Biiyaʼ guiraʼ ni nuu lu sitiu riʼ

guyé lu índice

Ñee ruuyaluʼ Jiobá casi ti binni ni dxandíʼ xhamíguluʼ la?

Ñee ruuyaluʼ Jiobá casi ti binni ni dxandíʼ xhamíguluʼ la?

«Laidxiña gaxha de Dios, ne laa zadxiña gaxha de laatu.» (SANTIAGO 4:8)

1. Xiñee naquiiñeʼ guyúbinu modo gaca xhamígunu Jiobá jma.

LAANU, ca testigu stiʼ Jiobá, nápanu ti cosa nabé risaca. Xhamígunu Jiobá. Naquiiñeʼ guyúbinu modo gaca xhamígunu laabe jma. Xiñee yaʼ. Purtiʼ guidxilayú stiʼ Binidxabaʼ riʼ zanda gucaa laanu gusaana de gaca xhamígunu Jiobá, ne cumu nácanu binni ruchee la? zanda guixélenu de laabe.

2. 1) Tuu nga ti binni ni dxandíʼ xhamíguluʼ. 2) Xi zanda gúninu para gaca xhamígunu Jiobá jma.

2 Ñee ruuyaluʼ Jiobá casi ti binni ni dxandíʼ xhamíguluʼ la? Ñee riuuláʼdxiluʼ gaca xhamíguluʼ laabe jma la? Santiago 4:8 cayabi laanu ximodo gúninu ni: «Laidxiña gaxha de Dios, ne laa zadxiña gaxha de laatu». Racá ridúʼyanu, para ganda gaca xhamíguluʼ Jiobá guirópatu naquiiñeʼ gúnitu xiixa. * Pa guidxíñaluʼ Jiobá la? laaca zadxíñabe lii. Ra jma guidxíñaluʼ Jiobá, jma zaca xhamíguluʼ laabe. Ne zuni sentirluʼ casi Jesús. Laa guníʼ ni «biseenda naa [...] nga dxandí Dios». Ne  laaca guniʼbe: «runebiaʼya laabe» (Juan 7:28, 29). Guidúʼyanu xi naquiiñeʼ gúninu para guidxíñanu Jiobá.

Ximodo rinínenu Jiobá (Biiyaʼ párrafo 3)

3. Ximodo zanda guinínenu Jiobá.

3 Pa racaláʼdxinu guidxíñanu Jiobá, nabé risaca nga guinínenu laa diidxaʼ. Ximodo rúninu nga yaʼ. Quíxhenu ti ejemplu. Pa chupa binni ni xhamígucaʼ nabézacaʼ zitu, xi zanda gúnicaʼ pa racaláʼdxicaʼ guiniʼcaʼ diidxaʼ yaʼ. Zanda gucaacabe mensaje ra nuucabe ne guiníʼcabe pur teléfono. Zacaca nga naquiiñeʼ gúninu para cadi gusaana de gaca xhamígunu Jiobá. Ximodo rinínenu laabe yaʼ. Ora guni orarnu laabe gatigá. Biblia na: «Nezalube bisaanaʼ guiráʼ ni riguu xizaa naa, gudxeʼ laabe guiráʼ guendanagana ni cadideʼ» (Salmo 142:2). Ne Jiobá riquiiñebe Biblia para guiniʼné laanu. Nga runi, para gucaʼdiáganu ni gábibe laanu naquiiñeʼ guidúʼndanu ni gatigá ne guiníʼ íquenu ni cayúʼndanu. Biblia na: «Ne dxandipeʼ zudii Jiobá laatu yuubaʼ casi ora ñácani pan ne zuquiichinabe laatu casi ora ñácani nisa; peru Dios ni jma nanna gusiidiʼ stiluʼ maʼ qué zucachilú, ne zuuyaluʼ Dios ni jma nanna gusiidiʼ stiluʼ. Dxandipeʼ zunadiágaluʼ ti diidxaʼ neza décheluʼ ni gabi lii: “Ndiʼ nga neza ca. Lasá luni”, pa maʼ biree cueʼtu ladu derechu o ladu bigaʼ» (Isaías 30:20, 21). Lu tema riʼ zaziidinu pa cadi gusaana de guinínenu Jiobá la? dxandíʼ zaca xhamígunu laabe.

RIQUIIÑEʼ JIOBÁ BIBLIA PARA GUINIʼNÉ LAANU

4, 5. 1) Ximodo riquiiñeʼ Jiobá Biblia para guiniʼné laanu. 2) Bisiéneni né ti ejemplu.

