʼ DIOS

14. Xi ruxuiʼlú caadxi binni.

14 Stale binni nabé riníʼ ique ni zazaaca despué ne ruxuíʼlucaʼ ca cosa ni qué ziuu dxi guizaaca. Guzéʼtenu ti ejemplu, ca binni ni huaxiéʼ napa bueltu ruxuíʼlucaʼ ziuu dxi zácacaʼ ricu ne zabánicaʼ sin chuʼ xiixa ni cuʼ xizaa laacaʼ. Peru Biblia cayabi laanu qué zusaana de gápanu guendanagana ne yuubaʼ lu guidxilayú malu riʼ (Salmo 90:10). Xcaadxi ruxuiʼlú ziuu ti gobiernu lu Guidxilayú riʼ ni zabee ca guendanagana stiʼ binni. Peru Biblia cayabi laanu Reinu si stiʼ Dios nga zuni chaahuiʼ ca guendanagana ca (Daniel 2:44). Ne stale tu riníʼ ique qué zunitilú Dios guidxilayú riʼ. Peru Biblia na zunitilube ni (Sofonías 1:18; 1 Juan 2:15-17). Ca binni ni riníʼ ique xiixa cosa gadxé de ni rusiidiʼ Biblia, zuuyacaʼ cadi jneza diʼ ni guníʼ íquecaʼ.

Ñee ruxuíʼluluʼ cani zanda gúniluʼ ora guni Jiobá guiráʼ ni maʼ bidii stiidxaʼ la? (Biiyaʼ párrafo 15)

15. 1) Xiñee galán nga guxuíʼlunu cani maʼ bizabiruaa Dios gudii laanu. 2) Bizeeteʼ ti cosa ni cabézaluʼ gúʼyaluʼ né stale gana.

15 Maʼ guníʼ Jiobá zudii laanu ti guendanabani sicarú despué. Pa guiníʼ íquenu ni chiguni Jiobá riʼ, ziuʼnu jma nayecheʼ ne zápanu stipa para cadi gusaana de gúninu ni na Dios. Ñee zanda guxuíʼluluʼ cayuuyaluʼ guiráʼ cosa ni maʼ bizabiruaa Dios gaca cásica guibáʼ ne zaqueca lu Guidxilayú la? Pa cabézaluʼ guibániluʼ lu Guidxilayú, bixuiʼlú ora maʼ cayúniluʼ dxiiñaʼ né ca xhamíguluʼ para gúnitu Guidxilayú riʼ ti jardín sicarú. Binni ni nabé rizaalaʼdxiʼ lii nga chitidxi lii ximodo gaca dxiiñaʼ riʼ. Guiráʼ binni zannaxhii Jiobá cásica nadxiiluʼ laa. Ziuuluʼ nazaaca ne zápaluʼ stale stipa, ne gastiʼ zaguu xizaa lii. Ziuuluʼ nayecheʼ purtiʼ zaquiiñeluʼ ca guenda stiluʼ para gacaneluʼ xcaadxi binni ne para gusisácaluʼ Jiobá. Ne ora guiasa ca gueʼtuʼ ca, zándaca zacaneluʼ laacabe gunibiáʼcabe Dios (Juan 17:3; Hechos 24:15). Ora guxuíʼlunu ca cosa riʼ, zánnanu caníʼ íquenu cosa ni zazaaca, purtiʼ Biblia na zacá ni (Isaías 11:9; 25:8; 33:24; 35:5-7; 65:22).

GUNIʼNÉ XCAADXI BINNI DE NI CABÉZALUʼ

16, 17. Xiñee galán guininu de ni maʼ bizabiruaa Jiobá gudii laanu.

16 Pa guinínenu xcaadxi Testigu de cani ñuuláʼdxinu ñúninu lu guidxilayú cubi stiʼ Dios, jma nayaʼniʼ zadúʼyanu  cani. Dxandíʼ, guirutiʼ ganna xi chiguni ndaaniʼ Paraísu ca. Peru galán guininu de laani pur chupa razón. Primé, purtiʼ rusihuínninu nápanu fe lu cani maʼ bizabiruaa Jiobá. Ne guiropa, purtiʼ riguʼnu gana xcaadxi xpinni Jiobá neca gápacaʼ guendanagana. Ne ngapeʼ nga ni biʼniʼ Pablu ne xcaadxi xpinni Cristu de Roma (Romanos 1:11, 12).

17 Ora riníʼ íquenu ni maʼ bidii stiidxaʼ Jiobá gudii laanu, qué riúʼpenu xizaa pur ca guendanagana ni rápanu. Ti dxi, nabé guyuu Pedru xizaa, ngue runi gunabadiidxabe Jesús: «Laadu yaʼ, xi zacaa du, ma bisaana du irá xixé ne ma beda nanda du lii». Gucalaʼdxiʼ Jesús niníʼ ique Pedru ne xcaadxi discípulo que ca cosa galán ni cabeza laacaʼ. Ngue runi gúdxibe laacaʼ: «Dxi [...] guseenda Dios naa cue casi rey la? dxi que laca zudiee laatu ra cui tu para guni mandar tu cani za de idubi doce xiiñi Israel, purti uzá né tu naa. Ne tutiica gusaana lidxi o biʼchi o bizaʼna o bixhoze o jñaa o xheela o xiiñi o xquidxi pur naa la? zacaa ti gayuaa tantu de ni bisaana que, ne zapa enda nabani ni qué zaluxe» (Mateo 19:27-29). Nga runi, Pedru ne xcaadxi discípulo que gunda bixuíʼlucaʼ ora maʼ nuucaʼ guibáʼ maʼ cayuni mandárnecaʼ Jesús ne cayacanecaʼ binni nachaʼhuiʼ para gácacaʼ binni sin donda.

18. Xiñee galán guxuíʼlunu dxi guni Jiobá guiráʼ ni maʼ guníʼ.

18 Lu tema riʼ bidúʼyanu ximodo biguidxi fe stiʼ chupa chonna xpinni Dios ora bixuíʼlucaʼ ni bizabiruaa Dios gudii laacaʼ. Bixuiʼlú Abel ximodo gueeda gaca guiráʼ ni maca bizabiruaa Dios. Ne cumu gúpabe fe lu cani la? nabé guca xhamigu Jiobá laabe. Abrahán laaca bixuiʼlú dxi guni Jiobá ni maʼ guníʼ ra cayeeteʼ de «ni za» de gunaa que (Génesis 3:15). Pur nga bizuubabe diidxaʼ neca gúpabe guendanagana. Moisés guníʼ ique lu premiu ni chigudii Dios laa, nga gucané laa gannaxhii Dios ne guzuubaʼ stiidxabe (Hebreos 11:26). Pa laaca guxuíʼlunu dxi guni Dios cani maʼ bidii stiidxaʼ, zannaxhiinu laabe jma ne zaguidxi fe stinu jma. Lu sti tema ca zadúʼyanu sti modo zanda guxuíʼlunu.