4 Nánnanu zanda gacané ca conseju ni zeeda lu Biblia guiráʼ binni. Peru laaca zanda gacané ni cada tobi de laanu para chuʼnu gaxha de Dios. Para ganda gacané ni laanu naquiiñeʼ guidúʼyanu xi runi sentirnu laga cadúʼndanu Biblia. Laaca naquiiñeʼ guiníʼ íquenu ximodo zanda gúninu ni ridúʼndanu lu xquendanabáninu. Ora gúninu guiráʼ ndiʼ, casi ñaca niniʼné Jiobá laanu. Ne ora guidúʼyanu racanebe laanu la? jma raca xhamígunu laabe (Hebreos 4:12; Santiago 1:23-25).

5 Quíxhenu ti ejemplu. Lu libru stiʼ Mateo 6:19, 20, guníʼ Jesús ca diidxaʼ riʼ: «Cadi guyubi tu gapa tu stale ni risaca ndaani guidxilayú riʼ». Ca diidxaʼ riʼ rusihuinni cani Jiobá nga binni ni jma risaca para laanu. Xi runi sentirnu ora guidúʼndanu ca diidxaʼ riʼ yaʼ. Pa gusihuínninu  zinándanu conseju riʼ zuni sentirnu cayechené Jiobá laanu. Peru pa gudiʼnu cuenta naquiiñeʼ gúninu jma xhiiñaʼ Jiobá ne cadi gápanu stale cosa risaca yaʼ. Óraca zudiʼnu cuenta cayacané Jiobá laanu guidúʼyanu xi naquiiñeʼ guni cada tobi de laanu para chuʼnu jma gaxha de laabe.

6, 7. 1) Ora ridúʼndanu Biblia, ximodo racané ni laanu gaca xhamígunu Jiobá. 2) Ora ridúʼndanu Biblia, xii nga ni jma naquiiñeʼ guicá íquenu.

6 Dxandíʼ, ora ridúʼndanu Biblia rudiʼnu cuenta xi naquiiñeʼ guchaʼnu lu xquendanabáninu para gúninu xhiiñaʼ Dios jma galán. Peru laaca rudiʼnu cuenta xii nga ca guenda sicarú stibe ne ca cosa ni rúnibe purtiʼ nadxiibe laanu. Ora rizíʼdinu guiráʼ ndiʼ, jma rannaxhiinu laabe. Ne laabe laaca jma rannaxhiibe laanu. Ne zacá jma raca xhamígunu laabe (biindaʼ 1 Corintios 8:3).

7 Pa racaláʼdxinu guidxíñanu Jiobá, naquiiñeʼ guidúʼndanu Biblia. Jesús guníʼ para gápanu ti guendanabani ni qué zaluxe, naquiiñeʼ gunibiáʼ chaahuinu Jiobá (Juan 17:3). Lu Biblia rizíʼdinu stale cosa risaca. Peru cadi nga diʼ nga ni jma ricá íquenu. Ora ridúʼndanu Biblia ni jma ricá íquenu nga gunibiáʼ chaahuinu Jiobá. Biblia na: «Ne yanna, pa riuuláʼdxiluʼ cani runeʼ, rinabaʼ lii guluiʼluʼ naa ca neza stiluʼ, ti ganda gunebiaʼyaʼ lii ti chuuláʼdxiluʼ cani runeʼ. Ne biiyaʼ guidxi riʼ casi xquídxiluʼ» (Éxodo 33:13; Salmo 25:4).

8. 1) Xi zándaca guiníʼ ique tuuxa ora guundaʼ ni biʼniʼ Jiobá rey Azarías. 2) Cumu runibiáʼ chaahuinu Jiobá la? xi nanna dxíchinu yaʼ.

8 Pa ridúʼyanu Jiobá casi ti binni ni dxandíʼ xhamígunu, qué zaníʼ íquenu xiñee nuu biaje qué rusiene Biblia xiixa ni bíʼnibe. Guzéʼtenu ti ejemplu, guiníʼ íquenu historia stiʼ ti rey de Judá láʼ Azarías. Ca dxi biʼniʼ mandarbe biʼniʼ adorar xquídxibe dios ni cadi dxandíʼ. Peru rey riʼ qué ñuni casi laacabe, purtiʼ Biblia na «qué nusaanabe de ñúnibe ni jneza nezalú Jiobá» (2 Reyes 15:1-5). Neca zacá, biʼniʼ castigar Dios laabe né ti guendahuará nabé malu. Xiñee yaʼ. Lu relatu riʼ qué rusiene diʼ Biblia xiñee biʼniʼ castigar Jiobá laabe. Nuu tu zándaca guiníʼ ique cadi jneza biʼniʼ Jiobá ne qué ñapa razón pur biʼniʼ castigar laabe. Peru laanu runibiáʼ chaahuinu Jiobá ne nánnanu qué rusaanabe de gúnibe ni jneza (Jeremías 30:11). Nga runi, neca qué gánnanu xiñee biʼniʼ castigar Dios rey riʼ, nanna dxíchinu bíʼnibe ni jneza.

9. Xiñee biʼniʼ castigar Jiobá rey Azarías.

9 Lu xcaadxi textu stiʼ Biblia ridxélanu ra rieeteʼ jma de rey Azarías, laaca runibiáʼ binni laabe casi Uzías (2 Reyes 15:7, 32). Lu 2 Crónicas 26:3-5, 16-21 na bíʼnibe «ni jneza nezalú Jiobá». Peru laaca rieeteʼ, despué bizulú bidxiibabe laca laabe. Ti dxi gucaláʼdxibe ñúnibe ti cosa ni runi ca sacerdote si. Ti grupu de 81 sacerdote gúdxicaʼ laabe cadi jneza diʼ ni chigúnibe que ne gucaláʼdxicaʼ nucueezacaʼ laabe. Peru cumu rey riʼ guizáʼ bidxiibaʼ laca laa la? bidxiichiné laacabe ne qué nulabi laacabe. Ndiʼ racané laanu guiénenu xiñee biʼniʼ castigar Jiobá laabe.

10. 1) Xiñee cadi naquiiñeʼ gánnanu xiñee runi Jiobá guiráʼ ni runi. 2) Xi zanda gacané laanu guni crenu de guidubi ladxidoʼno qué zusaana Jiobá de guni ni jneza.

10 Historia riʼ rusiidiʼ laanu ti cosa nabé risaca. Lu historia stiʼ rey Azarías rieeteʼ stale cosa ni racané laanu gánnanu xiñee biʼniʼ castigar Dios laabe. Peru ndaaniʼ Biblia zeeda stale historia ra qué rieeteʼ xipeʼ guca. Ora ridúʼndanu cani, ñee zaníʼ íquenu pa biʼniʼ Jiobá ni  jneza la? o zaníʼ íquenu qué rusaana Jiobá de guni ni jneza (Deuteronomio 32:4). Lu Biblia zeeda stale cosa ni zanda gacané laanu gunibiáʼ chaahuinu Jiobá ne gápanu confianza laa. Pa gunibiaʼnu laabe ne gannaxhiinu laabe, qué zacá íquenu gánnanu xiñee rúnibe guiráʼ ni zeeda lu ca historia ca. Peru, xi zanda gacané laanu guni crenu de guidubi ladxidoʼno qué zusaana Dios de guni ni jneza yaʼ. Ra guidúʼndanu Biblia. Zacá zápanu Jiobá casi ti binni ni dxandíʼ xhamígunu (Salmo 77:12, 13).

RINÍNENU JIOBÁ ORA RUNI ORARNU LAA

11-13. Xiñee nánnanu rucaadiaga Dios laanu ora runi orarnu yaʼ. (Biiyaʼ dibuju ni zeeda ra ruzulú tema riʼ.)

11 Ora runi orarnu, rusisácanu Dios, rudiʼnu xquíxepeʼ laabe ne rinábanu gacanebe laanu. Zacá riuʼnu jma gaxha de laabe (Salmo 32:8). Peru pa racaláʼdxinu gaca xhamigu Jiobá laanu, naquiiñeʼ chuʼnu seguru rucaadiágabe laanu ora runi orarnu laabe.

12 Nuu tu na qué rucaadiaga Dios oración stinu. Nácabe riquiiñeʼ ca oración ca para si guni sentirnu galán. Riníʼcabe racané ca oración ca laanu guiníʼ íquenu ca guendanagana stinu ne guidxélanu modo guni chaahuinu cani. Dxandíʼ zanda gacané ca oración ca laanu zacá. Peru ora runi orarnu Jiobá, dxandíʼ rucaadiágabe laanu. Xiñee nánnanu ni yaʼ.

13 Guiníʼ íquenu ni biʼniʼ Jesús. Ante gueedabe lu Guidxilayú riʼ, biiyabe ximodo ricabi Jiobá ca oración ni runi binni laa. Ne ora guyuube lu Guidxilayú riʼ, biʼniʼ orarbe Dios ne gúdxibe laa xi riníʼ íquebe ne xi runi sentirbe. Ti biaje biʼniʼ orarbe Dios guidubi gueelaʼ (Lucas 6:12; 22:40-46). Ne laaca bisiidibe ca discípulo stibe guni orarcaʼ. Ñee ñuni Jesús guiráʼ ndiʼ pa ñanna qué rucaadiaga Jiobá ca oración ca la? Coʼ njaʼ. Rihuinni dxíchica nánnabe rucaadiaga Dios ca oración ca. Nga runi gúdxibe laa: «Rudiee diuxquixe lii, Bixhozeʼ, purti bicaa diaʼgu naa. Qué riaana dxiu de ucaa diaʼgu naa» (Juan 11:41, 42). Laanu laaca nanna dxíchinu rucaadiaga Jiobá ca oración stinu (Salmo 65:2).

14, 15. 1) Xiñee naquiiñeʼ gábinu Jiobá xipeʼ nga ca cosa ni naguu xizaa laanu. 2) Ximodo gucané ca oración ni biʼniʼ ti hermana laa.

 14 Zándaca ziuu biaje qué zudiʼnu cuenta modo ricabi Jiobá ca oración stinu. Peru pa gábinu laabe xipeʼ naguu xizaa laanu, zanda guidúʼyanu ximodo zacábibe laanu. Zacá jma zaca xhamígunu laabe. Pa de guidubi ladxidoʼno gábinu laabe guiráʼ ni naguu xizaa laanu, ziuube jma gaxha de laanu.

15 Guidúʼyanu ejemplu stiʼ ti hermana láʼ Carmen. * Laabe nabe ante gaca jubilarbe rigucheechebe diidxaʼ, peru qué riuuláʼdxibe gúnibe ni. Dxi guca jubilarbe, guluu ti binnigola gana laabe para gácabe precursora regular. Bíʼnibe ni gudxi binnigola que laabe. Sicaríʼ guniʼbe: «Yenandaʼ conseju que, peru guiráʼ dxi gunabaʼ Jiobá gacané naa chuuladxeʼ gucheecheʼ diidxaʼ». Ñee bicaadiaga Dios ca oración stibe la? Yanna maʼ ziné Carmen chonna iza de naca precursora. Cumu nabé rucheechebe diidxaʼ ne racané xcaadxi hermana laabe la? yanna jma galán modo rucheechebe diidxaʼ. ¡Yanna maʼ riuuláʼdxibe gucheechebe diidxaʼ! Peru laabe guniʼbe xii nga ni jma risaca para laabe: «Yanna nga jma xhamiguaʼ Jiobá». Racá ridúʼyanu, gucané ca oración ni biʼniʼ hermana riʼ laa para beeda gaca xhamiga Jiobá.

GÚNINU NI NUU LU NANU

16, 17. 1) Xi naquiiñeʼ gúninu para gaca xhamígunu Jiobá jma. 2) Xi zadúʼyanu lu sti tema ca.

16 Zanda guidxíñanu Jiobá ne cadi gusaananu laa. Nga runi cadi gusaana de gucaʼdiáganu laabe ra guidúʼndanu Biblia guiráʼ dxi, ne cadi gusaana de guni orarnu laabe. Pa gúninu ni, ra tiidiʼ dxi jma zaca xhamígunu Dios. Ne zacanebe laanu guni huantarnu ca guendanagana stinu.

Cadi gusaana de guidxíñanu Jiobá (Biiyaʼ párrafo 16 ne 17)

17 Dxandíʼ, neca qué gusaana de guni orarnu Jiobá, zándaca zápanu guendanagana. Ne óraque zándaca gusaana de gápanu confianza laabe. Zándaca guiníʼ íquenu qué rucaadiágabe ca oración stinu ne guiníʼ íquenu pa xhamígurunu laabe. Pa zacá runi sentirnu, xi zanda gúninu yaʼ. Zadúʼyanu ni lu sti tema ca.

^ párrafo 2 Ora dxandíʼ xhamigu chupa binni nadxiicaʼ ne nápacaʼ confianza laacaʼ. Para cadi gusaana de gaca xhamígucabe, guirópacabe naquiiñeʼ gúnicabe stipa pur gaca xhamígucabe jma.

^ párrafo 15 Bidxaa labe.